Okɛ Ohiɛ Afɔ Yehowa nɔ Koni Eha Nibii Ashwere
1 “Miná yelikɛbuamɔ ni akɛhaa koni akɛto asafo hee ko shishi lɛ mli miishɛɛ ni yɔɔ sɔrɔto klɛŋklɛŋ kwraa. Enɛ he nɔ ni fe nitsumɔ kɛ ekãa afii enyɔ, sɔlemɔi ni asɔleɔ daa kɛ hiɛ ni akɛfɔɔ Yehowa ni ‘haa nibii shwereɔ’ lɛ nɔ.” Nakai ji bɔ ni gbɛgbalɔ ko ni hiɛ henilee kpakpa mli ni kase bɔ ni ehe hiaa ni akɛ hiɛ afɔ Yehowa nɔ kɛha shweremɔ lɛ ŋma. (1 Kor. 3:5-9) Yɛ be mli ni wɔtaoɔ mɛi ni sumɔɔ mumɔŋ nibii lɛ, ehe miihia ni wɔ hu wɔná Nyɔŋmɔ sɛɛfimɔ kɛ́ wɔ sɔɔmɔ nitsumɔ lɛ baawo yibii.—Abɛi 3:5, 6.
2 Shweremɔ Biɔ Nii Anɔkwɛmɔ: Ehe miihia ni akwɛ anɔkwale dumɔwu lɛ nɔ kɛ́ esa akɛ eshwere. Bei pii lɛ ní aaaya ekoŋŋ yɛ gbi kome mli loo gbii enyɔ mli yɛ klɛŋklɛŋ saramɔ lɛ sɛɛ lɛ woɔ yibii kpakpai. Okɛ miishɛɛ kɛ naanyobɔɔ su atsu nii. Ha mɔ kroko lɛ ana miishɛɛ. Okome too okawie sɔŋŋ. Ha ele bo, ni otsɔɔ akɛ oyɛ ehe miishɛɛ akɛ adesa.
3 Yɛ July mli aahu kɛyashi August lɛ, wɔkɛ wɔjwɛŋmɔ miima woji bibii sɔrɔtoi abɔ ni wɔkɛaaha mɛi ni wɔkɛkpeɔ lɛ nɔ. Shi kɛlɛ, ehe miihia ni wɔdi miishɛɛ ni ana lɛ kɛ woji ni akɛha lɛ sɛɛ. Wɔfeɔ enɛ kɛtsɔɔ sɛɛsaramɔi kɛ Biblia mli nikasemɔi ni wɔkɛ mɛi feɔ lɛ nɔ. (Mat. 28:19, 20) Yɛ enɛ hewɔ lɛ, abaanyɛ akɛ Taoɔ wolo bibioo lɛ atsu nii ni akɛje nikasemɔi ashishi. Obaanyɛ oná gbɛtsɔɔmɔi ejwɛ ni nyiɛ sɛɛ nɛɛ ahe sɛɛ.
4 Kɛ ótsɔ hiɛ okɛ mɔ ko ni susuɔ bɔ ni jeŋ shihilɛ yaa nɔ efiteɔ lɛ he lɛ ewie lɛ, obaanyɛ oje sanegbaa lɛ shishi ekoŋŋ akɛ:
◼ “Miheɔ miyeɔ akɛ osusuɔ bɔ ni jeŋba ekpɔtɔ yɛ adesai ashihilɛ mli lɛ he tamɔ bɔ ni misusuɔ he lɛ pɛpɛɛpɛ. Wɔnuɔ shia mli basabasafeemɔ he amaniɛbɔi ni haoɔ mɔ, ní haa awaa gbekɛbii, fɔlɔi, kɛ gbalashihilɛ mli hefatalɔi ayi lɛ he. Ni etamɔ nɔ ni gbɔmɛi babaoo susuuu malemɔ loo juu ni amɛkɛtsuɔ nibii ni amɛ diɛŋtsɛ amɛsumɔɔ lɛ he nii lɛ he nɔ ko kwraa. Ani osusuɔ akɛ bɔ ni gbɔmɛi hiɔ shi amɛhaa lɛ kɔɔ Nyɔŋmɔ he eko? [Ŋmɛɛ gbɛ ni ewie.] Nyɔŋmɔ to shishitoo mlai komɛi emamɔ shi eha gbɔmɔ koni ehi shi yɛ naa, ni eka shi faŋŋ akɛ ejeee nɔ ko ni tsii kɛha wɔ.” Kanemɔ 1 Yohane 5:3. No sɛɛ lɛ okɛ Taoɔ wolo bibioo lɛ aha, ni ogbele nikasemɔ 10 lɛ. Kanemɔ klɛŋklɛŋ kuku lɛ. Tsɔɔmɔ wiemɔi kukuji ni ama nɔ mi yɛ kukuji 2-6 lɛ shishijee lɛ, ni obi ni shiatsɛ lɛ atsɔɔ nifeemɔ ni esusuɔ akɛ eyeɔ adesai ashihilɛ awui fe fɛɛ lɛ. Kanemɔ kuku ni kɔɔ he lɛ, ni kɛ́ hegbɛ yɛ lɛ gbelemɔ ŋmalɛ kome loo enyɔ. Kanemɔ kuku 7 lɛ ni okɛgbe naa, koni no sɛɛ lɛ oto gbɛjianɔ koni oba ekoŋŋ kɛha sanegbaa lolo.
5 Obaanyɛ okɛɛ mɛi ni susuɔ amɛ weku lɛ he ni okɛ amɛ ekpe lɛ nɔ ko tamɔ nɛkɛ:
◼ “Ani osusuɔ akɛ nilee yɛ mli akɛ wɔɔkpa gbɛ akɛ Bɔlɔ lɛ kɛ dɛŋdadei ni he hiaa wɔ lɛ baaha wɔ koni wɔkɛtswa weku shihilɛ ni yeɔ omanye wɔma shi?” Ŋmɛɛ gbɛ ni ewie. Wiemɔ Taoɔ wolo bibioo lɛ he, gbelemɔ nikasemɔ 8 lɛ, ni otsɔɔ mli akɛ Biblia mli shishitoo mlai ni yɔɔ kɛha weku lɛ mli bii lɛ ateŋ mɔ fɛɛ mɔ ji nɔ ni yɔɔ mli. Kɛɛmɔ lɛ akɛ obaafee bɔ ni akɛ wolo bibioo lɛ kɛ Biblia lɛ tsuɔ nii koni akɛna he sɛɛ fe fɛɛ lɛ he nɔkwɛmɔ nii. Nyiɛmɔ gbɛtsɔɔmɔi ni anaa yɛ wolo bibioo lɛ baafa 2 lɛ sɛɛ. Too gbɛjianɔi koni oba ekoŋŋ ni obatsa nikasemɔ lɛ nɔ, aloo kɛ nyɛgbe ekasemɔ naa lɛ, koni nyɛkase nikasemɔ kroko ni shiatsɛ lɛ halaa kɛjɛɔ wolo bibioo lɛ mli lɛ.
6 Naa gbɛ ni yɔɔ tɛ̃ɛ ni obaanyɛ okɛtsu nii koni okɛtsɔɔ wɔ Biblia kasemɔ he gbɛjianɔtoo lɛ. Okɛ “Taoɔ” wolo bibioo lɛ atsɔɔ, ni okɛɛ akɛ:
◼ “Nikasemɔ he gbɛjianɔtoo ni yɔɔ fitsofitso ni wieɔ Biblia shishijee tsɔɔmɔi ahe yɔɔ wolo bibioo nɛɛ mli. Obaana sanebimɔi ni egba adesai anaa afii ohai abɔ lɛ ahetoo yɛ baafa fɛɛ baafa mli. Akɛ nɔkwɛmɔnɔ lɛ, Mɛni ji Nyɔŋmɔ yiŋtoo kɛha shikpɔŋ lɛ?” Gbelemɔ nikasemɔ 5 lɛ, ni okane sanebimɔi ni yɔɔ nikasemɔ lɛ shishijee lɛ. Bi shiatsɛ lɛ ni etsɔɔ nɔ ni esumɔɔ fe fɛɛ, koni no sɛɛ lɛ okane kuku(ji) ni kɔɔ he lɛ, ni otao ŋmalɛi ni sa. Tsɔɔmɔ mli akɛ abaanyɛ ana sanebimɔi krokomɛi lɛ ahetooi ni haa tsui nyɔɔ mɔ mli yɛ gbɛ ni waaa nɔ tamɔ bɔ ni wɔna enɛ lɛ nɔŋŋ. Kɛɛmɔ akɛ obaaku osɛɛ oba ekoŋŋ koni nyɛbagba sanebimɔ kɛ hetoo kroko he sane.
7 Aloo ekolɛ obaasumɔ ni oka gbɛ ni yɔɔ kuku kɛha Biblia kasemɔ shishijee lɛ okwɛ kɛtsɔ enɛ kɛɛmɔ nɔ:
◼ “Ani ole akɛ kɛ okɛ minitii fioo pɛ tsu nii lɛ, obaanyɛ ona Biblia mli sanebimɔ ko ni he hiaa lɛ hetoo? Akɛ nɔkwɛmɔnɔ lɛ, . . .” No sɛɛ lɛ kanemɔ sanebimɔ ni yɔɔ wolo bibioo lɛ mli nikasemɔi lɛ ekome mli lɛ shishijee, eko ni osusuɔ akɛ mɔ lɛ baanya he. Kɛha sanebimɔi ni obaanyɛ okɛtsu nii lɛ ekomɛi ahesusumɔi lɛ, kwɛmɔ nɔ ni aŋma ahɔ March 1997 Wɔ Maŋtsɛyeli Sɔɔmɔ lɛ mli lɛ kukuji 15 kɛ 16 ni hiɛ yitso akɛ: “Ná Ekãa ni Okɛfee Sɛɛsaramɔi.”
8 Miishɛɛ mli ni ooojɛ ni okɛkpɛlɛ sɛɛsaramɔi afeemɔ kɛ Biblia mli nikasemɔi afeemɔ he nitsumɔ lɛ nɔ lɛ ji Nyɔŋmɔ “hefatalɔi nitsulɔi” ni aaafee lɛ fã. (1 Kor. 3:9) Yɛ be mli ni wɔtsuɔ nii waa koni wɔkɛtee miishɛɛ ni wɔná lɛ shi, ni no sɛɛ lɛ wɔkɛ wɔhiɛ fɔɔ Yehowa nɔ koni eha nibii ashwere lɛ, wɔbaaná tsui ni nyɔɔ mɔ mli diɛŋtsɛ ni nitsumɔ kroko kwraa bɛ ni kɛbaaba lɛ.