Lé Kpẹ̀a E Jṍòn Beè Emí

3 A íe ene kà gbálà ea dṹùnà pá Fárìsíì, ea kọlà Nìkòdímòs. A beè di gbàà gbò tùle pá Júù. 2 Gbálàí beè tú bílá dee siimá ló Jíízọ̀s gé kọ́ nèe kọọ̀: “Neǹ Dòbá, è nyímà kọọ̀ ọ̀ọ̀ neǹ dòbá e Bàrì beè lẹ̀ẹ̀là, boo béè kọọ̀ tọ́ọ̀ nen náa é láá sí gbò tóm dũ̀ùnè eo gé síí be Bàrì á géé ló.” 3 Jíízọ̀s à kọ́ nèe kọọ̀: “M̀ lóò kà-kà bel nè ni kọọ̀, beè nen náa kpáá mèà, náa é láá bã mm̀ Boǹ Méné Bàrì.” 4 Nìkòdímòs à bĩináe kọọ̀: “Mósĩ́ deè ní e nen ea ni dú kànen é láá kpáá mèà ẽ? Náa é láá bã gbàà a kà vaá mèà ní ea égè bàà tóm, sẹ̀ à é láá naa vó é?” 5 Jíízọ̀s à aalá nèe kọọ̀: “M̀ lóò kà-kà bel nè ni kọọ̀, beè nen náa meà tení dú ló múú nè nyómá káí, náa é láá bã mm̀ Boǹ Méné Bàrì. 6 Nú ea meà aa mm̀ nom̀ kpáló dú nom̀ kpáló, vaá nú ea meà aa mm̀ nyómá dú nyómá. 7 Á gá bọọ́ ní ló kọ m̀ kọ́ọ̀ nè ni kọọ̀: Ò é íè ge kpáá meai. 8 Fọ́ọ́lọ́ ólò ula kĩée ea gbĩ́ gè ùlà, vaá ò ólò dã́ mon, sõò nóo nyímà kĩée ea aà nè kĩée ea gé kil. Níà bé ea dì nàgé naa ló kọ̀láá nen ea meà tení dú ló nyómá káí é.”

9 Nìkòdímòs à gbóó bĩináe kọọ̀: “Mósĩ́ deè ní e gbò nuí é láá naaá ẽ́?” 10 Jíízọ̀s à aalá kọọ̀: “Oló neǹ dòbá pá Ízrẹẹ̀l ní e bè nóo nyímà gbò nui ẽ́? 11 M̀ lóò kà-kà bel nè ni kọọ̀, è gé kọ́ nú e nyímà, vaá nè kpẹ̀a ea kil ló nú e beè mònmà dẽe, sõò nóo zigàì ló kpẹ̀a e kọ́ọ̀. 12 Be m̀ kọ́ọ̀ gbò nú ea kil ló gbò nú ea di boo kunukẽ̀í nèi vaá nóo zigàì, à é náà và ò láá zigai be m̀ kọ́ nú ea kil ló gbò nú ea di káála nèi ẽ́? 13 Kọ̀láá bé ea dì naa, tọ́ọ̀ nen gáà àà kil káála, sõò Sã́áná nená ní ea beè aa káála dù e. 14 Dì beli bé e Mózìs beè dàlà naanà nè boo gbẹá boo kpáà bàlà ól naaá, níà bé e bà é beè iè ge dàlà Sã́áná nená nè boo naa ẽ́, 15 kọbé kọ̀láá nen ea íée zìgà m íe dùm e bè náa tá.

16 “Boo béè kọọ̀ Bàrì palàge vùlè bàlà booí naa ní ea lọà áá kà a Sã́áná bá kọbé kọ̀láá nen ea kilsĩ́ gè iée zìgà m náa é íe kyọ̀àsĩ́, tãa vó, à é íe dùm e bè náa tá. 17 Bàrì náa beè lẹ̀ẹ̀là a Sã́áná domá kọ á gé beelá bel ló bàlà booí, sõò a beè lẹ̀ẹ̀làẹ domà kọbé bàlà booí íe dùùà tení dúé ló. 18 Bà náa é béélá bel ló nen ea íée zìgà m. Sõò baa béélá bel ló kọ̀láá nen e náa íée zìgà m lọ̀l, boo béè kọ náa íé zìgà mm̀ béè áá kà Sã́áná Bàrì. 19 Nee nú e bà é élá boo beemá belí: ẹ́ẹ́ dee beè dú bàlà booí, sõò gbò nen vulè kùkùù gín èlmà ẹ́ẹ́ dee, boo béè kọọ̀ nú e bà gé náa dú pọ́lọ́. 20 Kọ̀láá nen ea gé lábví pọ́lọ́ láb ólò ọbví ẹ́ẹ́ dee, vaá náa ólò gbĩ́ gè tõó kĩée e ẹ́ẹ́ dee dì, kọbé ẹ́ẹ́ dee náa tú a pọ́lọ́ tẹlẹ bàlà kẽ. 21 Sõò kọ̀láá nen ea gé náa nú ea lelà ólò tõó kĩée e ẹ́ẹ́ dee dì kọbé gbò nen mon kọọ̀ tóm ea gé síè gbááá ló bùlà Bàrì.”

22 Tṍó e níí nááá lọ̀l, Jíízọ̀s nè gbò e bà ólò nyoonée nvée beè gbóó àà kil bálásĩ́ Jùdíà, vaá a beè tú sìgà tṍó zọ̀ọ̀mà va tõó kĩá vaá tú gbò nen diilé múú.* 23 Sõò Jṍòn géè tú nágé gbò nen diilé múú Ínòn, ea di kuló Sélẹ̀m, boo béè kọọ̀ múú ea di kĩá beè bọọ́ kètẽ́, vaá gbò nen beè kilsĩ́ gè dù vaá à tú va diilé múú. 24 Tṍóá, bà gáà beè sii Jṍòn nvee tọọ̀ kpọ́gọ́lọ́.

25 Gbò e bà ólò nyoone nvéè Jṍòn nè enè neǹ Júù beè tàlà bel boo bé e nen é láá di õ̀òa kèsĩ́ Bàrì naa. 26 Bà gbóó sí ló Jṍòn gé kọ́ nèe kọọ̀: “Neǹ Dòbá, gbálà ea beè dì ní ló gbẹá na sábá Jọ́dàn, eo beè kọ́ nu ea kilíé lóá gé tú gbò nen diilé múú, vaá dénè nen gé síé ló.” 27 Jṍòn à kọ́ nè va kọọ̀: “Nen náa é láá ié tọ́ọ̀ nu beè Bàrì náa née. 28 Boolo é láá sii neǹ ditõ̀ò kọ m beè kọọ̀, ‘Nda níì Kráìst nì, sõò ba beè lẹ̀ẹ̀làm kọ ḿ gyàẹ́ sĩ́.’ 29 Dóm ea gé ílí va ní e vaá dì nèe. Sõò nyíè kóò dóm va ólò ẹẹ tṍó ea élá èla vaá dã́ nú e dóm vaá gé kọ́. Vó à naa, nyíém palàge ẹẹ. 30 Ẹlẹ é kilsĩ́ gè olòó dààa boo, sõò nda é ólòó kil kẽ.”

31 Nen ea aa gbàn deè dù bọọ èl dénè nen. Nen ea aa boo kunukẽ̀í ólò ló bel ea kil ló gbò nú ea di boo kunukẽ̀í, boo béè kọọ̀ níà kĩée ea aà dù e. Nen ea aa káála dù bọọ èl dénè nen. 32 À ólò kọ́ gbò nú ea beè mòn vaá dã̀, sõò tọ́ọ̀ nen náa ziga gbò nú ea kọ́. 33 Kọ̀láá nen ea ziga bel ea ló zigà kọọ̀ Bàrì dú kà-kà. 34 Nen e Bàrì lẹẹlà ólò ló bel ea aa gã́ Bàrì, boo béè kọọ̀ Bàrì ólò dõo a nyómá taalẹ bá. 35 Tẹ̀a vulè a Sã́áná vaá tú dénè nu nvèèé bá. 36 Nen ea íe zìgà mm̀ Sã́ánáá é íe dùm e bè náa tá. Nen ea lọl togó kèbá Sã́ánáá náa é íe dùm, sõò súng Bàrì é kilsĩ́ gè dìé boo.