Cinco mbaʼe ñanepytyvõtava ñakonsegi hag̃ua estúdio vívliko
1. ¿Mbaʼépa jajapovaʼerã ndajajuhúiramo peteĩ ostudiaséva la Biblia, ha mbaʼérepa?
1 ¿Ijetuʼúpa ndéve rejuhu hag̃ua peteĩ ostudiaséva la Biblia? Oiméramo upéicha ani reñentrega, resegivaʼerã guei reheka. Jehová ningo ohovasa umi akóinte oñehaʼãvape ojapo hag̃ua hembipota (Gál. 6:9). Koʼág̃a jahecháta cinco mbaʼe katuete ñanepytyvõtava ñakonsegi hag̃ua estúdio vívliko.
2. ¿Mbaʼéichapa ikatu ñamoñepyrũ estúdio vívliko ñañemongeta ypy guive pe ogajárandi?
2 Eikuaveʼẽ reñemongeta ypy guive. Heta oĩ oikuaáva ñaikuaveʼẽha umi rrevísta Ñemañaha ha ¡Despertad!, péro ndoikuaái ñande ñambostudiaha avei umi héntepe. Upévare ág̃a resẽ jey vove repredika ogahárupi, ¿mbaʼépa ere reporandúramo pe ogajárape ndostudiaséipa la Biblia reñemongeta ypy guive hendive? Eikuaveʼẽkena avei umi hénte revisitávape jepi. Ha heʼíramo jepe ndéve ndostudiaseiha, resegintevaʼerã regueraha chupekuéra umi puvlikasión ha eñemongeta meme hendivekuéra umi mbaʼe oikuaasévare la Bíbliagui. Heta áñore peteĩ ermáno oguerahavaʼekue umi rrevísta peteĩ paréhape, ha peteĩ jey ohórõ guare ontrega hag̃ua chupekuéra umi osẽ ramovéva, ojedespedi mboyve oñantoha chupe oporandu chupekuéra: “¿Ndapestudiaséi piko la Biblia?”. Ko ermáno ni noimoʼãi haʼekuéra heʼitaha chupe ostudiaseha, ha koʼág̃a mokõivéva ojevautisáma.
3. ¿Mbaʼérepa nañapensaivaʼerã umi ohóva guive rreunionhápe ostudiamaha la Biblia?
3 Ñañemongeta umi ohóvandi Salón del Réinope. Ani repensa umi ohóva guive rreunionhápe ostudiaha la Biblia. Peteĩ ermáno omombeʼu: “Umi estudiánte arekóvagui, alamita rasa akonsegi rreunionhápe”. Peteĩ kuñakarai hiʼotĩetereíva katu quince áño pukukue oho meme rreunionhápe imembykuñanguéra ojevautisáma vaʼekuéndi. Haʼe ningo og̃uahẽ oñepyrũvo pe rreunión ha opáre oho jeýma. Peteĩ jey peteĩ ermána oporandu chupe ndostudiaséipa la Biblia. Ko kuñakarai oñepyrũ ostudia ha tiémpo rire ojevautisa. Pe ermána heʼi: “¡Ambyasyete piko ahaʼarõ haguére quince áño haʼe hag̃ua chupe ndostudaiséipa la Biblia!”.
4. ¿Máva mávapepa ikatu reporandu rekonsegi hag̃ua nde estudiorã?
4 Eporandu ótrope. Peteĩ ermána ojepokuaa omoirũ umi ohóvape ojapo ijestúdio, ha oterminávo hikuái oporandu jepi umi estudiántepe sapyʼareípa ndoikuaái ótro ostudiaséva la Biblia. Péro upe mboyve ojerure permíso pe omboʼévape chupekuéra. Avei oiméramo javisita hína umi ohejáma vaʼekuépe pe lívro Mbaʼépa omboʼe la Biblia?, ñaporandukuaa chupekuéra ndoikuaáipa ótro ikatúva oipota avei pe lívro. Heta vése oĩ avei maranduhára térã prekúrsor ndaikatuvéimava ombostudia peteĩ oikuaasévape la Bíbliagui. ¿Mbaʼérepa nereporandúi ndoipotáipa reipytyvõ chupekuéra?
5. ¿Mbaʼérepa iporãta ñaporandúramo umi ména térã tembireko ndahaʼéivape Testígo ndostudiaséipa la Biblia?
5 Eñemongeta umi ména térã tembireko ndahaʼéivandi Testígo. ¿Oĩpa ne kongregasiónpe maranduhára iména térã hembireko ndahaʼéiva Testígo? Hetápe ningo ndogustái iména térã hembireko opredika chupe, péro naiprovlemaiete ostudia hag̃ua ótrondi. Péro oiméramo ñañemongetase hendivekuéra iporãvéta ñaporandu raẽramo pe ermáno térã ermánape arakaʼe ha mbaʼéichapa ikatu jajapo upéva.
6. ¿Mbaʼérepa iñimportanteterei ñañemboʼe jatopa hag̃ua peteĩ ostudiaséva la Biblia?
6 Ejerure Jehovápe tanepytyvõ. Aníkena arakaʼeve repensa reñemboʼe reiha Jehovápe (Sant. 5:16). Haʼe opromete ohendutaha umi mbaʼe jajerure asýva chupe haʼéma guive hembipota (1 Juan 5:14). Peteĩ ermáno hembiapoitereíva ojerure Jehovápe toipytyvõmi chupe okonsegi hag̃ua peteĩ estúdio. Hembirekópe katu oipyʼapy iména naitiémpoiramo g̃uarã oñatende hag̃ua iñestudiántere, koʼýte pe tapicha iprovléma hetáramo. Upévare omombeʼu Jehovápe oipyʼapýva chupe. Ha dos semána haguépe haʼekuéra ohechakuaa Jehová ohendu hague iñemboʼe, peteĩ prekursóra ojerurérõ guare pe ermánope ombostudia hag̃ua peteĩ karai oikuaasévape la Bíbliagui. Upéicha rupi ko ermáno rembireko heʼi: “Umi opensávape ndaikatumoʼãiha ojapo estúdio amokyreʼỹ ani hag̃ua ikaneʼõ ojerure hag̃ua Jehovápe okonsegiseha ijestudiorã. Ore ni noroimoʼãi peichaite peve rovyʼáta hague”. Nereñentregáiramo, nde avei ikatu retopa peteĩ ostudiaséva la Biblia ha revyʼaitereíta reipytyvõ haguére chupe oguata hag̃ua “pe tape oporogueraháva jeikove opaveʼỹvape” (Mat. 7:13, 14).