Ná Hesai Pii yɛ Shiɛmɔ Nitsumɔ lɛ Mli—Nɔ ni Esa akɛ Ofee yɛ Mɛi ni Sumɔɔɔ ni Ashiɛɔ Ahãa Amɛ lɛ Ahe

Nɔ Hewɔ ni Ehe Hiaa: Ŋɔɔ lɛ akɛ oná ole akɛ adebɔɔ naa oshara ko miiba nyɛkutso lɛ mli, ni akɛ kɛ́ mɛi ejooo foi amɛshiii jɛmɛ lɛ amɛbaagboi. Otee okutsoŋnyo ko ŋɔɔ ni oyabɔ lɛ kɔkɔ, shi owieee ogbeee naa nɔŋŋ ni ekɛɛ bo akɛ ebɛ dekã. Ani okɛ oyaiyeli baashi lɛ, ni oyeee obuaaa lɛ? Dabida! Akɛni mɛi ni yɔɔ wɔshikpɔŋkuku lɛ mli lɛ ateŋ mɛi pii leee akɛ sane ni wɔhiɛ lɛ ji yiwalaheremɔ sane hewɔ lɛ, amɛbooo wɔ toi. Ekolɛ be ni wɔbaaya amɛŋɔɔ lɛ, nibii krokomɛi ehe amɛjwɛŋmɔ. (Mat. 24:37-39) Aloo ekolɛ mɛi komɛi ewie wɔhe saji ni ejaaa etsɔɔ amɛ ni enɛ ehã amɛná wɔhe jwɛŋmɔ fɔŋ. (Mat. 11:18, 19) Ekolɛ amɛbaasusu akɛ srɔto ko bɛ wɔ kɛ jamɔi krokomɛi ni woɔ yibii fɔji lɛ ateŋ. (2 Pet. 2:1, 2) Kɛ́ yɛ shishijee mli lɛ shĩatsɛ lɛ ejieee miishɛɛ kpo lɛ, esaaa akɛ wɔnijiaŋ jeɔ wui amrɔ nɔŋŋ.

Bɔ ni Obaafee lɛ Ohã:

Dani obaaje shĩa fɛɛ shĩa shiɛmɔ lɛ shishi lɛ, hemɔ be fioo ni okɛsusu nibii ni mɛi baanyɛ amɛkɛjie amɛnaa koni amɛkabo sane lɛ toi kɛ nɔ ni obaanyɛ okɛɛ amɛ lɛ he.
Kɛ́ shĩatsɛ lɛ wie nɔ ko ni tsɔɔ akɛ esumɔɔɔ ni eboɔ wɔ toi lɛ, ŋmɛɛ otsui shi ni obɔ mɔdɛŋ ni okɛ lɛ atsa sanegbaa lɛ nɔ. Ekolɛ obaanyɛ ofee enɛ kɛtsɔ eyi ni ooojie lɛ nɔ. Akɛ nɔkwɛmɔnɔ lɛ, kɛ́ ekɛɛ eyɛ jamɔ ko mli momo lɛ, obaanyɛ okɛɛ akɛ, “Mishwelɛ nɔŋŋ ji akɛ mikɛ mɔ ko ni nyaa nyɔŋmɔjamɔ he tamɔ bo akpe.” Bei komɛi lɛ, kɛ́ ohã shĩatsɛ lɛ le akɛ onuɔ esusumɔi loo shihilɛ ni eyɔɔ mli lɛ shishi lɛ, ebaaye abua bo ni oya nɔ oye lɛ odase. Akɛ nɔkwɛmɔnɔ lɛ, kɛ́ ekɛɛ ebɛ dekã lɛ, obaanyɛ okɛɛ lɛ akɛ: “Mina nakai. Shi dani mashi bo lɛ, masumɔ ni mikɛ enɛ ahã bo.” Nɔ kroko ni obaanyɛ ofee kɛ́ shĩatsɛ lɛ kɛɛ ebɛ wiemɔ lɛ he miishɛɛ ji ni obaabi lɛ sane. Obaanyɛ obi lɛ akɛ, “Ani Biblia lɛ ji nɔ ni onaaa he miishɛɛ lɛ, aloo obɛ jamɔ ko jamɔ ko he miishɛɛ?”
Okɛ sɛɛyoomɔ atsu nii. Kaimɔ akɛ Yehowa enyɛɛɛ mɛi anɔ koni amɛbo lɛ toi. (5 Mose 30:19) Mɔ fɛɛ mɔ baabu lɛ diɛŋtsɛ ehe akɔntaa ehã Yehowa. (Gal. 6:5) Kɛ́ shĩatsɛ lɛ waje etsui akɛ eboŋ wɔ toi lɛ, esa akɛ wɔshi lɛ ni wɔya. Kɛ́ wɔbo lɛ toi ni wɔshi lɛ lɛ, ekolɛ no baahã nyɛmi kroko anyɛ aye lɛ odase wɔsɛɛ.—1 Pet. 3:15.

Kaa Enɛ Okwɛ yɛ Nyɔɔŋ nɛɛ Mli:

Be ni nyɛshi shĩatsɛ ko ni sumɔɔɔ ni ashiɛɔ ahãa lɛ lɛ ŋɔɔ lɛ, okɛ mɔ ni okɛnyiɛ lɛ asusu gbɛ ni kulɛ esa akɛ nyɛtsu he nii nyɛhã lɛ he.