Sanebimɔ He
◼ Mɛɛ osharai yɔɔ mɔ ko ní wɔleee lɛ ní wɔkɛ lɛ aaabɔ kɛtsɔ Intanɛt lɛ nɔ lɛ he?
Agbele Web sites babaoo yɛ Intanɛt lɛ nɔ ní mɛi baanyɛ atsɔ nɔ amɛkɛ mɛi krokomɛi agba sane. Web sites nɛɛ babaoo yɛ ni aŋmɛɔ gbɛ ní mɔ kɛ lɛ diɛŋtsɛ ehe saji awo nɔ, ni nibii ní mɔ lɛ baanyɛ ekɛwo jɛmɛ lɛ ekomɛi ji mfonirii kɛ saji komɛi ni kɔɔ ehe. Mɛi ni kwɛɔ saji nɛɛ baanyɛ atsɔ nɔ amɛkɛ mɔ lɛ ashara. Oblahii kɛ oblayei babaoo le hei ni tamɔ nɛkɛ yɛ Intanɛt lɛ nɔ, ni amɛteŋ mɛi komɛi ni yɔɔ asafo lɛ mli lɛ etsɔ gbɛ̀i nɛɛ anɔ amɛkɛ mɛi krokomɛi eshara loo amɛkɛtao gbalashihilɛ mli hefatalɔi ni kɛɛ Yehowa Odasefoi ji amɛ.
Ewaaa akɛ mɔ ko ni wɔkɛ lɛ aaashara yɛ Intanɛt lɛ nɔ lɛ kɛ mɔ pɔtɛɛ ni eji, emumɔŋ shidaamɔ, loo eyiŋtoi aaatee wɔ. (Lala 26:4) Ekolɛ mɔ ko ni kɛɔ akɛ eji Yehowa Odasefonyo lɛ baanyɛ afee mɔ ni heee yeee, mɔ ko ni ashwie lɛ kɛjɛ asafo lɛ mli, loo hemɔkɛyeli kwalɔ ni tɔ̃tɔ̃ɔ mɛi anane po. (Gal. 2:4) Amaniɛbɔɔ tsɔɔ akɛ, mɛi ni toɔ gbekɛbii kabonaa lɛ tsɔɔ Web sites nɛɛ anɔ ni amɛnine shɛɔ mɛi ni amɛtoɔ amɛ kabonaa lɛ anɔ.
Kɛ́ wɔyɛ nɔmimaa po akɛ mɛi ni wɔkɛsharaa lɛ yɛ shidaamɔ kpakpa yɛ asafo lɛ mli lɛ, gbɛ̀i ni tamɔ nɛkɛ ni atsɔɔ nɔ agbaa sane lɛ baanyɛ eha abɔi nibii ni esaaa ahe wiemɔ. Nɔ hewɔ ji akɛ, kɛ́ mɔ ko kɛ mɔ ko ekpeko pɛŋ lɛ, ehiɛ gbooo lɛ. Ekolɛ mɛi enyɔ lɛ hu baabu sane ni agbaa yɛ Intanɛt lɛ nɔ nɛɛ akɛ eji boŋsane, ni amɛbaanu he akɛ mɛi krokomɛi tamɔ amɛfɔlɔi loo asafoŋ onukpai lɛ leŋ nɔ̃ sane ni amɛgbaa lɛ. Dɔlɛ sane ji akɛ, enɛ ená oblahii kɛ oblayei babaoo ní fɔlɔi ni ji Kristofoi tsɔseɔ amɛ lɛ anɔ hewalɛ, ni amɛgbaa yakayaka saji. (Efe. 5:3, 4; Kol. 3:8) Mɛi krokomɛi hu kɛ amɛ diɛŋtsɛ amɛhe mfonirii ni teɔ bɔlɛnamɔ akɔnɔ shi, sabalai gbohii, loo hei ni amɛbaanyɛ amɛná bɔlɛnamɔ jeŋba shara he lalai ni ajieɔ yɛ vidio nɔ lɛ ewo amɛkɔmpiutai anɔ.
Yɛ nɔ ni awie kɛtsɔ hiɛ nɛɛ hewɔ lɛ, esa akɛ fɔlɔi akwɛ nibii ni amɛbii lɛ feɔ yɛ kɔmpiuta lɛ nɔ lɛ yɛ be kɛ beaŋ. (Abɛi 29:15) Ebaafee oshara akɛ wɔɔfɔ̃ mɔkpɔŋ ko nine kɛba wɔshĩa, loo ni wɔɔshi ekɛ wɔbii lɛ pɛ yɛ shĩa. Yɛ nakai gbɛ nɔ nɔŋŋ lɛ, eyɛ oshara akɛ wɔ loo wɔbii lɛ kɛ mɛi kpɔji aaabɔ naanyo yɛ Intanɛt lɛ nɔ kɛji amɛkɛɛ Yehowa Odasefoi ji amɛ po.—Abɛi 22:3.