Namɔ Baanyɛ Akpɛlɛ Biblia Mli Nikasemɔ Nɔ?

¹ Gbalɔ Amos gba akɛ hɔmɔ ko baaba yɛ Israel shikpɔŋ lɛ nɔ, “jeee aboloo hɔmɔ loo nu kumai ni, shi Yehowa wiemɔi lɛ atoiboo nɔ̃ ni!” (Amos 8:11) Bɔni afee ni mɛi ni mumɔŋ hɔmɔ kɛ mumɔŋ kumai yeɔ amɛ lɛ aná he sɛɛ lɛ, Yehowa gbɛjianɔtoo lɛ miijara Biblia he woji babaoo diɛŋtsɛ yɛ jeŋ fɛɛ.

² Kɛbashi amrɔ nɛɛ, wɔkala Nilee wolo lɛ akpekpei 70 kɛ Taoɔ woji bibii lɛ akpekpei 91. Wɔhiɛ sɔɔ bɔ ni woji nɛɛ amli wiemɔi waaa ni amɛmɔɔ shi jogbaŋŋ yɛ anɔkwale lɛ tsɔɔmɔ mli lɛ waa. Shi kɛlɛ, wɔkɛ gbɔmɛi babaoo diɛŋtsɛ ni nine eshɛ wɔwoji lɛ anɔ lɛ bɔiko Biblia lɛ kasemɔ lolo. Mɛni wɔbaanyɛ wɔfee yɛ enɛ he?

³ Wolo Fɛɛ Wolo ni Akɛbaaha lɛ Tsɔɔ akɛ Ebaanyɛ Eha Aje Nikasemɔ Shishi! Susumɔ shiɛlɔ ko ni kɛ hegbɛ ha koni ekɛ yoo ko akase nii beni ekɛ lɛ wie klɛŋklɛŋ kwraa yɛ shinaa naa lɛ niiashikpamɔ he okwɛ. Ekpɛlɛ nɔ amrɔ nɔŋŋ. Sɛɛ mli lɛ ekɛɛ shiɛlɔ lɛ akɛ, “Bo ji klɛŋklɛŋ mɔ ni ekɛɛ akɛ obaasumɔ ni okɛ mi akase Biblia lɛ.” Mɛi enyiɛ yɔɔ nyɛshikpɔŋkuku lɛ mli ni yɔɔ wɔwoji lɛ eko momo ni amɛbaanyɛ amɛkɛɛ nakai nɔŋŋ? Wolo fɛɛ wolo ni akɛhaa lɛ kɛ hegbɛ haa koni afee sɛɛsaramɔi kɛ shia Biblia mli nikasemɔ.

⁴ Akɛni bei pii lɛ wɔkɛ mɛi ni yɔɔ wɔwoji lɛ eko momo lɛ kpeɔ hewɔ lɛ, te wɔbaafee tɛŋŋ wɔtee amɛ miishɛɛ shi koni amɛkase saji ni yɔɔ wɔwoji lɛ amli lɛ? Odasefonyo ko bi shiatsɛ ko tɛ̃ɛ kɛ́ eyɛ Biblia mli sanebimɔi komɛi, ni nɔ ni ekɛɛ nɔŋŋ ji “Dabi.” Nyɛmiyoo lɛ tee nɔ lolo ni ekɛɛ akɛ, “Ekã shi faŋŋ akɛ oyɛ eko.” Yoo lɛ bi saji, ni aje nikasemɔ shishi. Mɛni hewɔ obiii shiatsɛ lɛ kɛ́ ebaasumɔ ni ekase nɔ ni Biblia lɛ kɛɔ yɛ sanebimɔ ko loo sane ko ni kɔɔ ehe lɛ he? Saamɔ ohe koni obi lɛ sane ko ni ebaaná he miishɛɛ kɛ́ enyɛŋ ekai eko. Sanegbaai ni tamɔ nɛkɛ baanyɛ agbele gbɛ kɛha Biblia mli shishijee anɔkwalei lɛ akasemɔ daa.

⁵ Biblia lɛ kasemɔ ji nɔ̃ titri ni kɔɔ wɔsɔɔmɔ nitsumɔ lɛ he. Akɛni wɔnyɛŋ wɔle mɔ ni baanyɛ akpɛlɛ nikasemɔ nɔ hewɔ lɛ, kaashashao shi akɛ okɛ hegbɛ aaaha mɔ fɛɛ mɔ ni okɛkpeɔ lɛ akɛ okɛ lɛ baakase nii. Okɛ sane lɛ afɔ̃ Yehowa hiɛ yɛ sɔlemɔ mli, ní otsu nii yɛ osɔlemɔi lɛ kɛ gbeekpamɔ naa. Ekolɛ etsɛŋ ni obaana akɛ mɔ ko ni obi koni okɛ lɛ akase nii lɛ baakpɛlɛ nɔ!—1 Yoh. 5:14, 15.