Ko múndo tuichakue javeve ñamombeʼúta oĩtaha Asambléa de Distríto “Koʼẽrõitéma ñanesãsóta!”
Puvlikadorkuéra omosarambíta oparupiete peteĩ invitasión espesiál!
1 Og̃uahẽvo amo nórtepe pe primavéra 2006, ha opa peve asambléa de distritokuéra, ko múndo tuichakue javeve hetápe ñamomarandúta oĩtaha asambléa de distríto, ojejapótava 155 tetãme rupi. Oñemomarandúta avei umi asambléa espesiál oikótava Alemania, República Checa ha Polóniape, julio ha agosto 2006-pe.
2 Opapotaitéma koʼã ára paha. Upévare koʼã asambléa, ohechaukátava Ñandejára ñanemosãsotaha ko múndo vaígui, oipytyvõne katuete umi tapicha ipyʼaporãvape. Pe marandu oñemeʼẽtava ikatu omokyreʼỹ chupekuéra ojepyʼamongeta hag̃ua umi mbaʼe ñahaʼarõvare. Ikatu hag̃uáicha hetaiterei tapicha ohendu pe marandu omeʼẽva pyʼaguapy ha esperánsa, enterovete umi 98.000 kongregasiónpe oñemokyreʼỹ osẽ hag̃ua omosarambi pe invitasión ojeho hag̃ua pe asambléa pe kongregasión ohotahápe.
3 Oñemondóta kongregasionkuérape umi invitasión ojeporútava ohupyty hag̃uáicha 50 káda puvlikadórpe. Hembýramo ikatu oñemeʼẽ umi precursor-pe. Káda kongregasión oñepyrũta omosarambi umi invitasión tres semána oñepyrũ mboyve pe asambléa haʼekuéra ohotahápe. Ikatúramo, oñembaʼapopaitevaʼerã pe território pe invitasión reheve.
4 Ikatúma guive oñemeʼẽvaʼerã ko invitasión óga jaraitépe. Ndaipóriramo óga jára katu ojehejakuaa okẽ guýpe. Ñañehaʼãvaʼerã ñameʼẽmbaite umi invitasión opa mboyve umi tres semána.
5 Rojeroviaiterei iporãtaha ko tembiapo ojejapótava opárupi oñemomarandu hag̃ua ñane Asambléa de Distríto “Koʼẽrõitéma ñanesãsóta!”. Rojerure Jehovápe penevendesi hag̃ua peñehaʼãhaguére pejapo ko tembiapo.