Jennfrè, vin dé moun ki byen doubout adan lavérité

1. Kijan on krétyen ka ‘montré i sé on nonm’ ?

WA David di Salomon : « Montré-w fò é montré ou sé on nonm » (1 Wa 2:1-3). Jòdijou, konsèy-lasa ka konsèwné tout sé frè-la ki adan lasanblé-la. Ou ka « montré ou sé on nonm », lè ou ka obéyi lwa a Bondyé é lè ou ka apliké prensip a Labib adan tout domenn a vi a-w (Lik 2:52). Si ou sé on jennfrè, poukwa sa enpòwtan kè vou osi ou vin on frè ki byen doubout adan lavérité ?

2-3. Poukwa sa enpòwtan kè on jennfrè vin on moun ki byen doubout adan lavérité ?

² Ki sé adan fanmi-la, ki sé adan lasanblé-la, wòl a on misyé enpòwtan toubònman. Pétèt ou ja réfléchi asi sé rèsponsabilité-la ou té’é pé ni la plita : vin pyonyé, vin asistan, é aprésa vin ansyen. Pétèt osi ou ja réfléchi pou vwè si ou ké mayé oben si ou ké ni timoun (Éféz. 6:4 ; 1 Tim. 3:1). Pou atenn sé òbjèktif-lasa é réyisi adan sa ou ka fè, ou bizwen vin on krétyen ki byen doubout adan lavéritéb.

³ Ka ki pé édé-w vin on krétyen ki byen doubout adan lavérité ? Fò ou ké aprann fè sèwten biten enpòwtan. An-nou vwè kijan ou pé préparé-w pou sé bèl rèsponsabilité-la ki ka atann-vou la.

KIJAN OU PÉ VIN ON KRÉTYEN KI BYEN DOUBOUT ADAN LAVÉRITÉ

4. Ki bèl ègzanp ou pé imité ? (gadé imaj-la osi).

⁴ Chwazi ki bèl ègzanp ou pé imité. Adan Labib ou pé touvé onlo ègzanp a jenngason ou pé imité. Sé nonm-lasa té enmé Bondyé é yo té ni onlo rèsponsabilité diféran adan pèp a-y. Ou pé touvé onlo bèl ègzanp osi a frè ki byen doubout adan lavérité adan fanmi a-w é adan lasanblé-la (Ébr. 13:7). É asirésèten, méyè ègzanp nou pé ni sé ta Jézi (1 Pyè 2:21). Pran tan étidyé sé ègzanp-lasa é réfléchi asi sé bèl kalité-la yo té ni la é kè ou ka aprésyé (Ébr. 12:1, 2). Aprésa, mandé-w kijan ou pé imité sé nonm-lasa.

5. Ka ou pé fè pou ou toujou « kapab réfléchi » plibyen, é poukwa sa enpòwtan pou on jenn ? (Sòm 119:9).

⁵ Fè éfò « pou ou toujou kapab réfléchi » plibyen (Pwov. 3:21). Sa vé di pa fè on biten présé-présé men pran tan a-w pou-w réfléchi avan ou désidé sa ou kay fè. Pou pwogrésé adan domenn-lasa, fò ou ké fè onlo éfò. Poukwa ? Pas si ou ka gadé alantou a-w, ou ké rann-vou kont kè onlo jenn ka pran désizyon a yo asi on koudtèt, oben yo ka lésé sa yo ka rèsanti pran lanmen asi yo (Pwov. 7:7 ; 29:11). Anplisdisa, télé-la, sé rézo sosyo la é Entèwnèt pé aji onlo asi-w. Alò ka ki pé édé-w « pou ou toujou kapab réfléchi » plibyen ? Prèmyé biten ou pé fè, sé byen konnèt sé prensip-la ki an Bib-la. Konsa ou ké sèten kè sa yo ka di bon pou-w. Aprésa, sèvi èvè sé prensip-lasa pou pran désizyon ki ké fè Jéova plézi (li Sòm 119:9). Lè ou ké pran bon labitid-lasa, sa ké édé-w toubònman pou vin on frè ki byen doubout adan lavérité (Pwov. 2:11, 12 ; Ébr. 5:14). Alèla, an-nou vwè kijan lè ou « kapab réfléchi » sa pé édé-w adan sé 2 domenn-lasa : 1) jan ou ka konpòwté-w èvè sé sè-la é 2) jan ou ka abiyé é jan ou ka pengné.

6. Si ou « kapab réfléchi », kijan sa ké aji asi mannyè ou ka konpòwté-w èvè sé sè-la ?

⁶ Fò prensip a Jéova édé-w montré sé madanm-la kè ou ni onlo rèspé pou yo. Pa ègzanp, on jennfrè pé zanmi èvè dé sè é pa ni ayen dè mal adan sa. Men si i « kapab réfléchi », i pé ké ni fè, ni di, ni maké ayen ki té’é pé fè on sè kwè kè i ni santiman pou-y, sòf si i anvi frékanté-y pou mayé èvè-y (1 Tim. 5:1, 2). É menmsi i ka frékanté on sè, i ké fè ansòt pou toujou ni on moun èvè yo pou pwotéjé répitasyon a sè-la (1 Kor. 6:18).

7. Si ou « kapab réfléchi », kijan sa ké aji asi jan ou ka abiyé é jan ou ka pengné ?

⁷ On jenngason ki kapab réfléchi ka montré sa osi adan jan i ka abiyé é adan jan i ka pengné. Byensouvan, sé moun-la ki ka fè lenj ki lanmòd pa ka tchenn kont dè prensip a Jéova oben yo pa ni on vi ki pwòp. Kifè, sé lenj-la yo ka fè la pé two séré oben pé fè on nonm sanm on madanm. Lè ou ka chwazi lenj a-w, vométan ou lésé prensip a Labib é sé bon ègzanp-la ou ka vwè adan lasanblé-la gidonné-w. Konsa ou ké montré kè ou vlé vin on moun ki byen doubout adan lavérité. Pa ègzanp, ou pé mandé-w : « Ès sé chwa-la an ka fè la ka montré kè an sé on moun ki kapab réfléchi é ki ka tchenn kont dè santiman a lézòt ? Ès jan-la an abiyé la ka montré kè an sé on moun ki ka sèvi Bondyé ? » (1 Kor. 10:31-33 ; Tit 2:6). Si ou ka fè éfò pou ou toujou kapab réfléchi, non sèlman frè é sè a-w ké ni plis rèspé pou-w, men Pap’a-w ki an syèl-la osi.

8. Kijan ou pé fè ansòt pou lasanblé-la fè-w konfyans plis ankò ?

⁸ Fè ansòt pou yo fè-w konfyans. On jennfrè yo pé fè konfyans ka fè tousa yo ka ba-y fè é i ka fè sa byen konm i fo (Lik 16:10). Pran on ti tan pou réfléchi asi ègzanp a Jézi, ki té pawfè. I té séryé adan tousa i té ka fè. I fè tousa Jéova mandé-y fè, menmsi sé biten-la i té ni a fè la té rèd toubònman. I bay vi a-y pas i té enmé disip a-y é pas i té enmé lézimen (Jan 13:1). Pou imité Jézi, fè éfò pou fè tousa yo ka ba-w fè. Si ou pa sav kijan pou fè on biten vréman, montré ou ni imilité é mandé on frè ki byen doubout adan lavérité édé-w. Pa kontanté-w dè fè sa ki nésésè tousèl men chèché a fè plis, é lèwvwè yo ka ba-w fè on travay, ay jous an bout a-y (Wom. 12:11). Toujou fè ‘konsi sé pou Jéova ou ka travay, pa fè-y konsi sé pou lézòm ou ka fè-y’ (Kol. 3:23). É konm ponmoun pa pawfè, aji èvè imilité é rèkonnèt sé érè-la ou ka fè la (Pwov. 11:2).

APRANN FÈ DÉ BITEN KI ITIL

9. Poukwa fò on frè aprann fè dé biten ki itil ?

⁹ On frè ki byen doubout adan lavérité ka fè biten ki itil pou lasanblé-la, i ka antann-li byen èvè lézòt, i ka gangné sou a pen a-y é i ka ba fanmi a-y sa yo bizwen. Sé pousa ni sèwten biten fò i sav fè. An-nou vwè 3 adan yo.

10-11. Poukwa fò ou chèché a li é a ékri plibyen ? (Sòm 1:1-3 ; gadé imaj-la osi).

¹⁰ Aprann li é ékri plibyen. Pou on moun ni tchè-kontan é pou i réyisi vi a-y, sa enpòwtan toubònman kè i pran tan li Labib é médité asi-y touléjou (li Sòm 1:1-3). Si ou ka li Labib chakjou, ou ké konprann jan Jéova ka pansé pli fasilman é sa ké édé-w apliké konsèy a-y adan vi a-w (Pwov. 1:3, 4). Si ou ka pran labitid-lasa, ou ké ba lasanblé-la on bèl pal.

¹¹ Adan lasanblé-la, sé frè é sè la bizwen frè ki kapab anségné é ki pé bay konsèy ki bazé asi Labib (Tit 1:9). Si ou ka li byen, sa ké édé-w bay diskou é fè komantè ki ka konsolidé fwa a lézòt. Fè éfò pou ékri plibyen osi. Sa ké pèwmèt-vou pran nòt ki entérésan lè ou ké ka étidyé tousèl a-w, lè ou ké réinyon é lè ou ké lasanblé. Konsa fwa a-w ké vin pli fò, é pétèt kè sé lidé-la ou maké la ké itil pou lézòt osi.

12. Ka ki ké édé-w kouté lézòt byen é palé ba yo byen konm i fo ?

¹² Aprann kouté lézòt byen é aprann palé ba yo byen konm i fo. Sa enpòwtan kè sé frè-la aprann fè sa byen. Lè kò a on frè bon adan domenn-lasa, i ka pran tan kouté lézòt byen é i ka chèché a konprann sa yo ka pansé é sa yo ka rèsanti (Pwov. 20:5). Lè on moun ka di on biten, frè-la ka tchenn kont osi dè jan lòt moun-la ka palé, dè figi a-y, dè jès i ka fè é dè konpòwtasyon a-y. Donk si ou ka sèvi toutlè èvè zouti élèktwonik pou palé èvè lézòt, kon pa ègzanp mésaj oben mèl, sa pa ka sifi. Sa enpòwtan kè ou ay owa moun-la pou palé èvè-y osi. Alò chèché tout ti lokazyon pou ou pé sa palé èvè lézòt « zyé dan zyé » (2 Jan 12).

13. Ki dòt biten on jennfrè pé aprann fè ? (1 Timoté 5:8 ; gadé imaj-la osi).

¹³ Aprann gangné sou a pen a-w. Lè on frè byen doubout adan lavérité, fò i gangné sou a pen a-y é fò i ba fanmi a-y sa yo bizwen (li 1 Timoté 5:8). Adan sèwten péyi, sé jenngason-la ni labitid aprann fè menm travay ki pap’a yo oben ta ondòt moun an fanmi a yo. Dòt koté, sé lékòl yo ka aprann fè dé biten ki ké sèvi-yo lèwvwè yo ké ni on travay. Antouka, sé toujou on bon biten lèwvwè on jenn ka aprann fè dé biten pou pèwmèt-li touvé on travay plita (Akt 18:2, 3 ; 20:34 ; Éféz. 4:28). Pran labitid travay rèd, é fè ansòt pou-w fin sa ou koumansé. Konsa, lézòt ké vwè kè ou sé on jenn ki séryé é kè yo pé fè-w konfyans. Ou pli fasil a touvé on travay osi, é ou pli fasil a rété adan-y. Talè la nou vwè ki biten itil on frè dwètèt aprann fè é ki kalité pou i ni. Tout sé biten-lasa ké édé-y lèwvwè i ké ni rèsponsabilité plita. Konnyéla, an-nou vwè déotwa rèsponsabilité i pé rivé a ni.

RÈSPONSABILITÉ OU PÉ NI PLITA

14. Kijan ou pé préparé-w pou sèvi Jéova aplentan ?

¹⁴ Sèvi Jéova aplentan. Lè on jenngason pyonyé, sé on bon biten toubònman. Onlo frè ki byen doubout adan lavérité koumansé sèwvis aplentan la lèwvwè yo té jenn. Lè ou pyonyé ou ka aprann kolaboré èvè toutkalté moun. Ou ka aprann jéré lajan a-w osi é ou pa’a dépansé plis ki sa ou ni (Filip. 4:11-13). Onlo frè é sè té pyonyé an ranfò pannan on tan avan yo vin pyonyé pèwmanan. É déotwa tan apré, sèwten adan yo vin sèwvitè a lakonstriksyon oben bétélit. Si ou ka vin pyonyé an ranfò, sa pé wouvè onlo pòt ba-w osi !

15-16. Ka on jennfrè pé fè si i vlé vin pli itil adan lasanblé a-y ?

¹⁵ Vin asistan oben vin ansyen. Labib ka di kè si on frè « ka chèché a » vin ansyen, « sé on bon biten i vlé fè » (1 Tim. 3:1). Avan on frè vin ansyen, fò i pwogrésé pou vin asistan. Sé asistan-la ka kolaboré èvè sé ansyen-la adan onlo domenn. Yotout ka sèvi frè é sè a yo èvè onlo imilité, é yotout ka préché èvè onlo balan. Yo pé nonmé on jennfrè asistan menmsi i ni antrè 17 é 19 an, é si i ka kontinyé pwogrésé, i pé jous vin ansyen tibwen apré i trapé 20 an a-y.

¹⁶ Ka ou pé fè pou atenn sé òbjèktif-lasa ? Labib ka èspliké byen ki kalité fò on asistan oben on ansyen montré kè i ni. Tout sé kalité-lasa lyanné èvè lanmou : lanmou pou Jéova, pou fanmi a-y é pou lasanblé-la (1 Tim. 3:1-13 ; Tit 1:6-9 ; 1 Pyè 5:2, 3). Pran tan analizé chak sé kalité-lasa, é priyé Jéova pou i édé-w ni-yoc.

17. Kijan on jennfrè pé préparé-y pou vin chèf a on fanmi ? (gadé imaj-la osi).

¹⁷ Vin chèf a on fanmi. On frè ki byen doubout adan lavérité pé rété sélibatè, pa ni pon pwoblèm adan sa (Mat. 19:12). Pawkont, sila ki ka mayé la ka aksèpté ni on rèsponsabilité anplis : vin chèf a on fanmi (1 Kor. 11:3). Fò on bon mari enmé madanm a-y, fò i ba-y sa i bizwen, fò i sé méyè zanmi a-y é fò i édé-y rété toupré Jéova (Éféz. 5:28, 29). Nou sòti palé dè sèwten kalité é dè sèwten biten ou pé aprann fè, é sé dé biten ki ké édé-w si ou ka mayé. Si ou kapab réfléchi, kè ou ka rèspèkté sé madanm-la é kè yo pé fè-w konfyans, sa ké édé-w vin on bon mari.

18. Kijan on jennfrè pé préparé-y pou vin on papa ?

¹⁸ Lévé timoun. É vinvwè on jou ou ni timoun ? Sèten ou ké anvi vin on bon papa ! Ka Jéova pé aprann-vou adan domenn-lasa ? Onlo biten menm ! (Éféz. 6:4). Pa ègzanp, Jéova di Jézi kè i té enmé-y é kè i té fyèw dè-y (Mat. 3:17). Asirésèten, on bon papa sav di timoun a-y kè i enmé-yo é i ka félisité-yo chakfwa yo ka fè on bon biten. Sé papa-la ka imité Jéova lè yo ka fè tousa yo pé pou édé gason a yo é fi a yo vin dé krétyen ki byen doubout adan lavérité. On biten ki pé édé-w préparé-w pou sianka ou ka mayé é kè ou ka vin ni timoun, sé lèwvwè ou ka montré fanmi a-w é lasanblé a-w jan yo ni onlo valè ba-w (Jan 15:9). Montré-yo kè ou enmé-yo é félisité-yo pou sa yo ka fè. Konsa ou ké pli itil an men a Jéova é ou ké pé édé fanmi a-w é lasanblé a-w.

KA OU KÉ FÈ ALÈLA ?

19-20. Kijan sé jennfrè-la pé vin dé frè ki byen doubout adan lavérité ? (gadé imaj-la ki anlè po a jounal-la).

¹⁹ Kon ou sòti vwè, pou vin on frè ki byen doubout adan lavérité sa ka mandé onlo éfò. Alò chwazi ki bon ègzanp ou pé imité, fè éfò pou ou toujou kapab réfléchi, montré ou sé on moun yo pé fè konfyans, aprann fè dé biten ki itil é préparé-w pou lèwvwè ou ké ni rèsponsabilité plita.

²⁰ Tousa nou sòti vwè adan awtik-lasa dwèt ka ba-w maltèt ! Men pa enkyété-w, ou pé rivé ! Sonjé kè Jéova vlé édé-w (Iz. 41:10, 13). É frè é sè a lasanblé a-w osi. Lè ou ké vin on moun ki byen doubout adan lavérité, vi a-w ké bèl toubònman. Jennfrè an nou, nou enmé-w ! Nou ka mandé pou Jéova béni éfò a-w pou-w vin on frè ki byen doubout adan lavérité ! (Pwov. 22:4).