Ye Obua Biblia Kaselɔi ní Amɛbatsɔmɔ Maŋtsɛyeli Sanekpakpa Jajelɔi
1 Nitsumɔ ni Yesu kɛwo ekaselɔi lɛ adɛŋ akɛ amɛtsu ni atsɔɔ yɛ Mateo 28:19, 20 lɛ da waa diɛŋtsɛ. Afã Kristo kaselɔi lɛ ni amɛfee mɛi pii kaselɔi, mɛi ni sɛɛ mli lɛ amɛ hu amɛbaatsa kaselɔfeemɔ nitsumɔ lɛ nɔ. Abaato gbɛjianɔ kɛha Nyɔŋmɔ Maŋtsɛyeli lɛ he sanekpakpa lɛ naagbee nɔ̃ ni abaajaje yɛ jeŋ fɛɛ yɛ naagbee be ni wɔyɔɔ mli bianɛ lɛ mli.—Mat. 24:14.
2 Wɔ-Biblia kaselɔi lɛ baanyɛ afee wɔbii loo mɛi krokomɛi ni miisumɔ ni wɔkɛ amɛ akase Biblia lɛ. Wɔmiisumɔ ni wɔjɛ wɔtsui mli wɔye wɔbua mɛi nɛɛ ní amɛnyɛ amɛtsu sɔ̃ ni kã amɛnɔ akɛ amɛye amɛbua mɛi krokomɛi ni amɛbatsɔmɔ Yesu Kristo kaselɔi lɛ ahe nii.—Luka 6:40.
3 Ye Obua Amɛ ní Amɛye Odase: Wó mɛi ni okɛkaseɔ nii lɛ hewalɛ ni amɛkɛ mɛi krokomɛi agba nɔ ni amɛkaseɔ lɛ he sane. Gbaa amɛ shiɛmɔ nitsumɔ lɛ mli niiashikpamɔi ni woɔ mɔ hewalɛ. Tsɔsemɔ obii lɛ kɛjɛ amɛgbekɛbiiashi ní amɛkɛ amɛhe awo shiɛmɔ nitsumɔ lɛ mli jogbaŋŋ yɛ amɛnyɛmɔ naa. (Lala 148:12, 13) Okɛ owiemɔ kɛ onifeemɔ atsɔɔ akɛ shiɛmɔ nitsumɔ lɛ he hiaa waa yɛ oshihilɛ mli.—1 Tim. 1:12.
4 Mɛi pɛ ni Yehowa kɛtsuɔ nii ji mɛi ni kɛ ejalɛ shishitoo mlai tsuɔ nii ní amɛhiɔ shi yɛ naa lɛ. Eyɛ mli akɛ nibii ni shiɛlɔi heei lɛ le lɛ shɛɛɛ nibii ni Maŋtsɛyeli lɛ he sɔɔlɔi ni ejɔɔ amɛhe nɔ ni abaptisi amɛ ni yɔɔ niiashikpamɔ lɛ le lɛ moŋ, shi esa akɛ mɛi heei lɛ afee mɛi ni heɔ shishijee Biblia mli tsɔɔmɔi lɛ amɛyeɔ ni amɛnyɛɔ amɛgbalaa mli amɛhaa mɛi krokomɛi. (Kwɛmɔ Ato Wɔhe Gbɛjianɔ wolo lɛ bf. 79-82.) Esa akɛ amɛfee mɛi ni amɛtsi amɛhe kwraa kɛjɛ “Babilon Kpeteŋkpele” lɛ he, amɛkɛ amɛhe wooo maŋkwramɔŋ saji amli dɔŋŋ, ni esa akɛ amɛya asafoŋ kpeei daa.—Kpoj. 18:2, 4; Yoh. 17:16; Heb. 10:24, 25.
5 Kɛ́ ona akɛ o-Biblia kaselɔi lɛ eko he esa ní ebaanyɛ etsɔ shiɛlɔ ni abaptisiko lɛ nɔŋŋ lɛ, esa akɛ owó onukpai asɛinɔtalɔ lɛ toi nɔ. Ebaato gbɛjianɔ koni onukpai enyɔ kɛ bo kɛ o-Biblia kaselɔ lɛ akpe ni amɛkwɛ kɛji akɛ ehe esa akɛ shiɛlɔ ni abaptisiko lɛ ni baanyɛ afata asafo lɛ he kɛshiɛ Maŋtsɛyeli lɛ he sanekpakpa lɛ lo. Enɛ baaha oná hegbɛ ní olɛɛ tsɔsemɔ ni okɛhaa o-Biblia kaselɔ lɛ mli beni efataa ohe yɛ shiɛmɔ nitsumɔ lɛ mli lɛ.