Yehowa Odasefoi​—Gbɛjianɔtoo ni Yɔɔ Gbɛi lɛ Sɛɛ

YƐ OCTOBER 6, 1990 lɛ, gbɔmɛi babaoo aaashɛ 5,000 ni ebua amɛhe naa yɛ Assembly Hall of Jehovah’s Witnesses yɛ Jersey City, New Jersey, U.S.A., kɛha Watch Tower Bible and Tract Society daa afi kpee lɛ anine baashɛ naakpɛɛ nɔ ko nɔ. Sɛinɔtalɔ lɛ, John E. Barr, tswa toibolɔi lɛ adafi yɛ Video mfoniri ni heɔ minitii 55, ni yitso ji Jehovah’s Witnesses​—The Organization Behind the Name lɛ he. Enɛ ji klɛŋklɛŋ Video ni Asafo lɛ efee, shi eka shi faŋŋ akɛ jeee naagbee nɔ.

Video lɛ tsɔɔ bɔ ni ato Yehowa webii ahe gbɛjianɔ aha koni amɛye Nyɔŋmɔ gbɛi lɛ he odase ni amɛshiɛ “maŋtsɛyeli lɛ he sanekpakpa” lɛ amɛtsɔɔ. (Mateo 24:14) Ama nitsumɔ he yitso ni yɔɔ Brooklyn, New York, kɛ nitsumɔ hei ni yɔɔ Watchtower Farms lɛ anɔ mi waa. Afee nɔ ni fa fe ekomekomei 500,000 yɛ Ŋleshi Blɔfo mli, ni amrɔ nɛɛ eyɛ (aloo etsɛŋ ni ebaaba yɛ) wiemɔi krokomɛi 26 hu mli.a

Te Anya He Aha Tɛŋŋ?

Te mɛi ni amɛjeee Yehowa Odasefoi lɛ enya video nɛɛ he amɛha tɛŋŋ? Nitsumɔtsɛ ko ŋma akɛ:

“Mina akɛ tape nɛɛ hi jogbaŋŋ diɛŋtsɛ. Nɔ ni mina he miishɛɛ waa diɛŋtsɛ ji bɔ ni mfonirii lɛ ahiɛ tse ni aje gbɛ ato naa jogbaŋŋ lɛ. Kulɛ mihiɛ miihe akpa nɔ akɛ tape ni, ni misusu he akɛ etamɔ sini pɛpɛɛpɛ. Nɛkɛ tape nɛɛ he baaba sɛɛnamɔ waa diɛŋtsɛ kɛha yiŋtoo ni yɔɔ nyɛ New York nitsumɔ he yitso lɛ sɛɛ lɛ mligbalamɔ. Nyɛbɔ mɔdɛŋ waa yɛ nɛkɛ nitsumɔ fɛfɛo nɛɛ he.”​—J J.

Mɛi ni kɛ Yehowa Odasefoi kaseɔ Biblia lɛ hu ena nɛkɛ video mfoniri nɛɛ kwɛmɔ he sɛɛ. Nɔ ni nyiɛ sɛɛ lɛ tsɔɔ nɔ hewɔ:

“Mikɛ obalanyo ko ni eye afii 20 ni ekaseɔ nii yɛ maŋ lɛ mli univɛsiti lɛ kaseɔ Biblia lɛ. Esusuɔ je lɛŋ shihilɛ ni yaa nɔ fiteɔ be fɛɛ be lɛ he waa. Shi, beni ekwɛ mfoniri lɛ ni ena nakai Betel nyɛmimɛi obalahii pii ni yɔɔ yiŋtoo diɛŋtsɛ yɛ amɛshihilɛ mli lɛ, subaŋ ni ehiɛ lɛ etsake kwraa. Eba wɔ kpee Gbi Krɛdɛɛ lɛ, ni ebi ni mikɛlɛ akase Biblia lɛ shii enyɔ yɛ otsi mli. Biblia kaselɔ kroko, ni ji nɔtsamɔ-skul tsɔɔlɔ lɛ ma video lɛ akɛ eyaajie etsɔɔ ewekumɛi. Kulɛ amɛsusuɔ akɛ Yehowa Odasefoi ji gbɛjianɔtoo bibioo ko, ni mɛi pii leee amɛ. Shi amɛnaa kpɛ amɛhe yɛ bɔ ni nitsumɔ lɛ ekpele jeŋ fɛɛ, kɛ bɔ ni esoro wɔ kwraa hu lɛ he, ni wɔdaa Yehowa shi yɛ enɛ he.”​—J. B.

“Wiemɔi nyɛŋ atsɔɔ miishɛɛ ni mina beni yoo ko ni mikɛlɛ kaseɔ Biblia lɛ jwa yaafo kɛ miishɛɛ kɛ hiɛsɔɔ beni ekwɛ video nɛɛ egbe naa lɛ. Ekɛ yaafonui wie akɛ: ‘Te aaafee tɛŋŋ ni mɔ ko aaakɛɛ akɛ enaaa akɛ enɛ ji anɔkwa Nyɔŋmɔ, Yehowa gbɛjianɔtoo lɛ? Mileee akɛ gbɔmɛi tamɔ nɛkɛ yɛ.’ Kɛkɛ ni ewie akɛ: ‘Miisumɔ ni abaptisi mi.’”​—C. D.

“Wɔye omanye babaoo yɛ video lɛ ni wɔkɛ wɔ Biblia kaselɔi lɛ kwɛ lɛ mli. Nyɛsɛɛ gbɛkɛ lɛ, miŋa Biblia kaselɔi lɛ ateŋ mɔ kome wu ba ebasra wɔ. Kulɛ eteɔ shi ewoɔ wɔ waa. Shi ekwɛ video lɛ. Yɛ sɛɛ mli lɛ ebibii saji ni eshi biɛ kɛ Biblia kɛ Biblia kasemɔ wolo ni ji Obaanyɛ Ohi Shi Kɛya Naanɔ yɛ Paradeiso yɛ Shikpɔŋ Nɔ lɛ ekome. Be ko ni eho lɛ, esha eŋa Biblia kasemɔ woji fɛɛ ni eyɔɔ!”​—D. H.

Gbekɛbii hu ena video lɛ he miishɛɛ babaoo, taakɛ wiemɔi ni nyiɛ sɛɛ lɛ tsɔɔ lɛ:

“Miye afii ekpaa kɛ fa. Misumɔɔ he ni ajie Biblia lɛ yɛ ni adekai lɛ hoɔ oyayaayai lɛ.”​—K. W.

“Wɔbii bibii lɛ kɛɛ eyɛ fɛo kwraa fe nɔ fɛɛ ni amɛkwɛ da yɛ TV lɛ nɔ.”​—R. C.

“Beni wɔkwɛ video lɛ wɔgbe naa nɔ ni ji shii enyɔ nɔ lɛ, wɔbinuu ni eye afii enumɔ, ni fee dioo aahu kɛkwɛ mfoniri lɛ fɛɛ lɛ bi akɛ, ‘Ani wɔbaanyɛ wɔkwɛ daa gbi?’ Wɔbiyoo ni eye afii etɛ lɛ wie kɛfo mli akɛ, ‘Miisumɔ ni maya Betel ni mayafee woji!’”​—M. E.

“Mibii lɛ, Robin kɛ Shannan, ni amɛye afii 12 kɛ 9 lɛ, yaa nɔ amɛkwɛɔ nɛkɛ mfoniri nɛɛ be fɛɛ be. Beni mibiyoo fioo kwraa lɛ na mfoniri lɛ, ewie akɛ, ‘Misumɔɔ shiɛmɔyaa waa diɛŋtsɛ. Ehaa minaa miishɛɛ babaoo.’ Wɔnuɔ he akɛ nɛkɛ video nɛɛ ena hewalɛ yɛ wɔweku lɛ nɔ tɛɛ. Kwɛ bɔ ni eyɔɔ miishɛɛ ha akɛ ooogbele televishin nɔ nifeemɔ ni ekwɛmɔ yɔɔ shweshweeshwe!”​—N. B.

“Miye afii 131/2. Video hee lɛ ha miyoo bɔ ni kulɛ mikuɔ mihiɛ mishwieɔ nibii kpakpai ni Yehowa haa wɔ lɛ nɔ lɛ waa diɛŋtsɛ. Eji hegbɛ akɛ mɔ ko aaafee Yehowa webii ateŋ mɔ ko.”​—K.W.

“Miye afi 16, ni nɛkɛ video nɛɛ eye ebua ni eha bɔ ni nitsumɔ ni atsuɔ nɛɛ ji jeŋ muu fɛɛ nɔ lɛ esaa eka mijwɛŋmɔ mli ekoŋŋ.”​—A. M.

“Wɔbii lɛ wie akɛ amɛnaaa TV nɔ nifeemɔ ni tsutsu lɛ amɛkwɛɔ daa lɛ ahe miishɛɛ dɔŋŋ yɛ na ni amɛna bɔ ni teokrase hiɛtserɛjiemɔ diɛŋtsɛ ji ba lɛ hewɔ. Ewo suɔmɔ ni amɛyɔɔ akɛ amɛaabote be-fɛɛ sɔɔmɔ lɛ mli lɛ mli hewalɛ.”​—L. M.

Nibii ni mɛi ni kɛ afi pii ehi shi akɛ Yehowa Odasefoi lɛ na lɛ ekanya amɛ.

“Kɛji video lɛ naa wɔnɔ hewalɛ nɛkɛ akɛ Yehowa webii lɛ, belɛ te eeenyɛ esa mɛi krokomɛi ahe waa eha tɛŋŋ? Kɛji shihilɛ lɛ mli wa waa fe bɔ ni minyɛɔ mikpeeɔ naa lɛ, mitaa misa lɛ nɔ nɔŋŋ ni miŋɔɔ ŋmɛlɛtswaa kome ni mikɛyasheraa shi yɛ Betel!”​—K. B.

“Beni mina mɔdɛŋbɔɔ kɛ nitsumɔ ni akɛtsuɔ nɔ fɛɛ nɔ he nii lɛ sɛɛ lɛ, minu he tamɔ nɔ ni esa akɛ maya mitsu mli ni miyafua Biblia kasemɔ woji ni miyɔɔ lɛ atuu.”​—L. P.

Wɔmiiwo bo hu hewalɛ ni otao be ni okɛkwɛ nɛkɛ video nɛɛ Jehovah’s Witnesses​—The Organization Behind the Name. Ebaaha ona shishinumɔ hee yɛ shihilɛ he, ni ebaaye ebua bo ni ona hiɛnɔkamɔ yɛ wɔsɛɛ be ko ni yɔɔ shweshweeshwe mli.

[Shishigbɛ niŋmai]