Mɛni Kwraa Kudɔɔ Oshihilɛ?

NƆ NI MƐI PII HEƆ AMƐYEƆ

ŊULAMIIAŊKWƐMƆ: Mɛi komɛi heɔ amɛyeɔ akɛ, bɔ ni ŋulamii ashikamɔ yɔɔ be ni afɔ mɔ ko lɛ, ji nɔ ni baatsɔɔ bɔ ni nibii baaya lɛ ahã yɛ eshihilɛ mli. Amɛkaneɔ ŋulamiiaŋkwɛmɔ woji (loo horoscope), koni amɛkɛna nɔ ni baaba amɛnɔ wɔsɛɛ ni no aye abua amɛ ni amɛkpɛ amɛyiŋ.

FENG SHUI: Mɛi komɛi hu heɔ amɛyeɔ akɛ, kɛ́ amɛto nibii ni yɔɔ amɛshiã mli lɛ ahe gbɛjianɔ yɛ gbɛ pɔtɛɛ ko nɔ lɛ, nibii baahi ahã amɛ. Nuu ko ni atsɛɔ lɛ Lo Wing,a ni yɔɔ Hong Kong lɛ kɛɛ, “Mɔ ko ni le feng shui mli waa lɛ kɛɛ mi akɛ, kɛ́ mikɛ kristalo (nɔ ko ni akɛ glase fee) pɔtɛɛ ko ma he ko yɛ mishwapo lɛ mli lɛ, maná shika waa.”

WEKUMƐI NI EGBOI LƐ JAMƆ: Mɛi krokomɛi hu heɔ amɛyeɔ akɛ, kɛ́ amɛjá amɛwekumɛi ni egboi loo wɔji komɛi lɛ, amɛbaabu amɛhe ni amɛbaajɔɔ amɛ. Yoo ko ni yɔɔ Vietnam, ni atsɛɔ lɛ Van lɛ kɛɛ akɛ, “Mihe miye akɛ, kɛ́ mikɛ woo hã miwekumɛi ni egboi lɛ, mishihilɛ baahi amrɔ nɛɛ, ni wɔsɛɛ lɛ nibii baahi ahã mi kɛ mibii lɛ.”

BLAMƆ: Mɛi pii heɔ amɛyeɔ akɛ, kɛ́ mɔ ko gbo lɛ ebablaa, ni tsɔɔ akɛ, afɔɔ lɛ ekoŋŋ. Amɛheɔ amɛyeɔ akɛ nibii kpakpai loo nibii gbohii ni yaa nɔ yɛ amɛshihilɛ mli bianɛ lɛ, jɛ nibii ni amɛfee dani amɛbabla lɛ.

Mɛi pii hu kɛɔ akɛ nibii nɛɛ bɛ mli. Shi loloolo lɛ, amɛhãa akwɛɔ amɛdɛ̃, amɛkaneɔ horoscope, amɛkɛ Ouija^® board, tarot kaadii, kɛ nibii ni tamɔ nakai tsuɔ nii. Amɛsusuɔ akɛ ekolɛ nibii nɛɛ baawa amɛ ni amɛle bɔ ni amɛshihilɛ baaji wɔsɛɛ.

ANI NIBII NƐƐ WAA AMƐ LƐƐLƐŊ?

Ani mɛi ni heɔ nibii nɛɛ amɛyeɔ loo amɛkɛ amɛhe woɔ nifeemɔi nɛɛ amli lɛ ashihilɛ ehi?

Nuu ko ni yɔɔ Vietnam, ni atsɛɔ lɛ Hào lɛ sane lɛ baanyɛ ahã wɔna enɛ naa. Ekɛ ehe wo ŋulamiiaŋkwɛmɔ, feng shui, kɛ wekumɛi ni egboi lɛ ajamɔ mli. Ani eye omanye? Hào kɛɛ, “Mishika pii hiɛ kpãtã, mimɔ nyɔmɔ, mikɛ naagbai kpe yɛ miweku lɛ mli, ni mifee basaa.”

Kulɛ nuu ko ni jɛ Taiwan, ni atsɛɔ lɛ Qiuming lɛ heɔ blamɔ, shɛɛ mli sane, kɛ feng shui eyeɔ, ni ekɛ ehe woɔ ŋulamiiaŋkwɛmɔ kɛ wekumɛi ni egboi lɛ ajamɔ mli. Etao nibii nɛɛ amli jogbaŋŋ, ni sɛɛ mli lɛ ewie akɛ: “Mibana akɛ tsɔɔmɔi kɛ kusumii ni tamɔ enɛɛmɛi lɛ teɔ shi amɛwoɔ amɛhe, ni amɛhãa mɔ yiŋ futuɔ lɛ. Mibana hu akɛ bei pii lɛ, nibii ni ŋulamiiaŋkwɛlɔi wieɔ lɛ baaa mli. Ni yɛ blamɔ gbɛfaŋ lɛ, kɛ́ mɔ ko kaiii nibii ni efee dani ebabla lɛ, te eeefee tɛŋŋ efee tsakemɔi koni kɛ́ afɔ lɛ ekoŋŋ lɛ, ená shihilɛ kpakpa lɛ?”

Hào, Qiuming, kɛ mɛi babaoo hu ebana akɛ, jeee shɛɛ mli sane, ŋulamii, wekumɛi ni egboi, loo fɔmɔ ni afɔɔ mɔ ko ekoŋŋ lɛ ni kudɔɔ wɔshihilɛ. Ani enɛ tsɔɔ akɛ, wɔnyɛŋ wɔfee nɔ ko ni baahã wɔshihilɛ ahi?

Mɛi babaoo hu susuɔ akɛ, ja amɛtee yunivɛsiti loo amɛná nii dani nibii baahi ahã amɛ wɔsɛɛ. Te nibii anaa eyakpa ehã tɛŋŋ ehã mɛi nɛɛ ekomɛi?