NIKASEMƆ 11

Wiemɔ Kɛ Miishɛɛ Kɛ Ekãa

Romabii 12:11

NƆ NI ESA AKƐ OFEE: Wiemɔ kɛ ekãa ni okɛkanya otoibolɔi lɛ.

Wiemɔ kɛjɛ otsui mli. Be ni osaa ohe lɛ, susumɔ sɛɛnamɔ ni yɔɔ osane lɛ he lɛ he waa. Kasemɔ nɔ ni oyaawie lɛ jogbaŋŋ koni onyɛ owie kɛjɛ otsui mli.
Susumɔ otoibolɔi lɛ ahe. Jwɛŋmɔ bɔ ni mɛi baaná sane ni oyaakane loo oyaatsɔɔ lɛ he sɛɛ amɛhã lɛ he. Taomɔ gbɛi ni obaatsɔ nɔ owie sane lɛ ni otoibolɔi lɛ ana sɛɛnamɔ ni yɔɔ he lɛ faŋŋ.
Kaahã owiemɔ lɛ fee nyaa, hã miishɛɛ ahi mli. Wiemɔ kɛ ekãa. Okɛ oninefɔɔ kɛ ohiɛ atsɔɔ bɔ ni onuɔ he ohãa diɛŋtsɛ.

Kwɛmɔ jogbaŋŋ ni okafɔ̃ onine yɛ gbɛ kome too nɔ shii abɔ, kɛ́ nakai feemɔ eka ohe po, kɛjeee nakai lɛ obaagbala otoibolɔi lɛ ajwɛŋmɔ kɛba onɔ. Hã oninefɔɔ lɛ kɛ nɔ ni owieɔ he lɛ anyiɛ. Kɛ́ oowie otii ahe loo oowo otoibolɔi lɛ hewalɛ ni amɛfee nɔ ko lɛ, ehi akɛ obaawie kɛ ekãa kɛ miishɛɛ. Shi kɛ́ okɛ ekãa kɛ miishɛɛ wie fe nine yɛ owiemɔ lɛ mli fɛɛ lɛ, owiemɔ lɛ baaje otoibolɔi lɛ atsine.