Shiɛmɔ—Hegbɛ ni Woo Yɔɔ Mli
1 Sanekpakpa shiɛmɔ lɛ ji hegbɛ ni woo yɔɔ mli ni Yehowa kɛha wɔ. (Rom. 15:16; 1 Tim. 1:12) Ani nakai ji bɔ ni onaa lɛ? Esaaa akɛ aŋmɛɔ gbɛ koni be ni hoɔ eyaa loo hefɛoyeli ni mɛi krokomɛi kɛbaa lɛ baa bɔ ni ehe hiaa ha lɛ shi yɛ wɔhiɛ. Nyɔŋmɔ gbɛi ni aaakã mɔ nɔ lɛ ji woo ni akɛha mɛi fioo pɛ. Te wɔɔfee tɛŋŋ wɔha wɔhiɛ asɔ hegbɛ ni tamɔ nɛkɛ lɛ babaoo?
2 Maŋtsɛyeli shɛɛ sane lɛ shiɛmɔ haaa wɔsa je lɛ hiɛ. Mɛi pii feɔ shikpilikpii yɛ wɔ nitsumɔ lɛ he loo ejeee amɛhe sane ko. Mɛi komɛi yeɔ he fɛo ni amɛteɔ shi amɛwoɔ. Nanemɛi nitsulɔi, akutsoŋbii, loo weku mlibii po baanyɛ amɛkɛ shitee-kɛ-woo ni tamɔ nɛkɛ aba. Ekolɛ wɔbaafee tamɔ mɛi ni alaka amɛ kɛ kwashiai yɛ amɛhiɛ. (Yoh. 15:19; 1 Kor. 1:18, 21; 2 Tim. 3:12) Amɛto saji ni amɛwieɔ lɛ ahe gbɛjianɔ koni amɛkɛba ekãa ni wɔfeɔ lɛ shi ni eje wɔnijiaŋ wui ni wɔŋmɛɛ wɔ hegbɛ ni woo yɔɔ mli lɛ he. Satan ni “eshwila mɛi ni heee yeee lɛ ajwɛŋmɔi lɛ . . ., koni . . . anunyam sanekpakpa lɛ la ni tsoɔ lɛ akakpɛ miiha amɛ” lɛ teeɔ saji ni ejaaa shi. (2 Kor. 4:4) Te ofeɔ onii yɛ he ohaa tɛŋŋ?
3 Ehe miihia ni wɔha ahi wɔjwɛŋmɔ mli akɛ Maŋtsɛyeli he sane ni wɔshiɛɔ lɛ ji nitsumɔ ni he hiaa fe fɛɛ ŋmɛnɛ ni wɔteŋ mɔ fɛɛ mɔ baanyɛ atsu. Wɔhiɛ yiwalaheremɔ he shɛɛ sane ko ni anyɛŋ atsɔ gbɛ kroko nɔ akɛha. (Rom. 10:13-15) Nyɔŋmɔ nɔkpɛlɛmɔ ni ána ni jeee gbɔmɔ nɔ̃, lɛ ji nɔ ni he hiaa. Jwɛŋmɔ ni ejaaa ni je lɛ hiɛ yɛ wɔ shiɛmɔ nitsumɔ lɛ he lɛ etsiii wɔnaa koni wɔkɛ ekãa akajaje sanekpakpa lɛ wɔtsɔɔ.—Bɔf. 4:29.
4 Yesu buɔ hegbɛ ni ena akɛ efee e-Tsɛ suɔmɔnaa nii lɛ waa. (Yoh. 4:34) Etu ehe eha shiɛmɔ nitsumɔ lɛ kwraa ni eŋmɛɛɛ gbɛ ni nibii ni jieɔ mɔ jwɛŋmɔ yɛ nɔ loo shitee-kɛ-wolɔi aje enijiaŋ wui. Maŋtsɛyeli shɛɛ sane lɛ shiɛmɔ ye klɛŋklɛŋ gbɛhe yɛ eshihilɛ mli daa. (Luka 4:43) Áfa wɔ ni wɔkase enɔkwɛmɔ nɔ lɛ. (1 Pet. 2:21) Wɔsɔmɔɔ akɛ “Nyɔŋmɔ hefatalɔi-nitsulɔi” yɛ nakai feemɔ mli. (1 Kor. 3:9) Ani wɔkɛ hegbɛ nɛɛ miitsu nii babaoo kɛmiimɔ shi? Ani wɔtaoɔ shihilɛi komɛi ní wɔkɛ sanekpakpa lɛ aha mɛi krokomɛi tɛɛ kɛ trukaa fɛɛ hu? Akɛ Yehowa Odasefoi lɛ, esa akɛ wɔfee klalo daa akɛ ‘wɔɔjaje egbɛi lɛ wɔtsɔɔ yɛ faŋŋ mli.’—Heb. 13:15.
5 Gbɛfaŋnɔ ni wɔnaa yɛ shiɛmɔ nitsumɔ lɛ mli lɛ damɔ wɔ subaŋ nɔ titri. Ani wɔhiɛ sɔɔ nɔ fɛɛ nɔ ni Yehowa efee eha wɔ lɛ waa diɛŋtsɛ? Ani wɔna suɔmɔ wɔha Yehowa yɛ wɔtsuii amli ní kanyaa wɔ ni wɔtsu nɔ fɛɛ nɔ ni wɔɔnyɛ yɛ esɔɔmɔ lɛ mli? Jɔɔmɔi ni wɔnaa mli ŋɔɔmɔ amrɔ nɛɛ kɛ wɔsɛɛ be he shiwoo ni Yehowa kɛha lɛ anɔjwɛŋmɔ yeɔ ebuaa ni wɔnáa suɔmɔ babaoo kɛhaa wɔ Bɔlɔ lɛ. Suɔmɔ ni tamɔ nɛkɛ kanyaa wɔ koni wɔtsu nii—Maŋtsɛyeli shiɛmɔ lɛ ni wɔɔfi shi yɛ mli ni wɔkɛ wɔhe aaawo mli daa ni efa ni efee nɔ ni hi hu bɔ ni wɔshihilɛi aaaŋmɛ gbɛ. Ekãa ni wɔjieɔ lɛ kpo wɔtsɔɔ lɛ wieɔ suɔmɔ ni wɔyɔɔ kɛhaa Yehowa kɛ wɔnaanyo gbɔmɔ lɛ he.—Mar. 12:30, 31.
6 Wɔtsɔɔ bɔ ni wɔbuɔ nɔ ko akɛ ejara wa waa lɛ kɛtsɔɔ nɔ ni wɔkɛfeɔ kɛ nɔ ni wɔwieɔ yɛ he lɛ nɔ. Ani wɔbuɔ hegbɛ ni wɔna, akɛ wɔshiɛ Maŋtsɛyeli lɛ he sane wɔtsɔɔ lɛ, akɛ ejara wa lɛlɛŋ? Ani wɔwoɔ wɔ shiɛmɔ lɛ hiɛ nyam? Ani wɔtswa wɔfai shi akɛ wɔɔfi shi yɛ nitsumɔ ni he hiaa nɛɛ mli yɛ shitee-kɛ-woo fɛɛ sɛɛ? Eka shi faŋŋ akɛ kɛ wɔbuɔ hegbɛ ni yɔɔ naakpɛɛ nɛɛ waa lɛ, wɔbaafee ekãa ni wɔtsu kɛ wɔtsui fɛɛ hu.—2 Kor. 4:1, 7.