Wɔbaabɔi Mɛi Ninefɔ̃ɔ Kɛha Kaimɔ lɛ Kɛjɛ March 17
1. Mɛni wɔbaabɔi feemɔ kɛjɛ March 17?
1 Daa afi lɛ, atsɔɔ Kaimɔ lɛ yeli nɔ ajajeɔ Yesu gbele lɛ atsɔɔ mɛi. (1 Kor. 11:26) No hewɔ lɛ, wɔmiisumɔ ni mɛi abafata wɔhe koni amɛbanu kpɔmɔnɔ lɛ ní Yehowa jɛ suɔmɔ mli ekɛha lɛ he sane. (Yoh. 3:16) Afi nɛɛ, wɔbaabɔi mɛi ninefɔ̃ɔ kɛha Kaimɔ lɛ kɛjɛ Hɔɔ, March 17. Ani oosaa ohe koni okɛ ohe awo mli kɛmɔ shi?
2. Mɛni wɔbaanyɛ wɔkɛɛ dani wɔkɛ ninefɔ̃ɔ wolo lɛ aha?
2 Nɔ ni Wɔbaanyɛ Wɔkɛɛ: Ehi jogbaŋŋ akɛ wɔɔha wɔshiɛmɔ wiemɔ lɛ afee kuku. Wɔbaanyɛ wɔkɛɛ akɛ: “Hɛloo. Wɔmiisumɔ ni wɔfɔ̃ okɛ oweku lɛ nine kɛya nifeemɔ ko ni he hiaa ni afeɔ lɛ daa afi lɛ shishi, ni abaafee afi nɛɛ nɔ̃ lɛ April 5 lɛ yɛ jeŋ fɛɛ. Abaaha Biblia mli wiemɔ ko kɛtsɔɔ nɔ ni Yesu gbele lɛ tsu, kɛ nɔ ni Yesu tsuɔ amrɔ nɛɛ mli, ní aheee shika ko. Ninefɔ̃ɔ wolo nɛɛ tsɔɔ be kɛ he ni abaafee kpee nɛɛ yɛ, yɛ wɔkutso lɛ mli.” Kɛ́ wɔmiijara ninefɔ̃ɔ woji lɛ yɛ otsii anaagbee lɛ, esa akɛ wɔkɛ woji tɛtrɛbii lɛ hu aha kɛ́ ebaahi.
3. Te wɔɔfee tɛŋŋ wɔfɔ̃ mɛi fɛɛ ni wɔnine baashɛ amɛnɔ lɛ nine?
3 Fɔ̃ɔ Mɛi Fɛɛ ni Ooonyɛ lɛ Nine: Oti ni ma wɔhiɛ ji ni wɔfɔ̃ mɛi fɛɛ ni wɔnine baashɛ amɛnɔ lɛ nine. No hewɔ lɛ bɔɔ mɔdɛŋ ni ofɔ̃ o-Biblia mli nikaselɔi, mɛi ni okuɔ osɛɛ oyasaraa amɛ, owekumɛi, mɛi ni okɛtsuɔ nii, oskulbii, okutsoŋbii, kɛ mɛi krokomɛi ni ole amɛ lɛ fɛɛ nine. Nyɛsafoŋ onukpai lɛ baatsɔɔ bɔ ni nyɛaafee nyɛtsu nyɛshikpɔŋkuku lɛ fɛɛ mli nii. Ta ni afãa daa afi kɛfɔ̃ɔ mɛi anine kɛbaa Kaimɔ lɛ woɔ yibii babaoo. Nyɛsɛɛ afi beni afeɔ Kaimɔ lɛ, yoo ko tee eko, ni mɛi ni kwɛɔ shitaramɔ nɔ lɛ eko kɛɛ lɛ akɛ ebaawa lɛ kɛtao shiɛlɔ ni fɔ̃ lɛ nine kɛba lɛ. Shi, yoo lɛ kɛɛ lɛ akɛ eleee mɔ ko mɔ ko yɛ jɛmɛ, ni ákɛ mɔ ko ní miishiɛ yɛ shĩa kɛ shĩa nakai gbi lɛ leebi lɛ ji mɔ ni ha lɛ ninefɔ̃ɔ wolo lɛ.
4. Mɛɛ yiŋtoi ahewɔ esa akɛ okɛ hiɛdɔɔ atswa Kaimɔ lɛ he adafi?
4 Ekolɛ mɔ ko baaba nyɛ-Kaimɔ lɛ eko yɛ ninefɔ̃ɔ wolo ni okɛha lɛ lɛ hewɔ. Kɛ́ mɔ ko here ninefɔ̃ɔ lɛ nɔ jio, mɔ ko hereee nɔ jio lɛ, omɔdɛŋbɔɔ lɛ baafee odaseyeli kɛha mɔ ko kɛ̃. Ninefɔ̃ɔ woji lɛ ni ojaraa lɛ baaha mɛi ale akɛ, amrɔ nɛɛ Yesu miiye nɔ akɛ Maŋtsɛ ni yɔɔ hewalɛ. Kɛ́ okɛ hiɛdɔɔ tswa Kaimɔ lɛ he adafi lɛ, ebaaha mɛi fɛɛ ni naa bo lɛ—mɛi ni yɔɔ oshikpɔŋkuku lɛ mli, onanemɛi shiɛlɔi, kɛ nɔ ni fe fɛɛ lɛ, Yehowa diɛŋtsɛ—ana akɛ ohiɛ sɔɔ nikeenii ni ji kpɔmɔnɔ lɛ waa.—Kol. 3:15.