Yaa Nɔ ‘Ofee Ekpakpa’
1 Ofee nɔkpakpa beni obatsɔ Yehowa Nyɔŋmɔ sɔɔlɔ lɛ. Shi kɛlɛ, amrɔ nɛɛ, kaa ni yɔɔ jaramɔ bei nɛɛ amli lɛ ji ni oya nɔ ‘ofee ekpakpa.’ (Gal. 6:9) Eyɛ mli akɛ enɛ biɔ mɔdɛŋbɔɔ diɛŋtsɛ moŋ, shi obaanyɛ ofee. Yɛ mɛɛ gbɛ nɔ?
2 Ná Yesu Jwɛŋmɔŋ Su lɛ Eko: Taakɛ Yesu ji lɛ, obaanyɛ oŋmɛ otsui shi yɛ kaai ashishi kɛji oha ojwɛŋmɔ hi Maŋtsɛyeli hiɛnɔkamɔ lɛ nɔ. (Heb. 12:2, 3) Ná nɔmimaa akɛ Yehowa sumɔɔ bo ni akɛ eesumɔ akɛ oye omanye. (2 Pet. 3:9) Ná hekɛnɔfɔɔ yɛ emli kwraa kɛmɔ shi, kɛ nɔmimaa akɛ ebaaye ebua bo. (1 Kor. 10:13) Kã sɔlemɔ he, ni obi ni Yehowa aye abua bo ni oŋmɛ otsui shi. (Rom. 12:12) Ná miishɛɛ yɛ hekɛnɔfɔɔ ni oyɔɔ akɛ otsuishiŋmɛɛ lɛ kɛ bo baaya shihilɛ ni akpɛlɛɔ nɔ lɛ mli yɛ Nyɔŋmɔ hiɛ. (Rom. 5:3-5) Onɔkwayeli akɛ oooná ‘jwɛŋmɔŋ su ni Kristo Yesu ná lɛ nɔŋŋ eko’ lɛ baaha otsui anyɔ omli ni ebaaha Yehowa tsui anya.—Rom. 15:5; Abɛi 27:11.
3 Yaa Nɔ Ofee Nibii ni Ja: Okɛ gbɛjianɔ ni Yehowa eto kɛha ewebii koni eye ebua amɛ ni amɛya nɔ amɛfee ekpakpa lɛ atsu nii jogbaŋŋ kɛmɔ shi. Hiɛmɔ gbɛjianɔtoo kpakpa mli daa kɛha Nyɔŋmɔ Wiemɔ lɛ kanemɔ yɛ teemɔŋ kɛ Biblia kasemɔ woji ni tsulɔ anɔkwafo kɛ nilelɔ kuu lɛ ŋmala lɛ kasemɔ. Okɛ anɔkwayeli asaa ohe kɛha asafoŋ kpeei fɛɛ, ní oya fɛɛ, ní okɛ ohe awo nifeemɔ lɛ fɛɛ mli. Dani abaaje Kristofoi akpeei ashishi kɛ yɛ no sɛɛ lɛ, kɛ ohe abɔ omumɔŋ nyɛmimɛi hii kɛ yei lɛ ahe gbagbalii. Okɛ otii ni yɔɔ diɛŋtsɛ amamɔ ohiɛ kɛha osɔɔmɔ nitsumɔ lɛ bɔni afee ni oná gbɛfaŋnɔ ni shishinumɔ yɔɔ mli yɛ shiɛmɔ nitsumɔ lɛ mli koni oha ohesaai yɛ sanekpakpa lɛ ni okɛhaa mɛi krokomɛi lɛ mli lɛ aya hiɛ.
4 Nɛkɛ gbɛ nɔ obaanyɛ otsɔ oya nɔ ofee ekpakpa ni oná miishɛɛ babaoo yɛ nakai beaŋ nɔŋŋ. Yɛ enɛ gbɛfaŋ lɛ, nyɛmi nuu ko ni yɔɔ Italy lɛ kɛɛ akɛ: “Kɛ je na, ni miku misɛɛ kɛtee shia beni mitsu nii yɛ Yehowa sɔɔmɔ mli sɛɛ lɛ, minuɔ he akɛ etɔ mi, miyɔse anɔkwale ni enɛ ji. Shi miyɛ miishɛɛ, ni miida Yehowa shi akɛ eha mi miishɛɛ ko ni mɔ ko mɔ ko nyɛŋ ahe kɛjɛ midɛŋ.” No hewɔ lɛ, yaa nɔ ofee ekpakpa, ni bo hu obaaná miishɛɛ kpele mli niiashikpamɔ.