Wɔ Suɔmɔ Mli ni Wɔɔjɛ Wɔkɛ Wɔhe Aha

¹ Lalatsɛ David gba efɔ shi akɛ Yehowa webii ‘baajɛ amɛsuɔmɔ mli amɛkɛ amɛhe aha’; no ji akɛ, ákɛ “mɛi ni kɛ amɛhe haa amrɔ nɔŋŋ.” (Lala 110:3, NW shishigbɛ niŋmaa) Eka shi faŋŋ akɛ, enɛ miiba mli yɛ wɔ jeŋ muu fɛɛ nyɛmimɛi anaanyobɔɔ lɛ mli. Yɛ sɔɔmɔ afii sɔrɔtoi ejwɛ ni eho nɛ lɛ eko fɛɛ eko mli lɛ, Yehowa webii etu nɔ ni fa fe ŋmɛlɛtswai akpekpei toi akpe amɛwo Maŋtsɛyeli lɛ he sanekpakpa lɛ gbɛɛ kɛ shwamɔ lɛ mli. Ni gbɛi babaoo yɛ ni fata shiɛmɔ kɛ kaselɔi afeemɔ nitsumɔ lɛ he ni wɔbaatsɔ nɔ koni wɔnyɛ wɔjɛ wɔ suɔmɔ mli wɔkɛ wɔhe aha koni wɔkɛye wɔbua mɛi krokomɛi.

² Gbɛi ni Wɔɔnyɛ Wɔtsɔ nɔ Wɔtsɔɔ Wɔ Suɔmɔ Mli ni Wɔjɛɔ: Ekolɛ, yelikɛbuamɔ he baahia asafo lɛ mli bii komɛi koni amɛya kpeei. Mɛni hewɔ okɛ ohe haaa ni okɛ amɛ afata ohe kɛya? Ekolɛ mɛi krokomɛi ahe miiye, amɛbɛ gbɔmɔtsoŋ hewalɛ, loo atsĩ amɛnaa yɛ helatsamɔ hé. Ani obaanyɛ otsɔ hiɛ oyasara amɛ loo oye obua amɛ yɛ gbɛ ko nɔ? Ekolɛ aŋkro ko loo weku ko yɛ ni hewalɛwoo he hiaa amɛ. Ani osusu he akɛ ooofɔ nine otsɛ mɛi ni tamɔ nɛkɛ koni amɛbafata nyɛhe yɛ be kɛ bei amli beni nyɛfeɔ weku nikasemɔ lɛ? Ekolɛ gbɛgbalɔ loo shiɛlɔ ko baasumɔ ni ená mɔ ko afata ehe kɛya shiɛmɔ. Mɛni hewɔ okɛ ohe haaa ni nyɛtsu nii kutuu yɛ shiɛmɔ nitsumɔ lɛ mli? Enɛɛmɛi ji gbɛi komɛi ni wɔbaanyɛ wɔtsɔ nɔ wɔkɛ wɔhe aha kɛtsu nɔ ni hi wɔha mɛi ni kɛ wɔ yɔɔ hemɔkɛyeli lɛ mli lɛ.—Gal. 6:10.

³ Nyɛmimɛi hii baanyɛ atsɔɔ suɔmɔ ni amɛyɔɔ akɛ akɛ amɛ aaatsu nii yɛ Yehowa gbɛjianɔtoo lɛ mli, kɛtsɔ mɔdɛŋ ni amɛaabɔ ni amɛhe asa akɛ onukpai loo asafoŋ sɔɔlɔi lɛ nɔ. (1 Tim. 3:2-10, 12, 13; Tito 1:5-9) Yɛ be mli ni wɔyi faa daa lɛ, ehe miihia ni ana nyɛmimɛi hii ni he esa ni miisumɔ ni amɛnyiɛ hiɛ yɛ shiɛmɔ kɛ nitsɔɔmɔ kɛ asafoi lɛ anɔkwɛmɔ lɛ mli.—1 Tim. 3:1.

⁴ Ekolɛ wɔteŋ mɛi komɛi baanyɛ amɛkɛ amɛhe aha kɛha Yehowa sɔɔmɔ kɛyashi he ni amɛbaanyɛ, kɛtsɔ amɛhe ni amɛkɛaaha akɛ gbɛgbalɔi awalɔi yɛ be kɛ bei amli lɛ nɔ. Agbɛnɛ, kɛ wɔfee tsakemɔi fioo yɛ wɔ gbɛjianɔtoo mli lɛ, wɔbaanyɛ wɔfee nakai kɛtsara nɔ loo ni wɔkɛ wɔhe awo daa gbɛgbamɔ nitsumɔ lɛ mli po. Ani wɔshihilɛi lɛ yɛ bɔ ni wɔɔnyɛ wɔshi kɛya he kroko ni yelikɛbuamɔ he hiaa waa yɛ lɛ? Ani wɔbaanyɛ wɔkɛ wɔhe aha ni wɔsɔmɔ yɛ Betel, koni wɔtsɔ no nɔ wɔfi jeŋ muu fɛɛ nitsumɔ lɛ hiɛyaa sɛɛ tɛ̃ɛ? Atsuɔ nii babaoo hu yɛ Maŋtsɛyeli Asai, Kpeei Asai, kɛ nitsumɔ he niji ni yɔɔ jeŋ fɛɛ lɛ amaamɔ, ni suɔmɔ mli ni ajɛɔ akɛ he haa lɛ he hiaa waa yɛ jɛmɛ lɛ amli. Hiɛ sɔɔ mɛi ni kɛ amɛhe eha ni amɛtsuɔ nitsumɔi kpakpai nɛɛ waa diɛŋtsɛ, ni ájɔɔ amɛ babaoo diɛŋtsɛ!—Luka 6:38.

⁵ Bei ni haa mɔ mli filiɔ lɛ lɛ nɛ. Yehowa miitsɔ emumɔ lɛ nɔ ekɛ ewebii ni kɛ amɛhe haa lɛ miitsu nitsumɔ ko ni yɔɔ naakpɛɛ! Be fɛɛ be ni Yehowa baatsɔ egbɛjianɔtoo lɛ nɔ efɔ nine etsɛ koni ana Maŋtsɛyeli nitsumɔ ni yaa hiɛ lɛ mli gbɛfaŋnɔ lɛ, wɔbaafee jogbaŋŋ akɛ wɔɔbi wɔhe aŋkroaŋkro akɛ, ‘Ani miijɛ misuɔmɔ mli mikɛ mihe miiha lolo?’ No sɛɛ lɛ esa akɛ wɔkɛ sɔlemɔ apɛi wɔtsui kɛ wɔ shihilɛi amli wɔkwɛ. Wɔ Nyɔŋmɔ jamɔ hetuu-kɛhamɔ lɛ baatsirɛ wɔ koni wɔfee nɔ fɛɛ nɔ ni wɔɔnyɛ yɛ sɔɔmɔ krɔŋkrɔŋ lɛ mli, koni wɔtsɔ no nɔ wɔha Yehowa tsui anya babaoo!—Zef. 3:17.