“Mibɛ He Miishɛɛ”
1 Yɛ hei komɛi lɛ, enɛ ji nɔ ni mɛi pii kɛjieɔ amɛnaa yɛ wɔshɛɛ sane lɛ he. Kɛ́ mɛi ni yɔɔ wɔshikpɔŋkuku lɛ mli sumɔɔɔ ni amɛboɔ wiemɔ lɛ toi lɛ, mɛni baaye abua wɔ koni wɔnijiaŋ akaje wui? Mɛɛ gbɛ nɔ wɔɔtsɔ wɔtee mɛi amiishɛɛ shi yɛ sanekpakpa lɛ he?
2 Hiɛmɔ Miishɛɛ ni Oyɔɔ lɛ Mli: Kɛ́ wɔkai nɔ hewɔ ni mɛi pii sumɔɔɔ ni amɛboɔ wiemɔ lɛ toi lɛ, ebaaye ebua wɔ koni wɔhiɛ miishɛɛ ni wɔyɔɔ lɛ mli. Ekolɛ mɛi ni ekase sutsakemɔ he nii loo mɛi ni atsɔse amɛ yɛ maŋ ni emli bii lɛ heee yeee akɛ Nyɔŋmɔ yɛ lɛ lé sɛɛnamɔ ni yɔɔ Biblia lɛ he. Ekolɛ osatofeemɔ ni yaa nɔ yɛ jamɔi amli lɛ eha mɛi komɛi bɛ hekɛnɔfɔɔ dɔŋŋ yɛ jamɔ mli. Yɛ mɛi krokomɛi agbɛfaŋ lɛ, ekolɛ hiɛnɔkamɔ ni amɛbɛ kɛ amɛnijiaŋ ni eje wui lɛ ni haa amɛkpooɔ akɛ amɛaabo wiemɔ lɛ toi lɛ. (Efe. 2:12) Mɛi komɛi hu haaa ‘amɛhiɛ ahi’ wiemɔ lɛ nɔ ejaakɛ shihilɛ mli naagbai ehe amɛtsuii.—Mat. 24:37-39.
3 Yɛ wiemɔ lɛ ni mɛi komɛi kpooɔ akɛ amɛaabo toi lɛ fɛɛ sɛɛ lɛ, wɔbaanyɛ wɔná miishɛɛ yɛ sɔɔmɔ nitsumɔ lɛ mli, ejaakɛ wɔle akɛ wɔmɔdɛŋbɔi lɛ woɔ Yehowa hiɛ nyam. (1 Pet. 4:11) Kɛfata he lɛ, anɔkwale lɛ he sane ni wɔkɛ mɛi gbaa, ni mɛi po ni amrɔ nɛɛ amɛnaaa sɛɛnamɔ ni yɔɔ he lɛ fata he lɛ, wajeɔ wɔhemɔkɛyeli lɛ. Nyɛhaa wɔbɔa mɔdɛŋ ni wɔbua mɛi ni yɔɔ wɔshikpɔŋkuku lɛ mli lɛ tamɔ bɔ ni Yehowa buɔ amɛ lɛ. Ninivebii ni “leee amɛninejurɔ kɛ amɛbɛku” lɛ asane dɔ Yehowa waa. (Yona 4:11) Sanekpakpa lɛ he miihia mɛi ni yɔɔ wɔshikpɔŋkuku lɛ mli lɛ! No hewɔ lɛ, esaaa akɛ wɔnijiaŋ jeɔ wui, shi moŋ esa akɛ wɔtao gbɛ̀i anɔ ni wɔɔtsɔ wɔha amɛná Biblia lɛ mli shɛɛ sane lɛ he miishɛɛ.
4 Wiemɔ Okutso Lɛŋ Naagbai Ahe: Ekolɛ obaanyɛ otsĩ naagba ko ni miiya nɔ yɛ nyɛkutso lɛ mli lɛ tã yɛ ohiɛkpamɔ wiemɔ lɛ mli, ni obi shiatsɛ lɛ koni lɛ hu etsɔɔ ejwɛŋmɔ yɛ he. Kɛ́ eetsɔɔ ejwɛŋmɔ lɛ, bo lɛ toi koni no sɛɛ lɛ otsɔɔ lɛ Biblia lɛ mli shɛɛ sane ni shɛjeɔ mɔ mii ni wieɔ enaagbai lɛ ahe lɛ. Beni oshara ko ba yɛ akutso ko mli lɛ, Odasefonyo ko ha mɛi ni eshiɛɔ etsɔɔ amɛ yɛ shĩa kɛ shĩa lɛ le akɛ nɔ ni eba lɛ edɔ lɛ waa. Shiɛlɔ nɛɛ kɛɛ akɛ: “Amrɔ nɔŋŋ ni gbɔmɛi lɛ bɔi wiemɔ. . . . Miná mɛi mikɛ amɛ gba sane jogbaŋŋ nakai gbi lɛ, ejaakɛ mitsɔɔ akɛ misusuɔ amɛ shihilɛ he.”
5 Nyɔŋmɔ Maŋtsɛyeli lɛ baajie naagbai fɛɛ ni adesai kɛkpeɔ lɛ kɛya. Bɔɔ mɔdɛŋ ni oyɔse naagbai nɛɛ ateŋ nɔ ni haoɔ shiatsɛ lɛ waa lɛ. Ekolɛ ebaaŋmɛ bo gbɛ koni ogbala Biblia lɛ mli shɛɛ sane ni haa mɔ náa hiɛnɔkamɔ lɛ mli otsɔɔ lɛ. Kɛ́ efeee nakai po lɛ, ekolɛ ebaasumɔ ni ebo bo toi ‘be kroko.’—Bɔf. 17:32.