“Kam na Rinea . . . Ane Kam na Toro Irouna”

1. Tera ae ti riai ni karaoia ngkana ti kani kukurei ni koaua ao bukin tera? (Itaia 48:​17, 18)

E RANGI n tangirira Tamara are i karawa ao e tangiria bwa ti na kukurei ni maiura ngkai ao n te tai ae imwaira. (TeMin. 3:​12, 13) E karikira ma ara tarena tabeua aika rianako, ma e aki anganira ara konabwai n tautaekanira i bon iroura ke ni katei oin ara kaetieti ibukin ae eti ao ae kairua. (TeMin. 8:9; Ier. 10:23) E ataia ae ngkana ti kani kukurei ni koaua, ti riai n toro irouna ao ni maiuakini ana kaetieti.​—Wareka Itaia 48:​17, 18.

2. Tera ae tangiria Tatan bwa ti na kakoauaa, ao e kangaa Iehova ni kaekaa te bukibuki ni kewe anne?

² E tangiria Tatan bwa ti na kakoauaa ae ti boni kona ni kukurei ngkana akea Iehova ni maiura, ao e kona n nakoraoi aroia aomata ngkana a tautaekania i bon irouia. (KBwaai 3:​4, 5) E kaekaa Iehova te bukibuki ni kewe anne ngke e kariaia aomata aika karitei bwa a na bon tautaekania i bon irouia i nanon te tai ae maan teutana. E nang kai otara ae e boni kabwaka aia tautaeka aomata. N te itera are teuana, a mwaiti katoto n te Baibara ibukia mwaane ao aine aika a kukurei ni maiuia n aia beku iroun Iehova. Iesu Kristo boni ngaia te kabanea ni kukurei i buakoia. Ti na noria moa bwa bukin tera ngkai e rineia bwa e na toro iroun Iehova. Imwina, ti na neneria bwa e aera ngkai ti riai n taromauria Tamara are i karawa. Ao kabaneana, ti na nori tabeua bukina ngkai ti rineia bwa ti na toro iroun Iehova.

BUKINA NGKE E RINEIA IESU BWA E NA TORO IROUN IEHOVA

3. Tera are e anganaki Iesu ao tera are e rineia bwa e na karaoia?

³ Ni menan Iesu i aon te aba, e riai ni karaoa ana rinerine bwa antai ae e na toro irouna. Tabeua te tai imwini bwabetitoan Iesu, ao e tuangnga Tatan bwa e na anganna tautaeka ni kabane n te aonnaba ngkana e taromauria tii teuana te tai. E kaeka Iesu ni kangai: “An naako Tatan! Bwa e koreaki ae kangai: ‘Ko riai n taromauria Iehova ae Atuam, ao ko riai n toro irouna n tii ngaia.’” (Mat. 4:​8-10) Bukin tera ngke e rinea anne Iesu? Iangoi bukina tabeua.

4-5. Baikara bukina tabeua ngke e rineia Iesu bwa e na toro iroun Iehova?

⁴ Bukina ae kakawaki ngke e rineia Iesu bwa e na toro iroun Iehova, bon te tangira. E rangi ni korakora ana tangira Iesu ibukin Tamana. (Ioa. 14:31) Irarikina, e toro Iesu iroun Iehova ibukina bwa bon anne te bwai ae e riai ni karaoia. (Ioa. 8:​28, 29; TeKao. 4:11) E ataia ae Nibwan te maiu Iehova ao E kona n onimakinaki ma n tituaraoi. (TaiAre. 33:4; 36:9; Iak. 1:17) E tataekina te koaua n taai nako Iehova nakon Iesu ao e a tia n anganna bwaai ni kabane ake irouna. (Ioa. 1:14) Ni kaitaraan anne, bon Tatan ae karika te mate. Te tia kewe ngaia ae e nanonrang ao e tii tatabe i bon irouna. (Ioa. 8:44) E atai koaua aikai Iesu, ngaia are e bon aki kani kakairi iroun Tatan ni karitei nakon Iehova.​—IBir. 2:​5-8.

⁵ Teuana riki bukina ngke e rineia Iesu bwa e na toro iroun Iehova, bwa e ingainga ni kan nori baika kakororaoaki n ana kakaonimaki ni beku iroun Iehova. (Ebera 12:2) E ataia ae ngkana e teimatoa ni kakaonimaki, e na katabuaki iai aran Tamana ao e na katauraoa te anga ae a na kamaunaaki iai rawawata ni kabane ake e karikii te Riaboro.

BUKINA NGKAI TI RIAI N TAROMAURIA IEHOVA

6-7. Bukin tera ngkai a bati ni boong aikai aika a aki toro iroun Iehova, ma e aera ngkai ti riai n taromauria?

⁶ A bati ni boong aikai aika a aki toro iroun Iehova ibukina bwa a tuai n atai aroaron Iehova aika anainano ao bwaai ni kabane ake e a tia ni karaoi ibukia. Anne naba aroia naake e uarongorongo nakoia te abotoro Bauro i Atenai.​—Mwa. 17:​19, 20, 30, 34.

⁷ E kabwarabwaraa Bauro nakoia naake a ongora ae bon te Atua ae koaua ae e “anga te maiu ma te ikeike ao bwaai ni kabane nakoia aomata nako.” E reitia n taku: “Boni ngaia ae ti maiu irouna ao ti kakammwakuri, ao iai ngaira.” Te tia Karikiriki te Atua ae “karaoiia natannaomata nako mairoun te aomata ae tii temanna,” ngaia are ti bon riai n taromauria.​—Mwa. 17:​25, 26, 28.

8. Tera ae e aki kona ni karaoia Iehova? Kabwarabwaraa.

⁸ E kona Iehova ni kairoroia aomata bwa a na toro irouna, ngkai te tia Karikiriki ngaia ao te tia Tautaeka ae Moan te Rietata n te iuniweeti. Ma e bon aki kona ni karaoa anne Iehova. N oneani mwin anne, e katauraoi bwaai ni kakoaua ibukira ni kaotia ae bon iai ngaia ao e rangi n tangirira n tatabemanira nako. E tangiriia aomata aika bati bwa a na riki bwa raoraona n aki toki. (1Tim. 2:​3, 4) Ibukin anne, e a tia Iehova ni kataneiaira bwa ti na reireinia tabemwaang taekan ana kantaninga ao n tuangia baika raoiroi aika e na karaoi ibukia aomata. (Mat. 10:​11-13; 28:​19, 20) E a tia ni baireira i nanon ekaretia nako, ao e mwiokoiia mataniwi aika tatangira bwa a na tabeakinira.​—Mwa. 20:28.

9. E kangaa n oti ana tangira Iehova?

⁹ E oti ana tangira ae rianako Iehova n arona n tabeakinia naake a rineia bwa a na aki kakoauaa ae bon iai ngaia. Iangoi baika koaua aikai: Iai birion ma birion aomata aika a tia n rineia bwa a na maiuakin oin aia kaetieti ibukin ae eti ao ae kairua mangkekei ni karokoa ngkai. Ma e akoi Iehova n angania baike a kainnanoi ibukini kateimatoaani maiuia ao ni kukurei. (Mat. 5:​44, 45; Mwa. 14:​16, 17) E a tia n angania te konaa ni karekeia raoraoia, ni kaikawaiia natiia ao ni karekea kimwareireia n aia mwakuri korakora. (TaiAre. 127:3; TeMin. 2:24) E oti n te bwai ni kakoaua anne ae e bon tangiriia aomata ni kabane Tamara are i karawa. (TeOti. 34:6) Ti na kauringi ngkai tabeua bukina ngkai ti rineia bwa ti na toro iroun Iehova ao arona ni kakabwaiaira.

BUKINA NGKAI TI RINEIA BWA TI NA TORO IROUN IEHOVA

10. (a) Tera bukina ae kakawaki ngkai ti toro iroun Iehova? (Mataio 22:37) (b) Ko kangaa ni kakabwaiaaki man ana taotaonakinnano Iehova? (Taian Areru 103:​13, 14)

¹⁰ N aron Iesu, ti toro raoi iroun Iehova ibukina bwa ti rangi n tangiria. (Wareka Mataio 22:37.) Ti kaaniaki riki ma Iehova ngkana ti reiakin aroarona. N te katoto, iangoa ana taotaonakinnano Iehova nakoira. Ngke a aki ongeaba tibun Iteraera nakoina, ao e bubutiia ni kangai: “Kam na rairaki taiaoka mani kawaimi aika bubuaka.” (Ier. 18:11) E uringira Iehova ae ti aki kororaoi ao bon taano ngaira. (Wareka Taian Areru 103:​13, 14.) Ngkana ko kananoa am iango i aon ana taotaonakinnano Iehova ao aroarona riki tabeua aika anainano, tiaki ko kairaki iai bwa ko na kan toro irouna n aki toki?

11. Baikara bukina riki tabeua ngkai ti rineia bwa ti na toro iroun Tamara are i karawa?

¹¹ Ti kairaki naba bwa ti na toro iroun Iehova ibukina bwa bon te bwai ae ti riai ni karaoia. (Mat. 4:10) Irarikina, ti atai baika a na kakororaoaki man ara kakaonimaki ni beku irouna. Ti buoka katabuan aran Iehova man ara kakaonimaki, ti kaotaraea iai ae te tia kewe te Riaboro, ao ti kakukureia nanon Tamara. Ao ngkana ti rineia bwa ti na toro iroun Iehova ngkai, ti a karekea iai kantaningaan ae ti na toro irouna n aki toki!​—Ioa. 17:3.

12-13. Tera reireiara man rongorongoia Jane ao Pam?

¹² Ti kona ni karikirakea tangiran Iehova ae korakora iroura e ngae ngkana ti uarereke, ae te tangira ae e na teimatoa ni korakora ngkana ti tabe n ikawairake. Iangoa aia katoto taari aine aika uoman ae Jane ao Pam.a A moana aia reirei n te Baibara ngke 11 ao 10 aia ririki. E ngae ngke a aki kan reirei aia karo, ma a anga te kariaia bwa a na kona n reirei n te Baibara Jane ao Pam ma taani Kakoaua, tii ngkana a iriia naba aia utu n taromauri n aia Aro n te wikeen. E taku Jane, “I buokaki n te baere I reiakinna man te Baibara irouia taani Kakoaua, bwa N na rarawa nakoni kaririakiu irouia tabonrorou ibukini kamanenaan te drug ke te wene ni bure.”

¹³ Ngke e a kani koro 20 aia ririki ao a a riki ataeinnaine aikai bwa taan uarongorongo. Imwina riki a moana aia bwaiania ao n tabeakinia naba aia karo aika kara. E ururinga te baere a rinanona Jane ao e taku: “I a ataia ae e kakaonimaki Iehova n tabeakinia raoraona ao n aron ae taekinaki n 2 Timoteo 2:19 are kangai, ‘E ataiia aika bon ana aomata Iehova.’” E bon tabeakinia Iehova naake a rineia bwa a na tangiria ao n toro irouna!

14. Ti na kangaa ni buoka kaitiakan aran Iehova mani kabuakakaana n ara taeka ao n ara mwakuri? (Nori naba taamnei.)

¹⁴ Ti kani buoka kaitiakan aran Iehova man taiani kabuakaka ni kabane. Iangoa te bwai ae riki aei: Iai raoraom ni kaan ae e akoi, e tituaraoi, ao e kakabwarai buure. N te bong teuana ao ko a ongo ae iai temanna ae bukina raoraom anne bwa e iowawa ao e babakanikawai. Tera ae ko karaoia? Ko tei ibukina. N aron anne, ti tei ibukin Iehova n arora n tataekina te koaua ibukina ao n ninikoria n tei ibukin arana, ngkana e kataia Tatan ma naake a mena i aan ana kairiri ni kabarekaa taekan Iehova ni kabutiinako keewe ibukina. (TaiAre. 34:1; Ita. 43:10) Ti kaotia ae ti kan toro iroun Iehova ma nanora ni kabane n ara taeka ao n ara mwakuri.

15. E kangaa ni kakabwaiaaki te abotoro Bauro ngke e bitii tiana? (I-Biribi 3:​7, 8)

¹⁵ Ti kukurei ni bitii tiara ni maiura bwa ti aonga ni kona n toro iroun Iehova n te aro ae e kukurei iai ao ni karaoa riki ae bati n ara beku irouna. N te katoto, e rineia te abotoro Bauro bwa e na kakeaa kakannatona n ana tabo bwa e aonga n rimwini Kristo ao n toro iroun Iehova. (IKar. 1:14) Ibukin anne, e kukurei ni maiuna ao e karekea naba tibwangana ae te tautaeka ma Kristo i karawa. E aki uringaaba n ana motinnano ae e na toro iroun Iehova ao ti na aki naba ngaira uringaaba iai.​—Wareka I-Biribi 3:​7, 8.

16. Tera reireiara man rongorongon Julia? (Nori naba taamnei.)

¹⁶ Ti kona ni kakabwaiaaki ni maiura ngkai ao n te tai ae imwaira ngkana ti karika ara beku iroun Iehova bwa te bwai ae moan te kakawaki ni maiura. Iangoa rongorongon te tari te aine ae Julia. Bon te tia anene Julia mangke uarereke n te kurubu n anene n ana Aro imwain ae e reiakina te koaua. E nora ana tarena neiei temanna te tia anene n taiani kaotioti ao e a kataneia. E waekoa ni kinaaki Julia bwa te tia anene ae rangi ni bwakuaku ao e kamataku n taabo n anene aika rangi ni kinaaki. Ngke e rin n te tabo n reirei n te anene ae tanoata taekana, ao iai raona n reirei ae mamaroroakina taekan te Atua nakoina ao ni kabwarabwaraa ae iai aran te Atua bwa Iehova. E aki maan imwina ao e a moana ana reirei n te Baibara Julia uatai n te wiki. N tokina, e a baireia neiei bwa e nang kabanea maiuna n toro iroun Iehova n oneani mwin are e na riki bwa te tia anene. E aki bebete te motinnano anne. E taku neiei, “A bati aomata aika tuangai bwa I kataonabaa au tarena, ma I kani kabongana maiuu ni kabane n toro iroun Iehova.” Tera ana namakin neiei ngkai ibukin ana rinerine are e karaoia 30 tabun te ririki n nako? “I karekea te raunnano, ao I onimakina Iehova bwa e na boni kakororaoi bwaai ni kabane ake I tangiri n te tai ae imwaira.”​—TaiAre. 145:16.

TEIMATOA N TORO IROUN IEHOVA

17. Tera aron rotakia naake a tia n rineia bwa a na toro iroun te Atua ao naake a tuai ni karaoa anne, ngkai ti a maeka n raatokin te waaki ae ngkai?

¹⁷ Ti a maeka n raatokin te waaki ae ngkai. E korea aei te abotoro Bauro: “Bwa ai tii ‘teutana riki,’ ao ‘e nang roko teuare e na roko, ao e na aki baenikai.’” (Ebera 10:37) Tera rotakira n aei? E a kimototo aia tai ngkai aomata n rineia bwa a na toro iroun Iehova. (1Kor. 7:29) Ao ngkana ti a tia n rineia bwa ti na toro iroun te Atua, ti ataia ae ti na rinanoni kataaki, ma tii i nanon “teutana” te tai.

18. Tera ae e tangiria Iesu ao Iehova bwa ti na karaoia?

¹⁸ E kaungaia aomata Iesu bwa a na aki tii riki bwa taan rimwina, ma a na teimatoa naba n ririmwina. (Mat. 16:24) Ngaia are e ngae ngkana ti a tia n toro iroun Iehova i nanon ririki aika bati, ti bia kananomatoaira bwa ti na aki kabwarai nanora. Ti riai ni kakorakoraira n teimatoa ni maiuakina ara motinnano ae ti na toro irouna. E bae n aki bebete, ma ti kona ni kakabwaiaaki ao ni kukurei naba ngkai, ngkana ti toro irouna!​—TaiAre. 35:27.

19. Tera reireiara man rongorongon Gene?

¹⁹ A iangoia tabeman bwa a bati bwaai aika a riai ni kakeai ngkana a na toro iroun Iehova. Ngkana te roro n rikirake ngkoe, ko iangoia ae e kabotu maium ngkana ko toro iroun Iehova? E kangai Gene ae te tari te mwaane ae te roro n rikirake: “I namakinna bwa e kabotu maiuu ngkai I riki bwa temanna Ana Tia Kakoaua Iehova. N taraana ao a bati ataei ake I ikawairake ma ngaiia aika a kukurei ni bobotaki, n iraorao ni karekenano, n takaakaro n taiani keim aika tiritiri, ao e bane ngai au tai n te taromauri ao n te mwakuri ni minita.” Tera aron rotakin Gene n te aeka n iango aei? E taku teuaei, “I a maiuakina te maiu ae kiriuoua ao I kukurei i nanon tabeua te tai. Ma e bon aki teimatoa kukureiu anne. I a moanna n iaiangoi koaua man te Baibara ake I a tia ni kakeai ngkoa ao I a motinnanoia bwa N na toro iroun Iehova ma nanou ni kabane. Ao man te tai anne ni karokoa ngkai, e teimatoa Iehova ni kaekai au tataro ni kabane.”

20. Tera ae ti riai ni kamatoaa nanora iai?

²⁰ E anene te tia areru nakon Iehova ni kangai: “E a kukurei te aomata ane ko rineia ao ko katikia ni kaania, bwa e na maeka n am katawanang.” (TaiAre. 65:4) Ti bia teimatoa ni kamatoaa nanora n aron Iotua ngke e kangai: “Ngai ma kaaini batau, ti na toro iroun Iehova.”​—Iot. 24:15.