Osɛɛ ni Oooku ni Oyatswa Hiɛsɔɔ Oma Shi

¹ Sɛɛsaramɔi ni shishinumɔ yɔɔ mli lɛ yaa nɔ ekanyaa shiatsɛ lɛ dalɛ lɛ fiofio ni eyeɔ ebuaa lɛ ni eda ebatsɔ heyelilɔ. Mɛni ji ŋaawoi komɛi ni hiɔ kɛ nitsumɔ ni esa akɛ aha ehi jwɛŋmɔ mli be mli ni akuɔ sɛɛ ayaa mɛi ni etsɔɔ miishɛɛ lɛ aŋɔɔ?

² Klɛŋklɛŋ kwraa lɛ, saamɔ ohe jogbaŋŋ. Esa akɛ enɛ aje shishi yɛ klɛŋklɛŋ saramɔ lɛ nɔ. Yɛ mɛɛ gbɛ nɔ? Kɛtsɔ miishɛɛ kpo ni ajie atsɔɔ lɛ he saji ni ja ni aaaŋmala yɛ woji amli lɛ nɔ. Ŋmaa shiatsɛ lɛ gbɛi, sane ni asusu he lɛ, bɔ ni efee enii eha, kɛ wolo fɛɛ ni oha lɛ lɛ yɛ wolo nɔ. No sɛɛ lɛ saamɔ okwɛ oshia-kɛ-shia kadimɔ wolo lɛ nɔ dani oya, ni agbɛnɛ okɛ sɔlemɔ asusu nɔ ni obaakɛɛ he.

³ Agbɛnɛ ófee klalo. Mɛni obaanyɛ okɛɛ? Kɛ oshi sanebimɔ ko oha shiatsɛ lɛ yɛ oklɛŋklɛŋ saramɔ be lɛ mli lɛ, no lɛ obaanyɛ otsa nakai saneyitso lɛ nɔ kɛ oku osɛɛ otee. Akɛ nɔkwɛmɔ nɔ lɛ, kɛ nyɛgba jɔɔmɔi ni Nyɔŋmɔ Maŋtsɛyeli lɛ kɛbaa­ba lɛ he sane yɛ klɛŋklɛŋ saramɔ be lɛ mli lɛ, no lɛ obaanyɛ otee sanebimɔ lɛ shi akɛ “Mɛni hewɔ ni Nyɔŋmɔ ŋmɛɔ efɔŋ feemɔ gbɛ?”

Kɛ oku osɛɛ otee ni ojie ohe kpo sɛɛ lɛ, obaanyɛ okɛɛ akɛ:

◼ “Beni wɔgba sane nyɛsɛɛ nɛɛ lɛ, wɔsusu nɔ hewɔ ni suɔmɔ Nyɔŋmɔ lɛ ŋmɛɔ efɔŋ feemɔ babaoo gbɛ ŋmɛnɛ lɛ he. Ani osusu he ekoŋŋ?” [Ŋmɛɛ gbɛ ni ewie.] Ani osusuɔ akɛ Nyɔŋmɔ jwɛŋɔ adesai ahe lɛlɛŋ? [Ŋmɛɛ gbɛ ni ewie.] Bo lɛ susumɔ nɔ ni Biblia lɛ kɛɔ yɛ Yohane 3:16 lɛ he okwɛ.” Beni okane kuku lɛ sɛɛ lɛ, obaanyɛ ogbala ejwɛŋmɔ kɛya Anɔkwale ni kɛ Mɔ Yaa Naanɔ Wala Mli lɛ yitso 8 lɛ fai pɔtɛɛ komɛi anɔ, ni haa anaa yiŋtoi ahewɔ ni Nyɔŋmɔ ŋmɛɔ efɔŋ feemɔ gbɛ ŋmɛnɛ lɛ.

⁴ Sanebimɔ kroko hu ni taa mɔ jwɛŋmɔŋ ni obaanyɛ oshi yɛ oklɛŋklɛŋ saramɔ be lɛ mli ji: “Kɛ Nyɔŋmɔ to eyiŋ akɛ gbɔmɔ ahi shi kɛya naanɔ lɛ, mɛni hewɔ ni gbɔmɛi gbɔɔ ni amɛgboiɔ?” Kɛ oku osɛɛ otee lɛ, obaanyɛ otsɔɔ amɛ Biblia lɛ hetoo ni ekɛhaa yɛ nakai sanebimɔ lɛ he taakɛ anaa yɛ Romabii 5:12 lɛ. Beni okane ŋmalɛ lɛ ogbe naa lɛ, gbalamɔ jwɛŋmɔ kɛya Is This Life All There Is wolo lɛ baafa 35 lɛ klɛŋklɛŋ kuku ni tsɔɔ nɔ hewɔ pɔtɛɛ ni gbɔmɔ gbɔɔ ni egboɔ lɛ nɔ.

⁵ Kɛ nyɛsusu sane ni tsɔɔ gbɛi ni abaatsɔ nɔ ayɔse anɔkwale jamɔ lɛ he yɛ oklɛŋklɛŋ saramɔ be lɛ mli ni okɛ Nyɔŋmɔ Sɛɛ Gbɛ ni Adesai Taoɔ wolo lɛ ha lɛ, no lɛ sanebimɔ ni sa ni obaanyɛ oha osɛɛsaramɔ lɛ adamɔ nɔ lɛ baanyɛ afee enɛ akɛ: “Te fee tɛŋŋ ni jamɔi babaoo ba?” Kɛ oku osɛɛ otee lɛ, obaanyɛ owie otii pɔtɛɛ komɛi ni yɔɔ nakai wolo lɛ yitso 2 lɛ ahe.

⁶ Ŋaawoo wiemɔ ko nɛ. Kɛ oku osɛɛ otee eŋɔɔ lɛ kwɛmɔ saji ni obiɔ lɛ lɛ jogbaŋŋ. Ni ooobi sane akɛ “Ani okane sane ni mishi miha bo lɛ?” aloo “Ani okaiɔ mi?” aloo “Ani okaiɔ nɔ ni wɔsusu he nyɛsɛɛ ko beni miba biɛ lɛ?” kɛ shiatsɛ lɛ woɔ shihilɛ ko ni mli wa shishi. Bei pii lɛ sanebimɔi ni tamɔ nakai lɛ wooo yibii kpakpai. Yɛ gbɛ kroko nɔ lɛ, jiemɔ naanyobɔɔ su kpo, feemɔ tswãa, ni ofee sane lɛ kuku. Sui ni tamɔ enɛɛmɛi baaha shɛɛ sane lɛ aya hiɛ.

⁷ Abaanyɛ akɛ gbɛi ni tamɔ nɛkɛ kɛ ekrokomɛi atsu nii ni akɛtee hiɛsɔɔ shi yɛ mɛi ni yɔɔ he miishɛɛ lɛ atsuii amli. Mɛni hewɔ bo diɛŋtsɛ lɛ okɛ oti ko emaaa ohiɛ akɛ kɛ hoo lɛ obaafee sɛɛsaramɔ kome otsi fɛɛ otsi? Okɛ ŋaawoi ni hiɔ kɛ nitsumɔ ni akɛha yɛ yiteŋgbɛ lɛ atsu nii, ni otao ni obɛŋkɛ shiɛlɔi ni he esa ni baanyɛ aye abua bo lɛ. Omiishɛɛ lɛ baafa yɛ be mli ni otswaa omaa klɛŋklɛŋ miishɛɛ lɛ nɔ kɛtsɔ sɛɛsara­mɔi ni mɔɔ shi lɛ nɔ.