Okɛ Gbɛ ni Abaanya He Atsu Nii Kɛshiɛ
1. Mɛni wɔbaanyɛ wɔkase kɛjɛ gbɛi srɔtoi ni mra beaŋ Kristofoi lɛ tsɔ nɔ amɛshiɛ lɛ mli?
1 Mra beaŋ Kristofoi lɛ shiɛ sanekpakpa lɛ amɛtsɔɔ mɛi ni jɛ hei srɔtoi kɛ jamɔi srɔtoi amli. (Kol. 1:23) Eyɛ mli akɛ amɛshiɛ sane kome lɛ nɔŋŋ—Nyɔŋmɔ Maŋtsɛyeli lɛ—moŋ, shi amɛsusu amɛtoibolɔi lɛ ahe ni amɛkɛ saji ni mɛi nɛɛ baanya he lɛ tsu nii. Akɛ nɔkwɛmɔnɔ lɛ, beni Petro kɛ Yudafoi ni yɔɔ bulɛ kɛha Ŋmalɛi lɛ wieɔ lɛ, etsɛ gbalɔ Yoel wiemɔi lɛ ayisɛɛ kɛje shishi. (Bɔf. 2:14-17) Shi, kadimɔ gbɛ ni Paulo hu tsɔ nɔ ekɛ Helabii lɛ susu saji ahe taakɛ abɔ he amaniɛ yɛ Bɔfoi lɛ Asaji 17:22-31 lɛ. Ŋmɛnɛ lɛ, mɛi komɛi yɛ shikpɔŋ kukuji komɛi amli ni amɛyɛ bulɛ kɛha Ŋmalɛi lɛ, no hewɔ lɛ yɛ hei ni tamɔ nɛkɛ lɛ, wɔbaanyɛ wɔkɛ Biblia lɛ atsu nii yɛ shĩa kɛ shĩa ni naagba ko bɛ he. Kɛlɛ, kɛ́ wɔkɛ mɛi ni bɛ Biblia lɛ loo jamɔ he miishɛɛ, loo amɛbɛ Kristofoi ajamɔ ko mli lɛ kpe lɛ, ehe baahia ni wɔkɛ hiɛshikamɔ diɛŋtsɛ atsu nii.
2. Mɛɛ gbɛ nɔ wɔbaanyɛ wɔkɛ woji ni akɛbaaha lɛ aye abua mɛi ni nyaa Biblia lɛ he kɛ mɛi ni nyaaa he lɛ hu?
2 Okɛ Woji ni Akɛbaaha lɛ Atsu Nii Jogbaŋŋ: Yɛ sɔɔmɔ afi nɛɛ mli lɛ, abaatsake woji ni akɛbaaha lɛ daa nyɔji enyɔ, ni woji ni akɛbaatsu nii ji Buu-Mɔɔ kɛ Awake, dɛhiɛmɔ woji (tracts), kɛ woji bibii (brochures). Kɛ́ mɛi ni yɔɔ wɔshikpɔŋ kuku lɛŋ lɛ nyaaa Biblia lɛ he po lɛ, wɔbaanyɛ wɔkɛ amɛ asusu sane ko ni amɛbaanya he yɛ Buu-Mɔɔ, Awake, dɛhiɛmɔ woji, loo woji bibii lɛ amli lɛ eko he. Ekolɛ, gbi klɛŋklɛŋ kwraa ni wɔtee mɔ lɛ ŋɔɔ lɛ, wɔkaneee ŋmalɛ loo wɔtsɛɛɛ eko yisɛɛ tɛɛ yɛ Biblia lɛ mli, shi kɛ́ mɔ lɛ ná sane lɛ he miishɛɛ lɛ, ni wɔku wɔsɛɛ wɔyasara lɛ lɛ wɔbaanyɛ wɔkɛfee oti ni ma wɔhiɛ akɛ wɔbaaye wɔbua lɛ koni ená hemɔkɛyeli yɛ Bɔlɔ lɛ kɛ e-Wiemɔ ni ajɛ mumɔŋ aŋma lɛ mli. Shi, kɛ́ wɔmiishiɛ yɛ hei ni mɛi nyaa Biblia lɛ he lɛ, wɔbaanyɛ wɔkɛ wɔwoji lɛ kɛ Biblia lɛ atsu nii. Anɔkwa, wɔbaanyɛ wɔkɛ Biblia lɛ Tsɔɔ wolo lɛ loo Bo Nyɔŋmɔ Toi loo Bo Nyɔŋmɔ Toi Koni Ohi Shi Kɛya Naanɔ wolo lɛ aha be fɛɛ be, ekɔɔɔ he eko wolo ni akɛhaa nakai nyɔɔŋ lɛ. Nɔ ni he hiaa titri ji ní wɔkɛ saji ni mɛi baanya he lɛ atsu nii.
3. Mɛi ni yɔɔ wɔshikpɔŋ kuku lɛ mli lɛ atsuii tamɔ sũ yɛ mɛɛ gbɛ nɔ?
3 Saamɔ Sũ Lɛ: Adesa tsui tamɔ sũ. (Luka 8:15) Ebiɔ ni asaa sũi loo shikpɔji komɛi jogbaŋŋ dani Biblia mli anɔkwalei lɛ baaná fãji ni amɛdara. Klɛŋklɛŋ afii 100 lɛ mli sanekpakpa shiɛlɔi lɛ tɛo sane lɛ yɛ sũi henɔi srɔtoi lɛ fɛɛ mli, ni enɛ ha amɛtsuii nyɔnyɔɔ amɛmli ni amɛmii shɛ amɛhe. (Bɔf. 13:48, 52) Kɛ́ wɔsusuɔ wɔtoibolɔi lɛ ahe, ni wɔkɛ sane ni amɛbaanya he lɛ tsu nii lɛ, wɔ hu wɔbaanyɛ wɔye omanye.