Esa akɛ Wɔya Amɛŋɔɔ Shii Abɔ
1 Beni akɛ bo wie sanekpakpa lɛ he klɛŋklɛŋ lɛ, ani obo toi? Kɛ́ jeee nakai lɛ, no lɛ esa akɛ oda Yehowa Odasefoi ni ba oŋɔɔ shii abɔ kɛyashi naagbee lɛ okpɛlɛ Biblia mli nikasemɔ nɔ lɛ ashi. Ehi akɛ osusu he nakai beni otsuɔ shikpɔŋkuku ni akɛha bo lɛ mli nii shii abɔ lɛ.
2 Gbɔmɛi ashihilɛi tsakeɔ daa gbi. Amɛkɛ naagbai loo shihilɛi heei kpeɔ, amɛnuɔ nifeemɔi ni haoɔ mɔ he yɛ akutso lɛ loo je lɛ mli, amɛkɛ shika gbɛfaŋ naagbai kpeɔ, loo hela mɔɔ amɛ loo amɛweku mlinyo ko gboɔ. Ekolɛ nibii ni tamɔ nakai baaha amɛsumɔ ni amɛle nɔ hewɔ ni haomɔi nɛɛ baa. Esa akɛ wɔyɔse nibii ni naa gbɔmɛi ajwɛŋmɔi anɔ hewalɛ lɛ koni agbɛnɛ wɔkɛ miishɛjemɔ shɛɛ sane aha.
3 Yibaamɔ Nitsumɔ Nɛ: Feemɔ yibaamɔ nitsulɔi ni yɔɔ oshara heko he mfoniri okwɛ. Eyɛ mli akɛ ekolɛ, mɛi komɛi baakwɛ he ni anaa mɛi fioo ko ni yɔɔ wala mli yɛ moŋ, shi amɛbaaa nitsumɔ lɛ shi loo ni amɛkpa yɛ amɛnanemɛi nitsulɔi ni miina mɛi babaoo ni yɔɔ wala mli yɛ he kroko lɛ hewɔ. Wɔyibaamɔ nitsumɔ lɛ bako naagbee. Daa afi lɛ, anáa akpekpei ohai abɔ ni miisumɔ ni amɛfo “amanehulu kpeteŋkpele lɛ.”—Kpoj. 7:9, 14.
4 “Mɔ fɛɛ mɔ ni aaabo atsɛ Yehowa gbɛi lɛ, aaahere eyiwala.” (Rom. 10:13-15, NW) Esa akɛ nɛkɛ wiemɔi nɛɛ aha wɔteŋ mɔ fɛɛ mɔ ana bɔ ni ehe hiaa akɛ wɔya nɔ daa yɛ shiɛmɔ nitsumɔ lɛ mli. Kɛjɛ be mli ni aje wɔshikpɔŋkuku lɛ mli nitsumɔ shishi klɛŋklɛŋ kwraa kɛbaa nɛɛ, gbekɛbii edara yɛ mli, ni amrɔ nɛɛ amɛdara bɔ ni amɛbaanyɛ amɛkɛ hiɛdɔɔ asusu amɛ diɛŋtsɛ amɛwɔsɛɛ be kɛ yiŋtoo ni yɔɔ shihilɛ he lɛ he. Wɔnyɛŋ wɔle mɔ ni baabo toi yɛ naagbee mli. (Jaj. 11:6) Tsutsu shitee-kɛ-wolɔi babaoo ekpɛlɛ anɔkwale lɛ nɔ. Wɔnitsumɔ lɛ jeee ni wɔkojo gbɔmɛi, shi moŋ wɔya nɔ ni wɔha amɛ hegbɛ koni amɛnu ní abaa amɛyi kɛjɛ nɛkɛ jeŋ momo nɛɛ mli. Taakɛ Yesu mra be mli kaselɔi lɛ fee lɛ, esa akɛ ‘wɔya’ gbɔmɛi lɛ aŋɔɔ ‘daa’ koni wɔbɔ mɔdɛŋ ni wɔkanya miishɛɛ ni amɛyɔɔ yɛ Maŋtsɛyeli shɛɛ sane lɛ he lɛ.—Mat. 10:6, 7.
5 Anɔkwale ni eji akɛ, hegbɛ yɛ lolo ni wɔkɛaashiɛ lɛ ji Yehowa mɔbɔnalɛ lɛ kpojiemɔ. (2 Pet. 3:9) Yɛ be mli ni wɔŋmɛɔ mɛi krokomɛi agbɛ ni amɛnu shɛɛ sane lɛ shii abɔ lɛ, belɛ wɔmiima Nyɔŋmɔ suɔmɔ lɛ nɔ mi, ni wɔjieɔ eyi kɛtsɔ nɛkɛ gbɛ nɔ.