Jacques
1 Mo menm Jak, èsklav Bondjé ké èsklav Sényèr Jézi Kris, mo ka ékri pou 12 nasyon-yan ki toupatou : Mo ka di zòt tout bonjou ! 2 Mo frè-ya, lò zòt ka jwenn tout kalité tribilasyon, a pou zòt wè sa kou roun gran lajwa, 3 paské zòt savé ki, lò zòt lafwa annan éprèv konsa, sa ka fè zòt gen andirans. 4 Mé lésé andirans-a fè so travay, pou zòt divini antchè épi san pyès défo annan tout domenn, pou i pa manké zòt anyen. 5 Donk si roun annan zòt pa gen asé sajès, a pou i kontinyé doumandé Bondjé toulong pou i bay li sajès, paské i ka bay tout moun san konté é i pa ka fè pyès répròch, é i ké bay li sajès i doumandé-a. 6 Mé a pou i kontinyé doumandé l’ ké lafwa, san i pa douté pyès, paské sa-la ki ka douté i kou roun vag lanmè van-an ka lévé é ka fè alé vini. 7 Roun moun konsa pa divèt antann Jéova bay li pyès bagaj. 12 Moun-an ki ka kontinyé tchenbé lò i annan roun éprèv, so tchò kontan paské apré sa, i ké sa roun moun Bondjé kontan é i ké gen kouròn lavi-a Jéova promèt bay sa-ya ki ka kontinyé kontan l’. 13 A pa pou pyès moun ki annan roun éprèv di : « A Bondjé ki ka mété mo anba éprèv. » Paské i pa gen pyès mové bagaj ki ka mété Bondjé anba éprèv, é li menm pa ka mété pyès moun anba éprèv ké mové bagaj. 14 Mé chak moun ka mété so kò anba éprèv lò i ka lésé so pròp anvi mennen l’ ké tanté li. 15 Épi anvi-a, lò i ja pran ofon tchò-a, i ka bay péché-a ; é péché-a li menm lò i fèt, i ka bay lanmò. 16 Pa tronpé zòt pròp kò, mo frè-ya, zòt mo kontan-an. 17 Tout bèl bagaj ké tout kado ki parfè ka soti di laro ; yé ka vini di Sa-la ki Papa limyèr-ya annan syèl-a, é ki pa ka chanjé kou lonbraj ki ka déplasé é ka chanjé pozisyon. 19 Mo frè-ya, zòt mo kontan-an, a pou zòt savé sa : chak moun toujou divèt paré pou kouté, pa présé palé é pa kouri faché, 20 paské lò roun moun kòlè, i pa ka fè sa ki jis douvan Bondjé. 21 Donk, jité tousa ki sal ké tout tras méchansté, épi ké dousèr, asèpté ki paròl-a ki pouvé sové zòt pran annan zòt tchò. 22 Mé, a pa pou zòt kouté sèlman, paské zòt té ké tronpé zòt pròp kò ké fo lidé, mé a pou zòt pito fè sa paròl-a ka di. 23 Paské si a kouté roun moun ka kouté paròl-a mé i pa ka fè sa i ka di, sa moun-an kou roun moun ki ka gadé so vizaj annan roun mirwè. 24 I ka gadé so vizaj, i ka alé é i ka bliyé lanmenm ki kalité moun i sa. 25 Mé sa-la ki ka plonjé so wéy annan lalwa ki parfè-a, sa di libèrté-a, é ki ka kontinyé fè l’, sa-la pa divini roun moun ki ka bliyé sa i tandé, mé i divini roun moun ki ka obéyi. É so tchò ké kontan annan sa i ka fè. 26 Si roun moun ka adoré Bondjé dapré li, mé i pa ka kontrolé sa so bouch ka di, sa moun-an ka bloublou so pròp kò, é so ladorasyon pa gen pyès valò. 27 Men ladorasyon ki pròp é ki pa gen pyès salté pou nou Bondjé ké nou Papa : pran swen di sa ki ka soufri paské yé pa gen manman ké papa, paské yé mari mouri, épi panga lésé monn-an sali nou.