Te Aaafee Tɛŋŋ ni Amɛaanu akɛ Ja Wɔyasara Amɛ?
1 “Te aaafee tɛŋŋ ni amɛaanu kɛ shiɛlɔ ko bɛ lɛ?” (Rom. 10:14) Yɛ anɔkwale mli lɛ, te amɛaafee tɛŋŋ amɛnu anɔkwale lɛ shishi akɛ ja wɔfee sɛɛsaramɔi ni mɔɔ shi? Ebaabi ni asara shiatsɛ ni wɔnyɛ wɔkɛ lɛ gba Maŋtsɛyeli shɛɛ sane ekoŋŋ. Wɔbaanyɛ wɔdi wɔ shishijee sanegbaa lɛ sɛɛ kɛ Ŋmalɛi krokomɛi ni jɛ woji bibii lɛ fɛɛ eko ni wɔkɛha yɛ nyɔŋ nɛɛ mli ni no baanyɛ aha wɔfee Biblia mli nikasemɔ ni yeɔ omanye lɛ sɛɛ.
2 Kɛ okɛ “A Secure Future—How You Can Find It” wolo bibioo lɛ ha lɛ, obaanyɛ oje sanegbaa ni baaha ofee Biblia mli nikasemɔ shishi yɛ nɛkɛ gbɛ nɔ. Be mli ni okɛ wolo lɛ sɛɛ tsɔɔ lɛ lɛ, obaanyɛ obi akɛ:
◼ “Ani obaasumɔ ni ohi shi yɛ jeŋ ko ni ama wɔsɛɛ be ni yɔɔ shweshweeshwe nɔ mi aha bo kɛ oweku lɛ mli? [Ŋmɛɛ gbɛ ni ewie. No sɛɛ lɛ gbelemɔ kɛya kuku 2.] Wɔ fɛɛ wɔmiishwe enɛ, eyɛ mli akɛ mɛi pii jeɔ anɔkwale ni eji lɛ he ŋwane. Yɛ Nyɔŋmɔ ni woɔ shi akɛ ebaaha enɛ aba mli lɛlɛŋ lɛ gbɛfaŋ lɛ, enɛ feemɔ waaa.” Kanemɔ Yesaia 32:17, 18 taakɛ aŋma emli wiemɔi yɛ kuku 2 lɛ, loo kanemɔ kɛjɛ o-Biblia lɛ mli. Yaa nɔ, ni otsɔɔ mli akɛ mɛi yɛ je lɛŋ he fɛɛ he ni amɛtsɔ hiɛ momo amɛmiina miishɛɛ kɛ jwɛŋmɔŋ toiŋjɔlɛ ni kɛ hiɛnɔkamɔ ni ma shi shiŋŋ kɛha wɔsɛɛ shihilɛ lɛ baa lɛ. Nyɛsusua Ŋmalɛ mli saji ni yɔɔ kuku 3 lɛ ahe, koni no sɛɛ lɛ otsɔɔ bɔ ni wolo bibioo lɛ kasemɔ baanyɛ aye abua shiatsɛ lɛ ni ekase babaoo. Kɛ mɔ lɛ yɛ he miishɛɛ lɛ, too gbɛjianɔ kɛha sɛɛsaramɔ oya nɔŋŋ koni atsa sanegbaa lɛ nɔ.
3 Kɛ oku osɛɛ otee be mli ni okɛ “Is There a God Who Cares?” wolo bibioo lɛ eha sɛɛ lɛ, ekolɛ nɔ ko tamɔ nɛkɛ baafee nɔ ni baamɔ shi.
◼ “Beni mibasara bo nyɛsɛɛ lɛ, wɔsusu sane ko ni ji akɛ, Ani Nyɔŋmɔ ko Yɛ Ni Susuɔ Mɔ He? lɛ he. Ani osusuɔ akɛ Nyɔŋmɔ jwɛŋɔ wɔhe bɔ ni sa ni ekɛ nɔnaa kɛ awuiyeli aaaba naagbee? [Kɛ mɔ lɛ ha hetoo sɛɛ lɛ, gbelemɔ kɛya kuku 32, ni otsa nɔ.] Nyɔŋmɔ ewo shi akɛ ekɛ jeŋ hee ni gbɔmɛi kpakpai baahi mli yɛ toiŋjɔlɛ mli baaye jeŋ fɔŋ nɛɛ najiaŋ. [Kanemɔ Lala 37:11.] Bo kɛ mi fɛɛ baanyɛ ana wala ni baaba yɛ nakai jeŋ hee lɛ mli lɛ mli ŋɔɔmɔ kɛ wɔhe Biblia lɛ wɔye ni wɔkɛ emli ŋaawoo tsu nii lɛ.” Tsɔɔmɔ gbɛjianɔ ni wɔto koni wɔkɛye wɔbua mɛi kɛha Biblia lɛ kasemɔ lɛ mli otsɔɔ lɛ.
4 Kɛ ofee sɛɛsaramɔ beni okɛ “Naa! Miifee Nii Fɛɛ Ehee” wolo bibioo lɛ eha sɛɛ lɛ, obaanyɛ oje shishi kɛtsɔ mfoniri ni yɔɔ sɛɛ lɛ ni okɛaatsɔɔ lɛ nɔ koni obi sane akɛ:
◼ “Te osusuɔ akɛ shihilɛ yɛ jeŋ ni eye emuu mli baatamɔ aha tɛŋŋ? [Bo shiatsɛ lɛ wiemɔ toi.] Nɔ ni onaa yɛ mfoniri nɛɛ mli lɛ jeee nɔ ko ni aka yiŋ asusu he kɛkɛ; edamɔ shiwoi ni ma shi shiŋŋ ni atsɔɔ yɛ Biblia mli lɛ nɔ. [Kanemɔ Kpojiemɔ 21:4 kɛ Lala 37:11, 29.] Masumɔ ni matsɔɔ bɔ ni bo kɛ oweku lɛ baanyɛ ana jɔɔmɔ ni tamɔ enɛ lɛ mli ŋɔɔmɔ lɛ mli.” Tsa sanegbaa lɛ nɔ, yɛ bɔ ni shiatsɛ lɛ ha hetoo eha lɛ naa, koni ofee Biblia mli nikasemɔ.
5 Kɛ wɔna mɛi ni hiɛ tsui kpakpa ni miitao anɔkwale lɛ, wɔjieɔ wɔ anɔkwa suɔmɔ kpo wɔtsɔɔ kɛtsɔɔ wɔ sɛɛ ni wɔkuɔ kɛyaa koni wɔyaye wɔbua amɛ ni amɛkɛ nɔ ni amɛnu lɛ atsu nii lɛ nɔ. Wɔkɛ anɔkwalei krɔŋkrɔŋi ni akɛwo wɔdɛŋ lɛ tsuɔ nii kɛhaa wɔ kɛ mɛi ni boɔ toi lɛ anaanɔ jɔɔmɔ.—1 Tim. 4:16.