Ñamombaʼékena pe sakrifísio ojejapovaʼekue ñanderehehápe
1, 2. Mbaʼe mbaʼérepa ñamombaʼevaʼerã pe sakrifísio?
1 Ñaneñeʼẽrendu rupi, oparupigua kristianokuéra ñañembyatýta ág̃a sábado 22 de marzo de 2008, Kuarahy oike rire ñanemanduʼa hag̃ua Jesús omanohague ñanderehehápe (Luc. 22:19; 1 Cor. 11:23-26). Jajapóta upéva ñamombaʼégui opa mbaʼe jahupytýva upe sakrifísio rupive, ha ohasáma 1.975 áño ojejapohague. Jesús ningo nomboykeivaʼekue ijerovia ohasa asýrõ guare. Ha péicha omombaʼeguasu Itúva réra ha ombohovái umi mbaʼe vai Satanás heʼivaʼekue (Job 1:11; Pro. 27:11).
2 Ha oñohẽ rupi huguy ñanderehehápe ojejapo peteĩ kompromíso pyahu Ñandejára ndive. Upéicha rupi, yvyporakuéragui ikatu oiko Ñandejára raʼy ha ogoverna yvágape Jesucristo ndive (Jer. 31:31-34; Mar. 14:24). Ko sakrifísio ohechaukavaʼekue mbaʼeichaitépa Jehová ñanderayhu, heʼimahaguéicha voi Jesús Nicodémope (Juan 3:16).
3. Mbaʼéichapa ñanepytyvõta jaháramo Conmemoracionhápe?
3 Ñaporoinvitákena. Ñane Rembiapo Rréino Rehegua enérope guare heʼi ñandéve ñaanota hag̃ua peteĩ lístape mávapepa ñainvitase Conmemoracionrã. Ñañepyrũmapa ñainvita chupekuéra? Jaikuaa avei ág̃a 1 de marzo guive ñasẽtaha ñainvita umi hénte ñande territóriope oikóvape. Jahechámapa avei ñande arakaʼépa ñasẽta? Ñanemanduʼavaʼerã upe atýpe ojeʼétava oñeguenohẽha Ñandejára Ñeʼẽgui ha upéva omombaretéta ñande jerovia Jesús sakrifísiore, ha upéicha ikatúta jaikove opa ára g̃uarã (Rom. 10:17).
4. Mbaʼérepa iporãta ñag̃uahẽ voimi Conmemoracionhápe?
4 Ikatúma guive, jaha voimi vaʼerã Salónpe jarresivi hag̃ua umi ñainvitavaʼekuépe. Hetaiterei ningo ojeho jepi Conmemoracionhápe. Upévare ñañangarekovaʼerã umi ohoramóvare, ha avei umi sapyʼapyʼánte ohóvare rreunionhápe.
5. Mbaʼéichapa ikatu jarekóma ñandepyʼapýpe pe Conmemoración ára?
5 Jarekomavaʼerã ñandepyʼapýpe. Folléto Examinando las Escrituras diariamente ha kalendário 2008-peguápe ohechauka ñandéve mbaʼépa jaleevaʼerã 17 de marzo guive. Kóicha ñanemanduʼa jeýta umi mbaʼe Jesús ohasavaʼekuére omano mboyve. Ñañemboʼe ha jajepyʼamongetáramo koʼã mbaʼére jarekótama ñandepyʼapýpe pe Conmemoración ára. Upéicha ñamombaʼevéta Jehová ha Itaʼýra ojapovaʼekue ñanderayhupápe (Esd. 7:10; Sal. 143:5).
6. Mbaʼépa jahupytýta ñanemanduʼa ha ñamombaʼéramo Jehová ha Jesús ojapovaʼekue ñanderehehápe?
6 Hiʼag̃uimbaitéma rupi pe Conmemoración, oimevaʼerã ñañembosakoʼimañaína upearã. Ñaipytyvõse avei ñande rapichakuérape oho hag̃ua. Ñanemanduʼa ha ñamombaʼéramo Jehová ha Jesús ojapovaʼekue ñanderehehápe, ñañemoag̃uivéta hesekuéra (2 Cor. 5:14, 15). Avei, jahayhúta ñande rapichápe Jehová ha Jesús ñanderayhuhaguéicha (1 Juan 4:11).