Sɛɛkuu-kɛ-Saramɔi Haa Anáa Biblia Mli Nikasemɔi

1. Mɛni hewɔ sɛɛkuu-kɛ-saramɔ nitsumɔ lɛ he hiaa waa nakai lɛ?

¹ Yesu kɛ nitsumɔ wooo ekaselɔi lɛ adɛŋ ni amɛshiɛ kɛkɛ, shi moŋ ni ‘amɛfee kaselɔi, ni amɛtsɔɔ amɛ nii’ hu. (Mat. 28:19, 20) Shiɛlɔ jajeɔ nii etsɔɔ, shi tsɔɔlɔ feɔ babaoo fe nakai. Etsɔɔ nii, egbálaa nibii amli, ni ekɛ odaseyelii ni fiɔ nɔ ni ewieɔ lɛ sɛɛ lɛ haa. Gbɛ kome ni wɔtsɔɔ nɔ wɔtsɔɔ mɛi krokomɛi anii ji kɛtsɔ wɔsɛɛ ni wɔkuɔ wɔyasaraa mɛi ni yɔɔ wiemɔ lɛ he miishɛɛ lɛ kɛ yiŋtoo akɛ wɔkɛ amɛ aaaje Biblia mli nikasemɔi ashishi lɛ nɔ.

2. Namɛi esa akɛ wɔku sɛɛ wɔyasara amɛ ekoŋŋ lɛ?

² Namɛi esa akɛ oku osɛɛ oyasara amɛ? Kwɛmɔ ni oyasara mɛi fɛɛ ni ŋɔ wolo loo amɛjie miishɛɛ bibioo po kpo yɛ sanekpakpa lɛ he lɛ. Kɛ́ ona mɔ ko ni yɔɔ wiemɔ lɛ he miishɛɛ beni oyeɔ odase yɛ maŋ lɛ, bɔɔ mɔdɛŋ ni obi mɔ lɛ adrɛs loo tɛlifoŋ nɔmba bɔni afee ni onyɛ oha miishɛɛ ni ená lɛ aya hiɛ. Ná jwɛŋmɔ kpakpa yɛ Biblia mli nikasemɔi ashishijee he. Yaa nɔ ni otao mɛi ni baakpɛlɛ ni akɛ amɛ akase Biblia lɛ, ni ekolɛ onine baashɛ amɛnɔ.—Mat. 10:11.

3, 4. Mɛni fata sɛɛkuu-kɛ-saramɔ ni mɔɔ shi ni aaafee lɛ he?

³ Jiemɔ Mɔ Hesusumɔ Kpo: Hesaamɔ kɛha sɛɛkuu-kɛ-saramɔ ni mɔɔ shi lɛ jeɔ shishi yɛ klɛŋklɛŋ saramɔ lɛ mli. Shiɛlɔi ni yeɔ omanye lɛ kadiɔ nɔ ni shiatsɛ lɛ yɔɔ he miishɛɛ, ni amɛkɛ no tsuɔ nii akɛ nɔdaamɔ nɔ kɛha sanegbaai ni baanyiɛ sɛɛ. Mɛi komɛi naa akɛ sɛɛnamɔ yɛ he akɛ amɛaabi sane ko yɛ saramɔ lɛ naagbee koni amɛkɛtee shiatsɛ lɛ miishɛɛ shi kɛha saramɔ ni baanyiɛ sɛɛ lɛ. Anɔkwa miishɛɛ ni wɔyɔɔ yɛ mɛi ahe lɛ haa wɔyaa nɔ wɔsusuɔ amɛhe kɛji akɛ wɔshi amɛshinaai anaa po, ni etsirɛɔ wɔ koni wɔkatsɛ ni wɔku sɛɛ wɔyasara amɛ. Kɛ́ eeehi lɛ, bɔɔ mɔdɛŋ ni oyasara amɛ beni miishɛɛ lɛ yɔɔ jɛmɛ lolo lɛ—ekolɛ yɛ jetserɛmɔ loo gbii enyɔ mli.

⁴ Kɛ́ oofee sɛɛkuu-kɛ-saramɔ lɛ, bɔɔ mɔdɛŋ ni otsa nyɛsɛɛ sane ni nyɛgba lɛ nɔ. Ha efee oti ni ma ohiɛ akɛ kɛ hoo lɛ okɛ lɛ baasusu Ŋmalɛ naa oti ko ni woɔ mɔ hewalɛ he be fɛɛ be, ni ohe afee oya kɛ sane toiboo. Lé shiatsɛ lɛ jogbaŋŋ. No sɛɛ lɛ okɛ lɛ asusu anɔkwalei ni yɔɔ Nyɔŋmɔ Wiemɔ lɛ mli ni tsuɔ enaagbai lɛ ahe nii tɛ̃ɛ lɛ he yɛ saramɔi ni baanyiɛ sɛɛ lɛ amli.

5. Mɛɛ gbɛ ni yɔɔ mlɛo abaanyɛ atsɔ nɔ ni akɛje Biblia mli nikasemɔi ashishi?

⁵ Hã Ohiɛ Ahi Biblia Mli Nikasemɔ Shishijee Nɔ: Feemɔ sɛɛkuu-kɛ-saramɔi kɛ yiŋtoo akɛ oooje Biblia mli nikasemɔ shishi. Te aaafee tɛŋŋ afee enɛ? Tsĩi tã akɛ obaasumɔ ni okɛ lɛ asusu sane oti ko ni yɔɔ miishɛɛ he, ni ogbele kɛya kuku ko ni yɔɔ Nilee wolo lɛ loo Taoɔ wolo bibioo lɛ mli ni osusuɔ akɛ mɔ lɛ baaná he miishɛɛ lɛ mli. Kanemɔ kuku lɛ, bi sane lɛ ni ogbála mli, ni okɛ lɛ asusu ŋmalɛ kome loo enyɔ ni atsɛ yisɛɛ lɛ he. Abaanyɛ afee enɛ yɛ shinaa lɛ naa nɔŋŋ yɛ minitii enumɔ kɛyashi nyɔŋma mli. Bi sanebimɔ ni nyiɛ sɛɛ lɛ kɛmu naa, ni okɛ lɛ ato gbɛjianɔ koni nyɛtsá sanegbaa lɛ nɔ yɛ be kroko mli.

6. Mɛɛ gbɛ nɔ wɔɔtsɔ wɔtsɔɔ yɛ akɛ wɔnuɔ bɔ ni sɛɛkuu-kɛ-saramɔi ahe hiaa lɛ shishi?

⁶ Miishɛɛ fɛɛ ni ajieɔ lɛ kpo yɛ wiemɔ lɛ he ni wɔɔha eya hiɛ lɛ ji wɔshiɛmɔ nitsumɔ lɛ fã ko ni he hiaa waa. No hewɔ lɛ, too be yɛ odaa otsi gbɛjianɔtoo lɛ mli kɛha sɛɛkuu-kɛ-saramɔi afeemɔ. No feemɔ baaha bɔ ni oshiɛmɔ nitsumɔ lɛ mɔɔ shi ehaa lɛ aya hiɛ ni ebaaha oná miishɛɛ diɛŋtsɛ.