Kaotiko Bwa Ko A Tauraoi Imwain Ana Bong Iehova
Ma ngaia ae kam na katae nangimi: ba ane E na roko Natin te Aomata n te aua ane kam taku i nanomi ba E aki roko iai.”—MATAIO 24:44.
1. Bukin tera bwa ti riai n iaiangoa ana bong Iehova?
ANA bong Iehova ae kakamaku, e na riki bwa te bong ni buaka ao n un, te bong ni korakai ao n rawawata, te bong ae rotongitong ao ni kamaroaa. “Ana bong Iehova are kakanato are kakamaku,” e na bon roko ni kamaunaa te waaki ae buakaka ae ngkai, n aron naba kamaunan te buakaka n te Ieka n ana bong Noa. E na bon roko. Ma, “ane taboa aran Iehova ao e na kamaiuaki.” (Ioera 2:30-32; Amota 5:18-20) E na kamaunaia ana kairiribai te Atua ao e na kamaiuia ana aomata. E taekina aei te burabeti are Tebania ma te nano-n-umaki: “E a kaan ana bong Iehova ae kakanato, e a kaan ao e bati ni waetata.” (Tebania 1:14) Ma, n ningai ngkanne ae e na roko iai ana motikitaeka te Atua?
2, 3. Bukin tera bwa e kakawaki bwa ti na katauraoira nakon ana bong Iehova?
2 E taku Iesu: “Akea ae ata rokon te bong arei ma te aua arei, ao a aki ataia naba anerani karawa, ao E aki ataia te Nati, ma bon ti te Tama ae ataia.” (Mataio 24:36) Kioina ngkai ti aki ataa raoi te tai arei, e kakawaki ngkanne bwa ti na mutiakin taeka ake a koreaki n ara kibu ibukin te ririki 2004 aika kangai: “Kamarurungingkami n tantani . . . Kam na katae nangimi.”—Mataio 24:42, 44.
3 E taku Iesu ni kaota aron waekoan kamaiuaia te koraki ake a tauraoi, ao mwanuokaia te koraki ake a aki: “Ane a na mena uoman te mwane n te tawana: e na uotaki nako temanna, ao e na katukaki temanna; ane a na tabe uoman te aine n ii baraua n te atibu; e na uotaki nako temanna, ao e na katukaki temanna.” (Mataio 24:40, 41) E na tera aroarora n te tai ane e karuanikai anne? Ti na tauraoi n te tai anne, ke ti na kubanako iai? A na kaetaki taekara man mwakuri aika ti karaoi ngkai. Ngkana ti kani kakoauaa raoi bwa ti a tauraoi imwain ana bong Iehova, e riai bwa ti na kararoai anua aika taabangaki bwainakia irouia aomata ni boong aikai, ike ti a tangiraki iai bwa ti na rawa ni kerikaki man tangiran bwaai n taamnei, ao n rarawa nakon aekani maiu aika maiuakin aomata.
Kararoaa te Aki Kani Bwerengaki
4. Tera aroaroia aomata ake n ana bong Noa?
4 Iangoa ana bong Noa. E taku te Baibara: “N te onimaki are e a karaoa te aake Noa, ba e na kamaiuia ana utu, ngke e a tia n tuangaki iroun te Atua baike a tuai n noraki, ao e wanawana ni makua.” (Ebera 11:7) E na bae ni kamimi te aake ao n noraki raoi. I rarikina naba, Noa bon “te tia taekina te raoiroi.” (2 Betero 2:5) Ma bon akea naba temanna ae e riingaki nanona bwa e na bita maiuna man ana mwakuri ni kaba Noa, ke n ana uarongorongo. Bukin tera? Ibukina bwa “a amamarake ma ni momoi, ma n iein, ma n anganga te aba nakon te iein.” Te koraki ake e uarongorongo Noa nakoia, a rangi n tabeakin riki aia bwai ao te kakukurei, n te aro are “a aki kani bwerengaki ni karokoa te tai are e roko iai te ieka n uotia nako.”—Mataio 24:38, 39, NW.
5. Tera aroaroia kaain Totom n ana bong Rota?
5 Ai aron naba are e riki n ana bong Rota. E kaongoira te Baibara ni kangai: “A amamarake, ao a momoi, ao a kabobwai, ao a bobwai, ao a ununiki, ao a katei baata; ao n te ngaina naba are e oti nako iai Rota mai Totom, ao e bwaka te karau ae te ai ma te burimton mai karawa, ao e kamaunaia ni kabaneia.” (Ruka 17:28, 29) Imwin kauringan Rota irouia anera taekan te kamaunanakoaki are e nang roko, ao e a tuangia buuia natina aine taekan te kabuanibwai are e nang roko. Ma a taraa Rota te koraki aei, bwa “ai aron temanna ae kakaniko.”—Karikani Bwaai 19:14.
6. Baikara aroaro aika ti riai ni kararoai?
6 E taekinna Iesu bwa n aron are e riki n ana bong Noa ao Rota, ao “ai aron naba rokon Natin te Aomata.” (Mataio 24:39; Ruka 17:30) Ni koauana, te aroaro ae e a taabangaki irouia aomata aika mwaiti ni boong aikai, bon te aki kani bwerengaki. Ti riai n taratara raoi bwa ti na aki rotaki naba n te aeka n aroaro anne. Akea kairuan te kukurei ni kang amwarake aika kakangkang ao te mooi manging ma te taubaang. N aron anne, te mare bon kanoan naba ana babaire te Atua. Ma, ngkana e a manga kakawaki riki iroura moanibwaian bwaai aikai ni maiura ao ti mwinibwai bwaai n taamnei, te koaua ngkanne bwa ti a tauraoi imwain ana bong Iehova ae kakamaku?
7. Tera te titiraki ae kakawaki ae ti riai n titirakinira moa iai imwain karaoan te bwai ae ti kani karekea, ao bukin tera?
7 E taku te abotoro Bauro: “A kakimototoaki bong i mwin ngkai, ba a na mena akana iai buia n ai aroia ngke tao akea buia.” (1 I-Korinto 7:29-31) Ai tii teutana te tai ae katauaki ibukira bwa ti na katiaa mwiokoara mairoun te Atua, are tataekinan rongorongon te Tautaeka n Uea. (Mataio 24:14) E kaungaia naba taanga aika a a tia ni mareaki Bauro, bwa a na aki tii iaiangoiia buuia, n te aro are a mwinibwaia iai te Tautaeka n Uea i nanoni maiuiia. E teretere bwa taben nanora n te Tautaeka n Uea are e taekinna Bauro, boni kaitaraan te aki kani bwerengaki. E taku Iesu: “Ma kam na ukoukora moa uean te Atua ma ana raoiroi.” (Mataio 6:33) Ngkana ti nang karaoi ara motinnano ke imwain karaoan te bwai ae ti kani karekea, ao e kakawaki bwa ti na titirakinira moa ni kangai, ‘E na kanga karaoan aei, n rota arou ni moanibwaia Uean te Atua i nanoni maiu?’
8. Tera ae ti riai ni karaoia, ngkana ti a moanibwai riki katabetabe aika riiriki ni maiura?
8 Tera arora ngkana ti a ataia bwa ti a tabeakin riki waaki aika a kaakaraoaki n te bong teuana ma teuana ni maiura aei, n te aro are e a moanna ni karibwaaki iai tangiran bwaai n taamnei iroura? Iai teutana okoron aroarora ma aomata aika tuai karekea te atatai ae eti man te Baibara, ao aika a tuai n riki bwa taan uarongorongoa te Tautaeka n Uea? Ngkana tii teutana okorora, ao ti riai ngkanne n tataroakina mamaarara aei. E kona ni buokira Iehova bwa ti na karekea te iango ae eti. (I-Rom 15:5; I-Biribi 3:15) E kona ni buokira naba bwa ti na moanibwaia te Tautaeka n Uea, ni karaoa ae eti, ao ni kakororaoa mwiokoara irouna.—I-Rom 12:2; 2 I-Korinto 13:7.
Rarawa Nakon te Nimatutu n te Aro n Taamnei
9. Ni kaineti ma Te Kaotioti 16:14-16, bukin tera bwa e kakawaki bwa ti na totokoa te nimatutu n te aro n taamnei?
9 E kauringira te taetae ni burabeti are e taekina rokon “te buaka n te bong are kakanato are ana bongi te Atua” n Aremaketon, bwa bon iai tabeman aika a na aki teimatoa n tantani. E taku te Uea ae Iesu Kristo: “Norai, I a nako mai n ai aron te tia ira. E a kabaia ane kamarurungnga ni kawakini kunnikaina, ba e kawa n nakonako n akea karabana, ao a na nora ae e maamaa iai.” (Te Kaotioti 16:14-16) Te kunnikai are e taekinaki, e nanonaki iai kanikinaeara bwa Kristian aika Taani Kakoaua ibukin Iehova. E reitaki aei ma ara mwakuri n uarongorongoa te Tautaeka n Uea ao aroarora ni Kristian. E kona n taenako kanikinaeara ni Kristian ngkana ti nimatutu n te aro are ti a aki manga bati ni mwamwakuri. E kamaamaa te aro anne ao e karuanikai naba. Ti riai n rarawa nakon te nimatutu n te aro n taamnei ke te taningaroti. Ti na kanga ni kona n totokoa te aroaro anne?
10. Bukin tera bwa warekan te Baibara, e buokira ni kateimatoaira n tantani n te aro n taamnei?
10 E kaokioka katuruturuan riain te teimatoa n tantani ao te taubaang te Baibara. N te katoto, a kauringira rongorongo ake a koreaki n taian Euangkerio ni kangai: “Kamarurungingkami n tantani” (Mataio 24:42; 25:13; Mareko 13:35, 37); “kam na katae nangimi” (Mataio 24:44); ‘kam na taratara, kamarurungingkami’ (Mareko 13:33); “kam na tauraoi” (Ruka 12:40, BK). Ngke e a tia te abotoro Bauro n taekina rokon ana bong Iehova nakon te aonnaba aei, n te tai ae aki-kaantaningaki ao e kaungaia raona n onimaki ni kangai: “Ti na tai matu n ai aroia tabemang; ma ti na kamarurungira, ao ti na tauu baangira.” (1 I-Tetaronike 5:6) Ni kabanean bokin te Baibara, ao e katuruturua aron rokona Kristo Iesu are e na karina n roko ngke e taku: “I a waetata n roko.” (Te Kaotioti 3:11; 22:7, 12, 20) A mwaiti burabetin Ebera aika a kabwarabwaraa naba ao ni kauringa taekan ana bong ae kakannato Iehova ni motikitaeka. (Itaia 2:12, 17; Ieremia 30:7; Ioera 2:11; Tebania 3:8) Warekan ana Taeka te Atua, ae te Baibara ni katoa bong, ao iaiangoan te bwai are ti warekia, bon te buoka ae tamaroa ibukin kateimatoara n tantani n te aro n taamnei.
11. Bukin tera bwa e kakawaki te ukeuke n reirei n te Baibara ibukini kamarurungara n te aro n taamnei?
11 Ni koauana, te botumwaaka n ukeuke n reirei n te Baibara rinanon kabonganan booki ake a kabwarabwaraa te Baibara ake a katauraoaki iroun “te toro ae kakaonimaki ae wanawana,” bon te bwai ae e na kauti matara bwa ti na tantani n te aro n taamnei! (Mataio 24:45-47) E na kona n reke te kakabwaia man te ukeuke n reirei, ngkana e karikirakeaki karaoakina ao ni kateimatoaki naba. (Ebera 5:14–6:3) Ti riai ni katoa tai ni karin amwarake n taamnei aika matoatoa. E noraki bwa e boni kona naba n riki bwa ara kangaanga karekean te tai ibukin te ukeuke n reirei n taai aikai. (I-Ebeto 5:15, 16) Ma e ngae n anne, e aki tau bwa ti na wareka te Baibara ao booki ake a kabwarabwaraa te Baibara tii ni mwaawan ara tai. E kakawaki te katoatai n ukeuke n reirei, bwa ti aonga ni ‘korakora, n te onimaki’ ao n teimatoa n tantani.—Tito 1:13.
12. A kanga bobotaki ni Kristian, ruunga, ao bwabwaro ni buokira n totokoa te nimatutu n te aro n taamnei?
12 Bobotaki ni Kristian, ruunga, ao bwabwaro, a kona naba ni buokira n totokoa te nimatutu n te aro n taamnei. N te aro raa? Rinanon reirei ake ti karekei mai iai. Tiaki te koaua bwa ti kakauringaki ni bobotaki aikai taekan kaanin ana bong Iehova? Botaki ni Kristian ake a karaoaki i nanon te wiki, a karekea naba angara bwa ti na “kaungaira nakon te tangira ao nakoni makuri aika a raraoi.” Te aeka ni kaungaunga aei, e na kauekea te teimatoa n tantani n te aro n taamnei. E aki kamimi aei iroura, kioina ngkai ti a bon tuatuangaki naba bwa ti na bobotaki ni katoa tai ‘bwa e a kaan roko te bong arei.’—Ebera 10:24, 25, BK.
13. E a kanga te mwakuri ni minita ni Kristian ni buokira bwa ti na teimatoa n tantani n te aro n taamnei?
13 Ti buokaki naba n teimatoa n tantani, ngkana ti buoka te mwakuri ni Kristian ma nanora ni koaua. Te bwai ae kakawaki riki, bon kateimatoara n ururing kanikina aika riki n taai aikai ma ataakin nanoia, nakon are ti na tii tataekinna nakoia tabemwaang. E a kakorakoraki riki nanora n umaki, ngkana ti nora te rikirake irouia te koraki ake ti rereirei ma ngaiia n te Baibara, ao ngkana a moanna ni maiuakina naba nanon aia reirei. E taku te abotoro Betero: “Kam na katauraoi nanomi, kam na taubang.” (1 Betero 1:13, BK) Te bwainnaoraki ae tamaroa ibukin te mamaara n te itera n taamnei, bon te aki toki “ni kakorakoraingkami n ana makuri te Uea ni kamaiti.”—1 I-Korinto 15:58.
Kararoai Aroaro ni Maiu Aika Kamamaaraa te Onimaki
14. N aron are e kabwarabwaraki n Ruka 21:34-36, aroaro ni maiu raa ake e anga ana kauring iai Iesu bwa ti na aki maiuakini?
14 E a manga anga riki te kauring teuana Iesu n ana taetae ni burabeti ae riinga te nano ibukin kanikinaean rokona. E taku: “Kawakiningkami, ba a kawa n taonaki ami iango n te buabeka, ma te mamanging, ma taian iango n raraomaeakini bwain te maiu aei, ao ba e rina n roko te bong arei i roumi n ai aron te ao-ni-katatai: ba ane e na roko n te aro anne i aoia aomata ni kabaneia aika maeka i aonaba ni bane. Ma kam na kamarurungingkami n tai nako, ao kam na tataro, ba kam aonga n tokanikai ni biri nako mani baika nangi roko ni kabane, ma n tei i matan Natin te Aomata.” (Ruka 21:34-36) E kabwarabwaraa te aroaro ni maiu Iesu, are a kakorakoraia aomata n uaiakina rekena irouia n aron te buabeka n amwarake, te koro ni manging, ao ai aroaro ni maiu riki ake a karekea te raraoma.
15. Bukin tera bwa ti riai ni kararoaa te buabeka n te amwarake ao te mooi manging?
15 Te buabeka n amwamwarake ao te koro ni manging, a bon aki boraoi ma ana reirei te Baibara, mangaia are a riai ni katinanikuaki. E taku te Baibara: “Tai iriri buakoia taan ninim wain; ma taani buabeka ni kang iriko.” (Taeka N Rabakau 23:20) E aki riai te aomata ni kabuabekaa n amwarake ke ni koro ni manging, bwa e kaawa n ruanikai iai ana onimaki. A kona n reke baikai bwa bwaai ni kanimatutu ao ni kataningaroti nakoina, imwain are e na ataia bwa e aki itiaki mataniwin nanona ibukin karaoan mwakuri aikai. E taku ana taeka n rabakau te Baibara: “E kanibwaibwai tamnein te aomata ae tataningaroti, ao akea naba ana bwai.” (Taeka N Rabakau 13:4) Tao e kona te aomata anne, n tangira karaoan nanon te Atua, ma e kona n aki koro bukin nanona anne, ibukin taningarotina.
16. Ti na kanga n totokoa taonakira nako ibukin raraomaeakinan bwaai aika kainnanoaki n ara utu?
16 Baikara katabetaben te maiu aei, ake e anga ana kauring i aona Iesu? A irekereke katabetabe aikai ma oin aia mwakuri aomata nako, bwaai aika kainnanoaki n te utu, ao bwaai aika titeboo ma aikai. Ai nanobaba ra ngaira ngkana ti a kariaia bwa ti nang taonaki nako ni bwaai aikai! E titiraki Iesu ni kangai: “Ai antai i roumi ae kona ni kamaana maiuna n ai anaun te manokunibai, ngkana e iangoia n raraomaeakinna?” E kaungaia aomata ake a ongora irouna ni kangai: “Tai iango n raraoma, ni kangai, Tera karara? ao, Tera nimara? ao, Tera karabara? Ba a ukoukori baikai ni kabane Tientaire; ba E ataingkami Tamami are i karawa ba a kai nanomi ngkana akea baikai i roumi.” Moanibwaian te Tautaeka n Uea ni maiura ao onimakinan are e na tabeakin kainnanora Iehova, a na kauarerekea te tabeaianga ao ni buokira n teimatoa n tantani.—Mataio 6:25-34.
17. E na kanga n reke te raraoma man tangiran te kanibwaibwai?
17 E kona naba n reke te raraoma man tangiran te kanibwaibwai. N te katoto, iai tabeman aika a karawawataa maiuia rinanon maiuakinan ae riaon aia karekemwane. Tabeman a a tia n anaaki nanoia ibukini kani karekean aia mwane ae bati n te tai ae kimototo ao te kareke mwane n te aro ae karuanikai naba. Irouia tabeman ake a uaiakina karekean rabakaun te aonnaba bwa angan reken aia mwane, e a manga riki bwa te ao-ni-katatai nakoia. Ni koauana,te reirei ae bon tau, e manena ibukin karekean te mwakuri. Ma te koaua iai, bwa ngkana e kabaneaki te tai ae bati ibukin karekean riki reirei aika rietata, ao e noraki bwa a a tia n rotaki buaka iai tabeman n te itera n taamnei ao a maraki iai. Ai karuanikai ra te aroaro anne ngkai e a uakaan ana bong Iehova! E kauring ni kangai te Baibara: “Akana kani bwaibwai a bwaka n te kaririaki ma te ao-ni-katatai ma taiani kaibabaru aika bati aika nanobaba aika kamaraki, aika kaiinakoia aomata n te tiringaki ma te kamateaki.”—1 Timoteo 6:9.
18. Te aeka ni konabwai raa ae ti riai ni karikirakea, ngkana ti aki tangiria bwa ti na reketaati n tangiran te kanibwaibwai?
18 Te anga ae riai ibukin te aki-reketaati n tangiran te kanibwaibwai, boni karikirakean te konabwai n ataa ae eti ao ae bure ngkana ti karaoi motinnano. E karikirakeaki te konabwai aei rinanon te katoatai ni kang ‘amwarake aika matoatoa aika kanaia akana ikawai’ ao man ‘kataneiakin wanawanara n ataa te raoiroi ma te buakaka.’ (Ebera 5:13, 14) Ataakin baika “a moan raraoi” ngkana ti katei tiara aika ti na moanibwai, e na kamanoira man rinean ae kairua.—I-Biribi 1:10.
19. Tera ae ti riai ni karaoia, ngkana ti a ataia bwa e a uarereke ara tai ibukin bwaai n taamnei?
19 Te maiu ni kanibwaibwai e kona ni kamatakira, n te aro are ti a kauarerekea iai ke ni kakeaa ara tai ibukin uaiakinan bwaai n taamnei. Ti na kanga n tirotiroi arora ao ni kararoaa kamwaneakira man te aeka ni maiu aei? Ti riai n iaiangoia ao n tataroakinna bwa ti na kanga ni kabebetei aroni maiura. E taku Uean Iteraera ngkoa are Toromon: “E matu raoi te tia beku, ngkana tao e amarake teutana ke tao e amarake raoi: ao ngaen te aomata ae kaubwai bon te bwai ae e aki kona ni matu iai.” (Te Minita 5:12) E koaua bwa karekean bwaai aika bati aika aki-manena, a kana angiin ara tai ao korakorara? Ngkana a mwaiti ara bwai, ao e na rikirake naba ara kabanemwane i aon te onobwai, te kaboomwi ao ai boon kamanoakiia. Tiaki te koaua bwa e na raoiroi ibukira bwa ti na kabebetei aroni maiura rinanon kamwaawakira man bwaai aikai?
Kaotiko bwa Ko a Tauraoi ni Bwaai ni Kabane
20, 21. (a) Tera ana taeka te abotoro Betero ni kaineti ma ana bong Iehova? (b) Baikara mwakuri ao aaro aika ti riai n teimatoa ni kaakaraoi, ngkana ti kani kaotira bwa ti a tauraoi imwain ana bong Iehova?
20 E a tia n roko n tokina aia waaki aomata n ana bong Noa, ao e na manga roko naba n tokina te waaki ae buakaka ae ngkai. E kakoauaa raoi aei nakoira te abotoro Betero ngke e kangai: “E na roko ana bong te Uea [“Iehova,” NW] n ai aron te tia ira; are e na mauna iai karawa n te rurunga ae korakora, ao a na waanako bwaai n te kabuebue, ao a na kabuokaki aonaba ma kanoana.” Akea mai buakon baikai ae e na kona n rawea maiuna man korakoran unin te Atua; karawa are a kaikonakaki iai tautaeka aika bubuaka, ao aonnaba are a kaikonakaki iai aomata aika a riki n ianena mairoun te Atua. E kabwarabwaraa Betero arora ni kona ni kaotira bwa ti a tauraoi imwain te bong anne ngke e kangai: “Ngkai a nangi bane ni waanako bwaai ni kabane n te aro aei, ao aro ra aromi aika riai ba kam na maeka n itiaki ma n tangira te Atua, ni kaantaninga rokon ana bong te Atua [“Iehova,” NW] ma ni barekia!”—2 Betero 3:10-12.
21 Ara katoatai n iriri bobotaki ni Kristian ao ara ibuokanibwai n tibwatibwan te rongorongo ae raoiroi, a warekaki naba i buakon mwakuri aika riai aikai ao aika kaota tangiran te Atua. Ti bia karaoi mwakuri aikai ma te nano ni kukurei ni koaua nakon te Atua, ngkai ti taotaon nanora ni kakaantaningaa rokon ana bong Iehova ae kakannato. Ti bia ‘kakorakoraira bwa ti aonga n noraki iroun te Atua bwa ti raoi ao akea baarekara, ao akea ae e kona ni kabuakakaira.’—2 Betero 3:14.
Ko Uringnga?
• Bukin tera bwa ti riai ni kaotira bwa ti a tauraoi imwain ana bong Iehova?
• Ngkana ti a rangi ni karimoai riki tabetabera n te maiu aei, ao tera ae ti riai ni karaoia?
• Tera ae e na buokira n totokoa te nimatutu n te aro n taamnei?
• Baikara aroaro ni maiu aika buakaka ake ti riai n tannako mai iai, ao ti na kanga ni karaoa anne?
[Taamnei n iteraniba 15]
Aomata ake n ana bong Noa, a aki kani bwerengaki n taekan te motikitaeka are e a kan roko, ao ngkoe ko tabe iai?
[Taamnei n iteraniba 17]
Ko kona ni kabebetea aroni maium bwa e aonga ni mwaiti riki am tai ibukin bwaai n taamnei?