AWTIK POU ÉTIDYÉ 12
KANTIK 77 La lumière dans un monde enténébré
Pran pyé a kouri a-w douvan nwèsè é rété adan limyè-la
« Avan zò té nwèsè, men konnyéla zò sé limyè » (ÉFÉZ. 5:8).
ON TI LIDÉ ASI SA NOU KAY VWÈ
Adan Éfézyen chapit 5, Pòl ka konparé sèwten biten èvè nwèsè é limyè. An-nou vwè ka sa ka aprann-nou.
1-2. a) Adan ki sitiyasyon Pòl té yé lè i maké lèt a-y ba sé Éfézyen-la ? b) A ki kèsyon nou kay réponn ?
TOUPANNAN i té lajòl Wòm, lapòt Pòl té vlé ankourajé frè é sè a-y. Konm i pa té pé ay vwè-yo, i voyé lèt ba yo. I maké ta sé Éfézyen-la koté 60 oben 61 a épòk an nou (Éféz. 1:1 ; 4:1).
2 Apépré 10 lanné avan, Pòl té pasé bon enpé tan Éfèz pou i té préché é anségné bon nouvèl-la (Akt 19:1, 8-10 ; 20:20, 21). I té enmé frè é sè a-y onlo é i té vlé ankourajé-yo rété fidèl a Jéova. Men pou kibiten i palé sé kréyen wen la dè nwèsè é dè limyè ? É ka sa i di-yo pé aprann tout sélézòt kréyen-la ? An-nou réponn a sé kèsyon-lasa.
YO SÒTI AN NWÈSÈ POU VIN AN LIMYÈ
3. Ki ègzanp Pòl itilizé adan lèt-la i maké ba sé Éfézyen-la ?
3 Pòl di sé krétyen Éfèz la : « Avan zò té nwèsè, men konnyéla zò sé limyè » (Éféz. 5:8). Pòl ka sèvi èvè ègzanp a nwèsè é limyè pou palé dè 2 sitiyasyon ki pa ni ayen a vwè yonn èvè lòt. Men pou koumansé, an-nou vwè poukwa i té pé di kè avan, sé Éfézyen-la té an « nwèsè ».
4. Poukwa nou pé di kè sé Éfézyen-la té an nwèsè akòz dè sé fo rèlijyon-la ?
4 An nwèsè akòz dè sé fo rèlijyon-la. Avan yo vin konnèt lavérité, krétyen a Éfèz té èsklav a fo-adorasyon é té ka kwè adan lamaji. Adan vil a Éfèz té ni tanp a Awtémis. Pou sé moun-la ki té ka viv a épòk-lasa, sé té yonn adan sé 7 pli bèl biten-la lòm té fè la. Sé moun-la ki té ka vin adan tanp-lasa té ka adoré idòl kon idòl fèt. Sé moun-la ki té ka fè é ki té ka vann èstati a Awtémis é a tanp a-y té ka gangné onlo lajan (Akt 19:23-27). É toutmoun té sav kè adan vil-lasa, yo té ka pratiké lamaji (Akt 19:19).
5. Poukwa nou pé di kè sé Éfézyen-la té an nwèsè anrapò èvè sa ki byen é sa ki mal ?
5 An nwèsè anrapò èvè sa ki byen é sa ki mal. Toutmoun té sav kè sé Éfézyen-la té ka viv adan on gran manjé-kochon. Té ni vyé pawòl ki adan sé pyès-téat-la, ki adan fèt ki lyanné èvè rèlijyon a yo (Éféz. 5:3). Onlo adan sé Éfézyen-la pa té « konnèt ka ki byen é ka ki mal ankò », kivédi yo « pa té ka pran penn a ayen ankò » (Éféz. 4:17-19). Avan yo té aprann konnèt vréman sa ki byen oben sa ki mal, konsyans a sé Éfézyen-la pa té ka bat-yo é yo té ka kwè kè yo pa té ni pon kont a rann Bondyé. Sé pousa Pòl té pé di kè « lèspri a yo an nwèsè é yo lwen vi-la ki ka vin dè Bondyé ».
6. Pou kibiten Pòl té pé di sé Éfézyen-la kè konnyéla yo té « limyè » ?
6 Men sèwten adan sé Éfézyen-la pa rété an nwèsè. Pòl di dè yo kè konnyéla yo té « limyè anrapò èvè Ségnè-la » (Éféz. 5:8). Yo té aksèpté limyè-la anrapò èvè sé vérité-la ki an Bib-la (Sòm 119:105). Yo té lagé tout sé biten-la yo té ka fè la adan fo rèlijyon a yo é tout péché sèksyèl. Yo té vin dé moun ka « imité Bondyé » é yo té ka fè tousa yo té pé pou adoré Jéova é fè-y plézi (Éféz. 5:1).
7. Poukwa nou pé di kè sitiyasyon an nou ka sanm ta krétyen a Éfèz an tan a Pòl ?
7 Nou osi, avan nou vin konnèt lavérité, nou té an nwèsè akòz dè sé fo rèlijyon-la é pas nou pa té konnèt sa ki byen é sa ki mal. Sèwten adan nou té ka fété fèt ki lyanné èvè fo rèlijyon é dòt té ni on vi ki pa pwòp. Men lè nou aprann konnèt prensip a Jéova anrapò èvè sa ki byen é sa ki mal, nou fè sé chanjman-la ki fo la. Nou koumansé viv jan i té vlé. É grasa sa, nou jwenn onlo byenfé (Iz. 48:17). Men jòdijou nou ka fasadé èvè onlo onlo onlo difikilté. Sé pousa, fò nou fè bon éfò pou rété lwen a nwèsè-la nou sòti adan-y la é pou « kontinyé maché kon timoun a limyè ». Kijan nou pé rivé fè sa ?
Image digitally reproduced with the permission of the Papyrology Collection, Graduate Library, University of Michigan, P.Mich.inv. 6238. Licensed under CC by 3.0
Adan lèt-la Pòl voyé ba sé Éfézyen-la, tini onlo konsèy plen lanmou ki pé sèvi-noub (gadé paragraf 7 la).
PRAN PYÉ A KOURI A-W DOUVAN NWÈSÈ
8. Dapré Éfézyen 5:3-5, ka krétyen a Éfèz té dwètèt kontinyé lagé ?
8 (Li Éfézyen 5:3-5.) Pou krétyen a Éfèz té rété lwen a nwèsè anrapò èvè sa ki byen é sa ki mal, fò yo té kontinyé lagé tousa ki pa té ka fè Jéova plézi, kivédi péché sèksyèl men pawòl sal osi. Pòl fè sé Éfézyen-la sonjé kè si yo té vlé « érité wayòm a Kris é a Bondyé », fò yo té lagé tout sé mové biten-la yo té ka fè la.
9. Poukwa fò nou lagé tousa ki té’é pé menné-nou a fè péché sèksyèl ?
9 Nou osi fò nou kontinyé goumé pou nou pa mèt-nou ka fè « sa ki ka fèt an nwèsè é ki pa’a pòté fwi » (Éféz. 5:11). On biten ki klè, sé kè pi on moun ka gadé, ka kouté oben ka palé dè biten ki pa pwòp oben ki lyanné èvè péché sèksyèl, pi moun-lasa ka riské fè on péché (Jén. 3:6 ; Jak 1:14, 15). Adan on péyi, onpakèt frè vin « zanmi » pas yo té ka palé adan on gwoup yo fè asi sé rézo sosyo la. Odépa, onlo adan yo té ni dé ti kozé asi Labib. Men piti-a-piti, yo koumansé palé dè biten ki pa pwòp é ki té lyanné èvè sèks. Aprésa, plizyè adan yo rèkonnèt kè sé ti kozé-la yo té ni la pousé-yo fè péché sèksyèl.
10. Kijan Satan ka éséyé kouyonné-nou ? (Éfézyen 5:6).
10 Mond a Satan ka éséyé kouyonné-nou. I ka chèché a fè-nou kwè kè lè Jéova ka di kè on biten pa pwòp oben kè sé on péché sèksyèl, a pa sa ditou-ditou (2 Pyè 2:19). Sa pa ka étonné-nou ! Satan ka sèvi èvè sé menm zatrap-lasa dépi bon enpé tan. Sa i vlé, sé fè ansòt pou sé moun-la pa sav ka pou yo pansé, é konsa yo pé’é pé fè ladiférans antrè sa ki byen é sa ki mal (Iz. 5:20 ; 2 Kor. 4:4). Kifè sa pa ka siwprann-nou nonplis kè onlo fim, émisyon a télé é sit Entèwnèt ka mèt douvan dé lidé ki pa annakò èvè prensip a Jéova ki jis ! Satan ka éséyé fè-nou kwè, kè lè sé moun-la ka fè dé mové biten é ka menné tout kalté vi ki pa pwòp, non sèlman a pa on mové biten, men anplisdisa sa ka pwokiré-yo onlo plézi é pa ni pon danjé adan sa (li Éfézyen 5:6).
11. Kijan ègzanp a Angela ka montré kè sa enpòwtan kè nou mèt sé konsèy-la ki adan Éfézyen 5:7 an pratik ? (gadé imaj-la osi).
11 Satan vlé kè nou frékanté moun ki pa ka ankourajé-nou rèspèkté prensip a Jéova. Sé pousa Pòl avèti sé Éfézyen-la. Mi sa i di-yo : « Fò pa zò ni ayen a vwè èvè yo », kivédi èvè sé moun-la ki té ni labitid fè sa ki mové pou Bondyé (Éféz. 5:7). Men jòdijou, fò nou fè plis atansyon ankò ki sé Éfézyen-la. Fò nou sonjé kè moun nou ka frékanté, a pa sèlman moun ki ka pasé tan èvè nou, men sé moun ki ka palé èvè nou asi sé rézo sosyo la osi. Angelaa ka viv an Azi é i fin pa konprann kijan sé rézo sosyo la pé danjéré. Mi sa i ka rèkonnèt : « Sé on vré danjé. Piti-a-piti, yo pé fè-w pèd bon jijman a-w. Anfinaldikont, sa pa té ka jenné-mwen ankò dè ni zanmi ki pa té ka rèspèkté prensip a Labib. É an fin pa kwè kè lè ou ni on vi ki pa’a fè Jéova plézi, pa ni ayen dè mal adan sa. » Érèzman, èvè onlo lanmou, sé ansyen-la édé Angela fè sé chanjman-la ki té fo la. Mi sa i ka di pou fin : « Olyé an plen lèspri an mwen èvè sa sé moun-la ka mèt anlè sé rézo sosyo la, an ka plen lèspri an mwen èvè dé biten ki ka édé-mwen konsolidé lanmityé an mwen èvè Bondyé. »
Si nou ka chwazi frékanté moun ki enmé Jéova, nou ké rivé rèspèkté prensip a-y pli fasilman (gadé paragraf 11 la).
12. Ka ki ké édé-nou rèspèkté prensip a Jéova anrapò èvè sa ki byen é sa ki mal ?
12 Fò nou goumé èvè létadèspri a mond-lasa ki vlé fè-nou aksèpté tout kalté péché sèksyèl. Nou konnèt lavérité asi sa (Éféz. 4:19, 20). Alò an-nou mandé-nou : « Ès an ka pran bon prékosyon pou an pa frékanté kolèg-travay, kanmarad-lékòl oben dòt moun ki pa’a rèspèkté prensip a Jéova ki jis si sa pa nésésè ? Ès an ka soutyenn prensip a Jéova èvè onlo kouraj menmsi moun ka di-mwen kè an two karé ? » Kon 2 Timoté 2:20-22 ka di, fò nou fè atansyon a zanmi nou ka chwazi adan lasanblé-la osi. An-nou sonjé kè pé ni désèwten ki pé ké ankourajé-nou rété fidèl a Jéova é kontinyé sèvi-y.
KONTINYÉ MACHÉ « KON TIMOUN A LIMYÈ »
13. Ka sa vé di « kontinyé maché kon timoun a limyè » ? (Éfézyen 5:7-9).
13 Non sèlman Pòl ankourajé krétyen a Éfèz kontinyé pran pyé a kouri a yo douvan nwèsè, men i ankourajé-yo « kontinyé maché kon timoun a limyè » osi (li Éfézyen 5:7-9). Ka sa vé di ? An dé mo kat pawòl, kontinyé maché kon timoun a limyè, sa vé di aji kon on vré krétyen toulongalé. On biten pou nou fè pou nou rivé fè sa, sé pran tan li é étidyé Labib é sé piblikasyon-la. É toupannan nou ka étidyé, sa vréman enpòwtan kè nou arété-nou asi ègzanp é ansègnman a Jézikri, li ki sé limyè a mond-la (Jan 8:12 ; Pwov. 6:23).
14. Kijan lèspri sen pé édé-nou ?
14 Nou bizwen lèspri sen a Bondyé pou nou kontinyé maché « kon timoun a limyè ». Poukisa ? Pas pou nou rété pwòp adan on mond ki pa pwòp, sa pa fasil ditou-ditou (1 Tés. 4:3-5, 7, 8). Lèspri sen pé édé-nou lagé létadèspri a mond-lasa, kon pa ègzanp filozofi é lidé ki pa annakò èvè sa Bondyé ka pansé. Lèspri sen pé fè-nou pwodui osi « tout kalté bonté é jistis » (Éféz. 5:9).
15. Ka pou nou fè pou nou ni lèspri sen ? (Éfézyen 5:19, 20).
15 On biten nou pé fè pou nou ni lèspri sen, sé priyé. Jézi di kè Jéova té’é « ba séla ki ka mandé-y la lèspri sen » (Lik 11:13). Ondòt biten nou pé fè pou nou ni lèspri sen, sé ba Jéova louwanj pannan réinyon an nou (li Éfézyen 5:19, 20). Lèspri sen a-y ké aji anlè nou pou édé-nou viv on mannyè ki ka fè-y plézi.
16. Ka ki ké édé-nou pran bon désizyon ? (Éfézyen 5:10, 17).
16 Lè nou ni on désizyon enpòwtan a pran, fò nou chèché a konprann « sa Jéova vlé » é aprésa, fò-nou tchenn kont dè sa (li Éfézyen 5:10, 17). Lè nou ka chèché ki prensip a Labib ka korèsponn èvè sitiyasyon an nou, an réyalité, sé chèché nou ka chèché a sav ka Bondyé ka pansé. Aprésa, si nou ka mèt sé prensip-lasa an pratik, nou ké pran bon désizyon pi fasilman.
17. Kijan nou pé sèvi èvè tan-la nou ni la méyè fason ki tini ? (Éfézyen 5:15, 16 ; gadé imaj-la osi).
17 Ondòt biten Pòl konséyé krétyen a Éfèz fè, sé sèvi èvè tan a yo èvè sajès (li Éfézyen 5:15, 16). Sa « méchan-la », kivédi lènmi an nou Satan té’é vlé, sé kè nou tèlman okipé ka kouri dèyè sa mond-la ka pwopozé, kè nou pa ni tan ankò pou sèvi Bondyé (1 Jan 5:19). On krétyen pé enn touvé-y ka koumansé kouri dèyè lajan, dèyè gran étid oben dèyè on gwo travay olyé i chèché a vwè ka i pé fè pou sèvi Jéova plis. Asirésèten sé biten-lasa pa mové, men fò pa yo jen pran prèmyé plas-la adan vi an nou. Si on krétyen té ka touvé-y adan sitiyasyon-lasa, sa té’é montré i ka lésé létadèspri a mond-lasa détenn asi-y. Pou nou maché « kon timoun a limyè », fò nou ‘sèvi èvè tan-la nou ni la méyè fason ki tini’, kivédi fò nou mèt sa ki vréman enpòwtan prèmyé douvan.
Krétyen a Éfèz té ka itilizé tan a yo èvè sajès davwa yo té ka préché (gadé paragraf 17 la).
18. Ka Donald fè pou sèvi plibyen èvè tan a-y ?
18 Chèché ki diféran posibilité ou ni pou sèvi Jéova plis ankò. Sé sa Donald, on frè ki ka rété an Afrik di Sid fè. Mi sa i ka di : « An analizé sitiyasyon an mwen é an mèt jounou atè pou mandé Jéova édé-mwen fè plis ba-y adan prédikasyon-la. An mandé-y édé-mwen osi touvé on travay ki té’é pèwmèt-mwen préché plis. É grasa-y, an touvé travay-la ki té fo la. Sé konsa mwen é madanm an mwen, nou koumansé pli bèl vwayaj ki tini, sèvi Jéova aplentan ansanm. »
19. Kijan nou pé kontinyé maché « kon timoun a limyè » ?
19 Sèten lèt-la Pòl voyé ba sé Éfézyen-la ankourajé-yo toubònman pou yo rété fidèl a Jéova. É sé konsèy-la i ba-yo la pé ban-nou fòs osi. Kon nou vwè-y, sé konsèy-lasa pé ban-nou sajès-la nou bizwen la pou nou byen chwazi anmizman an nou é zanmi an nou. Yo pé ban-nou anvi pran labitid étidyé Labib, pou limyè a lavérité kontinyé gidé-nou adan tousa nou ka fè. É yo ka montré jan lèspri sen enpòwtan toubònman pou édé-nou ni bèl kalité. Si nou ka mèt konsèy a Pòl an pratik, nou ké pran bon désizyon é sé désizyon-lasa ké annakò èvè sa Jéova ka pansé. Sé konsa nou ké pé pran pyé a kouri an nou douvan nwèsè a mond-lasa é rété adan limyè-la !
KA OU TÉ KÉ RÉPONN ?
Éfézyen 5:8 ka palé dè « nwèsè » é dè « limyè ». Ka sa yé ojis ?
Kijan nou pé pran pyé a kouri an nou douvan « nwèsè » ?
Ka nou pé fè pou nou « kontinyé maché kon timoun a limyè » ?
KANTIK 95 Limyè-la ka vin pli fò
a Yo chanjé sèwten non.
b SA NOU KA VWÈ ASI IMAJ-LA : Nou ka vwè on vyé vyé kopi a lèt-la Pòl maké ba sé Éfézyen-la.