Sane Ko ni Yeɔ Ebuaa Maŋbii

Anɔkwa Kristofoi kɛ amɛhe woɔ maŋshiɛmɔ nitsumɔ ni akɛgbɛɔ sanekpakpa lɛ ashwãa lɛ mli. (Fil. 2:17) Bɔni afee ni amɛnyɛ amɛtsu enɛ he nii lɛ, akɛ woji bibii komɛi, dɛhiɛmɔ woji, kɛ saji ni yɔɔ wiemɔi 20 amli ni akɛfɔɔ nitsumɔ lɛ ewo Internet lɛ nɔ yɛ www.watchtower.org. Atooo nɛkɛ Web site nɛɛ he gbɛjianɔ koni akɛja woji heei ni eba lɛ aha Yehowa Odasefoi. Eyiŋtoo ji koni eha maŋbii lɛ anine ashɛ anɔkwa saji ni kɔɔ nɔ ni Yehowa Odasefoi tsɔɔ kɛjɛɔ Biblia lɛ mli lɛ anɔ.

Akɛ nɔ ko ni sa kadimɔ waa efata wɔ Web site ni wɔkɛtsuɔ nii lɛ he nyɛsɛɛ nɛɛ. Enɛ ji wolo bibioo ni ji Mɛni Nyɔŋmɔ Taoɔ yɛ Wɔdɛŋ? ni eyɛ wiemɔi ni fa fe 220 amli. Agbɛnɛ hu, abɔi wɔ Web site adrɛs lɛ ŋmaa yɛ January 1 Buu-Mɔɔ kɛ January 8, Awake! ni je kpo yɛ afi 2004 lɛ naagbee baafa lɛ nɔ.

Mɛɛ gbɛ nɔ oootsɔ okɛ dɛŋdade nɛɛ atsu nii yɛ? Ojogbaŋŋ, ekolɛ okɛ mɔ ko ni yɔɔ wiemɔ lɛ he miishɛɛ shi wiemɔ kroko ko pɛ enuɔ lɛ baakpe. Kɛji akɛ ele Internet lɛ kɛ nitsumɔ lɛ, obaanyɛ otsɔɔ lɛ wɔ Web site adrɛs ni yɔɔ Buu-Mɔɔ loo Awake! lɛ naagbee baafa lɛ nɔ lɛ. Ekolɛ enɛ baaha enyɛ epɛi Taoɔ wolo bibioo lɛ mli yɛ emaŋ wiemɔ mli kɛyashi obaaku osɛɛ ni okɛ wolo ni yɔɔ ewiemɔ mli lɛ ayaha lɛ. Aloo obaanyɛ okɛ lɛ aha asafo loo kuu ko ni wieɔ emaŋ wiemɔ lɛ.