Mɛni Ofeɔ yɛ Shikpilikpii ni Afeɔ lɛ He?
1 Shikpilikpiifeemɔ ji henumɔ ni abɛ, nɔ ko he suɔmɔ loo miishɛɛ ni abɛ. Eji sui ni afɔɔ namɔ kɛ sui ni wa waa lɛ ateŋ ekome ni wɔkɛkpeɔ yɛ shiɛmɔ nitsumɔ lɛ mli. Te ofeɔ onii yɛ he ohaa tɛŋŋ? Ani no eha oba oshiɛmɔ nitsumɔ lɛ shi? Mɛɛ gbɛ nɔ obaanyɛ oye nɔ kunim yɛ, bɔni afee ni okɛ Maŋtsɛyeli shɛɛ sane lɛ ashɛ gbɔmɛi lɛ aŋɔɔ?
2 Klɛŋklɛŋ lɛ, taomɔ nɔ hewɔ ni mɛi ni yɔɔ oshikpɔŋkuku lɛ mli lɛ feɔ shikpilikpii lɛ. Ani akɛni amɛ maŋkwramɔŋ kɛ sɔlemɔ mli hiɛnyiɛlɔi lɛ eha amɛnijiaŋ eje wui lɛ hewɔ? Ani amɛsusuɔ akɛ tsabaa ko bɛ kɛha naagbai ni amɛkɛkpeɔ lɛ? Ani amɛyiŋ miifee amɛ kɔshikɔshi yɛ nɔ kpakpa ko he shiwoi ahewɔ? Ani amɛsumɔɔɔ akɛ amɛsusuɔ mumɔŋ saji ahe, akɛ ja amɛbaanyɛ amɛyoo sɛɛnamɔi kpakpai komɛi amrɔ nɔŋŋ dã?
3 Maa Maŋtsɛyeli Hiɛnɔkamɔ lɛ Nɔ Mi: Naagba ko bɛ ni Maŋtsɛyeli lɛ naŋ enaa tsabaa. No hewɔ lɛ, kɛ eeehi lɛ, esa akɛ wɔwie Maŋtsɛyeli lɛ he shiwoi lɛ ahe, ni wɔtsɛ Ŋmalɛ mli wiemɔi otii ayisɛɛ, kɛji akɛ wɔnyɛɛɛ wɔtsɔɔ Biblia mli ŋmalɛ lɛ po. (Heb. 4:12) Ni kɛlɛ, mɛɛ gbɛ nɔ wɔɔtsɔ wɔwie nakai sane oti lɛ he yɛ?
4 Ehe miihia ni gbɔmɛi lɛ ale yiŋtoo hewɔ ni wɔbaa amɛŋɔɔ lɛ. Esa akɛ amɛyoo akɛ wɔbaa jɛmɛ yɛ naanyo suɔmɔ ni wɔyɔɔ kɛ bɔ ni wɔsusuɔ akutsoŋbii lɛ ahe lɛ hewɔ. Wɔbaanyɛ wɔbi sane ni wɔsusu he jogbaŋŋ tamɔ, “Mɛni osusuɔ akɛ no ji tsabaa kɛha [naagba ni saa akutsoŋbii lɛ ahe]?” lɛ. Kɛ gbɛ kome ehiii lɛ, kaa ekroko okwɛ.
5 Yɛ shikpɔŋkuku ko ni niiatsɛmɛi yɔɔ mli, ní shiatsɛmɛi lɛ booo Maŋtsɛyeli shɛɛ sane lɛ toi lɛ mli lɛ, shiɛlɔi lɛ bɔ mɔdɛŋ koni amɛná hiɛkpamɔ wiemɔ ko ni baatee amɛmiishɛɛ shi. Beni amɛkɛ Nilee wolo lɛ haa lɛ, gbalashihilɛ mli hefatalɔi enyɔ ko ka hiɛkpamɔ wiemɔ nɛɛ amɛkwɛ: “Ani osusuɔ akɛ wolo-kasemɔ kpakpa he miihia kɛha omanyeyeli yɛ je lɛ mli ŋmɛnɛ? Ani okpɛlɛɔ nɔ akɛ nilee ni yɔɔ Biblia lɛ mli lɛ fata wolo-kasemɔ ni shishinumɔ yɔɔ he lɛ he?” Yɛ shwane kome mli lɛ amɛha woji wuji etɛ, ni amɛteŋ ekome ji nɔ ni yɔɔ yoo ko ni wie yɛ sɛɛ mli akɛ, ekane Nilee wolo lɛ fɛɛ ni ekpɛlɛ koni akɛ lɛ afee Biblia mli nikasemɔ lɛ ŋɔɔ.
6 Kɛ okɛ shikpilikpiifeemɔ kpe lɛ, kaa gbɛ̀i sɔrɔtoi okwɛ, bi saji ni kanyaa niiahesusumɔ, ni okɛ Nyɔŋmɔ Wiemɔ lɛ mli hewalɛ lɛ atsu nii. Kɛkɛ lɛ, obaanyɛ oye obua mɛi krokomɛi koni amɛbamɔ wɔ Maŋtsɛyeli hiɛnɔkamɔ ni yɔɔ naakpɛɛ lɛ mli.