Dii Miishɛɛ ni Ona lɛ Sɛɛ
1 Kɛ wɔmiitsu nii yɛ shia kɛ shia lɛ, bei pii lɛ be fioo ko pɛ wɔnyɛɔ wɔkɛ mɛi ni yɔɔ he miishɛɛ lɛ yeɔ. Bei pii lɛ nitsɔɔmɔ nitsumɔ lɛ diɛŋtsɛ yaa nɔ beni wɔtee sɛɛsaramɔi ni wɔkwɛ Biblia mli nikasemɔi anɔ lɛ. (Mat. 28:19, 20) Bɔni afee ni wɔtsɔɔ nii jogbaŋŋ yɛ sɛɛsaramɔ mli lɛ, ehe baahia ni wɔti nɔ ni wɔgba he sane klɛŋklɛŋ lɛ mli, koni no sɛɛ lɛ wɔsaa wɔhe kɛha sanegbaa ekoŋŋ.
2 Kɛ owie weku gbɛjianɔtoo ni emaaa shi jogbaŋŋ lɛ he lɛ, obaanyɛ okɛ “Obaanyɛ Ohi Shi” wolo lɛ mli sane ni yɔɔ yitso 29 lɛ atsu nii. Obaanyɛ okɛɛ akɛ:
◼ “Be ko lɛ wɔwie nilee ni yɔɔ Biblia mli ŋaawoo sɛɛ ni aaanyiɛ koni ana weku ni miishɛɛ yɔɔ mli lɛ he. Te nɔ ni onuɔ he akɛ no ji nɔ titri ni akɛaafee wekui lɛ ekome ŋmɛnɛ?” Ŋmɛɛ gbɛ ni ewie. Kwɛmɔ kuku 27 ni yɔɔ baafa 247 lɛ, ni okane Kolosebii 3:12-14. Wiemɔ saji krokomɛi ni tsɔɔ bɔ ni anɔkwa suɔmɔ baanyɛ afee wekui ekome lɛ he. Tsɔɔmɔ bɔ ni Obaanyɛ Ohi Shi wolo lɛ ni aaakase jogbaŋŋ fiofio lɛ baanyɛ aye abua ni akɛtao naagbai anaa tsabaa.
3 Kɛ nyɛgba je lɛŋ shihilɛi ni fiteɔ lɛ ahe sane, beni oyasara lɛ klɛŋklɛŋ lɛ, no lɛ obaanyɛ onyiɛ sɛɛ kɛtsɔ enɛ kɛɛmɔ nɔ:
◼ “Miheɔ miyeɔ akɛ okɛ mi baakpa gbee akɛ ehe baahia ni afee tsakemɔi wuji, kɛji ebaaba gbi ko akɛ wɔbaahi shi yɛ toiŋjɔlɛ mli. Biblia lɛ tsɔɔ akɛ Satan diɛŋtsɛ ji mɔ ni kɛ wɔ naagbai lɛ baa. Mɛi pii biɔ nɔ hewɔ ni Nyɔŋmɔ eŋmɛ lɛ gbɛ ni ehi shi aahu be kakadaŋŋ lɛ. Te osusuɔ tɛŋŋ?” Ŋmɛɛ gbɛ ni ewie. Gbelemɔ Obaanyɛ Ohi Shi wolo lɛ baafa 20 lɛ kukuji 14 kɛ 15, ni otsɔɔ nɔ hewɔ ni akpatako Satan hiɛ lolo lɛ. No sɛɛ lɛ kanemɔ Romabii 16:20 ni tsɔɔ nɔ ni wɔbaanyɛ wɔkpa gbɛ yɛ wɔsɛɛ be ni ebɛŋkɛ lɛ mli.
4 Kɛ owie jɔɔmɔi ni abaana yɛ Maŋtsɛyeli nɔyeli lɛ shishi yɛ osɛɛsaramɔ lɛ mli lɛ, obaanyɛ okɛɛ akɛ:
◼ “Nyɔŋmɔ Maŋtsɛyeli lɛ jɔɔmɔi ni yɔɔ naakpɛɛ baaba shikpɔŋ lɛ kɛ adesai anɔ. Afee jɔɔmɔi nɛɛ ahe mfoniri jogbaŋŋ yɛ baafai 12 kɛ 13. Mɛni ji nɔ ni onaa ni feɔ bo fɛo lɛ? [Ŋmɛɛ gbɛ ni ewie.] Kwɛmɔ bɔ ni jeŋ ni tamɔ nɛkɛ ni abaahi mli lɛ baatamɔ aha.” Kanemɔ kuku 12. Kɛ ena he miishɛɛ lɛ, bi sane ni yɔɔ kuku 13 lɛ, ni nyɛsusu hetoo lɛ he. Ha ele akɛ yitso nɛɛ haa Maŋtsɛyeli jɔɔmɔi ahe sanebimɔi babaoo hetoo ni akɛ ebaaŋɔɔ onaa akɛ okɛ lɛ aaagba nomɛi ahe sane kɛ obasara lɛ be kroko lɛ.
5 Obaanyɛ okɛɛ enɛ ni okɛje nikasemɔ shishi:
◼ “Mɛi pii kɛ wolo nɛɛ etsu nii ni amɛkɛna amɛ Biblia mli sanebimɔi ahetoo.” Gbelemɔ emli saji ni ato naa lɛ, ni obi akɛ: “Mɛɛ sane yɔɔ biɛ ni onyaa he waa?” Ŋmɛɛ gbɛ ni ewie, gbelemɔ kɛya yitso ni amɛnya he lɛ nɔ, ni okane klɛŋklɛŋ kuku lɛ. Tsɔɔmɔ bɔ ni sanebimɔi ni yɔɔ baafa fɛɛ baafa shishigbɛ lɛ maa otii ni yɔɔ kuku fɛɛ kuku mli lɛ nɔ mi ehaa. Tsɔɔmɔ mli kɛtsɔ kuku kome loo enyɔ he sanegbaa nɔ, koni no sɛɛ lɛ oto gbɛjianɔ ni oba ekoŋŋ.
6 Miishɛɛ ni anaa yɛ Obaanyɛ Ohi Shi wolo lɛ he lɛ sɛɛnyiɛmɔ tsɔɔ bɔ ni wɔsumɔɔ ni wɔtsu wɔsɔɔmɔ lɛ he nii kɛmɔ shi. (2 Tim. 4:5) Ekolɛ wɔbaanyɛ wɔye wɔbua wɔ toibolɔi lɛ koni amɛnine ashɛ naanɔ wala nɔ.—Yoh. 17:3.