“Gbigbọ po Asiyọyọ po Sọ to Didọ Mapote Dọmọ: ‘Wá!’”
“Gbigbọ po asiyọyọ po sọ to didọ mapote dọmọ: ‘Wá!’ . . . Podọ gbọ mẹdepope he nugbla to hùhù ni wá; gbọ mẹdepope he jlo ni yí osin ogbẹ̀ tọn vọnu.”—OSỌ. 22:17.
1, 2. Otẹn tẹ mẹ wẹ Ahọluduta lọ dona tin te to gbẹzan mítọn mẹ, podọ etẹwutu?
OTẸN tẹ mẹ wẹ Ahọluduta lọ dona tin te to gbẹzan mítọn mẹ? Jesu dotuhomẹna hodotọ etọn lẹ nado ‘to ahọluduta lọ dín whẹ́,’ bo hẹn yé deji dọ eyin yé wàmọ, Jiwheyẹwhe na na yé nuhe yé tindo nuhudo etọn lẹ. (Mat. 6:25-33) E yí Ahọluduta Jiwheyẹwhe tọn jlẹdo peali he họakuẹ taun de go bọ to whenuena ajọwatọ de mọ ẹn e “sà nuhe e tindo lẹpo bosọ họ̀ ẹ.” (Mat. 13:45, 46) Be e ma jẹ dọ mí ni ze azọ́n yẹwhehodidọ Ahọluduta tọn lọ po mẹhẹnzun devi po tọn lọ do otẹn tintan mẹ ya?
2 Dile mí mọ to hosọ awe he jẹnukọn lẹ mẹ do, eyin mí nọ dọho po adọgbigbo po bo nọ yí Ohó Jiwheyẹwhe tọn zan po azọ́nyinyọnẹn po to lizọnyizọn lọ mẹ, ehe nọ dohia dọ gbigbọ Jiwheyẹwhe tọn to anadena mí. Gbigbọ enẹ sọ nọ yí adà titengbe de wà dile mí to mahẹ gbesisọ tọn tindo to azọ́n yẹwhehodidọ Ahọluduta tọn lọ mẹ. Mì gbọ mí ni pọ́n lehe e nọ wàmọ do.
Mẹlẹpo Wẹ Yin Oylọ-Basina!
3. Osin wunmẹ tẹ kọ̀n wẹ gbẹtọ lẹpo yin oylọ-basina nado “wá”?
3 Gbigbọ wiwe to oylọ de basi na mẹlẹpo. (Hia Osọhia 22:17.) Oylọ lọ wẹ nado “wá” bo nù osin vonọtaun de nado gbọ nugbla. E ma yin osin he mí nọ nù to paa mẹ gba. Dile etlẹ yindọ osin yin dandannu nado hẹn ogbẹ̀ dote to aigba ji, osin wunmẹ devo wẹ Jesu tindo to ayiha mẹ to whenuena e dọna yọnnu Samalianu de to dotọ̀ kọ̀n dọmọ: “Nugbla ma na hù mẹdepope he nù sọn osin he yẹn na na ẹn lọ mẹ gbede ba, ṣigba osin he yẹn na na ẹn lọ na lẹzun asisa osin tọn de to ewọ mẹ he na to sisà jẹgbonu nado namẹ ogbẹ̀ madopodo.” (Joh. 4:14) Osin vonọtaun he gbẹtọvi lẹ yin oylọ-basina nado wá nù lọ nọ namẹ ogbẹ̀ madopodo.
4. Naegbọn osin ogbẹ̀ tọn lẹzun dandannu, podọ etẹwẹ osin enẹ nọtena?
4 Osin vonọtaun ehe lẹzun dandannu to whenuena sunnu tintan lọ Adam, kọnawudopọ hẹ asi etọn, Evi, nado vẹtolina Mẹdatọ yetọn—Jehovah Jiwheyẹwhe. (Gẹn. 2:16, 17; 3:1-6) Asu po asi po tintan lọ yin yinyan sọn owhé whanpẹnọ yetọn gbè na Adam “nikaa de alọ etọn jẹgbonu bo yí to atin ogbẹ̀ tọn mẹ ga, bo dù bosọ nọgbẹ̀ kakadoi.” (Gẹn. 3:22) Taidi tọgbo gbẹtọvi lẹpo tọn, Adam hẹn okú wá whẹndo gbẹtọvi lẹpo tọn ji to godo mẹ. (Lom. 5:12) Osin ogbẹ̀ tọn lọ nọtena nuhe Jiwheyẹwhe wleawudaina lẹpo nado tún gbẹtọvi tonusetọ lẹ dote sọn ylando po okú po si bo na yé ogbẹ̀ madopodo to Paladisi mẹ to aigba ji. Avọ́sinsan ofligọ Jesu Klisti tọn wẹ hẹn awuwledainanu ehelẹ yọnbasi.—Mat. 20:28; Joh. 3:16; 1 Joh. 4:9, 10.
5. Mẹnu dè wẹ oylọ-basinamẹ lọ nado wá “yí osin ogbẹ̀ tọn vọnu” wá sọn? Basi zẹẹmẹ.
5 Mẹnu dè wẹ oylọ-basinamẹ lọ nado wá “yí osin ogbẹ̀ tọn vọnu” wá sọn? Eyin awuwledainanu he na hẹn ogbẹ̀ yọnbasi gbọn Jesu gblamẹ lẹ wá tin-to-aimẹ to gigọ́ mẹ to Gandudu Owhe Fọtọ́n Klisti tọn whenu, yé na taidi ‘tọ̀sisa osin ogbẹ̀ tọn de he wé taidi klistali.’ Tọ̀sisa enẹ “to sisà jẹgbonu sọn ofìn Jiwheyẹwhe tọn po Lẹngbọvu lọ tọn po kọ̀n.” (Osọ. 22:1) Enẹwutu, Jehovah Gbẹ̀namẹtọ lọ wẹ Asisa osin he nọ namẹ ogbẹ̀ lọ tọn. (Ps. 36:9) Ewọ wẹ nọ hẹn osin enẹ tin-to-aimẹ gbọn ‘Lẹngbọvu lọ,’ Jesu Klisti gblamẹ. (Joh. 1:29) Tọ̀sisa yẹhiadonu tọn ehe wẹ Jehovah na yizan nado vọ́ nuhe tolivivẹ Adam tọn hẹngble to gbẹtọvi go lẹpo jlado. Mọwẹ, Jehovah Jiwheyẹwhe dè wẹ oylọ-basinamẹ lọ nado wá “yí osin ogbẹ̀ tọn vọnu” wá sọn.
6. Whetẹnu wẹ “tọ̀sisa osin ogbẹ̀ tọn” jẹ sisà ji?
6 Dile etlẹ yindọ “tọ̀sisa osin ogbẹ̀ tọn” na sà to gigọ́ mẹ to Gandudu Owhe Fọtọ́n Klisti tọn whenu, e ko jẹ sisà ji sọn “azán Oklunọ tọn gbè,” he bẹjẹeji to whenue ‘Lẹngbọvu lọ’ hẹ ofìn ji to olọn mẹ to 1914. (Osọ. 1:10) To enẹgodo, awuwledainanu he na gọalọnamẹ nado mọ ogbẹ̀ delẹ wá tin-to-aimẹ. Ehelẹ sinai do Ohó Jiwheyẹwhe tọn, Biblu ji, na owẹ̀n etọn yin alọdlẹndo taidi “osin.” (Efe. 5:26) Mẹlẹpo wẹ yin oylọ-basina nado wá “yí osin ogbẹ̀ tọn”—enẹ wẹ nado wá sè wẹndagbe Ahọluduta lọ tọn bo kẹalọyi i. Ṣigba, mẹnu lẹ na taun tọn wẹ to oylọ enẹ basinamẹ to azán Oklunọ tọn gbè?
“Asiyọyọ” Dọmọ: “Wá!”
7. (a) Mẹnu lẹ wẹ omẹ tintan he tindo lẹblanulọkẹyi lọ nado basi oylọnamẹ dọ “wá” to “azán Oklunọ tọn” gbè? (b) Mẹnu lẹ wẹ yé to oylọ-basina?
7 Hagbẹ asiyọyọ lọ tọn lẹ—yèdọ Klistiani yí gbigbọ do de lẹ—wẹ yin omẹ tintan he tindo lẹblanulọkẹyi lọ nado basi oylọna mẹdevo lẹ dọ “wá.” Mẹnu lẹ wẹ yé to oylọ-basina? Mẹhe tindo todido nado dugu ogbẹ̀ madopodo tọn to aigba ji to whenue “awhàn azán daho Jiwheyẹwhe Ganhunupotọ lọ tọn” na ko yin fùnfùn godo lẹ wẹ yé to oylọ-basina.—Hia Osọhia 16:14, 16.
8. Etẹwẹ dohia dọ Klistiani yiamisisadode lẹ ko to oylọ he wá sọn Jehovah dè basi na mẹdevo lẹ sọn 1918 gbọ́n?
8 Sọn 1918 gbọ́n wẹ hodotọ yiamisisadode Klisti tọn lẹ ko to oylọ lọ basi na mẹdevo lẹ. To owhe enẹ mẹ, togunmẹho he hosọ etọn yin “Livi Susu He to Gbẹnọ Todin lẹ Ma Na Kú Gbede” ze todido lọ donukọnnamẹ dọ mẹsusu wẹ na nọgbẹ̀ to paladisi aigba ji tọn de mẹ to awhàn Amagẹdọni tọn godo. To 1922, hodidọ de yin nina to plidopọ Biblu Plọntọ lẹ tọn ji to Cedar Point, Ohio, États-Unis d’Amérique bo dotuhomẹna mẹplidopọ lẹ nado ‘lá Ahọlu lọ po ahọluduta etọn po.’ Tudohomẹnamẹ ehe gọalọna pipotọ hagbẹ asiyọyọ lọ tọn lẹ nado basi oylọ lọ na mẹsusu dogọ. To 1929, hosọ lọ “Oylọ Homẹdagbe Tọn” he yin zize sinai do Osọhia 22:17 ji sọawuhia to zinjẹgbonu Atọ̀họ̀-Nuhihọ́ lọ Tọn [Glẹnsigbe] 15 mars tọn mẹ. Apadewhe hosọ lọ tọn dọmọ: “Hagbẹ pipotọ nugbonọ lọ tọn lẹ kọnawudopọ [hẹ Gigogán lọ] to oylọ homẹdagbe tọn lọ mẹ bo dọmọ: ‘Wá.’ Owẹ̀n ehe dona yin lilá na enẹnọ lẹ he tindo ojlo na dodo po nugbo po. E dona yin lilá todin.” Hagbẹ asiyọyọ lọ tọn lẹ gbẹ́ pò to oylọ enẹ basinamẹ kakajẹ egbé.
“Gbọ Mẹdepope He to Sisè Ni Dọmọ: ‘Wá!’”
9, 10. Nawẹ mẹhe sè oylọ-basinamẹ lọ dọ “Wá!” lẹ lọsu yinuwa gbọn?
9 Etẹwẹ dogbọn mẹhe sè oylọ-basinamẹ lọ dọ “wá” lẹ dali? Yelọsu yin oylọ-basina nado dọ “Wá!” na mẹdevo lẹ. Di apajlẹ, zinjẹgbonu Atọ̀họ̀-Nuhihọ́ lọ Tọn [Glẹnsigbe] 1er août 1932 tọn dọ to weda 232 ji dọmọ: “Mì gbọ mẹyiamisisadode lẹ ni na tuli mẹlẹpo he tindo ojlo nado tindo mahẹ to wẹndagbe Ahọluduta lọ tọn didọ mẹ. Yé ma dona yin mẹyiamisisadode Oklunọ lọ tọn whẹpo do sọgan lá owẹ̀n Oklunọ tọn gba. Homẹmiọnnamẹnu daho wẹ e yin na Kunnudetọ Jehovah tọn lẹ nado yọnẹn todin dọ yé yin dotẹnmẹ jodona nado hẹn osin ogbẹ̀ tọn sọyi na hagbẹ gbẹtọ lẹ tọn he sọgan yin hinhẹn jugbọn Amagẹdọni mẹ bo yin nina ogbẹ̀ madopodo to aigba ji.”
10 Atọ̀họ̀-Nuhihọ́ lọ Tọn [Glẹnsigbe] 15 août 1934, weda 249, zinnudo azọngban mẹhe sè oylọ-basinamẹ lọ dọ “Wá!” lẹ tọn ji dọmọ: “Hagbẹ Jonadabi tọn lẹ dona yì po enẹnọ lẹ po he yin hagbẹ Jehu tọn lẹ, enẹ wẹ yin mẹyiamisisadode lẹ, bo lá owẹ̀n ahọluduta lọ tọn, eyin yé ma tlẹ yin kunnudetọ yiamisisadode Jehovah tọn lẹ.” To 1935, “gbẹtọ susugege” he yin nùdego to Osọhia 7:9-17 mẹ lọ wá họnwun hezeheze. Enẹ vọ́ nùzindo nujọnu-yinyin azọ́n oylọ-basinamẹ he mí mọyi sọn Jiwheyẹwhe dè lọ tọn ji. Sọn whenẹnu gbọ́n, gbẹtọ susugege lọ he sọha yetọn ko hugan livi ṣinawe todin ko kẹalọyi oylọ-basinamẹ enẹ. To whenue yé kẹalọyi owẹ̀n lọ, yé klan yede do wiwe na Jiwheyẹwhe, yí baptẹm, bo kọnawudopọ hẹ hagbẹ asiyọyọ lọ tọn lẹ to zohunhun yíyí do basi oylọna mẹdevo lẹ nado ‘wá nù osin ogbẹ̀ tọn vọnu’ mẹ.
“Gbigbọ” to Didọmọ, “Wá!”
11. Adà tẹwẹ gbigbọ wiwe yiwà to azọ́n yẹwhehodidọ tọn lọ mẹ to owhe kanweko tintan W.M.?
11 To whenuena Jesu to yẹwhehodọ to sinagọgu de mẹ to Nazalẹti, e hùn owe-hihá yẹwhegán Isaia tọn bo hia dọmọ: “Gbigbọ Jehovah tọn tin to oji e, na e ko yiamisisadode mi nado lá wẹndagbe na wamọnọ lẹ, ewọ do mi hlan nado dọyẹwheho tundote tọn hlan kanlinmọ lẹ podọ nukunnumimọ tọn hlan nukuntọ́nnọ lẹ, nado tún mẹhe yin kọgbidina lẹ dote, nado dọyẹwheho owhe alọkẹyi Jehovah tọn.” Enẹgodo, Jesu yí hogbe ehelẹ zan na ede bo dọmọ: “Egbehe wẹ adà Owe-wiwe tọn he mì ṣẹṣẹ sè ehe yin hinhẹndi.” (Luku 4:17-21) Whẹpo Jesu do hẹji yì olọn mẹ, e dọna devi etọn lẹ dọmọ: “Mì na mọ huhlọn yí to whenue gbigbọ wiwe na wá mì ji, podọ mìwlẹ na yin kunnudetọ ṣie . . . kaka yì awà he dẹn hugan aigba tọn lẹ ji.” (Owalọ 1:8) To owhe kanweko tintan whenu, gbigbọ wiwe yí adà tangan de wà to azọ́n yẹwhehodidọ tọn lọ mẹ.
12. Adà tẹwẹ gbigbọ wiwe Jiwheyẹwhe tọn nọ yiwà to oylọ-bibasina mẹdevo lẹ mẹ to egbehe?
12 Adà tẹwẹ gbigbọ wiwe Jiwheyẹwhe tọn nọ yiwà to oylọ-bibasina mẹdevo lẹ mẹ to egbehe? Jehovah wẹ Asisa gbigbọ wiwe tọn. E nọ yí gbigbọ enẹ zan nado hùn ahun po ayiha hagbẹ asiyọyọ lọ lẹ tọn po nado mọnukunnujẹ Ohó etọn, Biblu mẹ. Gbigbọ lọ nọ whàn yé nado basi oylọna mẹhe tindo todido nado nọgbẹ̀ kakadoi to Paladisi mẹ to aigba ji lẹ bosọ basi zẹẹmẹ nugbo Owe-wiwe tọn lẹ na yé. Etẹwẹ dogbọn mẹhe kẹalọyi oylọ-basinamẹ enẹ lẹ bo lẹzun devi Jesu Klisti tọn, bosọ nọ basi oylọ dopolọ na mẹdevo lẹ dali? Gbigbọ wiwe nọ yí adà de wà to whẹho yetọn mẹ ga. To whenuena e yindọ yé yí baptẹm ‘to oyín gbigbọ wiwe tọn mẹ,’ yé nọ yinuwa sọgbe hẹ anademẹ gbigbọ wiwe tọn bo nọ ganjẹ alọgọ etọn go. (Mat. 28:19) Sọ lẹnnupọndo owẹ̀n he mẹyiamisisadode lẹ nọ lá to pọmẹ hẹ gbẹtọ susugege he fọ́n bo to jijideji lọ ji. Biblu—yèdọ owe he yin kinkàn to anademẹ gbigbọ Jiwheyẹwhe tọn glọ mẹ wẹ owẹ̀n lọ wá sọn. Enẹwutu, gbigbọ wiwe wẹ nọ gọalọ nado hẹn oylọ-basinamẹ lọ jẹ mẹdevo lẹ dè. Na nugbo tọn, gbigbọ enẹ wẹ nọ deanana mí. Be enẹ ma dona whàn mí nado nọ yí whenu susu dogọ zan to azọ́n oylọ-basinamẹ tọn lọ mẹ ya?
Yé “to Didọ Mapote Dọmọ: ‘Wá!’”
13. Etẹwẹ hogbe lọ “gbigbọ po asiyọyọ po sọ to didọ mapote dọmọ: ‘Wá!’” zẹẹmẹdo?
13 “Gbigbọ po asiyọyọ po” ma nọ dọ “Wá!” poun gba. Hogbe dowhenu tọn he yin yiyizan tofi dlẹnalọdo nuyiwa he to nukọnzindo. Nuhe zọ́n niyẹn bọ Owe-Wiwe Glẹki Tọn lẹ—Lẹdogbedevomẹ Aihọn Yọyọ lọ Tọn do dọ dọ: “Gbigbọ po asiyọyọ po sọ to didọ mapote dọmọ: ‘Wá!’” Ehe dohia dọ mí dona to oylọ lọ basina mẹdevo lẹ whepoponu. Etẹwẹ dogbọn mẹhe sè oylọ-basinamẹ lọ bo kẹalọyi i lẹ dali? Yelọsu nọ dọ, “Wá!” Sinsẹ̀n-basitọ he yin gbẹtọ susugege lọ lẹ yin alọdlẹndo taidi mẹhe ‘to sinsẹ̀nzọn wiwe basi to okle po ozán po to tẹmpli Jehovah tọn mẹ.’ (Osọ. 7:9, 15) Linlẹn tẹ mẹ wẹ yé ‘to sinsẹ̀nzọn basi to okle po ozán po te’? (Hia Luku 2:36, 37; Owalọ lẹ 20:31; 2 Tẹsalonikanu lẹ 3:8.) Apajlẹ yẹwhegán-yọnnu yọnhonọ lọ Anna po apọsteli Paulu po tọn dohia dọ ‘sinsẹ̀nzọn bibasi to okle po ozán po’ nọ biọ dọ yè ni dovivẹnu vẹkuvẹku to lizọnyizọn lọ mẹ bo nọ to mọwà to whepoponu.
14, 15. Nawẹ Daniẹli do nujọnu-yinyin sinsẹ̀n-bibasi whepoponu tọn hia gbọn?
14 Yẹwhegán Daniẹli lọsu do nujọnu-yinyin sinsẹ̀n-bibasi whepoponu tọn hia. (Hia Daniẹli 6:4-10, 16.) E ma diọ nuwiwa gbigbọmẹ tọn etọn lẹ gba—enẹ wẹ, aṣa etọn nado nọ hodẹ̀ hlan Jiwheyẹwhe “whla atọ̀n to gbèdopo, . . . dole e nọ wà do daidai”—e tlẹ wàmọ na osun dopo, mahopọnna dọ e na yin zizedlan odò kinnikinni tọn mẹ. Matin ayihaawe, nuyiwa etọn dohia mẹdevo lẹ dọ sinsẹ̀n-bibasina Jehovah to whepoponu wẹ yin nujọnu hugan.—Mat. 5:16.
15 To whenue Daniẹli ko yí ozán dopo blebu zan to odò kinnikinni tọn mẹ godo, ahọlu lọ lọsu yì finẹ bo dawhá dọmọ: “Daniẹli E, devi Jiwheyẹwhe ogbẹ̀nọ lọ tọn, Jiwheyẹwhe towe, mẹhe hiẹ to sinsẹ̀n whepoponu, tin sọgan nado whlẹn we sọn kinnikinni lẹ lọ si?” Daniẹli gblọn to afọdopolọji dọmọ: “Ahọlu E, nọgbẹ̀ kakadoi. Jiwheyẹwhe ṣie ko do angẹli etọn hlan, bo ko sọ bọ̀ onù kinnikinni lẹ lọ tọn lẹ do, bọ yé ma ko gbleawu de na mi gba: sọle yè mọ homẹvọ to yẹn mẹ to ewọ nukọn do; podọ ga to hiẹ nukọn, ahọlu E, wẹ yẹn ma ko sọ wà awugblenu de.” Jehovah dona Daniẹli na e nọ wà sinsẹ̀nzọn to “whepoponu” wutu.—Dan. 6:19-22.
16. Kanbiọ tẹlẹ wẹ apajlẹ Daniẹli tọn dona whàn mí nado kanse míde na nuhe dù obá he mẹ mí nọ tindo mahẹ to lizọnyizọn lọ mẹ jẹ?
16 Daniẹli wleawufo nado kú kakati nado gbẹkọ nuwiwa gbigbọmẹ tọn etọn lẹ go. Míwlẹ lo? Avọ́sinsan tẹlẹ wẹ mí to bibasi kavi wleawufo nado basi nado sọgan nọ lá wẹndagbe Ahọluduta Jiwheyẹwhe tọn to whepoponu? Na nugbo tọn, be e jẹ dọ osun dopo ni juwayi bọ mí ma na dọho Jehovah tọn na mẹdevo lẹ ya? Eyin e yọnbasi, be e ma jẹ dọ mí ni dovivẹnu nado nọ tindo mahẹ to lizọnyizọn lọ mẹ to sẹmẹsẹmẹ ya? Eyin azọ̀n kavi madogán agbasa tọn tlẹ zọ́n bọ mí ma sọgan dekunnu hugan nukunwhiwhe 15 to osun de mẹ, mí dona na linlin enẹ. Etẹwutu? Na ojlo mítọn wẹ nado to didọ mapote dọmọ: “Wá!” to pọmẹ hẹ gbigbọ po asiyọyọ lọ po. Mọwẹ, mí dona wà nuhe go mí pé lẹpo nado yin wẹnlatọ Ahọluduta lọ tọn gbesisọnọ lẹ.
17. Dotẹnmẹ devo tẹlẹ wẹ hundote na mí nado hẹn oylọ-basinamẹ Jehovah tọn jẹ mẹdevo lẹ dè?
17 Gbọnvona ojlẹ he mí de dovo na sinsẹ̀nzọn kunnudegbe tọn, mí sọ dona dovivẹnu nado yí dotẹnmẹ hundote devo lẹ zan nado hẹn oylọ-basinamẹ Jehovah tọn jẹ mẹdevo lẹ dè. Lẹblanulọkẹyi nankọ die nado basi oylọna mẹhe ovẹ́ to húhú lẹ nado ‘wá yí osin ogbẹ̀ tọn vọnu’ to whenue mí to gbejizọnlin basi, to ahiwhle, to whenue mí yì na gbọjẹ, to azọ́nwa, kavi to whenue mí jei wehọmẹ! Eyin aṣẹpatọ lẹ tlẹ hẹnalọdotena azọ́n yẹwhehodidọ tọn lọ, mí nọ yí zinzin do zindonukọn to yẹwhehodidọ mẹ—vlavo ma nado nọ yì ohọ̀n lẹpo nukọn to azán dopolọ ji kavi nado nọ yí whenu susu dogọ zan nado dekunnu mayin aṣa tọn.
To Didọ Mapote Dọmọ: “Wá!”
18, 19. Nawẹ hiẹ nọ dohia dọ a yọ́n pinpẹn lẹblanulọkẹyi lọ nado yin azọ́nwatọ hatọ Jiwheyẹwhe tọn gbọn?
18 E ko hugan owhe 90 todin he gbigbọ po asiyọyọ po ko to oylọ-basina mẹhe ovẹ́ osin ogbẹ̀ tọn to húhú lẹ dọ, “Wá!” Be hiẹ ko sè oylọ-basinamẹ yetọn ya? Eyin mọ wẹ, hiẹ yin tudohomẹna nado hẹn oylọ-basinamẹ ehe jẹ mẹdevo lẹ dè ga.
19 Mí ma yọ́n obá he mẹ oylọ-basinamẹ owanyinọ Jehovah tọn na gbẹ́ zindonukọn jẹ, ṣigba mí na yin azọ́nwatọ hatọ Jiwheyẹwhe tọn lẹ eyin mí nọ yinuwa sọgbe hẹ oylọ-basinamẹ lọ bo to didọmọ: “Wá!” (1 Kọl. 3:6, 9) Lẹblanulọkẹyi nankọ die! Mì gbọ mí ni dohia dọ mí yọ́n pinpẹn lẹblanulọkẹyi enẹ tọn bo nọ “basi avọ́sinsan pipà tọn hlan Jiwheyẹwhe to whepoponu” gbọn yẹwhehodidọ to gbesisọ mẹ dali. (Heb. 13:15) To pọmẹ hẹ hagbẹ asiyọyọ lọ tọn lẹ, mì dike mí mẹhe tindo todido aigba ji tọn lẹ ni to didọ mapote dọmọ: “Wá!” Podọ odẹ̀ mítọn wẹ yindọ mẹsusu dogọ ni wá “yí osin ogbẹ̀ tọn vọnu”!
Etẹwẹ Hiẹ Plọn?
• Mẹnu lẹ wẹ tindo lẹblanulọkẹyi lọ nado dọ “wá” na mẹdevo lẹ?
• Naegbọn mí sọgan dọ dọ Jehovah dè wẹ oylọ-basinamẹ lọ nado wá “yí osin ogbẹ̀ tọn vọnu” wá sọn?
• Adà tẹwẹ gbigbọ wiwe nọ yiwà nado hẹn oylọ-basinamẹ lọ nado “wá” jẹ mẹdevo lẹ dè?
• Naegbọn mí dona dovivẹnu nado yin gbesisọnọ to lizọnyizọn lọ mẹ?
[Yẹdide to weda 16]
(Na nudọnamẹ gigọ́, pọ́n linlinnamẹwe)
To Didọ Mapote Dọmọ: “Wá!”
1914
Wẹnlatọ 5 100
1918
Mẹsusu na dugu ogbẹ̀ madopodo tọn to Paladisi mẹ to aigba ji
1922
“Mì lá, mì lá, mì lá, Ahọlu lọ po ahọluduta etọn po”
1929
Pipotọ nugbonọ lọ dọmọ: “Wá!”
1932
E ma yin mẹyiamisisadode lẹ kẹdẹ wẹ to oylọ-basinamẹ dọ, “Wá!” gba
1934
Hagbẹ Jonadabi tọn lẹ yin oylọ-basina nado dọyẹwheho
1935
“Gbẹtọ susugege” lọ yin yinyọnẹn
2009
Wẹnlatọ 7 313 173