Ni Wɔɔye Wɔbua Mɛi Krokomɛi ni Amɛhiɛ Asɔ Sɛɛnamɔ ni Yɔɔ Wɔwoji lɛ Ahe
1 “Nyɔŋmɔ wiemɔ hiɛ ka ni eyɛ hewalɛ.” (Heb. 4:12) Akɛni wɔ Biblia kasemɔ woji lɛ yeɔ buaa mɛi koni amɛna Nyɔŋmɔ Wiemɔ lɛ mli hewalɛ lɛ he sɛɛ hewɔ lɛ, wɔkɛtsuɔ nii kɛkanyaa miishɛɛ ni aaana yɛ Biblia lɛ mli yɛ be mli ni wɔyeɔ odase trukaa loo wɔyaa mɛi aŋɔɔ yɛ shia kɛ shia lɛ.
2 Woji ni akɛbaaha yɛ January ji woji ni hiɛ baafai 192 ni akala yɛ wolo ni hiɛ tsuɔ nɔ, aloo wolo fɛɛ wolo ni afee dani 1980 shɛ. Kɛ woji ni tamɔ enɛɛmɛi yɛ nyɛ asafo lɛ mli lɛ, no lɛ okɛ Maŋtsɛyeli lɛ he shiɛmɔ-wiemɔ ni kɛo baaya ayabote wiemɔ pɔtɛɛ ko ni yɔɔ wolo ni okɛtsuɔ nii lɛ mli lɛ asaa ohe. Mɛɛ gbɛ nɔ abaatsɔ afee enɛ?
3 Gbɛ ni Atsɔɔ nɔ Asaa He: Kɛ obaaje shishi lɛ, halamɔ wiemɔ ni ekolɛ mɛi ni yɔɔ tsuijurɔ yɛ oshikpɔŋkuku lɛ mli lɛ baanya he kɛjɛ wolo ni okɛtsuɔ nii lɛ mli. No sɛɛ lɛ, susumɔ sane ni ba nyɛsɛɛ nɛɛ lɛ he loo sane ni mɔ fɛɛ mɔ gbaa he sane lɛ he ni obaanyɛ okɛ shiatsɛ lɛ agba he sane kuku dani ogbala ejwɛŋmɔ kɛya sane ni akala ni ohala lɛ nɔ. Ekolɛ ŋmalɛ ko yɛ ni atsɛ ni aŋmalako emli wiemɔi lɛ loo aŋmala emli wiemɔi lɛ ni ooonyɛ okane kɛjɛ Biblia lɛ mli loo kɛjɛ wolo lɛ mli tɛɛ, koni okɛfi owiemɔi lɛ asɛɛ. Na jwɛŋmɔ ni ja ni okɛ wolo lɛ aha ni ofee shia Biblia kasemɔ gbɛjianɔtoo ni aheee nɔ ko lɛ he nɔkwɛmɔ nɔ otsɔɔ lɛ. Bɔɔ mɔdɛŋ ni oshi sanebimɔ ko loo sane ni ebaasusu he ko oha lɛ ni obaanyɛ odamɔ nɔ okɛfee sɛɛsaramɔ.
4 Asafoi babaoo yɛ Your Youth—Getting the Best Out Of It kɛ Tsɔɔlɔ Kpele lɛ Toiboo woji lɛ fioo komɛi amrɔ nɛɛ. Kɛ woji nɛɛ eko yɛ lɛ, mɛni hewɔ okɛ sane ko esaaa ohe koni okɛ obalaŋtai ni okɛkpeɔ yɛ shikpɔŋkuku lɛ mli lɛ agba he sane? Wo amɛ hewalɛ ni amɛkane woji kpakpai nɛɛ ateŋ ekome. Kɛ okɛ Anɔkwale ni kɛ Mɔ Yaa Naanɔ Wala Mli Lɛ miiha lɛ, no lɛ obaanyɛ okɛ gbɛ ni atsɔɔ yɛ yiteŋgbɛ lɛ atsu nii koni okɛsaa ohe ni okɛ lɛ agba Biblia shishijee tsɔɔmɔi abɔ fɛɛ ni asusu he yɛ Biblia kasemɔ wolo ni hi jogbaŋŋ ni okɛaatsu nii nɛɛ mli lɛ he sane.
5 Okɛ Nyɔŋmɔ Sɛɛ Gbɛ ni Adesai Taoɔ lɛ aha: Obaanyɛ oje sanegbaa shishi kɛtsɔ jwɛŋmɔ ni ooogbala kɛaaya adafitswaa sane ko ni maa bɔ ni jamɔ kɛ ehe ewo je lɛŋ saji amli eha lɛ nɔ mi loo yɛ gbɛ kroko nɔ lɛ etsɔɔ bɔ ni jamɔ ena gbɔmɛi ashihilɛi anɔ hewalɛ eha lɛ nɔ.
No sɛɛ lɛ bi lɛ sane tamɔ nɛkɛ akɛ:
◼ “Te osusuɔ bɔ ni Nyɔŋmɔ kwɛɔ jamɔŋ gbɛjianɔtoi ni naa je lɛŋ saji anɔ hewalɛ ŋmɛnɛ lɛ he ohaa tɛŋŋ? [Ha ni eha hetoo.] Ani eeefee bo naakpɛɛ akɛ ooole akɛ jamɔi sɔrɔtoi nɛɛ fɛɛ ashishitoo tsɔɔmɔi lɛ ji nɔ kome too ni akɛ esoro nomɛi kwraa yɛ Biblia mli tsɔɔmɔi lɛ ahe?” No sɛɛ lɛ tsɔɔmɔ lɛ emli saji ni ato naa lɛ, ni ogbala mli kuku otsɔɔ lɛ akɛ, kɛji mɔ ko kɛ ehe woɔ jamɔ mli loo efeee nakai po lɛ, jamɔ mli saji ni mli wa lɛ naa eshihilɛ nɔ hewalɛ. Tsɔɔmɔ lɛ akɛ kɛ ekase ele nɔ hewɔ ni Nyɔŋmɔ sɛɛ gbɛ ni adesai taoɔ lɛ eha ana gbɛi sɔrɔtoi babaoo ni ejie mɛi kɛjɛ anɔkwa jamɔ ni aaayoo lɛ he lɛ, ehe baaba sɛɛnamɔ aha lɛ.
6 Bei komɛi lɛ ebaahi akɛ okɛ woji tɛtrɛbii loo dɛhiɛmɔ wolo ko aaaha. Wɔyɛ yiŋtoo hewɔ ni wɔɔtsɔɔ miishɛɛ ni wɔfee ekaa yɛ bɔ ni wɔfeɔ wɔwoɔ mɛi krokomɛi ahewalɛ ni amɛkane woji nɛɛ koni anyɛ awaje amɛ lɛ he ni amɛnine ashɛ hewalɛ ni Nyɔŋmɔ Wiemɔ lɛ naa yɛ amɛshihilɛi amli lɛ nɔ kɛtsɔ no gbɛtsɔɔmɔ sɛɛ ni amɛaanyiɛ lɛ nɔ.