Ye Obua Mɛi ni Bɛ Niiashikpamɔ lɛ Koni Amɛnu Shishi
1 Wɔtsɔɔ mɛi krokomɛi nɔ ni Nyɔŋmɔ taoɔ yɛ amɛdɛŋ kɛtsɔɔ kaselɔi afeemɔ nitsumɔ lɛ nɔ. (Mat. 28:19, 20) Odasefoi ni fa fe akpekpei enumɔ miibɔ mɔdɛŋ waa yɛ jeŋ fɛɛ koni amɛfee nakai. Jeee ŋmɛlɛtswai abɔ ni akɛtsuɔ nii, woji ni akɛhaa, loo Biblia mli nikasemɔi ni ajeɔ shishi lɛ tsɔɔ bɔ ni aye omanye aha. Kɛ gbɔmɛi nu nɔ ni amɛkaseɔ lɛ shishi, ni amɛkɛtsu nii lɛ, wɔnine shɛɔ oti ni ma wɔhiɛ lɛ nɔ.
2 Nɔ ni fata mɛi krokomɛi ni aaaye abua amɛ yɛ mumɔŋ lɛ he ji, “ni aaaha mɛi ni bɛ niiashikpamɔ lɛ anu shishi.” (Lala 119:130, NW) Ja gbɔmɛi lɛ ‘ena shishi’ dani ekanyaa amɛtsui ni etsirɛɔ amɛ. (Mat. 15:10) Yɛ be mli ni wɔ nitsumɔ lɛ shwereɔ, ni emli waa lɛ, wɔbaleɔ bɔ ni ehe hiaa ni wɔ wiemɔ kɛ nitsɔɔmɔ afee mlɛo lɛ waa diɛŋtsɛ. No hewɔ ni Asafo lɛ efee wolo bibioo, Mɛni Nyɔŋmɔ Taoɔ yɛ Wɔdɛŋ? lɛ. Biblia mli shishijee tsɔɔmɔi ahe nikasemɔi ni mli ka shi faŋŋ ji nɔ ni yɔɔ mli. Nikasemɔi lɛ yɛ kuku, wiemɔi ni yɔɔ mli lɛ yɛ tɛ̃ɛ, ni gbɛtsɔɔmɔ lɛ shishinumɔ waaa, ni mɛi pii sumɔɔ wolo bibioo lɛ waa.
3 Akɛ wolo bibioo nɛɛ kɛ woji tɛtrɛbii lɛ shɛɛ baatsu nii yɛ April kɛ May nyɔji lɛ amli. Aajie yi akɛ, kɛ oto oshiɛmɔ nitsumɔ kɛha otsi lɛ he gbɛjianɔ lɛ, oto gbɛjianɔ ni okɛ woji tɛtrɛbii lɛ aha daa Hɔɔ, shi okɛ wolo bibioo lɛ atsu nii titri yɛ oshiɛmɔ nitsumɔ lɛ mli yɛ otsi lɛ mli gbii krokomɛi lɛ amli. Okɛ wolo bibioo lɛ aya gbɔmɛi ni tsutsu lɛ amɛhe wolo amrɔ nɔŋŋ lɛ aŋɔɔ. Kaimɔ akɛ, ehe baanyɛ aba sɛɛnamɔ waa diɛŋtsɛ kɛ akɛtsɔɔ gbekɛbii, gbɔmɛi ni wieɔ wiemɔ kroko, kɛ mɛi ni nyɛɛɛ akane nii jogbaŋŋ lɛ anii.
4 Tsɔ Gbɛ ni Waaa Nɔ: Kɛ okɛ Taoɔ wolo bibioo lɛ miitsu nii lɛ, gbalamɔ jwɛŋmɔ kɛya baafã 2, he ni etsɔɔ yɛ akɛ, “ato wolo bibioo nɛɛ he gbɛjianɔ ni akɛkase Biblia lɛ.” Tsɔɔmɔ lɛ kuku 3 ni yɔɔ baafã 3 lɛ, koni otsɔɔ nɔ hewɔ ni ehe miihia ni mɔ lɛ akase Biblia lɛ. Okɛ nikasemɔ lɛ saneyitsei lɛ ekomɛi ni jieɔ Biblia mli anɔkwalei ni waaa kpo etsɔɔ lɛ atee emiishɛɛ shi. Feemɔ bɔ ni wolo bibioo nɛɛ haa nikasemɔ feɔ miishɛɛ lɛ he nɔkwɛmɔ nɔ otsɔɔ lɛ, koni okɛɛ lɛ akɛ, obaaye obua lɛ.
5 Feemɔ Nikasemɔ ni Yaa Nɔ Be Fɛɛ Be: Oti ni ma wɔhiɛ ji, ni wɔtsu babaoo fe ni wɔɔfee nikasemɔi kɛkɛ—wɔmiisumɔ ni wɔfee gbɔmɛi kaselɔi ni baafĩ anɔkwale jamɔ sɛɛ kpɛŋŋ. Abaanyɛ akɛ otsii fioo komɛi akase wolo bibioo lɛ fɛɛ, ni esa akɛ efee nɔ ni ekasemɔ kɛ mɔ boteɔ Nilee wolo lɛ kasemɔ mli amrɔ nɔŋŋ. (Kwɛmɔ shishigbɛ niŋmaa ni yɔɔ baafã 31.) Kɛjɛ shishijee nɔŋŋ lɛ, ye obua nikaselɔ lɛ ni eyɔse Yehowa gbɛjianɔtoo lɛ amrɔ nɔŋŋ. (Kwɛmɔ Reasoning wolo lɛ baafã 283-4.) Maa sɛɛnamɔ ni yɔɔ asafoŋ kpeei ahe lɛ nɔ mi, ni otsɔɔ mli akɛ, kpeei lɛ ni abaaya lɛ haa anuɔ bɔ ni aaafee atsu anɔkwa jamɔ he nii lɛ shishi jogbaŋŋ.—Heb. 10:24, 25.
6 Wɔyɛ nɔmimaa akɛ, wɔhe ni wɔkɛaawo nitsumɔ krɛdɛɛ nɛɛ mli yɛ April kɛ May lɛ, baaha wɔna miishɛɛ mli ŋɔɔmɔ ni baa kɛjɛɔ mɛi ni yeɔ anɔkwa, ni ayeɔ abua amɛ koni “amɛna shishinumɔ” ni kɛ mɔ yaa wala mli lɛ mli lɛ.—Abɛi 4:5, NW.