Wɔbaabɔi Mɛi Ninefɔ̃ɔ Kɛha Kaimɔ lɛ Kɛjɛ March 1
1. Mɛɛ be wɔbaaje tafãa kɛha Kaimɔ lɛ ninefɔ̃ɔ lɛ shishi, ni mɛni hewɔ tafãa lɛ sɛɛ baatsɛ afi nɛɛ?
1 Yɛ Sohaa, March 1 lɛ wɔbaaje ta ni wɔfãa daa afi kɛfɔ̃ɔ mɛi anine koni amɛkɛ wɔ abafee ekome kɛye Kaimɔ lɛ shishi. Abaaye Kaimɔ lɛ March 26, ni tsɔɔ akɛ tafãa lɛ sɛɛ baatsɛ fioo fe afii krokomɛi ni eho lɛ. Enɛ baaha mɛi babaoo aná hegbɛ ni amɛnine ashɛ ninefɔ̃ɔ lɛ nɔ, titri lɛ kɛ́ amɛyɛ asafo ko ni shikpɔŋkuku da waa lɛ mli.
2. Mɛɛ gbɛjianɔi ato kɛha ninefɔ̃ɔ woji lɛ akɔlɔmɔ kɛ bɔ ni akɛbaatsu nii yɛ shikpɔŋkuku lɛ mli aha?
2 Too Gbɛjianɔ: Asafoŋ onukpai lɛ kɛ gbɛtsɔɔmɔ baaha yɛ bɔ ni abaatsu shikpɔŋkuku lɛ mli nii aha lɛ he, amɛbaatsɔɔ hu kɛji ebaahi akɛ ashi ninefɔ̃ɔ wolo lɛ eko aha mɛi ni anaŋ amɛ yɛ shĩa. Kɛ́ ninefɔ̃ɔ woji ni akɛtsu nii yɛ shĩa kɛ shĩa shiɛmɔ lɛ mli lɛ eko shwɛ lɛ, abaanyɛ ajara aha mɛi krokomɛi beni anyiɛ shiɛmɔ nɔ. Shiɛmɔ nitsumɔ nɔkwɛlɔ lɛ baakwɛ ni akɛ ninefɔ̃ɔ woji ni aŋmala nɔ nii lɛ ekomɛi ashwie hei ni akɔlɔɔ woji lɛ yɛ lɛ aha shiɛlɔi lɛ, shi esaaa akɛ akɛ fɛɛ shwieɔ jɛi shi kome. Esa akɛ wɔkɔlɔ bɔ pɛ ni he baahia wɔ kɛha otsi fɛɛ otsi.
3. Mɛni esa wɔha ehi wɔjwɛŋmɔŋ kɛ́ wɔmiijara ninefɔ̃ɔ woji lɛ?
3 Mɛni Obaakɛɛ? Ehi akɛ wɔɔha wɔwiemɔ lɛ afee kuku, ejaakɛ enɛ baaha wɔnine ashɛ mɛi babaoo anɔ. Atsɔɔ shiɛmɔ wiemɔ ni wɔbaanyɛ wɔkɛtsu nii yɛ wɔshikpɔŋkuku lɛ mli lɛ yɛ baafa 4 lɛ. Kɛlɛ, esaaa akɛ wɔyeɔ wɔhe oyai akɛ wɔɔshi kɛ shiatsɛ lɛ jie naanyobɔɔ su kpo loo eyɛ sanebimɔi. Kɛ́ wɔmiijara ninefɔ̃ɔ woji lɛ yɛ otsii anaagbee lɛ, esa akɛ wɔkɛ woji tɛtrɛbii lɛ hu aha kɛ́ ebaahi. Yɛ March gbi ni ji 2 lɛ nɔ lɛ, wɔbaajara ninefɔ̃ɔ woji lɛ titri fe ní wɔɔje Biblia mli nikasemɔi ashishi.
4. Mɛni hewɔ esa akɛ wɔkɛ wɔhe awo tafãa lɛ mli kɛ ekãa lɛ?
4 Wɔyɛ nɔmimaa akɛ mɛi babaoo baafata wɔhe kɛye Kaimɔ lɛ. Wiemɔ ni abaaha lɛ baatsɔɔ mɔ diɛŋtsɛ ni Yesu ji. (1 Kor. 11:26) Ebaatsɔɔ bɔ ni egbele lɛ yeɔ ebuaa wɔ. (Rom. 6:23) Ni ebaama nɔ hewɔ ni ehe hiaa ni wɔkai lɛ lɛ nɔ mi. (Yoh. 17:3) Eba akɛ wɔkɛ wɔhe baawo tafãa lɛ mli kɛ ekãa!