Ha Ohiɛ Ahi Ohe nɔ ni Oje Biblia Mli Nikasemɔi Ashishi
1 Shia Biblia mli nikasemɔi ashishijee kɛ amɛfeemɔ fata nitsumɔ ni akɛha wɔ akɛ Yehowa Odasefoi lɛ he. (Mat. 28:19, 20) No hewɔ lɛ, ani ooofee Nyɔŋmɔ nanemɛi nitsulɔi lɛ ateŋ mɔ ko yɛ enɛ feemɔ mli? (1 Kor. 3:9) Mɛɛ hegbɛ wɔna nɛkɛ akɛ wɔɔye wɔbua mɛi krokomɛi ni amɛbale Mɔ ni nɔ kwɔ fe fɛɛ yɛ jeŋ muu lɛ!
2 Akɛni je lɛŋ nibii ni tsakeɔ oyayaayai lɛ kɛ naagbai pii baa hewɔ lɛ, mɛi ni hiɛ tsui krɔŋŋ lɛ ateŋ mɛi babaoo miitao hetoi kɛha nɔ hewɔ ni nibii nɛɛ baa lɛ. Mra be ko mli beebe ni Yehowa ha amɛsanebimɔi lɛ ahetoo. Kɛ ajɛ Nyɔŋmɔ Wiemɔ lɛ mli atsɔɔ mɛi ni hiɛ jwɛŋmɔ kpakpa lɛ anii lɛ, eshɛjeɔ amɛmii. No hewɔ lɛ, ehe miihia ni wɔhiɛ ahi wɔhe nɔ yɛ hegbɛi ni wɔnaa ni wɔkɛaaje Biblia mli nikasemɔi ashishi lɛ he.—Abɛi 3:27.
HA OHIƐ AHI OHE NƆ YƐ HEGBƐI AHE
3 Ani osusu he akɛ okɛ owekunyo ko loo mɔ kroko ni ole lɛ jogbaŋŋ ni bɛ anɔkwale lɛ mli lɛ aaaje Biblia mli nikasemɔ shishi? Le ni ole amɛ lɛ haa onaa hegbɛ akɛ okɛ niiasɛɛyoomɔ aaatsu nii ni okɛna be ni sa jogbaŋŋ ni okɛ amɛ aaasusu sane lɛ he. Ha ehi ojwɛŋmɔ mli akɛ sanebimɔ ni hi jogbaŋŋ ni ooohala aloo wiemɔ ko ni ooowie yɛ be ni sa mli lɛ baanyɛ atsiɛ miishɛɛ ni amɛyɔɔ yɛ anɔkwale lɛ he lɛ hiɛ. Kɛ atee mɔ ko miishɛɛ shi yɛ sane ko he lɛ, yɛ bei babaoo mli lɛ sanegbaa ni woɔ yibii nyiɛɔ sɛɛ, ni anyɛɔ ajeɔ Biblia mli nikasemɔ hu shishi.
4 Yɛ shihilɛi pii amli lɛ, jeŋba kpakpa ni Kristofonyo ni ji gbalashihilɛ mli hefatalɔ lɛ jieɔ lɛ kpo lɛ gbeleɔ gbɛ ehaa mɔ ko ni jeee heyelilɔ ni ebaa anɔkwale lɛ mli. (1 Pet. 3:1, 2) Yɛ bei babaoo mli lɛ, kɛ asafo lɛ mlibii le gbalashihilɛ mli hefatalɔi kɛ wekumɛi krokomɛi ni heee yeee lɛ ni amɛbuɔ amɛ hu lɛ, amɛhiɛ sɔɔ enɛ waa. Kɛ ana amɛhe miishɛɛ diɛŋtsɛ lɛ, enyɛɔ eshɛɔ shɔŋŋ kɛyashɛɔ naanyobɔɔ mli po. Kɛ okɛ ohefatalɔ aloo oweku lɛ mlibii lɛ fee ekome kɛtsu nii yɛ anɔkwale lɛ mli lɛ, obaanyɛ otsɔ no nɔ oje Biblia mli nikasemɔ shishi.
5 Yɛ be mli ni wɔkɛ wɔhe woɔ shia-kɛ-shia nitsumɔ lɛ mli lɛ, ekolɛ obaabɔ mɔdɛŋ akɛ oooje Biblia mli nikasemɔ shishi yɛ ojɛmɛ yaa klɛŋklɛŋ. Mɛɛ gbɛ nɔ oootsɔ ofee enɛ yɛ? Shiɛlɔi komɛi eye omanye yɛ enɛ feemɔ mli yɛ be mli ni shiatsɛ lɛ biɔ saji ni abaanyɛ aha hetoo tɛ̃ɛ kɛjɛ wolo ko mli lɛ. Kɛji mɔ lɛ kpɛlɛ nɔ akɛ ebaakane wolo lɛ aloo efɔ wɔ nine akɛ wɔba mli lɛ, no lɛ wɔbaanyɛ wɔŋɔ hegbɛ lɛ ni wɔkɛtsa sanegbaa lɛ nɔ koni ekolɛ wɔfee nikasemɔ he nɔkwɛmɔ nɔ wɔtsɔɔ lɛ. Bo diɛŋtsɛ kpɛɛ oyiŋ jogbaŋŋ yɛ be sɛɛjɛkɛmɔ ni obaaye yɛ ojɛmɛ yaa klɛŋklɛŋ lɛ he. Ehe baaba sɛɛnamɔ akɛ oooku osɛɛ yɛ ŋmɛlɛtswai fioo ko sɛɛ aloo yɛ gbi kroko nɔ koni nyɛtsa sanegbaa lɛ nɔ. Kɛji otee eŋɔɔ yɛ be kroko mli lɛ, ekolɛ obaasumɔ ni nyɛtsa saneyitso ni owie he yɛ be mli ni otee jɛmɛ klɛŋklɛŋ kwraa lɛ nɔ. Aloo obaanyɛ owie sanebimɔ ko ni te shi yɛ nyɛsɛɛ saramɔ lɛ naagbee mli Iɛ he.
HEGBEI NI BAA TRUKAA
6 Trukaa odaseyeli hu baanyɛ afee gbɛ kroko ni woɔ yibii yɛ mɔdɛŋ ni wɔbɔɔ akɛ wɔɔje shia Biblia mli nikasemɔ shishi lɛ mli. Wɔkɛ mɛi aŋkroaŋkroi ni miisumɔ ni amɛkase nii kpeɔ yɛ wɔ daa gbi shihilɛi amli. Wɔbaanyɛ wɔkɛ hiɛkpamɔ wiemɔi ni yɔɔ Reasoning wolo lɛ mli ni aka akwɛ lɛ ekomɛi aje wɔsanegbaa lɛ shishi, koni eye ebua wɔ ni wɔshiɛmɔ lɛ amɔ shi. Ni kaashashao shi akɛ oooha lɛ hegbɛ kɛha nikasemɔ yɛ shishijee kwraa akɛni mɔ lɛ yɛ he kroko ni ekolɛ wɔnaŋ hegbɛ ni wɔ diɛŋtsɛ wɔkɛ lɛ afee nikasemɔ lɛ hewɔ.
7 Ha ohiɛ ahi ohe nɔ yɛ hegbɛi ni onaa kɛhaa trukaa odaseyeli lɛ ahe, ni osaa ohe hu kɛtsɔ dɛhiɛmɔ woji kɛ woji tɛtrɛbii ni baaha miishɛɛ ni toibolɔ lɛ yɔɔ yɛ anɔkwale lɛ he lɛ aya hiɛ lɛ ni ooohiɛ lɛ nɔ. (Jaj. 11:1) Kɛji mɔ aŋkro ko na anɔkwale lɛ he miishɛɛ, ni ebɛ nyɛ asafo lɛ shikpɔŋkuku lɛ mli lɛ, no lɛ hemɔ edrɛs kɛ nibii krokomɛi ni he hiaa ni sa akɛ ole lɛ fɛɛ ni okɛha asafo ni yɔɔ he ni eyɔɔ lɛ koni mɔ ko anyɛ aya eŋɔɔ ni eyaye ebua lɛ.
8 Kaselɔ-feemɔ nitsumɔ lɛ bɛ kɛha mɛi fioo ko pɛ. Eyɛ kɛha mɛi fɛɛ ni yɔɔ asafo lɛ mli lɛ. Kɛ wɔha ehi wɔjwɛŋmɔ mli akɛ eji nitsumɔ ni akɛha Kristofoi akɛ amɛtsɔmɔ kaselɔi afeelɔi lɛ, no lɛ ebaawo wɔ hewalɛ koni wɔhiɛ ahi wɔhe nɔ yɛ hegbɛi ni wɔɔna ni wɔkɛaaje Biblia mli nikasemɔi ashishi lɛ ahe.