‘Jaikuaauka porãkena opárupi pe marandu porã’

1. Mbaʼeichagua notísia porãpa ñamombeʼuse ñande rapichakuérape?

¹ Ko múndope henyhẽte umi notísia vai. Upévare, tuichaiterei mbaʼe ñandéve g̃uarã ‘jaikuaauka porã opárupi pe marandu porã’ (Hech. 20:24). Ñande ningo ñamombeʼuse ñande rapichakuérape koʼẽrõitéma og̃uahẽtaha huʼãme koʼã ára paha, ha Jehová omoĩtaha pe múndo pyahu oprometevaʼekue. Ha upépe ikatútama jaʼe: “Opa oĩvaʼekue yma niko ndaiporivéima” (2 Tim. 3:​1-5; Rev. 21:4). Ñamombeʼuse chupekuéra koʼã mbaʼe: upépe ndaiporimoʼãveimaha hasykatúva (Isa. 33:24), Ñandejára omoingove jeytaha umi omanovaʼekuépe ojotopa hag̃ua ifamília ha iñamigokuéra ndive (Juan 5:​28, 29), ko Yvy tuichakuégui oikotaha peteĩ hardín neporãva (Isa. 65:​21-23), ha hetave notísia porã!

2. Mbaʼérepa ikatúta hetápe ñamombeʼu umi notísia porã Conmemoración tiémpope?

² Ikatúta hetápe ñamombeʼu umi notísia porã ág̃a marzo, abril ha máyope. Koʼã méspe ningo tiémpo porãve ha arakue pukuve. Upéicha rupi ikatúta hetave óra japredika. Avei, pe Conmemoración ningo hoʼáta sábado 22 de marzo, Kuarahy oike rire, ha upéva hína pe día iñimportantevéva. Upévare, koʼág̃ama ñañepyrũvaʼerã jajeprepara ñasẽve hag̃ua japredika.

3. Mbaʼépa oipytyvõta ñane famíliape osẽve hag̃ua opredika?

³ Precursorado auxiliar. Ikatúpa ñamohenda ñane tiémpo jajapo hag̃ua precursorado auxiliar un més jepe térã umi tres méses voi? Mbaʼérepa nañañeʼẽi ko mbaʼére jastudia vove ñane família ndive? Ñañopytyvõmbáramo, ikatuhína peteĩ térã hetave voi ñande apytépe ojapo prekursorádo (Pro. 15:22). Ñañemboʼevaʼerã Jehovápe upévare, ha jahecháta haʼe ñanevendesiha ñañehaʼãhaguére (Pro. 16:3). Ha ndaikatúiramo jepe jajapo prekursorádo ñande ni ñande rogayguakuéra, enterove ikatu ñañehaʼã ñasẽve japredika ha ñamoirũ umi ermáno ojapóvape iprekursorádo.

4. Mbaʼéichapa ikatu jajapo ñande precursorado auxiliar ñambaʼapóramo jepe un diaite?

⁴ Ha ñambaʼapóramo jepe un diaite, ikatúnte avei jajapo ñande precursorado auxiliar. Upearã, ñamohenda porãnte vaʼerã ñane tiémpo. Ikatu ningo japredika asajekue ojepytuʼu jave, térã jajerure peteĩ território personál hiʼag̃uíva ñande travahohágui térã ñande rógagui. Ikatu avei japredika una óra jepe jaike mboyve ñande travahohápe térã japoi rire. Ñane tiempove hag̃ua ningo ikatu ñambotapykue umi mbaʼe natekotevẽtereíriva, térã ñasẽ un diaite japredika sábado ha domingokue. Oĩ avei umi ojeruréva vakasión uno térã dos día opredika hag̃ua.

5. Mbaʼéichapa ikatu ñaipytyvõ umi ermáno ijedámavape térã hasykatúvape ojapo hag̃ua precursorado auxiliar?

⁵ Ndépa ndetuja térã neg̃uaig̃uíma, nderasykatu térã ndepilaʼireína? Ikatu avei rejapo prekursorádo sapyʼami jepe resẽramo repredika káda día. Rejerurevaʼerã Jehovápe tomeʼẽ ndéve ipuʼaka (2 Cor. 4:7). Peteĩ ermána orekóva 106 áño ningo ojapomi iprekursorádo! Chupe oipytyvõ ihentekuéra testígova ha ambue ermanokuéra kongregasionpegua. Upéicha rupi osẽ opredika, ojapo rrevisíta, estúdio ha hetave mbaʼe. Diez estúdio voi katu omoñepyrũmi. Haʼe heʼi: “Tuichaiterei mbaʼe ningo chéve g̃uarã ajapo precursorado auxiliar. Apensáramo upévare añandu che pyʼaite guive ahayhu ha amombaʼeha Jehovápe, Itaʼýra ha iñorganisasiónpe. Aagradese Jehovápe che pyʼaite guive.”

6. Mbaʼéichapa ikatu ojapo precursorado auxiliar umi ohóva gueteri eskuéla térã koléhiope?

⁶ Ha oiméramo rejevautisáma péro reho gueteri eskuéla térã koléhiope, ikatu avei rejapo nde precursorado auxiliar. Umi ombaʼapóva un diaite ojapoháicha avei, ikatu remohenda ne tiémpo repredika hag̃ua sábado ha domingokue, ha resẽkuaa avei una óra jepe ótro día. Oĩtapa feriádo nde eskuélape resẽ hag̃ua repredika upe díape? Rejaposéramo precursorado auxiliar, iporãta reñeʼẽramo nde sy ha nde ru ndive upévare.

7. Mbaʼépa ikatu ojapo ansianokuéra oporomokyreʼỹ hag̃ua predikasionrã Conmemoración tiémpope?

⁷ Ñaporomokyreʼỹkena. Ansianokuéra ningo omokyreʼỹ kongregasiónpe ojapóva rupive (1 Ped. 5:​2, 3). Haʼekuéra ikatu ohecha ojejapove hag̃ua umi rreunión predikasionrã pyharevete, umi voi osẽkuaátavape g̃uarã, ha ikatu ohecha avei ojejapo hag̃ua kaʼaruete umi opyta porãtavape g̃uarã eskuélagui osẽ rire térã opoi rire itravahohágui. Pe superintendénte de servísio ojerurevaʼerã umi ermáno ikatupyrývape omoakã hag̃ua umi rreunión predikasionrã. Avei ohechavaʼerã ani ofalta território, rrevísta ha ambue puvlikasionkuéra koʼã més oñembaʼapovetahápe predikasiónpe.

8. Mbaʼépa ñanemboʼe peteĩ kongregasiónpe ojejapovaʼekue?

⁸ Peteĩ kongregasionpegua ansianokuéra are og̃uahẽ mboyve pe Conmemoración, omokyreʼỹma ermanokuérape ojapo hag̃ua precursorado auxiliar. Ha káda semána omombeʼu hikuái rreunionhápe mboy prekursór pyahúmapa oĩhína. Upéicha umi ermáno ombaʼaposevevaʼekue predikasiónpe ohechakuaa oĩtaha omoirũva chupekuéra. Umi ansiáno ohecha avei ojejapove hag̃ua rreunión predikasionrã pyharevete ha kaʼaruete. Umícha ojapohaguére, 53 precursor auxiliar oreko hikuái abrílpe. Haimete a la mita upe kongregasiónpe oĩva ermanokuéra!

9. Mbaʼérepa opyta porãta pe Conmemoración tiémpope opredika ñepyrũ hag̃ua ñane família térã ñane estudiánte?

⁹ Ñaipytyvõkena ñande rapichakuérape opredika hag̃ua. Umi ipyahúva ha ermanokuéra família ikatúmavape opredika, oñemondokuaa opredika hag̃ua umi ikatupyryvémava ndive. Ha upearã opyta porãitereitahína pe Conmemoración tiémpo. Upe jave ningo heta ermáno osẽvetahína opredika. Oĩpa ñane estudiánte oñakãrapuʼã porãva hína ha oikómava Jehová oipotaháicha? Ñane familiakuérapa iñeʼẽrendu ha oñehaʼãhína oservi Jehovápe ndahaʼéiramo jepe puvlikadór? Ha haʼekuéra heʼíramo opredikasemaha ha jahechakuaáramo ikatumaha osẽ opredika ojevautisaʼỹre, ñañeʼẽvaʼerã peteĩ ansiáno ndive. Pe superintendénte presidénte ojeruréta mokõi ansiánope ohecha hag̃ua ñanendive ha ñane família térã ñane estudiánte ndive ikatútamapa osẽ opredika.

10. Mbaʼépa ikatu ojapo ansianokuéra oipytyvõ hag̃ua umi aréma ndopredikavéivape?

¹⁰ Umi més oúvape opyta porãta avei ñaipytyvõ hag̃ua umi aréma ndopredikavéivape osẽ jey hag̃ua opredika. Umi omoakãva estúdio de Lívro ha ambue ansianokuéra oñehaʼãmbaitéta ovisita ha oinvita chupekuéra osẽ hag̃ua opredika hendivekuéra. Oĩramo peteĩ aretereíma nosẽvéiva opredika, mokõi ansiáno oñeʼẽ raẽta hendive ohecha hag̃ua oĩpa osẽ hag̃uáicha (km 11/00 páh. 3).

11. Mbaʼéichapa Ñandejára ohechaukavaʼekue ñanderayhuetereiha?

¹¹ Jajepreparákena Conmemoracionrã. Ñandejára ningo omeʼẽvaʼekue Itaʼýra ñanderehehápe ha upéicha ohechauka mbaʼeichaitépa ñanderayhu (Hech. 20:24). Pe sábado 22 de marzo Kuarahy oike rire, hetaiterei tapicha oparupigua oñembyatýta imanduʼa hag̃ua Jesucristo ñemanóre. Ha ñande ningo ñainvitase enterove ipyʼaporãvape oho hag̃ua ohendu mbaʼeichaitépa Jehová ñanderayhu.

12. Máva mávapepa ñainvitavaʼerã Conmemoracionrã?

¹² Ñaanotákena peteĩ kuatiáre máva mávapepa ñainvitase. Ñamoĩkena ñainvita hag̃ua ñane hentekuéra, vesíno, ñaneirũ ñande travahohapegua térã eskuelapegua, umi ostudiavaʼekue ha ostudiavahína la Biblia ñanendive ha oimeraẽ tapicha javisita pyʼỹivape. Oĩramo oikuaasevéva mbaʼépa hína pe Conmemoración, jaiporukuaa pe informasión oĩvéva páhina 206 guive 208 peve lívro Mbaʼépa omboʼe la Biblia? oñeʼẽva Cena del Señor rehe. Upéicha jajapóramo ikatu hína ñamoñepyrũ peteĩ estúdio, jahechauka rupi chupe pe lívro jaiporúva ñaporomboʼe hag̃ua la Biblia.

13. Mbaʼéichapa Jehová ovendesi mokõi ermáno oñehaʼãvaʼekuépe oporoinvita Conmemorasionrã?

¹³ Peteĩ ermána oanotavaʼekue 48 família oinvita hag̃ua. Ha oinvita jave peteĩme, omarkáma héra ha omoĩ ijykére arakaʼépa oinvita chupe. Ovyʼaitereíningo ouhaguére Conmemoracionhápe 26 umi oinvitavaʼekue! Peteĩ ermáno ndive ombaʼapo peteĩ karai saserdotevaʼekue, ha oinvita chupe. Ha oho rire Conmemoracionhápe heʼi: “Hetave mbaʼe aikuaa la Bíbliagui una órape ambojojáramo umi treinta áño ahasavaʼekuére Iglesia Católicape”. Upe riremínte oñepyrũma ostudia pe lívro Mbaʼépa omboʼe la Biblia?

14. Mbaʼépa jajapóta 1 de marzo guive?

¹⁴ Ñainvitáta opavave ñande rapichakuérape. Sábado 1 de marzo guive 22 de marzo peve ñameʼẽta peteĩ invitasión iporãitereíva opárupi ko Yvy ape ári. Ajépa enterovete ñasẽta upépe ñaporoinvita hag̃ua. Ñanemanduʼavaʼerã iporãvetaha ñameʼẽ ñande rapichápe ipópe voi pe invitasión jahejarangue hóga renondépente. Péro ñane kongregasión tuichaitereíramo iterritório, umi ansiáno ikatu heʼi jahejántema hag̃ua umi invitasión oĩ porãtahápe ndaipóriramo umi óga jára. Sábado ha domingokue katu ñaikuaveʼẽta avei ñande rrevistakuéra.

15. Mbaʼépa ikatu jaʼe ñameʼẽ hag̃ua pe invitasión Conmemoracionhápe g̃uarã?

¹⁵ Ha ndaipukumoʼãi rupi ko tembiapo, mbykymínte ñañeʼẽvaʼerã ñag̃uahẽhápe, ha ñanderoryntevaʼerã avei. Ikatu ningo jaʼe kóicha: “Romeʼẽsetereíningo ndéve, ne família ha ne amigokuérape ko invitasión pehomi hag̃ua peteĩ rreunión iñimportantetereívape ág̃a 22 de marzo. Kóva hína nembaʼerã. Koʼápe oñeñeʼẽvehína upévare”. Ikatu hína oĩ ombaʼeporandúva ñandéve; oĩta avei umi ojagarráva pe invitasión ha heʼíva ohotaha. Aníkena ñanderesarái ñaanota hag̃ua mbaʼéichapa héra, moõpa oiko, ha jaʼékena chupekuéra jaha jeytaha.

16. Mbaʼe oikovaʼekuépa ohechauka iñimportanteha ñaporoinvita Conmemoracionrã?

¹⁶ Pe áño ohasavaʼekuépe, peteĩ soldádo otopa hokẽme peteĩ invitasión oho hag̃ua Conmemoracionhápe. Haʼe ohose, péro ojerure raẽ vaʼerã permíso huvichápe. Upe mburuvicha ohechávo pe invitasión, okirirĩnte. Upe rire heʼi ituvakuéra Testigoha, ha haʼe ohomihague hendivekuéra rreunionhápe. Upémaramo ndahaʼéi omeʼẽnteva permíso upe soldádope, oho voi katu hendive Conmemoracionhápe.

17. Mbaʼéichapa ikatu jahechauka akóinte jajaposeha Ñandejára heʼíva?

¹⁷ Jahechaukákena ñamombaʼeha. Hiʼag̃uivévo pe Conmemoración 2008-pegua, tekotevẽ enterovete jajepyʼamongeta mbaʼeichaitépa Jehová ñanderayhu. Pe apóstol Pablo ohaivaʼekue: ‘Rojerure peẽme ani hag̃ua pembohasa rei upe pyʼaporã Ñandejára ohechaukavaʼekue’ (2 Cor. 6:1). Ñande ningo akóinte jajapose Ñandejára heʼíva, péro mbaʼéichapa jahechaukáta jajaposeha upéicha? Apóstol Pablo heʼi: ‘Jahechauka opa mbaʼépe, ñande Ñandejára rembiguaiha’ (2 Cor. 6:4). Añetehápe ningo, jajeporta porã ha japredika kyreʼỹramo pe marandu porã, jahechaukáta ñamombaʼeha Jehová omeʼẽva ñandéve. Ha Conmemoración tiémpope ikatúta ñasẽve japredika.

[Rrekuádro oĩva páhina 3-pe]

Máva mávapa ikatúta ojapo precursorado auxiliar?

◼ Umi sy, túva ha ifamiliakuéra

◼ Umi ombaʼapóva un diaite

◼ Umi ijedámava ha umi hasykatúva

◼ Umi oikéva gueteri eskuéla térã koléhiope

[Rrekuádro oĩva páhina 4-pe]

Ñaporoinvita vove Conmemoracionrã:

◼ Nañandeʼaréi ha ñanderoryvaʼerã

◼ Ñaanotavaʼerã mbaʼéichapa héra ha moõpa oiko umi oikuaasevéva Ñandejárape jaha jey hag̃ua

◼ Ñaikuaveʼẽvaʼerã ñande rrevistakuéra sábado ha domingokue