“E na Kakorakoraingkami”—N te Aro Raa?

1. A kangaa taan taromauria te Atua ni kakorakoraaki n taai ake rimoa?

E AKI TOKI ni kabwarabwaraaki n Ana Taeka te Atua bwa a korakora mwaane aika kakaonimaki. Ma e aki namakinna n taai nako are e korakora riki i buakoia bwa e korakora. N te katoto, iai taai ake e namakinna iai te Uea are Tawita bwa e ‘korakora kaanga ai aron te maunga,’ ma iai naba taai ake e “maakunrang” iai. (TaiAre. 30:7) E ngae ngke e rangi ni korakora Tamton ngke e kairaki n taamnein te Atua, ma e ataia ae ngkana akea korakorana ane mairoun te Atua anne, ao e na bon “rikirake ni mamaara ma n riki bwa kaanga bon aroia mwaane nako.” (MotiTae. 14:5, 6; 16:17) A tii korakora mwaane aika kakaonimaki aikai ibukina bwa e kakorakoraia Iehova.

2. Bukin tera ngke e taekinna te abotoro Bauro bwa e mamaara ao e korakora? (2 I-Korinto 12:9, 10)

² E ataia te abotoro Bauro bwa e kainnanoa naba te korakora mairoun Iehova. (Wareka 2 I-Korinto 12:9, 10.) Iai aorakini Bauro n ai arora naba. (IKar. 4:13, 14) Iai naba taai ake e kabokorakora iai ni karaoa te bwai ae eti. (IRom 7:18, 19) Ao n tabetai e namakina te tabeaianga ao te nanououa. (2Kor. 1:8, 9) Ma ngke e mamaara Bauro, ao e riki ni korakora. N te aro raa? E angani Bauro Iehova te korakora are e kainnanoia. E kakorakoraa Bauro.

3. Baikara titiraki aika ti na kaekai n te kaongora aei?

³ E berita Iehova bwa e na kakorakoraira naba. (1Bet. 5:10) Ma ti aki kona ni kantaningaia bwa ti na karekea te korakora ngkana ti aki kakorakoraira ni karekea. Iangoa te kaikonaki aei, e kona te intin ni kamaiua te kaa bwa e na buti. Ma e riai te turaiua n taona ana bentiin bwa e aonga ni buti. N aron naba anne, e tauraoi Iehova n anganira te korakora ae ti kainnanoia, ma iai mwaneka aika ti riai ni karaoi bwa ti aonga ni kakabwaiaaki mai iai. Tera ae e a tia ni katauraoia Iehova ibukini kakorakoraakira? Ao tera ae ti riai ni karaoia bwa ti aonga ni karekea te korakora anne? Ti na kaekai titiraki aikai ngkana ti iaiangoa aron Iehova ni kakorakoraia aomata aika karakinaki n te Baibara aika teniman aika Iona, Maria are tinan Iesu, ao te abotoro Bauro. Ti na nora naba aron Iehova n teimatoa ni kakorakoraia ana toro ni boong aikai n aanga naba aika ai aron akanne.

KAREKEA KORAKORAM MAN TE TATARO AO TE UKEUKE N REIREI

4. Ti na kangaa ni karekea te korakora mairoun Iehova?

⁴ Te anga teuana ae ti kona ni karekea iai te korakora mairoun Iehova ngkana ti kawaria n te tataro. E na boni kaekai ara tataro Iehova n arona n anganira “te korakora ae riaoni korakoraia aomata.” (2Kor. 4:7) Ti kona naba ni kakorakoraaki ngkana ti wareka ana Taeka ao n iaiangoia raoi. (TaiAre. 86:11) E “mwaaka” ana rongorongo Iehova nakoira ae n te Baibara. (Ebera 4:12) Ngkana ko tataro nakon Iehova ao ni wareka ana Taeka, ko na boni karekea te korakora are ko kainnanoia bwa ko aonga n nanomwaaka, ni kateimatoa kimwareireim, ke ni kakororaoa mwiokoam teuana ae kangaanga. Nora aron Iehova ni kakorakoraa te burabeti are Iona.

5. E aera ngke e kainnanoa te korakora te burabeti are Iona?

⁵ E kainnanoa te korakora te burabeti ae Iona. E birinako mani mwiokoana ae kangaanga are e anganna Iehova. N tokina, e kuri ni bua maiuna n te angibuaka ae korakora ao e karuanikaia maiuia kaain te kaibuke. Ngke e karenakoaki man te kaibuke, ao e a mena n te tabo ae e tuai n roroko iai mai imwaina, ae te tabo ae rotongitong ae nanoni biroton te ika ae bubura. N am iango, tera ana namakin Iona? E kantaningaia bwa e na mate ikanne? E kona n iangoia ae e a kitanna Iehova? E bae n rangi n raraoma Iona.

6. Ni kaineti ma Iona 2:1, 2, 7, tera ae e kakorakoraaki iai Iona ngke e mena i nanoni biroton te ika?

⁶ Tera ae e karaoia Iona ni karekea korakorana ngke e mena ni biroton te ika n tii ngaia? Teuana, e tataro. (Wareka Iona 2:1, 2, 7.) E ngae ngke e a tia n aki ongeaba iroun Iehova ma e kakoauaa raoi Iona ae e na bon ongoraea Iehova ana tataro, are e oti iai ana rairannano ao nanorinanona. E kananoa naba ana iango Iona i aon te Baibara. Bukin tera ngkai ti kona n taekina anne? N ana tataro are e koreaki n Iona mwakoro 2, e kamanenai taeka aika bati ao kibuntaeka aika titeboo ma ake a kuneaki n Taian Areru. (N te katoto, kabotaua Iona 2:2, 5 ma Taian Areru 69:1; 86:7.) E mataata raoi bwa e atai raoi kiibu akanne Iona. Ao n iaiangoani kiibu aikai ngke e rinanon te kangaanga, e a kakoauaa raoi ae e na boni buokia Iehova. Imwina ao e a koro i aon te aba Iona ao e a tauraoi ni butimwaea ao ni kakororaoa mwiokoana are imwina.—Iona 2:10–3:4.

7-8. E kangaa te tari te mwaane i Taiwan ni karekea korakorana ngke e kataaki?

⁷ Ana katoto Iona e kona ni buokira ngkana ti a rinanoni kataaki aika bati. N te katoto, e rotaki n te aoraki ae kakaiaki te tari te mwaane i Taiwan ae Zhiming.b Irarikina, e riai n nanomwaaka i aan aia kakaaitara ana utu ibukin onimakinan Iehova irouna. E karekea korakorana mairoun Iehova rinanon te tataro ao te ukeuke n reirei. E taku teuaei: “N tabetai ngkana a riki kangaanga ao I namakina te aki rau n te aro are I a aki kona ni karaoa au ukeuke n reirei i bon irou.” Ma e aki kabwaraa nanona. E taku: “Te moanibwai, I tataro nakon Iehova, imwina I kanimwa au bwai n ongongora ao n ongora n anenen te Tautaeka n Uea. N tabetai I anenei ni kauarerekea bwanaau ni karokoa e a rau nanou. Imwina I a moana naba au ukeuke n reirei.”

⁸ E kakorakoraaki Zhiming n aanga aika aki kantaningaaki man ana ukeuke n reirei i bon irouna. N te katoto, ngke e tabe ni kamarurungnga imwin ana korokoro, ao e a tuangaki iroun te neeti ae e a uarereke mwaitin raraana, ao e riai ni karinraraa. Te tairiki are imwain ana korokoro, ao e wareka Zhiming taekan te tari te aine ae titeboo ana korokoro ma ngaia. E uarereke riki mwaitin raraan neiei nakoina ma e bon aki naba butimwaea te karinraraa ao e marurung. E buokaki Zhiming n te rongorongo anne bwa e na teimatoa ni kakaonimaki.

9. Tera ae ko kona ni karaoia ngkana iai te kataaki teuana ae kamamaarako? (Nori naba taamnei.)

⁹ Ko a tia n namakina te raraoma ae korakora n tain te kataaki n te aro are ko aikoa kona n tataro nakon Iehova? Ke ko namakinna ae ko a rangi ni kua n ukeuke n reirei? Uringnga are e ota raoi Iehova n am kangaanga. Ngaia are e ngae naba ngkana e kimototo am tataro, ko kona ni kakoauaa ae e na anganiko te bae ko boni kainnanoia. (IEbe. 3:20) Ngkana e a kangaanga iroum te wareware ao te ukeuke i bon iroum ibukin te aoraki ao te kua, ko kona n ongora ni bwanaa aika raweaki ibukin te Baibara ke ibukini booki aika aanaki man te Baibara. Ko kona naba n noria bwa e ibuobuoki te ongora n teuana mai buakon ara anene ke ni mataku n te taamnei teuana n jw.org. Ngkana ko tataro nakon Iehova ao n ukera te kaeka ni baike e a tia ni katauraoi ibukin ara onimaki, ko a kaoia iai bwa e na kakorakorako.

KAREKEA KORAKORAM MAIROUIA TARIM N TE ONIMAKI

10. A kangaa tarira ni Kristian ni kakorakoraira?

¹⁰ E kona Iehova ni kamanenaia tarira ma mwaanera ni Kristian ni kakorakoraira iai. A kona n riki bwa ‘nibwani kabebetean nanora’ ngkana ti kaaitara ma te kataaki ke ni kakorakoraira ni kakororaoa te mwioko teuana ae kangaanga. (IKoro. 4:10, 11) Ti rangi ni kainnanoia riki raoraora n “tain te rawawata.” (TaeRab. 17:17) Ngkana ti namakina te mamaara, a kona taari ni buokira n te itera n rabwata, ao n ara onimaki. Iangoa aroni Maria are tinan Iesu ni karekea korakorana mairouia tabemwaang.

11. E aera ngke e kainnanoa te korakora Maria?

¹¹ E kainnanoa te korakora Maria. Iangoa ana namakin imwini karekeani mwiokoana ae kangaanga mairoun te anera are Kabiriera. E tuai ni mare ao e a bikoukou naba. Akea mwaataina ni kaikawaa oin natina, ma e riai n tararuaa te teei are e nang riki bwa Mesia. Ao kioina ngkai e bon tuai ni wene n taanga mai imwaina, e na kangaa ngkanne ni kabwarabwarai baikai ni kabane nakon ana kabae are Ioteba?—Ruka 1:26-33.

12. Ni kaineti ma Ruka 1:39-45, e kangaa Maria ni karekea korakorana are e kainnanoia?

¹² E kangaa Maria ni karekea te korakora are e kainnanoia ni kakororaoa iai te mwioko ae kangaanga aei? E ukera buokana mairouia tabemwaang. N te katoto, e tuanga te anera are Kabiriera bwa e na taekin riki rongorongon te mwioko aei. (Ruka 1:34) Teutana te tai imwina, e a mwananga nakon “te aba are maungaunga” i aon Iuta ao ni kawara ana koraki are Eritabeta. E nakoraoi te mwananga anne. E kamoamoaa Maria Eritabeta ao e kairaki n taamnein Iehova bwa e na taekina te taetae ni burabeti ae kaunganano ibukin natini Maria are e tuai bungiaki. (Wareka Ruka 1:39-45.) E taekinna Maria bwa e a tia Iehova ni “karaoi mwakuri aika korakora ni baina.” (Ruka 1:46-51) E kamanena Kabiriera ao Eritabeta Iehova, ni kakorakoraa iai Maria.

13. E kangaa ni kakabwaiaaki te tari te aine i Bolivia ngke e kakaaea buokana irouia taari?

¹³ N aroni Maria, ko kona naba ngkoe ni karekea korakoram mairouia taari n te onimaki. E kainnanoa te aeka ni korakora anne Dasuri ae te tari te aine mai Bolivia. Ngke e a rotaki tamana n te aoraki ae kakaiaki ao n titiku n te onnaoraki, e a kukurei Dasuri n tabeakinna. (1Tim. 5:4) E aki bebete anne n taai nako. E taku neiei, “A bati taai ake I namakinna iai bwa I a aki konaa.” E bubutii buokana neiei? E aki n te moantai. E kabwarabwaraa n taku: “I aki kani katabetabeia taari. Bwa I tataku, ‘Bon Iehova ae e na anganai te ibuobuoki are I kainnanoia.’ Ma imwina I a ataia ae ngkana I kararoaai ma tabemwaang, I a kataia iai ni kanakoraoa au kangaanga i bon irou.” (TaeRab. 18:1) E a motikia Dasuri bwa e na kororeta nakoia raoraona tabeman ao ni kabwarabwaraa te bae e rinanona. E taku neiei; “I a aki kona ni kabwarabwaraa aroni kakorakoraau mairouia tariu ni Kristian. A uotii amwarake nakon te onnaoraki ao n tibwai kiibu man te Baibara nakoiu. Ai tamaroara namakinan ae ti bon aki tiku i bon iroura. Ti riki bwa kaain ana utu Iehova ae bubura, ae te utu ae a tatauraoi n ibuobuoki, a tang ma ngkoe ao a kaungako bwa ko na teimatoa ni beku ibukin Iehova.”

14. Bukin tera bwa ti riai ni butimwaea te ibuobuoki mairouia unimwaane?

¹⁴ Te anga teuana ae kakorakoraira iai Iehova bon rinanoia unimwaane. Boni bwaintangira aika e kabonganaia ni kakorakoraira ao ni buokira. (Ita. 32:1, 2) Ngaia are ngkana ko namakina te raraoma, tibwaa tabeaiangam nakoia unimwaane. Ngkana a anganiko te ibuobuoki, kukurei ni butimwaeia. E kona Iehova ni kakorakorako rinanoia naakai.

E KONA NI KAKORAKORAKO AM KANTANINGA IBUKIN TAAI AIKA A NA ROKO

15. Tera te kantaninga ae kakawaki irouia Kristian ni kabane?

¹⁵ E kona ni kakorakoraira ara kantaninga ae boto man te Baibara. (IRom 4:3, 18-20) Ngkai ngaira Kristian, ti a kona ni karekea te kantaninga ae te maiu n aki toki n te aonnaba ae te bwaretaiti ke n te Tautaeka n Uea i karawa. Ti kakorakoraaki man ara kantaninga aei bwa ti na nanomwaaka i aani kataaki, n tataekina te rongorongo ae raoiroi, ao ni karaoi mwioko aika kakaokoro n te ekaretia. (1Tet. 1:3) E kakorakoraaki naba Bauro n te kantaninga anne.

16. E aera ngke e kainnanoa te korakora te abotoro Bauro?

¹⁶ E kainnanoa Bauro te korakora. N ana reta nakoia kaaini Korinto, ao e kabotaua i bon irouna ma te mwangko ae te tano ae kai uruaki. E “taotaonaki n rawawata,” e “babanga arona,” e “bwainikirinaki,” ao e “kabwakaaki.” E kuri naba ni bua maiuna. (2Kor. 4:8-10) E korei taeka akanne Bauro n ana katenua ni mwananga ni mitinare. Ao imwini korean taeka akanne, e a kaaitarai riki kangaanga aika bati. E na boni kaaitara ma te mwakuri n iowawa, e na kabureaki, e na toka ni kaibuke ake a urubekebeke i taari, ao ni kamatawarikaki.

17. Ni kaineti ma 2 I-Korinto 4:16-18, tera ae kakorakoraa Bauro bwa e aonga n nanomwaaka i aani kataakina?

¹⁷ E karekea korakorana Bauro n nanomwaaka mani kaatuuan ana iango i aon ana kantaninga. (Wareka 2 I-Korinto 4:16-18.) E tuangia kaaini Korinto ae e ngae ngke e a “mamaara” rabwatana ma e na aki kariaia anne bwa e na kabwaraa nanona. E kaatuua ana iango Bauro n taai aika a na roko. E a “ririkirake ni korakora” ana kantaninga ibukin te maiu n aki toki i karawa, ao e materaoi riki nakoni kataakina ae korakora are e rinanona. E kananoa ana iango Bauro n te kantaninga anne, ao ibukin anne e a namakinna bwa e a ‘kakorakoraaki riki nanona n te bong teuana ma teuana.’

18. A kangaa ni kakorakoraaki Tihomir ma ana utu n te kantaninga?

¹⁸ Te tari te mwaane i Bulgaria ae Tihomir, e karekea korakorana man ana kantaninga. Tabeua te ririki n nako ao tarina ae uarereke ae Zdravko, e mate n te kabuanibwai. Tabeua te tai imwin anne, e a rotaki n te rawawata ae korakora teuaei. Ibukini buokana e a kataamneia aron te mangauti, ngaia ma ana utu. E kabwarabwaraa ni kangai: “N te katoto, ti maroroakinna bwa ti na kaitiboo ia ma Zdravko, tera te amwarake ae ti na karaoia ibukina, antai ae e na moani kaoaki ngkana e a oki, ao tera ae ti na tuangnga ibukini kabaneani boong.” E taekinna Tihomir bwa kaatuuan aia iango i aon aia kantaninga e kakorakoraia ana utu bwa a na teimatoa n nanomwaaka ao n tataningaa ana tai Iehova are e na kauta iai tarina.

19. Tera ae ko kona ni karaoia ni kakorakoraa iai am kantaninga? (Nora naba te taamnei.)

¹⁹ Ko na kangaa ni kakorakoraa am kantaninga? N te katoto, ngkana ko kantaningaa te maiu n aki toki n te aonnaba, wareka kabwarabwaraan te bwaretaiti n te Baibara ao kananoa am iango iai. (Ita. 25:8; 32:16-18) Kataamneia bwa e na tera aron te maiu n te aonnaba ae boou. Iangoiko bwa ko mena iai. Antai ae ko noria? Tera te bwai ae ko ongo? Tera am namakin? Ni kataamneian anne, nori korobanna n ara boki aika boreetiaki aika kaota te Bwaretaiti ke mataku n taamnei aika iai katangitangia n aron Te Aonnaba ae Boou, I Aoni Kawaina n Roko, ke Iangoa te Tai. Ngkana ti kateimatoa iaiangoan ara kantaninga ibukin te aonnaba ae boou, a na boni ‘kai toki . . . ao ni bebete’ ara kangaanga. (2Kor. 4:17) E na boni kakorakorako Iehova rinanon te kantaninga are e anganiko.

20. E ngae ngkana ti namakina te mamaara, ti na kangaa ni karekea te korakora?

²⁰ E ngae ngkana ti namakina te mamaara, ma ti na “karekea korakorara iroun te Atua.” (TaiAre. 108:13) E a kamani katauraoa te bae ko kainnanoia Iehova ibukini karekeani korakoram mairouna. Ngaia are ngkana ko kainnanoa buokam ni kakororaoa te mwioko teuana, n nanomwaaka i aan te kataaki, ke ni kateimatoa kimwareireim, kakorakorako n tataro nakon Iehova ao ukera ana kairiri rinanon te ukeuke n reirei. Butimwaea te kaungaunga mairouia tarim ni Kristian. Teimatoa n iaiangoa te kantaninga. Ane kam na “kakorakoraaki n te mwaaka ae kam kainnanoia ae reke mani mimitongini mwaakana, bwa kam aonga n nanomwaaka ni bwaai ni kabane ma te taotaonakinnano ao te kimwareirei.”—IKoro. 1:11.