Oblahii kɛ Oblayei ni Tsoɔ Tamɔ Kanei
1. Biblia lɛ tsɔɔ akɛ abaayɔse Kristofoi akɛ mɛi ni yɔɔ srɔto yɛ mɛɛ gbɛ nɔ, ni te nakai wiemɔi lɛ kɔɔ Kristofoi oblahii kɛ oblayei ahe ehaa tɛŋŋ ŋmɛnɛ lɛ?
1 Yesu kɛɛ ekaselɔi lɛ akɛ: “Nyɛ ji je lɛŋ la lɛ.” (Mat. 5:14, 16) Mɛi fɛɛ baayɔse amɛ akɛ amɛyɛ srɔto, taakɛ ayɔseɔ maŋ ni ato yɛ gɔŋ ko yiteŋ, ní kpɛlɛɔ kɛ́ hulu je lɛ. Ŋmɛnɛ, Kristofoi oblahii kɛ oblayei babaoo ‘miitso tamɔ kanei yɛ je nɛŋ’ kɛtsɔ amɛjeŋba ni he tse kɛ ekãa ni amɛkɛyeɔ odase lɛ nɔ.—Fil. 2:15; Mal. 3:18.
2. Mɛɛ gbɛ̀i komɛi anɔ obaanyɛ otsɔ oye otsɔɔlɔi kɛ onanemɛi skulbii lɛ odase?
2 Yɛ Skul: Mɛɛ gbɛ nɔ obaanyɛ otsɔ oye odase yɛ skul? Oblahii kɛ oblayei komɛi etsɔ saji ni asusuɔ he yɛ skul, tamɔ tsofai ni akɛtsuɔ nii yɛ gbɛ fɔŋ nɔ, sutsakemɔ, kɛ gbijurɔyelii anɔ amɛye odase. Nyɛmiyoo ko tsɔ sane ni abi ni amɛŋma yɛ skul, ní kɔɔ awuiyeli ni akɛtutuaa mɛi he lɛ nɔ eye Nyɔŋmɔ Maŋtsɛyeli lɛ he odase ákɛ no ji adesai ahiɛnɔkamɔ pɛ ni hi. Etsɔɔlɔ lɛ hiɛ sɔ nɔ ni eŋma ni jwɛŋmɔ yɔɔ mli waa lɛ diɛŋtsɛ, ni enɛ ha ená hegbɛi krokomɛi kɛye odase.
3. Obaanyɛ otsɔ ojeŋba nɔ oha okane lɛ atso yɛ skul yɛ mɛɛ gbɛ nɔ?
3 Gbɛ kroko ni obaanyɛ otsɔ nɔ oha okane lɛ atso ji ojeŋba, ohesaamɔ kɛ otadewoo ni yɔɔ hiŋmɛi nɔ lɛ. (1 Kor. 4:9; 1 Tim. 2:9) Kɛ skulbii kɛ tsɔɔlɔi na akɛ esoro onifeemɔ lɛ, ekolɛ ojeŋba kpakpa lɛ baaha amɛteaŋ mɛi komɛi aná anɔkwale lɛ he miishɛɛ, ni ebaaha oná hegbɛ ni okɛ amɛ agba Biblia mli anɔkwalei lɛ ahe sane. (1 Pet. 2:12; 3:1, 2) Ekolɛ efeŋ mlɛo kɛhaŋ bo akɛ ooojie jeŋba kpakpa kpo, shi kɛ ofee nakai lɛ Yehowa baajɔɔ bo babaoo. (1 Pet. 3:16, 17; 4:14) Kɛ́ ootao oha mɛi aná sanekpakpa lɛ he miishɛɛ lɛ, obaanyɛ okane Biblia kasemɔ woji komɛi beni nyɛtee hejɔɔmɔ, loo obaanyɛ oshi woji nɛɛ yɛ hei ni mɛi baana.
4. Mɛɛ sɛɛnamɔi yɔɔ odase ni ayeɔ yɛ skul lɛ he?
4 Okane lɛ ni oooha etso yɛ skul lɛ baawaje ohemɔkɛyeli lɛ, ni ebaaye ebua bo ní onyɛ okɛ Yehowa sɔɔlɔ ni oji lɛ ashi otsitsi. (Yer. 9:24) Ebaabu ohe hu. Nyɛmiyoo ko kɛɛ akɛ, “Sɛɛnamɔi ni jɛɔ mihemɔkɛyeli lɛ he sane ni mikɛ skulbii lɛ gbaa lɛ mli kɛbaa lɛ ateŋ ekome ji akɛ, ehaaa skulbii lɛ kɛ nibii gbohii ni kɛ nɔ ni Biblia lɛ kɛɔ lɛ kpaaa gbee lɛ agbá minaa.”
5. (a) Yɛ mɛɛ gbɛ nɔ oblahii kɛ oblayei komɛi lɛɛɔ amɛsɔɔmɔ nitsumɔ lɛ mli? (b) Mɛɛ mumɔŋ otii okɛmamɔ ohiɛ?
5 Sɔɔmɔ Nitsumɔ lɛ Mlilɛɛmɔ: Gbɛ kroko ni oblahii kɛ oblayei haa amɛkanei lɛ tsoɔ ji kɛtsɔ amɛsɔɔmɔ nitsumɔ lɛ mli ni amɛlɛɛɔ lɛ nɔ. Beni nyɛminuu ko gbe nɔtsamɔ skul naa lɛ, etee eyasɔmɔ yɛ he ko ni Maŋtsɛyeli jajelɔi ahe hiaa waa yɛ jɛmɛ lɛ. Ekɛ asafo bibioo ko ni onukpa kome pɛ yɔɔ mli lɛ yabɔ. Eŋma kɛyaha enaanyo ko akɛ: “Miishɛɛ ni mináa yɛ biɛ lɛ nɔ bɛ. Shiɛmɔ yɛ biɛ yɛ miishɛɛ waa! Wɔyeɔ aaafee minitii 20 yɛ shinaa fɛɛ shinaa naa, ejaakɛ mɛi lɛ miisumɔ ni amɛbo nibii fɛɛ ni wɔyɔɔ amɛ kɛɛmɔ lɛ toi.” Ekɛfata he akɛ: “Miná ni kulɛ oblahii kɛ oblayei fɛɛ baakpɛ amɛyiŋ tamɔ nɛkɛ koni amɛná miishɛɛ ni mináa lɛ eko.” Nɔ ko bɛ ni hi fe ákɛ wɔkɛ wɔnii fɛɛ aaasɔmɔ Yehowa.
6. Mɛni onáa he miishɛɛ yɛ oblahii kɛ oblayei ni yɔɔ nyɛsafo lɛ mli lɛ ahe?
6 Oblahii kɛ oblayei, wɔyɛ he miishɛɛ waa akɛ nyɛmiitso tamɔ kanei yɛ je nɛɛ mli! (1 Tes. 2:20) Kɛ nyɛkɛ nyɛtsui, nyɛsusuma, nyɛjwɛŋmɔ, kɛ nyɛhewalɛ fɛɛ sɔmɔ Yehowa lɛ, nyɛbaakpa ‘toi oha yɛ benɛ be nɛɛ mli beebe, ni jeŋ ni baaba lɛŋ hu nyɛbaaná naanɔ wala.’—Mar. 10:29, 30; 12:30.