Kakimwareireiko Ni Maiu Ni Maakan Iehova
“Kam na maka Iehova, ngkami aika ana aomata aika itiaki: Ba a aki kai nanoia akana makua.”—Taian Areru 34:9.
1, 2. (a) Te aro raa ae a kakaokoro iai aia iango kaain Aaro ake aongkoa Kristian ngaiia i aon maakan te Atua? (b) Baikara titiraki ake ti na rinanoi ngkai?
A KABOTOA aia reirei minitan Aaro aika aongkoa Kristian ngaiia ae a riai aomata ni maaka te Atua, ibukin aia iango ae e katuuaia taani bure n aki toki te Atua n te ai ni moone. Te reirei aei e kaaitarai ana reirei te Baibara are e kaotia bwa Iehova bon te Atua n tangira ao e kaetitaeka n ae riai. (Karikani Bwaai 3:19; Te Tua-Kaua 32:4; I-Rom 6:23; 1 Ioane 4:8) A kaokoro aia taeka iai tabeman minita n Aaro ake aongkoa Kristian ngaiia. A bon aki taekinna ae ti riai ni maaka te Atua. Ma n onean mwin anne, a taekinna bwa e butimwaia aomata ni kabane te Atua n aki ongeia bwa tera aroaroni maiuia. Ma bon tiaki naba anne ana reirei te Baibara.—I-Karatia 5:19-21.
2 Ni koauana, e kaungaira te Baibara bwa ti na maaka te Atua. (Te Kaotioti 14:7) E a kauekei titiraki ana reirei te Baibara anne n aron ae, bukin tera ngkai e tangirira te Atua ae tatangira, bwa ti na maakua? Te aeka ni maaku raa ae e tangiria te Atua? Ti na kanga ni kakabwaiaki man maakan te Atua? Ti na rinanon titiraki aikai ngkana ti reita nako ara maroro i aon te ka-34 n Areru.
Bukin Maakan te Atua
3. (a) Tera am iango n te tua ae ko na maaka te Atua? (b) Bukin tera ngkai a kukukurei aomata aika a maaka Iehova?
3 E bon riai ni maakaki Iehova kioina ngkai bon te tia Karikiriki ao te tia Tautaeka ae Rietata i aon bwaai ni kabane. (1 Betero 2:17) Ma, tiaki aron aekani maakan te Atua ae ribuaka ae ko na rangi ni maakua, bwa bon te karinerine maakan Iehova ao aki karaoan naba te bwai ae e aki kukurei iai. Bon te aroaro ae raoiroi ae buoka te aomata ae mamaaka te Atua. E tangiriia ana aomata Iehova ae “te Atua ae kukukurei” aika e karikiia, bwa a na kukurei. (1 Timoteo 1:11, NW) Ma ngkana ti na karaoa anne, ti riai moa ni kaboraoa maiura ma ana kaetieti te Atua. A bati aika taku bwa e nanonaki iai bitakin aroaron maiuia. A nora koauan ana taeka te tia areru are Tawita aomata nako ake a karaoa te bitaki aei ae kangai: “Kam na kata Iehova ma n noria ba E raoiroi: E a kabaia te aomata ae onimakinna. Kam na maka Iehova, ngkami aika ana aomata aika itiaki: Ba a aki kai nanoia akana makua.” (Taian Areru 34:8, 9) A na bon aki tare n aki toki aomata ni kabane ake a maaka Iehova ni baika kakawaki ibukina bwa iai aia reitaki ma te Atua.
4. Tera te karaunano are e anga Tawita ao Iesu?
4 Noria bwa e karineia ana aomata Tawita ngke e arania bwa a “tabu.” Boni kaain ana natannaomata te Atua ae tabu. A bon ruanikai naba maiuia ngke a rimwin Tawita. E ngae ngke a birinako mairoun te Uea are Tauro ma e kakoauaa Tawita bwa e na bon teimatoa Iehova ni katauraoi kainnanoia. E korea ae kangai Tawita: “Akea aia bwai bunia raian, ao a mate ni baki: Ma a na aki kai nanoia akana ukoukora Iehova n akea aia bwai aika raraoi.” (Taian Areru 34:10) E anga naba te karaunano ae titeboo ma arei Iesu nakoia taan rimwina.—Mataio 6:33.
5. (a) Tera raoi aroaroia angiia taan rimwin Iesu? (b) Tera te reirei are e anga Iesu ni kaineti ma te maaku?
5 A bati mai buakoia taan ongoraa aika raarikin ao ni mangori. Mangaia are “E nanoangaiia [Iesu], ba a rawawata, ao a mae nako, n ai aroia tiibu aika akea te tia kawakinia.” (Mataio 9:36) A kona ngkanne akana a mangori n ninikoria n rimwin Iesu? A kona ngkana a karikirakea maakan Iehova ao tiaki aomata. E taku Iesu: “Tai makuia akana kamatea te rabata, ao i mwina akea aia bwai riki ae a kona ni karaoia. Ma N na tuangngkami moa teuare kam riai ni makua; Kam na maka teuare kona n tetewe nako Keenna, ngkana e a tia ni kamateingkami; boni ngaia ae I tuangngkami ba kam na makua. Tiaki a kaboaki niiman te tibaaro n teuana te bene? ao e aki manuokaki temanna n aikai i matan te Atua. Ma a boni bane ni warekaki iran atumi. Kam na tai maku: kam bongana riki nakoia tibaaro aika bati.”—Ruka 12:4-7.
6. (a) Tera ana taeka Iesu are e kakorakoraia Kristian iai? (b) Bukin tera ngkai kaotiotan maakan te Atua iroun Iesu bon te banna ni katoto ae te kabanea n tamaroa?
6 Ngkana a kaaitaraki taani maaka Iehova irouia aia kairiribai, ma n tuangaki bwa a na katoka aia beku iroun te Atua, a bae n ururinga ana reirei Iesu ae kangai: “Ane kaota tauani bukiu i mataia aomata, ao E na manga kaota tauani bukina Natin te Aomata i mataia ana anera te Atua: ma ane kaakeai i mataia aomata ao e na kaakeaki i mataia ana anera te Atua.” (Ruka 12:8, 9) A kakorakoraaki Kristian n taeka akanne, e moamoa riki n aaba ake a katabuakaki iai te waaki n taromauri ae koaua. A teimatoa aomata akanne n neboa Iehova ma te nanowanawana n taiani bobotaki ni Kristian ao n aia mwakuri ni minita. (Mwakuri 5:29) E katea te banna ni katoto Iesu ae tamaroa ni kaotiotan “makan te Atua i Rouna.” (Ebera 5:7) E kangai te taetae ni burabeti ibukina: “E na bwakaria tamnein Iehova, ae te tamnei . . . ae maka Iehova . . . ao makan Iehova te bwai ae tangiraki i Rouna.” (Itaia 11:2, 3) E rangi ni mwaatai Iesu n reireinira taekan te kakabwaia ae reke ni maakan te Atua.
7. (a) A na kanga Kristian ni karaoa ae riai ni kaineti ma te kakao are titeboo ma are e anga Tawita ? (b) A na kanga kaaro ni katotonga ana banna ni katoto Tawita?
7 Aomata ni kabane ake a katotonga Iesu n ongeaba nakon ana reirei, ai aron ae a butimwaea te kakao ae titeboo ma are e anga Tawita ae kangai: “Ataei, kam na nako mai n ongora i rou: N na reireingkami makan Iehova.” (Taian Areru 34:11) E riai iroun Tawita aranakia ana aomata bwa ana “ataei,” ibukina bwa a onimakinna ibukin kairaia. E buokia taan rimwina Tawita bwa a na maaka te Atua n te aro are a na kona n reitaki ao ni karekea ana akoi te Atua. Ai tamaroara te katoto aio ibukia kaaro aika Kristian! E a tia Iehova n angania mwiokoaia ni kaineti ma natiia aine ao mwaane bwa a “na kaikawaiia i nanon te kataereaki n reireiaki ma te tuatuangaki aroia aika riai i matan te Uea.” (I-Ebeto 6:4) A buokaki rooro n rikirake irouia aia karo bwa a kona n maiu ni kukurei ngkana a maaka Iehova, ma ni maroroakinan baika irekereke ma te onimaki ni katoa bong ao te katoa tai n reirei ma ngaiia n te Baibara.—Te Tua Kaua 6:6, 7.
Aron Kataneiakim ni Maaka te Atua
8, 9. (a) Bukin tera ngkai e anaaki nanora ni maakan te Atua n aroaroni maiura? (b) E irekereke ma tera kawakinan newera?
8 N aron ae e taekinaki i mwaina, ao e aki totokoa reken te kimwareirei maakan Iehova. E titiraki Tawita ni kangai: “Ai antai te aomata ae tangira te maiu, ma n tangira naba kabatiani boong, ba e aonga n nora ae e na kabaia iai?” (Taian Areru 34:12) E mataata bwa maakan Iehova, boni ngaia kiingin reken te maiu ae abwabwaki ma ni kakukurei. E bebete taekinan ae “I maaka te Atua,” ma e kangaanga maiuakinana. Mangaia are e kabwarabwaraa Tawita arora are ti na kona iai ni kaotiota maakan te Atua.
9 “Ko na taua newem man te buakaka, ao matanriam man atongan te uarao.” (Taian Areru 34:13) E kairaki Betero bwa e na mwanewea mwakoron Taian Areru 34 aei, imwin kauringaia Kristian bwa a na tangiria taria, temanna nakon temanna. (1 Betero 3:8-12) Kawakinan newera man te buakaka e nanona naba bwa ti na rarawa nakon kabutanakoan winnantiaia raora. Ma n onean mwin anne, ti riai n aki toki ni kakorakoraira nakon baika kateimatoa ngkana ti maroro ma tabeman. Irarikin anne, ti riai ni kakorakoraira bwa ti aonga n ninikoria ma n tataekina te koaua.—I-Ebeto 4:25, 29, 31; Iakobo 5:16.
10. (a) Kabwarabwaraa te bwai ae nanonaki n te rarawa nakon te buakaka. (b) Tera ae irekereke ma karaoakin ae raoiroi?
10 “Kitana te buakaka, ao karaoa te raoiroi; ukoukora te raoi, ao kaeea ni kan tauua.” (Taian Areru 34:14) Ti rarawa nakon mwakuri aika e riribai te Atua n aron te wene ni bure, taamnei aika bwaitingako, te iraa, te tabunea, te tiritiri, te koro ni manging ao kabonganakin taian drug n te aro ae aki riai. Ti rarawa naba nakon bwaai ni kaakibotu aika kammaira. (I-Ebeto 5:10-12) Ma n onean mwin anne, ti kabongana ara tai ni karaoi baika a raraoi. Te mwakuri ae ti kona ni karaoia ae te kabanea n raoiroi bon te katoa tai n ira tataekinan rongorongon te Tautaeka n Uea ao karekeaia taan rimwin Kristo, ao buokaia aomata bwa a na kamaiuaki. (Mataio 24:14; 28:19, 20) Karaoan ae raoiroi e nanona naba te kakatauraoi, kaakaean bobotaki ni Kristian, te anganano n te mwane ibukin buokan te mwakuri ni katobibia te aonnaba, tararuan ara Mwaneaba n Uea, ao tabeakinaia Kristian aika iai kainnanoia.
11. (a) E kanga Tawita ni kaotiota te raoi ni kan taua? (b) Tera ae ko kona ni karaoia n ‘ukoukora iai te raoi’ n te ekaretia?
11 E katea te katoto ae tamaroa ni karekean te raoi Tawita. Uatai te tai are reke iai angana n tiringa Tauro, ma e rawa n tiringnga. Imwina riki e taetae ni karinea te uea, i aan te kaantaningaa ae e na manga reke te rau i marenaia. (1 Tamuera 24:8-11; 26:17-20) Tera ae kona ni karaoaki ngkana iai te bwai ae riki n te ekaretia ae kona n urua te rau? Ti riai n ‘ukoukora te raoi, ao ni kaaea ni kan taua.’ Mangaia are ngkana ti namakinna bwa e aki nakoraoi ara iraorao i marenara ma raora n te onimaki, ma ti ongeaba nakon ana reirei Iesu ae kangai: “Naako moa, raoiakina tarim.” Imwina, ti a kona ni waaki ma iteran taromaurian Iehova ake tabeua riki.—Mataio 5:23, 24; I-Ebeto 4:26.
Maakan te Atua e Kabatiaa te Kakabwaia
12, 13. (a) Tera te kakabwaia ae a kona n reke irouia te koraki ake a maaka te Atua? (b) Tera te kaniwanga ae moan te raoiroi, ae e na reke irouia taan taromauri aika kakaonimaki, n te tai ae kaan roko ngkai?
12 “A memena matan Iehova i aoia akana raoiroi ni kan akoiia, ao a uki taningana nakon aia wewete.” (Taian Areru 34:15) E kakoauaki rongorongon ana mwakuri te Atua nakon Tawita bwa a koaua taeka akanne. Ni boong aikai, ti namakina te kimwareirei ao te raunnano ibukina bwa ti ataia ae e tarataraira Iehova. Ti aki nanououa bwa e na anganganira baika ti kainnanoi e ngae ngke ti karawawataki. Ti ataia naba bwa n te tai ae waekoa, a nang kaaitara taan taromauria te Atua ae koaua ma niniakia irouia Koka ma Makoka are e taetae ni burabetinaki, ao imwina, “ana bong Iehova are kakanato are kakamaku.” (Ioera 2:11, 31; Etekiera 38:14-18, 21-23) A na koro iai bukin ana taeka Tawita aikai, n aki ongei kangaanga ake ti kaaitaraki iai: “A wewete akana raoiroi, ao E ongo Iehova, ao E kamaiuia man rawawataia ni kabane.”—Taian Areru 34:17.
13 Ai kakukureira norakin Iehova ni karietata arana ae kakannato n te tai anne! E na onrake nanora ma te karinerine ae bati nakon are rimoa, ao a na kamaamaeaki ni kamaunaki taan kakaitara ni kabaneia. “E ekiia nako akana karaoa ae buakaka matan Iehova, ba E aonga ni kamauna kanuringaia mai aon te aba.” (Taian Areru 34:16) Ai batira te kakabwaia ni karekean te kamaiu ae kamimi n te aonnaba ae boou ae raoiroi!
A Buokira n Nanomwaaka Ana Berita Iehova
14. Baikara koaua man te Baibara ake a kona ni kananomwaakaira n aki ongei kangaanga?
14 Ma e kainnanoa te nanomwaaka, te ongeaba nakon Iehova n te aonnaba ae akea te kaetitaeka ae riai iai ao e bati te kairiribai naba iai. E rangi n ibuobuoki maakan te Atua n arona ni karikirakea te ongeaba iroura. Ibukina bwa ti maiu i nanon taai aika karuanikai, ao a tia ana toro Iehova n rinanon kangaanga aika a rangi ni korakora ike a namakina iai te rawawata n nano ao te bwarannano are a kaaitara ma ngaai. Ma a boni kakoauaa are e na bon buokiia Iehova ni kananomwaakaia, ngkana a onimakinna. A kabebetei nanora ana taeka Tawita aikai: “E a kaan Iehova ma akana a uruaki nanoia, ao E kamaiuia akana a raraoma tamneiia.” (Taian Areru 34:18) E a manga taku riki Tawita ngke e kaungaunga: “A bati karawawatan te aomata ae raoiroi: Ma Iehova E na kamaiua mani baikai ni kabane.” (Taian Areru 34:19) E ngae ngkana a mwaiti kangaanga ake ti kaaitara ma ngaai ma e bon tau korakoran Iehova ibukin kamaiuara.
15, 16. (a) Tera reireian Tawita ni kataakina imwin oteakin Taian Areru 34 n te tai ae aki maan? (b) Tera te bwai ae kona ni buokira ni kananomatoaira i aani kataaki?
15 Teutana te tai imwin otean Taian Areru 34, ao e ongo taekaia kaain Noba Tawita bwa a taonaki n te kangaanga ngke a kamateaki iroun Tauro ma ibonga naba. Ai rawawatara nanon Tawita ngkai e uringnga ae rokona i Noba e karika unin Tauro! (1 Tamuera 22:13, 18-21) Akea te nanououa bwa e rairaki Tawita nakon Iehova ni kakaaea buokana mairouna, ao e kabebeteaki nanona ni kaantaningan kautaia “akana raoiroi” n te tai ae imwaina.—Mwakuri 24:15.
16 Ni boong aikai, ao e kakorakoraira naba te kaantaninga ibukin te mangauti. Ti ataia ae a aki kona n teimaan baika bubuaka aika karaoaki nakoira irouia kairiribai. (Mataio 10:28) E kabwarabwaraa ana iango Tawita ae titeboo ma anne n taeka aikai: “E kakawakin rina ni kabane: Akea teaina i buakoia ae maoto.” (Taian Areru 34:20) E kaineti naba te kibu anne ma are e riki nakon Iesu. Ma e bon tiringaki Iesu n te aro n iowawa ma akea teaina ma ibuakon riina ae “oteaki.” (Ioane 19:36) Ma iai riki kakoroana teuana, bwa e karau nanora Taian Areru 34:20 bwa e ngae ngkai a karawawataki Kristian aika kabiraki ao raoia aika “tiibu tabemang,” ma a na aki karawawataki n aki toki. Kaanga, a na aki oteaki riia.—Ioane 10:16.
17. Tera te kangaanga are e na reke nakoia taan riribaia ana aomata te Atua aika rawa n raraoma iai?
17 Ma, e na kaokoro aroia aomata aika buakaka. A na anaa uaan te buakaka are a tia n unikia n te tai ae aki maan. “E na kamatea te aomata ae babakanikawai te buakaka: Ao akana riribaiia akana raoiroi, a na kabureaki.” (Taian Areru 34:21) Aomata ni kabane ake a teimatoa ni kaaitaraia ana aomata te Atua a na bon kaaitara ma te kangaanga ae korakora. A “na reke kaiia n tiringaki n aki toki” ni kaotin Iesu Kristo.—2 I-Tetaronike 1:9.
18. N te aro raa, ae a a tia ni kainaaomataki iai “te koraki ae uanao,” ao tera ae a na kaaitara ma ngaia n te tai ae na roko?
18 E motika ana areru Tawita n taeka ni karaunano aikai: “E kakamaiui tamneiia ana toro Iehova: Ao akea temanna i buakoia aika onimakinna ae na kabuakakaki.” (Taian Areru 34:22) Ngke e a kaan banen ana ririki n uea are 40 ao e taku te Uea are Tawita: “E kamaiua tamneiu [te Atua] mani kaai ni kabane.” (1 Uea 1:29) A na kona ni kukurei aomata aika mamaaka Iehova n aron Tawita ibukin kainaaomataia man te bure ao kamaiuaia mani kataakia ni kabane ngkana a tanrikaki. A a tia ni karekea kaniwangaia i karawa angiia Kristian aika kabiraki. E a tabe ngkai “te koraki ae uanao” mai buakoia botannaomata nako, n reitiia ma nikiraia tarin Iesu ni beku ibukin te Atua, ao a taraaki bwa a a itiaki i matan Iehova. E a reke aei ibukina bwa a onimakina mwaakan raraan Iesu ni kainaaomataia. I aan ana Tautaeka Kristo ae Manna Tengaa te Ririki ae na roko, e na kamanenaki korakoran te karea ni kaboomwi nakoia, ao a na karikirakeaki nakon te maiu ae kororaoi.—Te Kaotioti 7:9, 14, 17; 21:3-5.
19. Tera are a kananomwaakaia ni karaoia kaain te “koraki ae uanao”?
19 Bukin tera ngkai a na bane n roko kakabwaia aikai nakoia “te koraki ae uanao” aika taromauria te Atua? Ibukina bwa a teimatoa n nanomwaaka ni maaka Iehova, ni beku irouna ma nanoia ni kakaitau ao te ongeaba ae boto i aon te karinerine. Ni koauana, e karekea te kakukurei ni maiura ngkai maakan Iehova ao e buokira “n taua te maiu ni koaua,” are te maiu n aki toki n ana aonnaba ae boou te Atua.—1 Timoteo 6:12, 18, 19; Te Kaotioti 15:3, 4.
Ko Uringnga?
• Bukin tera ngkai ti riai ni maaka te Atua, ao tera ae nanonaki ni maakana?
• Tera irekereken maakan te Atua ma aroaroni maiura?
• Baikara kakabwaia aika reke mani maakan te Atua?
• Baikara berita ake a kananomwaakaira?
[Taamnei n iteraniba 29]
A bwaina te wanawana te koraki aika mamaaka Iehova ngke a katabuakaki
[Taamnei n iteraniba 31]
Te kabanea n tamaroa ae ti kona ni karaoia nakoia raora, bon tibwakin rongorongon te Tautaeka n Uea nakoia