Mɛni Obaakɛɛ Buddhanyo?
1 Yɛ shikpɔji komɛi anɔ lɛ, mɛi ni abaptisiɔ lɛ atɛŋ mɛi fã ji Buddhabii. Mɛni gbalaa nɛkɛ gbɔmɛi nɛɛ kɛbaa anɔkwale lɛ he? Mɛɛ gbɛ nɔ oootsɔ okɛ sanekpakpa lɛ aha Buddhanyo?
2 Jiemɔ Mɔ he Susumɔ yɛ Anɔkwale Mli Kpo Otsɔɔ: Mɛi ni tsutsu ko lɛ amɛji Buddhabii lɛ kɛɔ akɛ jeee niiahesusumɔ babaoo ji nɔ ni gbalaa amɛ kɛbaa anɔkwale lɛ mli. Shi mɔ he ni asusuɔ yɛ anɔkwale mli lɛ ji nɔ ni tsirɛ amɛ. Naanyo ni nyɛmi yoo ko kɛ Asianyo ko ni ebahi United States lɛ bɔ ni ekpɛlɛ koni ekɛ lɛ akase nii lɛ ji nɔ ni ná enɔ hewalɛ waa. Enyɛɛɛ ewie Blɔfo jogbaŋŋ, shi nyɛmi yoo lɛ ná tsui eha lɛ. Kɛ́ etɔ yoo lɛ aloo enyɛɛɛ nii lɛ ekase dɔŋŋ lɛ, nyɛmi yoo lɛ yasaraa lɛ kɛkɛ, ni ekɛ lɛ gbaa sane, ni etoɔ gbɛjianɔ kɛha be kroko nikasemɔ. Naagbee lɛ, abaptisi yoo lɛ, ebihii enyɔ, kɛ enyɛ yoomo lɛ. Eku esɛɛ etee ejaku maŋ ni eyaye ebua mɛi krokomɛi pii koni amɛkase anɔkwale lɛ. Ebihii lɛ ateŋ mɔ kome miisɔmɔ yɛ Asafo lɛ nitsumɔhe nine lɛ. Kwɛ jɔɔmɔi ni jɛɔ mli baa kɛji wɔkase Yehowa ‘mlihilɛ lɛ kɛ suɔmɔ ni eyɔɔ kɛha adesai’ lɛ!—Tito 3:4.
3 Susumɔ ni Buddhabii Yɔɔ: Buddhabii lɛ ateŋ mɛi pii ŋmɛɔ mɛi krokomɛi asusumɔi agbɛ, shi amɛsusuɔ akɛ ehe ehiaaa ni amɛkpɛtɛ tsɔɔmɔ pɔtɛɛ kome ko he. No hewɔ lɛ, soro nɔ ni amɛteŋ mɔ fɛɛ mɔ heɔ eyeɔ. Sane kome ko ni Buddhabii fɛɛ tsɔɔ yɛ amɛtsɔɔmɔi amli ji akɛ, shihilɛ eyi obɔ kɛ nɔnaa, shi kɛtsɔ nilee ni mɔ aaaná lɛ nɔ lɛ, ebaanyɛ efo fɔmɔ ekoŋŋ he shibɔlemɔ kɛmiibote shihilɛ ni miishɛɛ bɛ mli lɛ sɛɛ. Akɛɔ akɛ dani mɔ ko aaaye ehe yɛ nɛkɛ fɔmɔ ekoŋŋ he shibɔlemɔ nɛɛ mli lɛ, esa akɛ mɔ lɛ aná Nirvana, ni ji shihilɛ ni anyɛɛɛ atsɔɔ bɔ ni eji, akɛni ejeee he ko aloo shihilɛ ko, shi moŋ eji shihilɛ ko ni piŋmɔ kɛ efɔŋfeemɔ bɛ mli. (Kwɛmɔ Mɛni Baa Wɔnɔ Kɛ́ Wɔgboi? wolo bibioo lɛ baafa 9-10.) Mɛni ji nɔ ni enɛ tsɔɔ wɔ? Etsɔɔ wɔ akɛ, kɛ́ wɔkɛ gbɔmɛi ni heɔ Buddhabii ajeŋ nilee amɛyeɔ lɛ je saji ahe ŋwane lɛ, ewoŋ yibii. Yɛ no najiaŋ lɛ, esa akɛ wɔkɛ amɛ agba naagba ni wɔ fɛɛ wɔkɛkpeɔ ni ehaoɔ wɔ lɛ he sane.
4 Maa Mɛi Ahe Susumɔi Anɔ Mi: Akɛni Buddhabii pii kɛɔ akɛ shihilɛ yɛ shikpɔŋ lɛ nɔ ji piŋmɔi sɔŋŋ hewɔ lɛ, ekolɛ naanɔ wala yɛ shikpɔŋ lɛ nɔ he nilee baaha amɛhiɛ afee amɛ yaa. Shi yɛ fɛɛ sɛɛ lɛ, wɔ fɛɛ wɔsumɔɔ ni wɔná weku shihilɛ ni miishɛɛ yɔɔ mli lɛ mli ŋɔɔmɔ, ni wɔsumɔɔ ni wɔna akɛ ajie piŋmɔ kɛtee koni wɔnu nɔ ni wala ji lɛ shishi. Kadimɔ gbɛ ni abaanyɛ atsɔ nɔ ama nakai hiamɔ nii ni asumɔɔ lɛ nɔ mi.
5 Obaanyɛ oka hiɛkpamɔ wiemɔ nɛɛ okwɛ:
◼ “Ŋmɛnɛ, wɔ yɛ jeŋ ko ni gbɔmɛi kpakpai pii piŋɔ yɛ mli. Mɛni osusuɔ akɛ ehe hiaa koni gbi ko lɛ, akɛ piŋmɔ kɛ nɔnaa aba naagbee? [Ŋmɛɛ gbɛ koni eha hetoo.] Shiwoo ko ni akɛha yɛ blema beebe lɛ ji nɔ ni shɛjeɔ mimii. [Kanemɔ Kpojiemɔ 21:4.] Yɛ anɔkwale mli lɛ nakai be lɛ bako moŋ, shi kɛ eba lɛ, wɔbaasumɔ ni wɔna, aloo jeee nakai?” No sɛɛ lɛ, okɛ wolo ni tsɔɔ akɛ nɔnaa baaba naagbee aha.
6 Obaanyɛ okɛɛ mɔ ko ni eda akɛ:
◼ “Ekolɛ, bɔ ni susumɔi gbohii efa babaoo, kɛ bɔ ni enáa wɔbii lɛ anɔ hewalɛ lɛ gbaa onaa tamɔ mi nɔŋŋ. Mɛni hewɔ jeŋba shara efa yɛ oblahii kɛ oblayei ateŋ nakai? [Ŋmɛɛ gbɛ koni eha hetoo.] Ani ole akɛ, agba enɛ he sane afɔ̃ shi yɛ wolo ko ni aje eŋmaa shishi jeeŋmɔ dani Muslim, Kristofoi, kɛ Hindubii ajamɔ je shishi lɛ mli? [Kanemɔ 2 Timoteo 3:1-3.] Kadimɔ akɛ, yɛ nii ni mɛi kaseɔ lɛ fɛɛ sɛɛ lɛ, nɛkɛ shihilɛi nɛɛ miiya nɔ. [Kanemɔ kuku 7.] Wolo nɛɛ eye ebua mi ni minu anɔkwale ko ni gbɔmɛi pii nuuu shishi lɛ shishi. Ani obaasumɔ ni okane?” Okɛ wolo loo wolo bibioo ko ni sa aha lɛ.
7 Buddhabii lɛ ateŋ mɛi pii buɔ Biblia lɛ akɛ eyɛ krɔŋkrɔŋ. No hewɔ lɛ, kanemɔ nii kɛjɛ mli tɛ̃ɛ. (Heb. 4:12) Kɛ́ yɛ Anaigbɛ bii ashihilɛ mli nifeemɔi ahewɔ lɛ enáaa he miishɛɛ lɛ, no lɛ kɛɛmɔ lɛ akɛ Biblia ŋmalɔi lɛ fɛɛ jɛ Asia.
8 Mɛɛ Woji Baahi Waa Kɛ Nitsumɔ? Shiɛlɔi pii kɛ woji ni nyiɛ sɛɛ nɛɛ etsu nii ni amɛye omanye: Nyɔŋmɔ Sɛɛgbɛ ni Adesai Taoɔ, Nɔ Diɛŋtsɛ ni Kɛ Weku Miishɛɛ Baa, kɛ Questions Young People Ask—Answers That Work; woji bibii tamɔ “Naa! Miifee Nii Fɛɛ Ehee,” kɛ Mɛni Ji Yiŋtoo ni Yɔɔ Shihilɛ Sɛɛ—Te Ooofee Tɛŋŋ Ole Hu?; ni kɛ́ Maŋtsɛyeli Sanekpakpa No. 35, ni ji Ani Gbɔmɛi Fɛɛ Baasumɔ Amɛhe Gbi Ko? lɛ eko yɛ lolo lɛ, abaanyɛ akɛtsu nii. Buddhabii pii ni miikase anɔkwale lɛ bianɛ lɛ kase Taoɔ wolo bibioo lɛ klɛŋklɛŋ, ni no sɛɛ lɛ amɛkase Nilee wolo lɛ.
9 Eyɛ mli akɛ akɛɔ akɛ Buddha maŋsɛɛ sanekpakpa shiɛlɔi yashɛ Ateene aaafee afii 400 sɛɛ dani Paulo yashiɛ yɛ jɛmɛ moŋ, shi aleee akɛ ekɛ gbɔmɛi ni Buddha tsɔɔmɔ ená amɛnɔ hewalɛ kpe gbi ko. Shi kɛlɛ, wɔle bɔ ni Paulo nu he akɛ esa akɛ eshiɛɔ etsɔɔ gbɔmɛi ni jɛ shihilɛi srɔtoi fɛɛ amli lɛ eha. ‘Ekɛ ehe hã akɛ tsulɔ kɛha mɛi fɛɛ koni be fɛɛ be ni aaafee lɛ, ehere mɛi komɛi ayiwala.’ (1 Kor. 9:19-23) Wɔbaanyɛ wɔfee nakai nɔŋŋ kɛji akɛ wɔjie mɔ he susumɔ kpo wɔtsɔɔ mɛi lɛ, ni wɔma hiɛnɔkamɔ ni wɔ fɛɛ wɔyɔɔ lɛ nɔ mi yɛ be mli ni wɔyeɔ mɛi fɛɛ ni wɔkɛkpeɔ lɛ odase lɛ.