Mé

Krétyen-yan annan 1^é syèk-a soufri lò roun gran lafamin « vini asou tout latè-a. » Chèf fanmi-ya té divèt enkyèt, é yé dèt doumandé yé kò kouman yé té ké bay yé fanmi manjé. Sonjé osi jenn-yan ki té lé fè plis pou Jéova. Ès yé di ki yé té ké fè sa pita ? Kèlkéswa yé sitiasyon, krétyen-yan annan 1^é syèk-a adapté yé kò. Yé kontinyé préché kou yé té pouvé é yé té kontan partajé sa yé té gen ké yé frè ké sò-ya ki té an Jidé (Actes 11:29, 30). Sa-ya yé idé byen wè Jéova soutni yé (Mat. 6:31-33). Yé dèt santi yé té pi pròch osi di yé frè ké sò-ya ki idé yé. É sa ki bay roun bagaj ké sa-ya ki idé yé konpanyen, yé rivé konprann a kisa ki kontan bay (Actes 20:35). w23.04 16 § 12-13.

Détan, Jéova ka fè moun ki pa ka adoré l’ fè bon bagaj pou so sèrvitèr-ya pou réponn yé lapriyè. Parèkzanp, i fè rwa Artakzèrsès lésé Néémi routounen Jérizalèm pou idé pèp-a roukonstrwi vil-a (Néh. 2:3-6). Menm fason-an, jòdla, i pouvé fè moun ki pa ka adoré l’ idé nou. An jénéral, Jéova pa ka fè gran mirak pou réponn nou lapriyè. Mé i ka réponn nou, é répons i ka bay nou-a, a èkzaktéman sa nou bézwen pou nou rété fidèl. A pou sa, a pou to chaché wè répons Jéova-a. Pran tan réfléchi asou fason Jéova ka réponn to lapriyè (Ps. 66:19, 20). A pou nou gen lafwa pou nou priyè Jéova, mé osi pou nou asèpté répons i ka bay nou, kèlkéswa répons-a (Héb. 11:6). w23.05 11 § 13 ; 12 § 15-16.

Jou-a nou bay Jéova nou lavi, nou promèt li adoré l’ épi fè so volonté. Nou divèt rèspèkté sa promès-a. A pa roun fardo. Poukisa ? Paské Jéova fè nou pou nou fè so volonté (Rév. 4:11). I mété anvi konnèt li épi adoré li annan nou tchò é i fè nou kou li menm. Sa ka pèrmèt nou vin pi pròch ké li épi pran plézi fè so volonté. Anplis di sa, lò nou ka fè so volonté é nou ka swiv so Pitit, sa ka « konsolé » nou (Mat. 11:28-30). Donk, fè to lanmou pou Jéova vin pi fò. Pou fè sa, pran tan réfléchi asou tout bèl bagaj i fè, i ka fè é i ké fè pou to. Pi to lanmou pou li ké vin fò, pi sa ké fasil pou to obéyi l’ (1 Jean 5:3). Jézi rivé fè volonté Jéova paské i té ka doumandé li idé li é i pa té ka bliyé rékonpans i té ké gen-an (Héb. 5:7 ; 12:2). Kou Jézi, doumandé Jéova bay to fòrs é pa janmen bliyé èspwar lavi pou tout-tan-an. w23.08 27 § 4-5.

Nou tout nou kontan moun ki gen pasyans. Nou ka rèspèkté sa-ya ki konnèt antann roun bagaj san yé pa nèrvé. Nou kontan lò ròt-ya ka pran pasyans ké nou lò nou ka fè bagaj ki pa bon. Nou byen kontan moun-an ki étidyé Labib ké nou pran pasyans ké nou ; roun patché annan nou pa té ka rivé konprann, asèpté ouben apliké sèrten bagaj annan Labib. É pi enpòrtan-an, nou byen kontan Jéova pran pasyans ké nou. Nou kontan lò ròt-ya ka pran pasyans. Mé ès détan nou menm nou ka trouvé sa rèd pou nou pran pasyans ? Parèkzanp, ès sa rèd pou nou rété kalm lò nou annan roun anboutéyaj, èspésyalman si nou an rétar ? Ès nou pa ka rivé tchenbé nou kò lò roun moun ka nèrvé nou ? Ouben ès détan sa rèd pou nou kontinyé antann jiktan monn nouvo Jéova promèt nou-a rivé ? Mé annan tout sa sitiasyon-yan nou divèt gen plis pasyans. w23.08 20 § 1-2.

Jéova di Jédéyon fè près tout so sòlda routounen annan yé kaz. Pitèt i di annan so tchò : « Ès mo vréman bézwen fè sa ? Ès sa ké maché ? » Mé Jédéyon obéyi kanmenm. Jòdla, ansyen-yan ka imité Jédéyon lò yé ka fè chanjman òrganizasyon Jéova-a ka doumandé yé fè (Héb. 13:17). Jédéyon obéyi Jéova menm lò i té pè é lò sa té danjéré (Juges 9:17). Lò Jéova rasiré l’, i vin sir ki i té ké idé l’ protéjé so pèp. I gen péyi koté gouvèrnman-an ka entèrdi nou adoré Bondjé kou nou lé. Ansyen-yan ki ka rété annan sa péyi-ya ka imité Jédéyon. Yé ka dirijé réinyon-yan ké prédikasyon-an menmsi yé ka riské arété yé, entérojé yé, fè yé méchansté ouben yé ka riské pédi yé travay. Pannan gran tribilasyon-an, ansyen-yan ké divèt gen kouraj pou obéyi sa òrganizasyon-an ké doumandé yé fè, menmsi sa ké danjéré. w23.06 5-6 § 12-13.

Jéova fè moun ékri istwè gran prèt Joad annan Labib pou nou pouvé anprann roun patché bagaj (Rom. 15:4). É lò Joad mouri, yé bay li roun gran lònò. Yé antéré l’ « ké rwa-ya annan Vil David, paské i té fè bon bagaj pou vré Bondjé-a ké so tanp, annan péyi Israyèl » (2 Chron. 24:15, 16). Istwè Joad pouvé idé nou tout gen lakrent pou Bondjé. Pou yé imité Joad, ansyen-yan toujou divèt chaché fason pou yé protéjé troupo Bondjé-a (Actes 20:28). Grasa èkzanp Joad, frè ké sò-ya ki ja granmoun pouvé anprann ki si yé ka krenn Jéova é si yé ka rété fidèl, i pouvé itilizé yé pou réyalizé so projè. Jennjan-yan, yé menm, pouvé imité fason Jéova aji ké Joad lò yé ka rèspèkté yé frè ké sò-ya ki ja granmoun, èspésyalman sa-ya ki ka adoré Jéova ké fidélité dipi lontan (Prov. 16:31). Annou soutni ké fidélité ‘sa-ya ki ka dirijé nou’ épi obéyi yé (Héb. 13:17). w23.06 17 § 14-15.

Lò nou ka désidé konmyen fwa nou ké lévé nou lanmen pannan roun réinyon, a pou nou rézonab. Si nou ka lévé nou lanmen tro souvan, frè-a ki ka dirijé kozé-a ka riské santi i oblijé fè nou réponn plizyèr fwa menmsi ròt-ya pòkò réponn. Sa pouvé dékourajé roun ran moun lévé yé lanmen (Eccl. 3:7). Lò i gen roun patché proklamatèr ki ka lévé yé lanmen pannan roun étid, pitèt yé pa ka bay nou réponn souvan kou nou té ké lé. É détan, pitèt sa-la ki ka dirijé étid-a pa ké pouvé fè nou réponn menm. Pitèt sa ké fè nou lapenn. Mé, lò yé pa ka entérojé nou, a pa pou nou di ki yé fè sa parèsprè (Eccl. 7:9). Si to pa ka réponn souvan kou to lé, to pouvé byen kouté répons ròt-ya ka bay épi, apré réinyon-an, félisité yé pou yé répons. Répons to té lé bay-a té ké ankourajé yé, mé sa to ké di pou félisité yé ké ankourajé yé bokou osi. w23.04 23-24 § 14-16.

Étidyé Paròl Bondjé-a épi réfléchi asou sa to ka anprann. Menm fason roun pyébwa bézwen so rasin alé fon pou i tchenbé dibout, nou bézwen nou lafwa alé fon annan Paròl Bondjé-a pou nou rété fò. Pi roun pyébwa ka grandi pi so rasin ka alé lwen é ka alé fon annan latè-a. Menm fason-an, lò nou ka étidyé é nou ka pran tan réfléchi asou sa nou ka étidyé, nou lafwa ka vin pi fò é nou pi sir ankò ki a prensip Bondjé-ya ki pi bon (Col. 2:6, 7). Sonjé kouman Jéova idé so sèrvitèr-ya tan-lontan lò i di yé sa pou yé té fè, lò i bay yé konsèy é lò i protéjé yé. Parèkzanp, Ézékyèl byen gadé lò roun zanj té ka byen méziré tanp-a ki té annan vizyon i té ka wè-a. Sa vizyon-an bay Ézékyèl plis fòrs. É jòdla, sa ka anprann nou ki sa enpòrtan pou nou swiv prensip Jéova mété pou vré ladorasyon-an (Ézéch. 40:1-4 ; 43:10-12). Nou ka jwenn roun patché bénédiksyon osi lò nou ka pran tan étidyé bagaj-ya ki fon annan Paròl Bondjé-a épi réfléchi asou yé. Nou tchò pouvé fò, sa lé di nou pouvé fè Jéova konfyans ké tout nou tchò (Ps. 112:7). w23.07 18 § 15-16.

Annan Labib, nou ka jwenn èkzanp roun patché jennjan nou pouvé imité. A té dé jennjan ki té kontan Bondjé é ki té gen diféran rèsponsabilité. Annan to fanmi é annan to asanblé osi, to pouvé jwenn èkzanp roun patché frè ki djòk (Héb. 13:7). É pi bon èkzanp to gen-an, a Jézi (1 Pierre 2:21). Pran tan étidyé èkzanp sa mouché-ya épi réfléchi asou bèl kalité yé té gen é ki to kontan (Héb. 12:1, 2). Apré sa, doumandé to kò kouman to pouvé imité yé. Si to sa roun moun ki ka byen réfléchi, to pa ké kouri fè roun bagaj, to ké réfléchi anvan to désidé sa to ké fè. A pou to fè éfòr pou to vin pi fò annan sa domenn-an. Pou koumansé, anprann byen konnèt prensip-ya ki annan Labib, konsa to ké sir ki sa prensip-ya bon pou to. Apré sa, sèrvi sa prensip-ya pou désidé fè bagaj ki ké fè Jéova plézi (Ps. 119:9). Sa ké idé to bokou pou to divini roun krétyen ki djòk (Prov. 2:11, 12 ; Héb. 5:14). w23.12 24-25 § 4-5.

Papa ké manman-yan pouvé anprann yé timoun réyaji ké dousèr lò roun moun ka kritiké sa yé ka krè (Jacq. 3:13). Sèrten papa ké manman ka òrganizé pou yé antréné yé kò pannan étid yé ka fè ké tout fanmi-a. Yé ka chwazi palé di bagaj yé timoun pouvé tandé lò yé lékòl é yé ka gadé sa yé pouvé di. Sa yé lé, a anprann yé palé ké dousèr épi jantiman.Sa kalité èkzèrsis-ya ka idé nou jennjan bokou. Sa ka pèrmèt yé pi sir ki sa yé ka krè vré é sa ka pèrmèt yé savé sa yé pouvé di yé kanmarad. Annan parti « Les jeunes s’interrogent » asou jw.org, nou ka trapé roun patché fiche de réflexion. Sa fiche-ya fèt pou idé jennjan-yan fè yé lafwa vin pi fò é pou yé préparé répons yé ké pouvé bay di yépa fason. Si zòt ka étidyé artik-ya ki annan sa parti-a ansanm ké tout fanmi-a, tout moun ké anprann défann so lafwa ké dousèr épi jantiman. w23.09 17 § 10 ; 18 § 15-16.

Ès sa ja rivé to gen roun òbjèktif èspirityèl épi sa té rèd pou to té rivé fè sa to té prévwè ? Si a sa, a pa to rounso. Philip té lé priyè pi souvan épi vin pi vayan annan sa zafè-a, mé sa té rèd pou i té trapé tan pou i té priyè. Erika té lé rivé annan réinyon prédikasyon-yan anvan yé koumansé, mé i pa té ka rivé : a près tout tan i té an rétar. Si to gen roun òbjèktif èspirityèl épi to pa ka rivé fè sa to prévwè, pitèt to ka santi ki to pa vo anyen. Mé a pa pou to krè sa paské menmsi òbjèktif-a piti, sa ka pran tan é sa ka doumandé to fè éfòr. Kou to lé rivé fè sa to prévwè fè, sa ka montré ki to lanmityé ké Jéova enpòrtan pou to é ki to lé bay li sa to gen ki miyò. É tout éfòr to ka fè enpòrtan pou li. I pa ka doumandé to bay li plis ki sa to pouvé bay li (Ps. 103:14 ; Mich. 6:8). Atò, tchenbé kont di to sitiasyon épi chwazi roun bagaj to sir to ké rivé fè. w23.05 26 § 1-2.

Roun moun ki gen kouraj pouvé pè, mé i pa ka lésé sa anpéché li fè sa ki bon. Danyèl té sa roun jennjan ki té plen ké kouraj. I té ka étidyé sa profèt-ya té marké, profèt Jérémi parèkzanp. Afòrs i étidyé, i vin konprann ki i pa té ka rété bokou tan pou Jwif-ya délivré di Babilòn (Dan. 9:2). Paské i wè kouman profési-ya té ka réyalizé, sa fè li fè Jéova ankò plis konfyans. É kou nou byen savé, sa-ya ki pa ka lésé anyen anpéché yé fè Jéova konfyans pouvé gen bokou kouraj (gadé Romains 8:32, 37-39). É sa ki pi enpòrtan ankò, a ki Danyèl té ka priyè so Papa ki annan syèl-a souvan (Dan. 6:10). I té ka konfésé so péché pou li, i té ka di li sa i té gen asou so tchò, é i té ka doumandé li idé li (Dan. 9:4, 5, 19). I té sa roun moun kou nou menm, donk i pa fèt ké kouraj. I vin gen kouraj paské i étidyé, i priyè é i fè Jéova konfyans. w23.08 3 § 4 ; 4 § 7.

Lò nou ka obéyi sa-ya ki gen otorité, a roun bon bagaj pou nou ké pou nou frè ké sò-ya. Poukisa nou ka di sa ? Pou koumansé, kou nou pa ka dézobéyi lalwa, yé pa ka pini nou (Rom. 13:1, 4). Anplis di sa, lò nou ka obéyi sa-ya ki gen otorité, sa pouvé pèrmèt yé chanjé yé lidé asou Témwen Jéova-ya. Parèkzanp, i gen plizyèr lannen o Nijérya, plizyèr sòlda antré annan roun lasal di Rwayonm pannan roun réinyon. Yé té ka chaché moun ki té mété dézòrd é ki pa té lé péyé yé enpo. Mé yé chèf di yé soti di lasal-a. I èspliké yé : « Témwen Jéova-ya pa ka mété dézòrd, yé pa ka réfizé péyé yé enpo. » Chak fwa to ka obéyi roun lalwa, to ka pèrmèt Témwen Jéova-ya kontinyé gen roun bèl répitasyon — é sa répitasyon-an ké pitèt protéjé to frè ké sò-ya roun jou. w23.10 9 § 13.

Roun ran sèrvitèr Jéova ka antann lafen sa monn-an dipi lontan. Sèrten moun ka pansé ki lafen ka pran tròp tan pou i rivé. Mé Jéova savé sa so sèrvitèr ka rousanti, é i di profèt Abakouk : « Vizyon-an gen pou fèt toujou jou i divèt fèt-a, mé a ké ti kouri i ké fèt, é a pa manti. Menmsi i ka pran tan, kontinyé antann li ! Paské i ké fèt, asiré pa pitèt. I pa ké an rétar ! » (Hab. 2:3). Ès Jéova té ka palé pou Abakouk rounso ? Ouben ès sa paròl-ya pou nou osi jòdla ? Bondjé fè apot Pòl apliké sa paròl-ya pou krétyen-yan ki présé wè monn nouvo-a rivé (Héb. 10:37). Donk nou pouvé sir ki menmsi nou ka pansé ki promès Jéova pou sové nou ka pran tan pou rivé, « i ké fèt, asiré pa pitèt » ; « i pa ké an rétar ! » w23.04 30 § 16.

Israyélit-ya réfizé wè prèv-ya ki té ka montré ki Jéova té chwazi Moyiz pou palé ké yé (Nomb. 14:10, 11). Plizyèr fwa, yé pa asèpté rékonnèt ki Jéova té ka sèrvi Moyiz pou gidé yé. A pou sa, Jéova pa lésé sa ran Israyélit-ya antré annan Péyi i té promèt yé-a (Nomb. 14:30). Mé, sèrten Israyélit asèpté swiv dirèksyon Jéova té ka bay yé. Parèkzanp, Jéova di : « Kalèb [...] kontinyé obéyi mo ké tout so tchò » (Nomb. 14:24). Bondjé rékonpansé Kalèb, é i jis lésé l’ chwazi ki koté i té lé rété annan péyi Kanaan-an (Jos. 14:12-14). É Israyélit-ya Jéova lésé antré annan Péyi i té promèt bay yé-a, yé menm osi, yé swiv dirèksyon Jéova bay yé. Tout tan Joziyé gidé pèp-a apré lanmò Moyiz, Labib ka di ki Israyélit-ya « rèspèkté Joziyé pannan tout so lavi » (Jos. 4:14). Donk, Jéova béni yé, i fè yé antré annan Péyi i té promèt bay yé-a (Jos. 21:43, 44). w24.02 21 § 6-7.

Menm fason roun dòktèr pouvé wè si nou tchò k’alé byen lò i ka santi nou pou ka bat, nou pouvé wè si nou lanmou pou Bondjé fò lò nou ka gadé kouman nou kontan nou konpanyen. Si nou kontan yé mwens ki anvan, sa pouvé montré ki nou kontan Bondjé mwens osi. Parkont, si nou ka montré souvan ki nou kontan nou frè ké sò-ya, sa ké montré ki nou lanmou pou Bondjé fò. Si nou ka randé nou kò kont ki nou lanmou pou nou frè ké sò-ya fébli, a pou nou enkyété nou kò. Poukisa ? Paské sa pouvé lé di ki nou ka riské pédi nou lanmityé ké Jéova. A sa nou ka konprann lò nou ka li sa Jan ékri : « Sa-la ki pa kontan so frè i ka wè, pa pouvé kontan Bondjé i pa pouvé wè » (1 Jean 4:20). Kisa sa ka anprann nou ? Jéova ké kontan nou sèlman si « nou kontan nou konpanyen » (1 Jean 4:7-9, 11). w23.11 8 § 3 ; 9 § 5-6.

Lò rwa Joas té jenn, i pran roun désizyon ki té saj. Kou i pa té gen papa, i swiv konsèy roun granprèt ki té fidèl ké Bondjé. A té Joad. Sa granprèt-a lévé l’ kousidiré a té so pròp pitit. Grasa bon èkzanp i bay li, Joas désidé adoré Jéova é i idé pèp-a adoré Jéova osi. I jis fè sa ki té fo pou ranjé tanp Jéova-a (2 Chron. 24:1, 2, 4, 13, 14). Si to manman ké to papa ouben rounòt moun ka anprann to kontan Jéova é rèspèkté so Lalwa, a pou to wè sa kou roun bèl kado yé ka fè to (Prov. 2:1, 10-12). To paran pouvé fè plizyèr bagaj diféran pou yé fòrmé to. Si to ka swiv konsèy to paran ka bay to é ki ka vini di Labib, sa ké fè yé tchò kontan. É sa ki pi enpòrtan ankò, Jéova ké kontan é to ké rété zanmi ké li pou tout-tan (Prov. 22:6 ; 23:15, 24). Men roun bèl rézon pou imité èkzanp Joas lò i té jennjan. w23.09 8-9 § 3-5.

Jéova ka promèt nou kouté nou lapriyè. Kou nou ka adoré l’ ké fidélité, nou Bondjé kontan nou é i pa ké janmen bouché so zorè pou nou (Ps. 10:17 ; 37:28). Mé, sa pa lé di ki i ké bay nou tousa nou ka doumandé l’. Pou roun ran bagaj, nou ké pitèt divèt antann monn nouvo-a. Lò Jéova ka kouté sa nou ka doumandé l’, i ka tchenbé kont di so projè (Is. 55:8, 9). Parèkzanp, roun bagaj i lé, a ki latè-a plen ké mouché ké madanm ki ka pran plézi fè so volonté é ki ka asèpté l’ kou yé Chèf. Mé kou Satan di ki moun té ké pi byen si yé té ka dirijé yé kò tousèl, enben i ka lésé yé fè pou tout moun wè ki so lèlmi ka manti (Gen. 3:1-5). Kou a moun-yan ki ka dirijé, i gen roun patché problèm jòdla (Eccl. 8:9). Mé, nou ka konprann ki Jéova pa ké fè sa problèm-yan disparèt anvan moman-an i désidé rivé. w23.11 21 § 4-5.

Jéova té promèt Abraam ki i té ké divini « papa roun patché nasyon » é ki grasa li i té ké béni sa nasyon-yan. Mé lò i té gen 100 lannen, é Sara 90 lannen, yé patékò gen timoun. Si a té pou nou sèlman, yé pa té ké janmen rivé fè timoun ! Sa pa té fasil pou Abraam, mé « èspwar i té gen-an pèrmèt li gen lafwa ki i té ké divini papa roun patché nasyon » (Rom. 4:18, 19). É finalman, sa i té ka antann réyalizé : Izaak, timoun-an i té ka antann dipi lontan, fèt (Rom. 4:20-22). Nou pouvé fè Bondjé plézi, i pouvé di ki nou jis, é nou pouvé sa so zanmi kou Abraam. A sa Pòl montré lò i di : « Lò yé ka di ki Bondjé té ka wè l’ kou roun moun ki té jis, a pa pou [Abraam] rounso yé ka palé, a pou nou osi, nou menm Bondjé ké di ki nou jis, paské nou ka krè annan Sa-la ki résisité Jézi » (Rom. 4:23, 24). Kou Abraam, annou gen lafwa annan Jéova, annou fè bagaj pou montré ki nou gen lafwa, é annou kontinyé sonjé èspwar nou gen-an. w23.12 7 § 16-17.

Lò to annan roun problèm ki ka fè to pè, sonjé ki Jéova ka wè ki problèm to gen, é i ka wè kouman to ka santi to kò akoz di sa. Parèkzanp, Jéova té wè kouman yé té ka fè Israyélit-ya wè mizè an Éjip, mé i té byen konnèt « yé doulò » osi (Ex. 3:7). Mé si to annan roun sitiasyon ki ka fè to pè, pitèt to pa ka rivé wè kouman Jéova ka idé to. Atò, kisa to pouvé fè ? Doumandé l’ idé to wè sa i ka fè pou to (2 Rois 6:15-17). Épi réfléchi asou sa : Ès roun moun fè roun diskour ouben bay roun répons pannan roun réinyon ki bay to fòrs ? Ès roun piblikasyon, roun vidéyo ouben roun chanté ankourajé to ? Ès roun moun pran roun vèrsé ouben di to roun bagaj ki annan Labib-a pou rasiré to ? Si nou pa ka fè atansyon, nou pouvé bliyé ki lanmou nou frè ké sò-ya ké ankourajman Labib-a ka bay nou, idé nou. Pourtan, sa bagaj-ya, a bèl kado di Jéova ! (Is. 65:13 ; Marc 10:29, 30). Sa ka montré ki i ka gadé pou to, é ki i mérité ki to fè l’ konfyans (Is. 49:14-16). w24.01 4 § 9-10.

Anvan i routounen annan syèl-a, Jézi fè so disip sonjé ki yé té divèt bay roun témwanyaj asou li « annan Jérizalèm, annan tout Jidé ké Samari, é jik annan koté ki pi lwen asou latè-a » (Actes 1:8 ; Luc 24:46-48). Mé roun ti moso tan apré, chèf rélijyé jwif-ya arété apot Pyèr ké Jan, é yé mennen yé douvan Sanédren-an. Yé di yé arété préché é yé jis ménasé yé (Actes 4:18, 21). Pyèr ké Jan réponn : « A zòt ki pou di si, pou Bondjé, sa bon pou nou kouté zòt pasé nou kouté Bondjé. Mé nou menm, nou pa pouvé arété palé di sa nou wè ké sa nou tandé » (Actes 4:19, 20). Lò yé libéré Pyèr ké Jan, yé ké ròt disip-ya priyè Jéova é yé di li ki yé té lé fè so volonté. Jéova réponn yé lapriyè ki té ka soti di yé tchò (Actes 4:31). w23.05 5 § 11-12.

Jéova ké Jézi, so Pitit i kontan-an, kontan yé konpanyen dipi nanninannan. A roun lanmityé ki pi vyé pasé pyès ròt lanmityé ki pouvé èkzisté. Kou nou ka wè l’ annan tèks-a pou jòdla, Jéova byen montré ki i té kontan Jézi. I té pouvé di : « Men […] sa-la […] ki ka fè mo plézi. » Mé kou i té lé nou savé kouman i kontan so Pitit, i aplé l’ « mo Pitit, sa-la mo kontan-an ». Jéova té fyèr di li, èspésyalman paské i té paré bay so lavi an sakrifis (Éph. 1:7). Jézi li menm, pa té ka douté ki so Papa té kontan li. I té tèlman sir ki so Papa té kontan l’ ki i té ka rousanti sa jik ofon so tchò. I di plizyèr fwa ki i té sir ki so Papa té kontan l’ (Jean 3:35 ; 10:17 ; 17:24). w24.01 28 § 8.

Imajiné sa sitiasyon-an : Roun moun to kontan bokou ka di roun vyé bagaj asou to. A roun manti, mé i gen sa ki ka krè l’. Pi mal ankò, yé k’alé répété sa. Finalman, roun patché moun ka koumansé krè sa manti-a. Kisa to ka rousanti atò ? Sa manti-a ka fè to lapenn bokou, pa vré ? Sa èkzanp-a ka idé nou konprann sa Jéova rousanti lò yé sali so répitasyon. Roun di so pitit èspirityèl di Èv, prémyé madanm-an, roun manti asou li. É Èv krè l’. Akoz di sa manti-a, nou prémyé papa ké nou prémyé manman tounen yé do bay Jéova. É akoz di sa, péché-a ké lanmò-a « antré » annan monn-an (Rom. 5:12 ; Gen. 3:1-6). Tout problèm nou ka jwenn jòdla (lanmò, lagèr, soufrans) ka èkzisté paské Satan manti. Mé ès Jéova gen lapenn akoz di sa manti-a ké tout déga sa mennen ? Asiré pa pitèt. Pourtan, i pa yèg, é i pa ka tchenbé pyès moun asou so tchò akoz di sa. I pito ka rété « Bondjé ki éré-a » (1 Tim. 1:11). w24.02 8 § 1-2.

Kouman to pouvé montré ki to byen désidé kou Jozèf ? A pou to désidé aprézan sa to ké fè lò tantasyon-an ké vin. Anprann di non lanmenm lò i gen bagaj Jéova rayi épi fè tousa to pouvé pou to pa menm sonjé sa bagaj-ya (Ps. 97:10 ; 119:165). Konsa, lò to ké jwenn roun tantasyon, to ké di non san bégéyé. Mé, ès i gen rounòt bagaj ki ka anpéché to vouwé Jéova to lavi épi batizé menmsi to savé ki to trouvé lavérité é ki to lé adoré Bondjé ké tout to tchò ? Si a sa, swiv èkzanp rwa David lésé é sipliyé Jéova konsa : « Byen gadé annan mo tchò, o Bondjé, pou to savé sa i gen annan l’. Byen gadé annan mo tchò, pou to savé sa ki ka fè mo enkyèt. Gadé pou wè si i pa gen mové bagaj annan mo tchò, é fè mo maché asou chimen lavi pou tout-tan-an » (Ps. 139:23, 24). Jéova ka béni « moun-yan ki ka chaché l’ ké tout yé tchò ». É to ka montré l’ ki a sa to ka fè, lò to ka fè tousa to pouvé pou rivé vouwé to lavi épi batizé (Héb. 11:6). w24.03 6 § 13-15.

A gran prèt-a ki té divèt réprézanté pèp-a douvan Bondjé. A Jéova ki té mété tou prémyé gran prèt-a, Aaron, prémyé jou yé té koumansé sèrvi tabèrnak-a. Mé apré sa, kou apot Pòl èspliké l’, « bokou té oblijé divini prèt […] paské lanmò té ka anpéché yé rété prèt » (Héb. 7:23-26). É kou yé pa té parfè, sa gran prèt-ya té divèt bay sakrifis pou yé pròp péché. A pa menm bagaj-a ké Gran Prèt souvéren-an, Jézi Kris ! Jézi Kris, nou Gran Prèt, « ka sèrvi […] annan vré tant-a. Sa tant-a, a pa roun moun ki fè l’, a Jéova ki fè l’ » (Héb. 8:1, 2). Pòl èspliké ki kou « i ka viv pou tout-tan, pyès moun pa ké divini prèt a so plas ». Épi i di ankò ki i « pròp, séparé ké moun ki ka péché » é ki « i pa bézwen fè sakrifis chak jou » pou so pròp péché kou gran prèt-ya an Israyèl. w23.10 26 § 8-9.

« Ansyen syèl-a », a gouvèrnman-yan asou latè-a ki ka aji anba pouvwar Satan ké so démon (Mat. 4:8, 9 ; 1 Jean 5:19). Annan Labib, lò yé ka palé di « latè-a », détan, a pou palé di moun asou latè-a (Gen. 11:1, nòt ; Deut. 32:1). Donk, « ansyen latè-a », a moun méchan ki ka viv asou latè-a jòdla. Jéova pa ké yenki ranjé « syèl-a » ké « latè-a » nou konnèt jòdla. Non, i ké tiré yé nèt é i ké mété « roun nouvo syèl ké roun nouvo latè » pou ranplasé yé, sa lé di ki roun nouvo gouvèrnman ké dirijé dé moun ki jis. Jéova ké ranjé latè-a é i ké fè tout moun vin parfè. Kou Izayi di l’, tout latè-a ké divini roun paradi ki bèl toubonnman, kousidiré a té jarden Édèn-an asou tout latè-a ! Chak moun ké « vin nòv », Bondjé ké géri yé chak konplètman. Moun ka bwété, moun ki sourdo, moun ki pa ka wè ké géri é moun mouri-ya ké rouviv (Is. 25:8 ; 35:1-7). w23.11 4 § 9-10.

« Gran tribilasyon »-an ké koumansé rounsèl kou konsa (Mat. 24:21). Mé a pa ké kou ròt katastròf-ya, i pa ké sirprann tout moun. I gen apéprè 2 000 lannen, Jézi avèrti so disip, i di yé préparé yé kò pou sa. Lò sa jou-a ké rivé, si nou « paré », sa ké pi fasil pou nou tchenbé pannan sa lépòk-a ki ké rèd, é pou nou idé nou frè ké sò-ya tchenbé yé menm osi (Luc 21:36). Pou nou obéyi Jéova, nou ké bézwen andirans é nou ké divèt sir ki i ké protéjé nou. Kisa nou ké fè si nou frè ké sò-ya ka pédi sa yé gen, pitèt menm tousa yé gen ? (Hab. 3:17, 18). Si nou gen konpasyon, sa ké pousé nou idé yé. É kouman nou ké réyaji si akoz di nasyon-yan ki ké mété yé kò ansanm pou ataké nou, nou divèt viv ké nou frè ké sò-ya annan roun ti koté pannan roun ti moman ? (Ézéch. 38:10-12). Pou nou rivé tchenbé, nou ké divèt gen bokou lanmou pou yé. w23.07 2 § 2-3.

Mouché ké madanm maryé pouvé anprann bokou grasa Akilas ké Prisil, roun mouché ké so madanm bokou krétyen annan 1^é syèk-a té byen kontan (Rom. 16:3, 4). Yé té ka travay, yé té ka préché é yé té ka idé ròt-ya, ansanm (Actes 18:2, 3, 24-26). Anfèt, chak fwa Labib ka palé di Akilas ké Prisil, yé toujou ansanm. Kouman mouché ké madanm pouvé imité yé ? Sonjé tout bagaj zòt gen pou fè. Ès i gen bagaj zòt pouvé fè ansanm pasé zòt fè yé chak moun yé bò ? Akilas ké Prisil té ka préché ansanm. Ès zòt menm osi zòt ka òrganizé zòt kò pou zòt fè l’ souvan ? Anplis di sa, Akilas ké Prisil té ka travay ansanm. Pitèt zòt pa ka travay menm koté-a, mé, ès zòt pouvé fè travay zòt gen pou fè annan kaz-a ansanm ? (Eccl. 4:9). Pi zòt ké idé zòt konpanyen, pi zòt ké santi ki zòt sa roun ékip, é zòt ké gen lokazyon palé ansanm. w23.05 22-23 § 10-12.

Tout moun ka pè. Parèkzanp, lò rwa Sayil té ka kouri dèyè David é té lé tchwé l’, David alé séré annan vil Gat, roun vil ki té di filisten-yan. Mé Akich, rwa sa vil-a, anprann ki sa David-a ki té ka maché ké yé, a té li ki té tchwé « roun patché milyé » Filisten. « A pa ti pè [David] koumansé pè » (1 Sam. 21:10-12). I té pè sa Akich té pouvé fè l’. Kisa ki idé David gen kouraj ? Annan Psaume 56, David ka di kouman i té ka santi so kò lò i té annan vil Gat. Annan sa psaume-an, i ka byen èspliké poukisa i té pè. Mé i ka di osi kisa ki idé l’ arété pè. Lò David té pè, i té ka fè Jéova konfyans (Ps. 56:1-3, 11). É i té gen rézon fè Jéova konfyans ! Jéova idé l’. David désidé fè roun bagaj ki té dròl mé ki byen maché : i fè kousidiré i té vin fou. Lò Akich wè sa, i pa menm té lé tchwé David ankò, i fè l’ pati. A konsa David rivé chapé so lapo (1 Sam. 21:13 – 22:1). w24.01 2 § 1-3.

Di kimoun yé ka palé annan tèks-a pou jòdla ? A di frè ké sò-ya ki wen é ki ké résisité annan syèl-a yé ka palé ! Donk, lò gran tribilasyon-an ké près fini, lò dèrnyé krétyen wen-yan ké monté laro syèl-a, prémyé bagaj yé ké fè, a briga. Lò yé ké résisité annan syèl-a, yé ké briga ansanm ké Kris ké so zanj-ya ki sen pannan dèrnyé lagèr kont lèlmi Bondjé-ya. Réfléchi asou sa : Asou latè-a, sèrten krétyen wen granmoun jòdla, é détan yé frajil menm ! Mé lò yé ké résisité laro syèl-a, yé ké sa dé lèspri pwisan ki pa pouvé mouri. É prémyé bagaj yé ké fè, a briga òbò Jézi Kris yé Rwa Gèryé-a ! Apré lagèr Armagédon-an, yé ké travay ké Jézi pou idé moun-yan divini parfè. Annan syèl-a, yé ké pouvé fè plis bagaj pou idé yé frè ké sò-ya ki si yé té rété asou latè-a, paské asou latè-a yé pa parfè. w24.02 6-7 § 15-16.

Roun ran moun paré pou vouwé Jéova yé lavi épi batizé, é pourtan yé ka ézité. Détan yé ka di annan yé tchò : « É si mo batizé épi mo ka fè roun péché grav épi yé ka mété mo dèrò di asanblé-a ? » Si a sa to pè, a pou to sir ki Jéova ké bay to tousa to bézwen pou to ‘gen roun kondwit kou [i] ka doumandé’ é pou to « fè li plézi » (Col. 1:10). I ké bay to fòrs osi pou to fè sa ki byen. I ja montré ki i pouvé fè l’ paské i fè l’ pou roun patché moun (1 Cor. 10:13). A pou sa finalman i pa gen bokou moun ki èskominyé. Jéova ka bay nou sa nou bézwen pou nou rété fidèl, asiré pa pitèt. Paské nou pyès pa parfè nou tout pouvé anvi fè sa ki mové (Jacq. 1:14). Mé, a to ki pou désidé sa to ké fè lò i ké gen roun tantasyon. Finalman, a to ki ké désidé kouman to ké mennen to lavi. Menm si roun ran moun pouvé éséyé fè to krè ki to pa pouvé kontrolé ni sa to ka di ni sa to ka rousanti, sa pa vré menm, to pouvé fè l’. w24.03 5 § 11-12.