Nɔkwɛlɔi ni Nyiɛɔ Hiɛ—Asafo Woloŋ Nikasemɔ Nɔkwɛlɔi Lɛ
1 Eji hegbɛ ni ekaaa kɛha onukpa loo asafoŋ sɔɔlɔ ni ehe esa akɛ eeesɔmɔ akɛ Asafo Woloŋ Nikasemɔ nɔkwɛlɔ. Mɛi ni yɔɔ ekuu lɛ mli lɛ amumɔŋ hiamɔ nii ni eeekwɛ lɛ ji sɔ̃ ni hiɛdɔɔ yɔɔ he. Egbɛnaa nii lɛ yɛ kui etɛ mli.
2 Nitsɔɔmɔ ni Mɔɔ Shi: Ebiɔ hesaamɔ diɛŋtsɛ yɛ Asafo Woloŋ Nikasemɔ nɔkwɛlɔ lɛ gbɛfaŋ koni ekɛ shishinumɔ aha kuu lɛ daa otsi. Etaoɔ koni eha hiɛsɔɔ ni ayɔɔ kɛha saji ni akaseɔ lɛ aya hiɛ. Yɛ nɔ najiaŋ ni eeewie babaoo yɛ nikasemɔ lɛ shishi lɛ, kɛ́ ehe miihia lɛ, ebaatee sanebimɔi ni he hiaa ashi efata he koni ekɛgbala otii titrii ni yɔɔ nikasemɔ lɛ mli kɛje kpo. Ekaa lɛ ji ni eha nikasemɔ lɛ afee nɔ ni yɔɔ miishɛɛ kɛ nɔ ni tsɔɔ mɔ nii ní eha mɔ fɛɛ mɔ kɛ ehe awo sanegbaa lɛ mli. Oti ni ma ehiɛ ji ni etswa amɛ ema shi yɛ mumɔŋ, ní ema sɛɛnamɔ ni yɔɔ nikasemɔ lɛ mli ni anyɛɔ atsuɔ he nii lɛ nɔ mi, ni eha sane lɛ ashɛ jwɛŋmɔ kɛ tsui lɛ fɛɛ he.—1 Tes. 2:13.
3 Nyɛmimɛi Asaramɔ ni Yeɔ Ebuaa: Asafo Woloŋ Nikasemɔ nɔkwɛlɔ lɛ “tamɔ abobaahe yɛ kɔɔyɔɔ naa kɛ teemɔhe yɛ nugbɔnɛmɔ naa.” (Yes. 32:2) Esusuɔ mɛi fɛɛ ni yɔɔ ekuu lɛ mli lɛ he jogbaŋŋ ni ekwɛɔ ni amɛnine ashɛ mumɔŋ yelikɛbuamɔ nɔ kɛji mɛi ni yɔɔ ekwɛmɔ shishi lɛ eko nijiaŋ eje wui.—Ezek. 34:15, 16; 1 Tes. 2:7, 8.
4 Sanekpakpa Jajemɔ kɛ Ekãa: Asafo Woloŋ Nikasemɔ nɔkwɛlɔ lɛ hiɛ hiɔ ehe nɔ ni etoɔ gbɛjianɔi ni anyɛɔ atsuɔ he nii ehaa mɛi fɛɛ ni yɔɔ ekuu lɛ mli lɛ koni amɛkɛ amɛhe awo shiɛmɔ nitsumɔ lɛ mli jogbaŋŋ kɛmɔ shi. Enyiɛɔ hiɛ yɛ sanekpakpa jajemɔ nitsumɔ lɛ mli, ni ele akɛ ehe ni ekɛwoɔ mli daa, ekãa, kɛ miishɛɛ ni ejieɔ lɛ kpo yɛ shiɛmɔ nitsumɔ lɛ mli lɛ baaje kpo yɛ mɛi krokomɛi ni yɔɔ kuu lɛ mli lɛ ahe. (Kol. 4:17; 2 Tes. 3:9) Yɛ be ni sa mli lɛ, ebɔɔ mɔdɛŋ koni ekɛ ekuu lɛ mli mɔ fɛɛ mɔ atsu nii yɛ shiɛmɔ nitsumɔ lɛ mli. Kɛ́ wɔmiisumɔ ni wɔha wɔshiɛmɔ kɛ wɔnitsɔɔmɔ hesaai lɛ aya hiɛ yɛ shiɛmɔ nitsumɔ lɛ mli lɛ, no lɛ, Asafo Woloŋ Nikasemɔ nɔkwɛlɔ lɛ baanyɛ aye abua wɔ koni wɔnine ashɛ oti ni ma wɔhiɛ lɛ nɔ.—1 Tim. 4:16; 2 Tim. 4:5.
5 Akɛ gbɔmɛi ateŋ nikeenii ni efee klalo koni amɛkɛ mumɔŋ yelikɛbuamɔ kɛ suɔmɔ sɛɛfimɔ aha wɔ nɛɛ ejɔɔ wɔ lɛɛlɛŋ. (1 Tes. 5:14) Eba akɛ wɔɔjie hiɛsɔɔ kpo wɔha nɛkɛ naakpɛɛ nii ni jɛ Yehowa ŋɔɔ nɛɛ, kɛtsɔ wɔhe ni wɔkɛaawo woloŋ nikasemɔ lɛ mli daa kɛ sanekpakpa jajemɔ nitsumɔ lɛ ni wɔɔfi sɛɛ yɛ anɔkwale mli lɛ nɔ.—Heb. 10:25.