Emboʼékena umi maranduhára pyahúpe opredikakuaa hag̃ua
1. Mbaʼéichapa reñeñanduvaʼekue reñepyrũrõ guare repredika?
1 Epensamína mbaʼéichapa reñeñanduvaʼekue reñepyrũrõ guare repredika ogahárupi. Oiménengo nderyʼái roʼysãmbáraʼe, ajépa! Péro upe rire reñeñandu porãmiéma oĩ rupi nendive upe nemboʼevaʼekue la Biblia térã ambue maranduhára, ha reikuaa porã haʼekuéra nepytyvõtaha. Koʼág̃a nde ndekatupyrýma predikasiónpe ha ikatúma remboʼe umi ipyahuvévape opredikakuaa hag̃ua.
2. Mbaʼépa tekotevẽ oaprende umi ipyahuvéva?
2 Umi maranduhára pyahu oaprendevaʼerã mbaʼéichapa oñepyrũta oñemongeta hapichándi predikasiónpe, tekotevẽ oiporukuaa la Biblia oñeʼẽ jave pe ogajárandi, ojapokuaa rrevisíta, omoñepyrũ ha ojapo peteĩ estúdio. Avei tekotevẽ oikuaa mbaʼéichapa ikatu opredika kállere ha umi negosioháre. Mbaʼéichapa nde ikatu reipytyvõ umi ipyahuvévape? Upéva ikatu rejapo ne ehémplo rupive ha avei erévo chupekuéra mbaʼéichapa ojapo porãvéta ko tembiapo.
3. Mbaʼéichapa ñaporopytyvõkuaa ñane ehémplo rupive?
3 Eporomboʼe ne ehémplo rupive. Jesús ohechaukavaʼekue hemimboʼekuérape mbaʼéichapa opredikavaʼerã (Luc. 8:1; 1 Ped. 2:21). Upéicha avei, resẽtáramo repredika peteĩ maranduhára pyahúndi, repreparavaʼerã umi presentasión ndahasýiva oñentende, ikatu hag̃uáicha haʼe avei ojapo. Upearã rehechakuaa umi presentasión osẽva jepi ñane puvlikasiónpe. Peimévo predikasiónpe nde raẽ epredika peteĩ térã mokõi ógape ikatu hag̃uáicha haʼe ohendu, upe rire eporandu chupe mbaʼéichapa ohecha pe presentasión rejapovaʼekue. Péicha haʼe ohechakuaáta mbaʼérepa ideprovécho oñesẽ mokõi mokõi predikasiónpe ha naiprovlemamoʼãi ohendu hag̃ua reñemoñeʼẽvo chupe opredikapa rire.
4. Mbaʼéichapa ñaipytyvõkuaa peteĩ maranduhára pyahúpe ñahendu rire ipresentasión?
4 Eñemoñeʼẽ chupe ikatupyryve hag̃ua. Jesús heʼi avei hemimboʼekuérape mbaʼéichapa opredikavaʼerã (Mat. 10:5-14). Ejapóna nde avei upéicha, pe maranduhára pyahu opredika jave ejapysakã porã hese. Ha pesẽ rire upe ógagui eguerohory chupe opredika porã haguére ha ere voi mbaʼe mbaʼépa ojapo porã, ojavy mimíramo jepe. Ani rejapura rekorrehi hag̃ua chupe, ikatu ningo oime ochuchuʼimínteraʼe. Nemanduʼavaʼerã avei naentéroi peteĩchaha, ha peteĩ tembiapo ikatuha ojejapo heta hendáicha (1 Cor. 12:4-7).
5. Mbaʼépa ikatu ere reipytyvõ hag̃ua umi ipyahúvape?
5 Sapyʼánte pe maranduhára voi oporandúta ndéve mbaʼéichapa ikatu opredika, péro noporandúiramo mbaʼeve, ndete ikatu reipytyvõ chupe. Mbaʼéichapa rejapokuaa upéva? Reikekuaavaʼerã; oĩ ermáno heta tiémporema opredikáva, ha oporandúnte hikuái: “Ndegustápa rejapo lája?” térã, “Ikatu avei ere kóicha” ỹrõ, “Che apredika ñepyrũrõ guare cheforsavaʼekue, péro chepytyvõ ...”. Sapyʼánte iporãta pehecha oñondive lívro Razonamiento. Upéicharamo jepe reñatendevaʼerã ani redesahusia chupe hetaiterei mbaʼépe; mbeguekatúpente rehovaʼerã hese.
6. Mbaʼérepa jaʼe iérro ikatuha oñehaimbeʼe iérrope jey?
6 Iérro ikatu iérrope jeýnte oñehaimbeʼe. Timoteo ningo peteĩ maranduhára katupyry vaʼekue, upéicharamo jepe Pablo heʼi chupe akóinte toñehekomboʼe ha toñakãrapuʼãve ohóvo (1 Tim. 4:13, 15). Oiméramo ohasáma heta áño repredika hague katuete ndekatupyrýmane, péro ani repyta upépe, eñehaʼã guei ndekatupyryve rehóvo. Eaprende umi ermáno osẽvagui nendive predikasiónpe, toñepyrũ ramo jepe raʼe. Ehechakuaákena avei mbaʼéichapa ikatu reipytyvõ ermanokuérape, koʼýte umi ipyahúvape, ikatupyry hag̃ua avei predikasiónpe (Pro. 27:17).