‘Nyɛkpɛa Tamɔ Kanei’
1 Yɛ ŋmɛnɛŋmɛnɛ nibii agbɛjianɔtoo ni shihilɛ lɛ ekpɔtɔ yɛ mumɔŋ kɛ jeŋba mli nɛɛ mli lɛ, anɔkwa Nyɔŋmɔ, Yehowa jálɔi aaafee akpekpei ekpaa ni yɔɔ jeŋ fɛɛ lɛ ‘miikpɛ tamɔ kanei’ yɛ shikpɔji 234 nɔ. (Fil. 2:15) Enɛ haa mɛi yɔseɔ wɔ oya. Mɛɛ gbɛ nɔ wɔtsɔɔ wɔjieɔ anɔkwa la ni jara wa ni jɛ Yehowa dɛŋ lɛ kpo yɛ?—2 Kor. 3:18.
2 Wɔ Nifeemɔi: Mɛi yɔseɔ wɔjeŋba oya. (1 Pet. 2:12) Yoo ko yɔse akɛ Odasefonyo ko ni ekɛtsuɔ nii lɛ mli hi ni eyeɔ ebuaa mɔ, ni ekɛ wiemɔ sha tsuuu nii loo ni ebaaŋmɔ yɛ shwɛmɔi ni esaaa he. Kɛji akɛ mɛi krokomɛi bɔ mɔdɛŋ akɛ amɛbaawo Odasefonyo lɛ mli la kɛtsɔ wiemɔ sha kɛ nitsumɔ nɔ beni edamɔ jɛmɛ lɛ, efeɔ diŋŋ shi kɛlɛ, eyɛ shiŋŋ yɛ nɔ ni ja he. Mɛɛ hewalɛ enɛ ná yɛ yoo lɛ nɔ? Ekaiɔ akɛ: “Miná ejeŋba lɛ he miishɛɛ aahu akɛ, mibɔi saji bimɔ yɛ Biblia lɛ he. Mije shishi mibɔi Nyɔŋmɔ Wiemɔ lɛ kasemɔ, ni sɛɛ mli lɛ abaptisi mi.” Ekɛɛ kɛfata he akɛ: “Ejeŋba ji nɔ ni tsɔ̃ miyiŋ ni mipɛi Yehowa Odasefoi ahemɔkɛyelii lɛ amli mikwɛ.”
3 Su ni wɔyɔɔ yɛ nɔyeli hegbɛ he, bɔ ni wɔsusuɔ je lɛŋ nifeemɔi ahe wɔhaa, kɛ wɔwiemɔ ni he tse lɛ haa anaa Yehowa Odasefoi akɛ mɛi ni yɔɔ srɔto ni hiɔ shi yɛ Biblia shishitoo mlai ni nɔ kwɔlɔ lɛ anaa. Nitsumɔi kpakpai ni tamɔ nɛkɛ baanyɛ ekɛ anunyam abaha Yehowa ni egbala mɛi krokomɛi kɛba ejamɔ lɛ he.
4 Wɔ Wiemɔi: Eji anɔkwale akɛ, ekolɛ mɛi ni naa wɔjeŋba kpakpa lɛ nyɛŋ ale nɔ hewɔ ni esoro wɔ, ja wɔkɛ amɛ egba wɔhemɔkɛyelii lɛ ahe sane dã. Ani mɛi ni okɛtsuɔ nii loo okɛ amɛ yaa skul lɛ le akɛ oji Yehowa Odasefoi ateŋ mɔ kome? Ani oŋɔɔ hegbɛ lɛ ni oyeɔ odase be mli ni nyɛgbaa sane ko kɛkɛ lɛ? Ani eji ofaishitswaa akɛ obaaha ‘ola lɛ akpɛ yɛ gbɔmɛi ahiɛ’ yɛ shihilɛ fɛɛ shihilɛ ni sa mli?—Mat. 5:14-16.
5 Kɛji akɛ wɔbaanyɛ wɔtsu nitsumɔ ni atuu awo wɔdɛŋ ákɛ la hiɛlɔi lɛ he nii lɛ, ebiɔ ni wɔná he-kɛ-afɔleshaa mumɔ. Susuma muu fɛɛ su ni wɔɔná lɛ baakanya wɔ ni wɔtsi wɔhe kɛjɛ nibii ni he ehiaaa lɛ ahe bɔni afee ni wɔtsu bɔ fɛɛ bɔ ni wɔbaanyɛ yɛ wala yibaamɔ nitsumɔ lɛ, ni ji shiɛmɔ kɛ kaselɔi afeemɔ nitsumɔ lɛ mli.—2 Kor. 12:15.
6 Eba akɛ kɛtsɔ wɔwiemɔi kɛ nifeemɔi anɔ lɛ, wɔbaaya nɔ ni wɔkpɛ tamɔ kanei. Kɛji wɔfee nakai lɛ, ekolɛ ebaakanya mɛi krokomɛi ní amɛbafata wɔhe ni wɔkɛ anunyam aha Yehowa.