Hewalɛ Ni Nyɔŋmɔ Wiemɔ Lɛ Yɔɔ
1 Nyɔŋmɔ Wiemɔ lɛ yɛ hewalɛ. (Heb. 4:12) Abaanyɛ ana enɛ he odaseyeli ŋmɛnɛ, yɛ adesai akpekpei abɔ ni amɛshihilɛ etsake efee ekpakpa yɛ bɔ ni amɛkɛ nibii ni amɛkase yɛ Biblia lɛ mli lɛ etsu nii yɛ amɛshihilɛ mli amɛha lɛ hewɔ. Nakai nɔŋŋ eji anɔkwale yɛ klɛŋklɛŋ afii oha lɛ mli beni Yesu kaselɔi lɛ kɛ Nyɔŋmɔ Wiemɔ lɛ he nilee ha mɛi krokomɛi lɛ.—Rom. 12:2.
2 Bɔni afee ni gbɔmɛi ana Biblia mli tsɔɔmɔi ahe sɛɛ lɛ, ehe miihia ni amɛkpɛlɛ Biblia lɛ nɔ akɛ Nyɔŋmɔ Wiemɔ. (1 Tes. 2:13) Wɔkɛ hegbɛ baaha gbɔmɛi lɛ yɛ December mli koni amɛkase babaoo yɛ sɛɛnamɔ ni yɔɔ Biblia lɛ he yɛ be mli ni wɔkɛ New World Translation of the Holy Scriptures lɛ kɛ The Bible—God’s Word or Man’s? wolo lɛ haa mɛi fɛɛ ni yɔɔ wiemɔ lɛ he miishɛɛ yɛ wɔ shikpɔŋkuku lɛ mli lɛ.
3 Mɛni hewɔ otĩii saji ni yɔɔ miishɛɛ yɛ God’s Word wolo lɛ mli lɛ ekomɛi amli okwɛɛɛ? Emli saji ni ato naa lɛ baaha ole yitsei ni wieɔ naakpɛɛ nibii, saji ni akɛɛ eteɔ shi woɔ amɛhe, bɔ ni ekɛ jeŋ nilee kpaa gbee, gbalɛi, kɛ saji krokomɛi ahe lɛ. Mfonirii kɛ nɔkwɛmɔ nii pii yɛ mli. Ato hei ni atsɛ woji sɔrɔtoi amli saji kɛjɛ lɛ yɛ wolo lɛ naagbee. Emli saji nɛɛ baaha wɔnyɛ wɔkɛ wolo lɛ aha kɛ miishɛɛ diɛŋtsɛ, kɛ hekɛnɔfɔɔ kwraa akɛ ehe miihia ni gbɔmɛi ni yɔɔ wɔ shikpɔŋkuku lɛ mli lɛ anu sanekpakpa ni yɔɔ mli lɛ.
4 Te wɔɔfee tɛŋŋ wɔkɛ wolo nɛɛ atsu nii beni wɔkɛ shiatsɛ ni heɔ yeɔ akɛ Biblia lɛ ji Nyɔŋmɔ Wiemɔ lɛlɛŋ ekpe lɛ? Obaanyɛ otee mɔ lɛ miishɛɛ shi kɛtsɔ yitso 2, ni gbaa ta ni Biblia lɛ ewuu koni abaa yi lɛ he yinɔsane lɛ, loo yitso 14, ni woɔ nikanelɔ lɛ hewalɛ koni ekpɛlɛ yelikɛbuamɔ nɔ koni enu nɔ ni Biblia lɛ ji kɛha wɔ ŋmɛnɛ lɛ shishi jogbaŋŋ lɛ. Ŋmalɛi ni yɔɔ yitso 14 lɛ kanemɔ baama nɔ mi aha shiatsɛ lɛ akɛ osanegbaa lɛ damɔ Biblia lɛ nɔ.
5 Mɛi pii kpooɔ akɛ amɛaakpɛlɛ Biblia lɛ nɔ akɛ eji Nyɔŋmɔ Wiemɔ yɛ Kristendom jeŋba lɛ hewɔ. Abaanyɛ akɛ yitso 3. ‘Biblia lɛ Apasa Shieŋtsɛ’ lɛ atsu nii yɛ gbɛ ni mɔɔ shi jogbaŋŋ nɔ yɛ biɛ.
6 Kɛ wɔkane wɔ Biblia lɛ, ekolɛ shiatsɛ lɛ baanyɛ ayoo bɔ ni wiemɔ ni akɛtsu nii yɛ New World Translation lɛ mli lɛ mli ka shi faŋŋ ha lɛ. Aloo ekolɛ wɔbaana akɛ shiatsɛ lɛ yɛ wɔ wiemɔ lɛ he miishɛɛ moŋ, shi ebɛ Biblia. Kɛ nɛkɛ sane lɛ ji lɛ, wɔbaanyɛ wɔtsɔɔ nibii ni hi jogbaŋŋ yɛ Biblia ni wɔkɛtsuɔ nii lɛ he lɛ, kɛ yiŋtoo hewɔ ni wɔsumɔɔ no fe ekrokomɛi lɛ. Kɛfata he lɛ, wɔbaanyɛ wɔtsɔɔ lɛ ‘Biblia mli Wiemɔi ni Ato Naa’ ni yeɔ buaa ni haa anaa ŋmalɛi komɛi ni ataoɔ lɛ. Agbɛnɛ hu ‘Biblia Mli Saji Otii Kɛha Sanegbaa’ ni yɔɔ Biblia lɛ sɛɛ gbɛ lɛ hu baanyɛ aye abua mɛi ni yɔɔ wiemɔ lɛ he miishɛɛ lɛ koni amɛna hetoo amɛha saji pii ni afɔɔ bimɔ lɛ.
7 Yehowa etsɔ Biblia lɛ nɔ eha ale bɔ ni ekɛ adesai yeɔ haa, ni enɛ eha wɔle esu kɛ baŋ ni yɔɔ naakpɛɛ lɛ. Eba akɛ wɔkɛ New World Translation lɛ kɛ God’s Word wolo lɛ aaatsu nii yɛ gbɛ ni mɔɔ shi nɔ koni wɔkɛye wɔbua mɛi krokomɛi ni amɛkase Yehowa, kɛ hewalɛ ni e-Wiemɔ lɛ yɔɔ lɛ he nii.—2 Kor. 10:4.