Amɛkpaaa Odaseyeli
1 Wɔ gbɛi, Yehowa Odasefoi lɛ, haa aleɔ mɛi ni wɔji ni etsɔɔ nɔ ni wɔfeɔ hu. Wɔyeɔ wɔ-Nyɔŋmɔ, Yehowa agbojee lɛ he odase. (Yes. 43:10, 12) Esa akɛ mɔ fɛɛ mɔ ana nɛkɛ odaseyeli nɛɛ mli gbɛfaŋnɔ kɛji eeetsɔ asafo lɛ mli nyo. Wɔtsuɔ odaseyeli nitsumɔ lɛ kɛtsɔɔ wɔ maŋshiɛmɔ sɔɔmɔ lɛ nɔ titri, ni nɔ ni fata he ji shia-kɛ-shia yaa, gbɛjegbɛi anɔ nitsumɔ, sɛɛsaramɔ yaa, kɛ shia Biblia mli nikasemɔi afeemɔ. Awoɔ wɔ fɛɛ hewalɛ yɛ gbɛ ni ja nɔ akɛ wɔmia wɔhiɛ ni wɔna mli gbɛfaŋnɔ kɛmɔ shi.—1 Kor. 15:58.
2 Shi, asafo lɛ mli bii lɛ ekomɛi yɛ ni nɔ ko bibioo pɛ amɛbaanyɛ amɛtsu. Ekolɛ helai ni mli wawai loo gbɔjɔmɔi komɛi baanyɛ atsĩ amɛnaa. Wekumɛi ni teɔ shi woɔ amɛ lɛ baanyɛ afee gbɛtsii nii ni dara. Fɔlɔ ni heee yeee hu baanyɛ atsĩ ebi ni edako lɛ naa. Ekolɛ aŋkroaŋkroi ni yɔɔ hei ni etse ehe banee lɛ baanu he akɛ etamɔ nɔ ni amɛnyɛŋ amɛye odase kwraa. Hiɛ ni gboɔ, ni yɔɔ mɛi komɛi ahe lɛ baanyɛ aha mɛi ni sheɔ gbeyei lɛ ashashao shi. Ekolɛ shiɛlɔi komɛi ni naa amɛhe yɛ shihilɛi nɛɛ kɛ ekrokomɛi ni tamɔ nakai mli lɛ baanu he akɛ amɛshɛɛɛ Kristofoi ataomɔ nii lɛ ahe ejaakɛ nɔ ni amɛnyɛɔ amɛtsuɔ lɛ shɛɛɛ nɔ ni mɛi krokomɛi tsuɔ lɛ he kwraa, ni eshɛɛɛ nɔ ni amɛtaoɔ amɛfee lɛ hu he. Yiŋtoo ko bɛ ni amɛaadamɔ nɔ amɛbu amɛ diɛŋtsɛ amɛnyɛmɔi lɛ akɛ nɔ ko bibioo. (Gal. 6:4) Amɛbaanyɛ amɛna miishɛjemɔ kɛjɛ le ni amɛle akɛ kɛji amɛfee bɔ fɛɛ bɔ ni amɛaanyɛ yɛ shihilɛ fɛɛ shihilɛ ni amɛbaaje mli lɛ, Yehowa naa he miishɛɛ lɛ mli.—Luka 21:1-4.
3 Ni Aaatao Gbɛ ni Abaatsɔ nɔ Akɛ He Awo Mli: Agba niiashikpamɔi pii ni tsɔɔ bɔ ni aŋkroaŋkroi ni yɔɔ jaramɔ shihilɛi amli lɛ eŋmɛɛɛ gbɛ ni gbɛtsii nii atsi amɛnaa ni amɛkaye odase. Beni amɛkɛ amɛ diɛŋtsɛ amɛjwɛŋmɔ tsuɔ nii lɛ, amɛna gbɛi sɔrɔtoi ni amɛaatsɔ nɔ amɛye odase trukaa. Mɛi komɛi ni esa akɛ amɛhi shia be fɛɛ be lɛ kɛ woloŋmaa etsu nii (aloo tɛlifon, kɛji amɛyɛ eko) ni amɛkɛgbele shinaa wulu agbo naa kɛha odaseyeli. Amɛbuɔ mɔ fɛɛ mɔ ni basaraa amɛ lɛ akɛ mɔ ko ni baabo wiemɔ lɛ toi. Eyɛ mli akɛ ekolɛ yoogbayoo ni yɔɔ weku ni teɔ shi woɔ lɛ lɛ nyɛŋ aye odase yɛ shia moŋ, shi eŋɔɔ hegbɛ ni enaa lɛ ni ekɛ ekutsoŋbii loo mɛi krokomɛi ni ekɛkpeɔ yɛ edaa gbi shihilɛ mli nifeemɔi amli lɛ wieɔ.
4 Ekolɛ fɔlɔ ni heee yeee lɛ baatsi ebi ni edako lɛ naa akɛ ekɛ ehe akawo wɔ maŋ odaseyeli lɛ mli. Yɛ nɔ najiaŋ ni eeekpɛlɛ no nɔ akɛ gbɛtsii nii ni enyɛɛɛ nɔ eye lɛ, ebaanyɛ ebu eklasbii kɛ etsɔɔlɔi lɛ akɛ lɛ diɛŋtsɛ “eshikpɔŋkuku,” koni enyɛ eye amɛ odase jogbaŋŋ, ní ekolɛ ekɛ amɛ afee Biblia mli nikasemɔ po. Mɛi ni yɔɔ hei ni etse ehe banee lɛ ateŋ mɛi pii enyɛ amɛkɛ amɛhe ewo mli kɛtsɔ woji aŋmalamɔ nɔ. Mɛi ni Kristofoi a-ekaa tsirɛɔ amɛ lɛ baatao gbɛ ni amɛaatsɔ nɔ ni amɛkafee “hejɔlɔi aloo mɛi ni wooo yibii yɛ wɔ-Nuŋtsɔ Yesu Kristo he nilee lɛ gbɛfaŋ.”—2 Pet. 1:8.
5 Yɛ gbɛfaŋnɔ ni wɔnaa yɛ odaseyeli nitsumɔ lɛ mli lɛ gbɛfaŋ lɛ, Yehowa efo tɛ kome efɔ shi eha mɔ fɛɛ mɔ, ni ji akɛ, esa akɛ wɔsɔmɔ kɛ ‘wɔsusuma fɛɛ.’ (Kol. 3:23) Eyɛ mli akɛ bei abɔ ni wɔyeɔ kɛ nɔ ni wɔnyɛɔ wɔtsuɔ lɛ baafee sɔrɔtoi moŋ, shi nɔ kome lɛ nɔŋŋ yɔɔ sɛɛ ni kanyaa wɔ—no ji anɔkwa suɔmɔ ni jɛɔ “tsui muu lɛ fɛɛ” mli lɛ. (1 Kron. 28:9; 1 Kor. 16:14) Kɛji wɔmiifee bɔ fɛɛ ni wɔɔnyɛ lɛ, no lɛ wɔnaŋ yiŋtoo ni wɔɔdamɔ nɔ wɔnu he akɛ wɔhemɔkɛyeli miitã, aloo wɔji asafo lɛ mli bii ni he bɛ sɛɛnamɔ akɛni bɔ ni wɔnyɛɔ wɔtsuɔ lɛ faaa hewɔ. Taakɛ Paulo ji lɛ, wɔbaanyɛ wɔkɛ anɔkwayeli awie akɛ ‘wɔshiuuu nii ni he yɔɔ sɛɛnamɔ lɛ eko nɔ, shi moŋ wɔjaje wɔtsɔɔ yɛ faŋŋ mli.’—Bɔf. 20:20.