Tsɔ Hiɛ ni Oto Gbɛjianɔ!
1 Yehowa gbɛjianɔtoo lɛ kɛ teokrase nitsumɔi ahe gbɛjianɔtoo ni haa wɔnine shɛɔ nibii fɛɛ ni he hiaa wɔ yɛ mumɔŋ lɛ haa wɔ daa gbi. Hiɛsɔɔ ni wɔyɔɔ lɛ tsirɛɔ wɔ koni wɔná nibii fɛɛ ni ato amɛhe gbɛjianɔ lɛ he sɛɛ kɛmɔ shi, tamɔ nɔkwɛlɔ gbɛfalɔi asaramɔi lɛ, kpeei bibii kɛ kpeei wuji, kɛ nitsumɔi krɛdɛɛi komɛi ni atoɔ amɛhe gbɛjianɔ yɛ he ni nyɛyɔɔ lɛ. (Mat. 5:3) Shi kɛlɛ, yɛ gbɛjianɔi krokomɛi ni mɛi komɛi eto lɛ ahewɔ lɛ, amɛnaaa nɛkɛ mumɔŋ nibii nɛɛ pii ahe sɛɛ. Mɛni abaanyɛ afee koni akɛtsĩ enɛ naa? Te wɔɔfee tɛŋŋ wɔkwɛ jogbaŋŋ koni nitsumɔi ni jeee teokrase nɔ̃ lɛ akatsĩ “nibii ni he hiaa titri” lɛ naa?—Fil. 1:10.
2 Gbɛjianɔtoo yɛ Nilee Mli He Miihia: Abɛi 21:5 lɛ woɔ ŋaa akɛ: “Mɔdɛŋbɔlɔ jwɛŋmɔi lɛ, nifalɛ sɔŋŋ ekɛbaa; shi mɔ fɛɛ mɔ ni feɔ shɛii lɛ, enɔ lɛ ohia kɛkɛ ni.” Bɔni afee ni ‘wɔná nii’ yɛ mumɔŋ lɛ, ehe miihia ni wɔkɛ mɔdɛŋbɔɔ atsɔ hiɛ wɔto gbɛjianɔ, koni yɛ nakai beaŋ nɔŋŋ lɛ wɔha teokrase nitsumɔi ni ato amɛhe gbɛjianɔ lɛ ahi wɔjwɛŋmɔ mli. Esa akɛ wɔto wɔ diɛŋtsɛ wɔnitsumɔi ahe gbɛjianɔ yɛ be mli ni egbaŋ mumɔŋ jɔɔmɔi ni wɔbaaná lɛ naa. Kɛ wɔkɛ oyaiyeli to gbɛjianɔ koni wɔfee nibii ni wɔsumɔɔ ni wɔfee, ni wɔsusuuu teokrase nibii ni kã wɔhiɛ ni abaatsu lɛ ahe lɛ, no lɛ eka shi faŋŋ akɛ, wɔbaaye “ohia” yɛ mumɔŋ.
3 Kaaha Eho Ohe! Wɔteŋ mɔ fɛɛ mɔ toɔ gbɛjianɔ kɛha wɔsɛɛ shihilɛ, ni nɔ ni fata he ji hejɔɔmɔ gbii, nitsumɔ mli gbɛfaai, wekumɛi asaramɔ kɛ ekrokomɛi ni fata he. Dani oookpɛlɛ aloo ooomu ogbɛjianɔtoi anaa kɛha amɛhe nitsumɔi lɛ, kwɛmɔ gbɛjianɔi ni ato kɛha mumɔŋ nibii ni kã ohiɛ ní abaatsu he nii lɛ mli. Kɛ ona akɛ kpokpaa nɔkwɛlɔ lɛ miiba, aloo ákɛ abaaya kpokpaa nɔ kpee ko, ní yɛ nakai beaŋ lɛ obɛ lɛ, no lɛ bɔɔ mɔdɛŋ ni osaa oto oshihilɛ he gbɛjianɔ ekoŋŋ bɔni afee ni onyɛ okɛ ohe awo mli. Atsɔɔ hiɛ kwraa atswaa wɔ adafi yɛ nibii ni he hiaa titri ni kã wɔhiɛ ni ato amɛhe gbɛjianɔ lɛ he. Nyɛ asafo lɛ mli onukpai lɛ baanyɛ atsɔɔ nyɛ gbɛjianɔ ni ato aha nyɛ asafo lɛ.
4 Kɛ wɔkwɛɔ nii kɛyaa shɔŋŋ, ni wɔtsɔɔ hiɛ wɔtoɔ nibii ni he hiaa titri lɛ ahe gbɛjianɔ lɛ, no lɛ, ‘jalɛ yibii baayimɔ wɔ obɔbɔ aha Nyɔŋmɔ anunyam kɛ yijiemɔ.’—Fil. 1:11.