Jehovah Nọ Dotoaina Awhágbe Mẹhe Jẹflumẹ lẹ Tọn

DILE Sọlomọni, ahọlu nuyọnẹntọ Islaeli hohowhenu tọn dọ do, “Ojlẹ po kosọ po mẹ wẹ onú te na [mímẹpo].” (Yẹwh. 9:11) Nujijọ ajiji kavi whlepọn sinsinyẹn de sọgan zọ́n bọ ogbẹ̀ na dózin do mí. Di apajlẹ, eyin hagbẹ whẹndo tọn vivẹ́ de kú to ajiji mẹ, e sọgan hẹn awubla sinsinyẹn wá. Numọtolanmẹ awubla po todido matindo po tọn sọgan gbọṣi aimẹ na osẹ kavi osun lẹ. Mẹde sọgan biọ bẹwlu mẹ sọmọ bọ e na nọ pọ́n ede hlan taidi mẹhe ma jẹ nado dọnsẹpọ Jehovah to odẹ̀ mẹ.

Eyin onú mọnkọtọn jọ do mẹde go, mẹlọ nọ tindo nuhudo tulinamẹ, mẹtọnhopọn po owanyi po tọn. Po jidevọnamẹ po, Psalm-kantọ jihàn dọmọ: “OKLUNỌ jlọ yé he jai lẹpo dote, bosọ ze yé he yin didẹ́ do odò lẹ daga.” (Ps. 145:14) Biblu dọna mí dọmọ: “Nukun [Jehovah] tọn lẹ to godo po nukọn po yì lẹdo aigba lẹpo pete, nado do ede hia huhlọnnọ na ayiha yé mẹhe tọn yin pipé hlan e dè lẹ tọn.” (2 Otan. 16:9) Ewọ tin ‘hẹ ewọ he tindo gbigbọ ovọjọ po whiwhẹ po tọn, nado hẹn gbigbọ whiwhẹnọ lẹ tọn zéta, podọ nado hẹn mẹhe jẹflumẹ lẹ zéta.’ (Isa. 57:15) Nawẹ Jehovah nọ gọalọna mẹhe jẹflumẹ lẹ bo nọ miọnhomẹna yé gbọn?

“Ohó Dopo to Ojlẹ Etọn Mẹ”

Dopo to aliho he mẹ Jehovah nọ wleawu alọgọ tọn to ojlẹ etọn mẹ te lẹ mẹ wẹ gbọn pipli mẹmẹsunnu lẹ tọn dali. Klistiani lẹ yin tudohomẹna nado nọ “dọho homẹmiọnnamẹ tọn na alindọn he jẹflumẹ lẹ.” (1 Tẹs. 5:14) Hogbe mẹtọnhopọn po owanyi po tọn he wá sọn yisenọ hatọ awuvẹmẹtọ lẹ dè sọgan hẹn mẹde lodo to ojlẹ ayimajai po awubla po tọn mẹ. Hogbe homẹmiọnnamẹ tọn kleun he mẹde tlẹ dọ sọgan yí nususu wà nado jlọ mẹhe jẹflumẹ de dote. Hogbe mẹjlọdote tọn mọnkọtọn lẹ sọgan wá sọn mẹhe ko doakọnna awufiẹsa apọ̀nmẹ tọn po numọtolanmẹ tọn enẹ nkọ lẹ po dè. Kavi e sọgan yin hogbe mẹjlọdote tọn sọn họntọn he ko tindo numimọ susu to gbẹ̀mẹ de dè. Gbọn alọgọ mẹmẹsunnu po mẹmẹyọnnu lẹ po tọn gblamẹ, Jehovah sọgan whlẹn mẹhe jẹflumẹ lẹ sọn tukla yetọn lẹpo mẹ.

Lẹnnupọndo apajlẹ Alex tọn ji, yèdọ mẹho agun tọn de he ṣẹṣẹ wlealọ bọ to ajiji mẹ, azọ̀n jẹmagbọ de hù asi etọn. Nugopọntọ tomẹyitọ awuvẹmẹtọ de dọho homẹmiọnnamẹ tọn delẹ hẹ Alex. Ewọ lọsu ko hẹn asi etọn bu to okú mẹ, ṣigba e ko dẹn he e vọ́ alọwle. Nugopọntọ lọ dọna ẹn dọ na emi nọ yawu tindo numọtolanmẹ wutu, e ma bọawuna emi to whelọnu. Awú nọ yá ẹ to whenue e tin hẹ mẹdevo lẹ to lizọnyizọn lọ mẹ podọ to opli agun tọn lẹ ji. Ṣigba, eyin e biọ ohọ̀ etọn mẹ bo suhọ̀n, e nọ tindo numọtolanmẹ ṣokẹdẹninọ tọn taun. Alex dọ dọ, “homẹmiọnnamẹnu wẹ e yin nado yọnẹn dọ numọtolanmẹ he n’nọ tindo lẹ sọgbe podọ mẹdevo lẹ lọsu ko jugbọn ninọmẹ dopolọ mẹ pọ́n.” Matin ayihaawe, “ohó dopo to ojlẹ etọn mẹ” sọgan miọnhomẹnamẹ to ayimajai whenu.—Howh. 15:23.

Mẹho agun tọn devo he jẹakọ hẹ mẹhe hẹn alọwlemẹ yetọn bu to okú mẹ delẹ yin whinwhàn nado na tuli Alex. E gbọn awuvẹmẹ po owanyi po dali zinnudeji dọ Jehovah nọ yọ́n nuhe yin numọtolanmẹ mítọn po nuhe mí tindo nuhudo etọn po. Mẹmẹsunnu lọ dọmọ: “Dile osun kavi owhe lẹ to yìyì, eyin a wá mọdọ emi tindo nuhudo gbẹdohẹmẹtọ de tọn, awuwledainanu owanyinọ Jehovah tọn wẹ e yin nado vọ́ alọwle.” Nugbo wẹ dọ e ma yin mẹhe hẹn alọwlemẹ yetọn bu to okú mẹ bo jlo nado vọ́ alọwle lẹpo wẹ nọ penugo nado wàmọ gba. Ṣigba to whenue Alex lẹnnupọndo nuhe mẹmẹsunnu lọ dọ ji, e dọmọ: “Eyin mẹde flindọ awuwledainanu Jehovah tọn wẹ ehe yin, e na zọ́n bọ e ma na tindo linlẹn agọ̀ depope dọ emi ma na yin nugbonọ na alọwlemẹ emitọn kavi na tito alọwle tọn he Jehovah zedai gbọn alọvivọwle to nukọn mẹ dali.”—1 Kọl. 7:8, 9, 39.

Psalm-kantọ Davidi he jugbọn whlepọn po nuhahun susu po mẹ dọmọ: “Nukun OKLUNỌ tọn tin hlan dodonọ lẹ dali, otó etọn sọ hùn hlan ogbè yetọn. OKLUNỌ sẹpọ yé he yin ayiha gbigbànọ de tọn [kavi mẹhe jẹflumẹ] lẹ.” (Ps. 34:15, 18) Jide tin dọ Jehovah sọgan na gblọndo awhágbe mẹhe jẹflumẹ lẹ tọn to ojlẹ sisọ mẹ gbọn hogbe mẹjlọdote po awuvẹmẹ po tọn he nọ wá sọn yisenọ hatọ mẹtọnhopọntọ he whèwhín lẹ dè dali. Awuwledainanu mọnkọtọn họakuẹ bosọ yọ́n-na-yizan.

Opli Klistiani Tọn lẹ Nọ Gọalọ

Linlẹn agọ̀ sọgan yinuwado mẹhe jẹflumẹ de ji sọmọ bọ e na klan ede dovo. Ṣigba, Howhinwhẹn lẹ 18:1 gbẹnunamẹ dọmọ: “Ewọ he klan ede dovo na dómọna ojlo ede tọn; bosọ diọavunnukunsọ mẹdepope he yin zinzin tọn.” Alex dọ dọ: “Linlẹn agọ̀ lẹ kẹdẹ wẹ nọ wá ayiha mẹ namẹ to whenue mẹde hẹn alọwlemẹ etọn bu to okú mẹ.” E flindọ emi nọ kanse emi de dọ: “‘Be nudevo de tin he n’sọgan ko wà dai wẹ ya? Kavi be n’sọgan ko hò etọn pọ́n bo vẹawu i dogọ wẹ ya?’ N’ma jlo na nọ dee ṣo. N’ma jlo na yin tlẹnnọ. E nọ vẹawu taun nado doalọtena nulinlẹnpọn to aliho ehe mẹ, na whelẹponu wẹ a na nọ flindọ hiẹ ṣo wẹ e pò.”

Mẹhe jẹflumẹ lẹ nọ tindo nuhudo gbẹdido mẹjlọdote tọn badabada. Mí nọ saba mọ ehe to opli agun tọn lẹ whenu. Mí nọ hùn ayiha mítọn nado sè ohó dagbe po mẹjlọdote tọn Jiwheyẹwhe tọn lẹ po to opli mọnkọtọn lẹ ji.

Opli Klistiani tọn lẹ nọ gọalọna mí nado tindo pọndohlan jlẹkaji tọn gando ninọmẹ mítọn go. Dile mí to todoaina wefọ Biblu tọn lẹ bo to ayihamẹlẹnpọn do yé ji, mí nọ ze linlẹn mítọn do whẹho titengbe awe hugan lẹ ji—yèdọ whẹsuna nupojipetọ-yinyin Jehovah tọn po klandowiwe oyín etọn tọn po—e ma yin do oyà he ji mí te lẹ kẹdẹ ji gba. Humọ, nuplọnmẹ gbigbọmẹ tọn he mí nọ sè to opli Klistiani tọn lẹ ji nọ hẹn mí lodo, na mí yọnẹn dọ eyin mẹdevo lẹ ma tlẹ doayi ayimajai he pehẹ mí te go kavi ma mọnukunnujẹ numọtolanmẹ mítọn mẹ, jide tin dọ Jehovah yọnẹn. E yọnẹn dọ “gbọn awubla ayiha tọn dali, gbigbọ nọ gbàdo.” (Howh. 15:13) Ojlo Jiwheyẹwhe nugbo lọ tọn wẹ nado gọalọna mí, podọ ehe nọ whàn mí bo nọ na mí huhlọn nado zindonukọn.—Ps. 27:14.

To whenue Ahọlu Davidi tin to kọgbidinamẹ sinsinyẹn glọ sọn kẹntọ etọn lẹ si, e dawhá hlan Jiwheyẹwhe dọmọ: “Gbigbọ ṣie kúṣiọ to ohò ṣie mẹ: ayiha he to ohò ṣie mẹ sọ hùn bu.” (Ps. 143:4) Adángbòmẹ nọ saba de huhlọn pò namẹ to agbasa-liho podọ to numọtolanmẹ-liho, e tlẹ nọ yinuwado ahun ji. Azọ̀n kavi madogán agbasa tọn he ma yawu gbọ̀ de sọgan hẹn awufiẹsa wá mí ji. Mí sọgan deji dọ Jehovah na gọalọna mí nado doakọnna. (Ps. 41:1-3) Dile etlẹ yindọ Jiwheyẹwhe ma nọ hẹnazọ̀ngbọna mẹdepope to azọ́njiawu-liho to egbehe, e nọ na nuyọnẹn po huhlọn po mẹhe to yaji de nado doakọnna ninọmẹ etọn. Flindọ to whenue whlepọn lẹ húagbọ́ Davidi, e lẹhlan Jehovah. E jihàn dọmọ: “Yẹn flin azán hoho tọn lẹ; yẹn lẹn azọ́n towe lẹpo pọ́n; yẹn ayihamẹlẹnpọn na azọ́n alọ towe tọn lẹpo.”—Ps. 143:5.

Nugbo lọ dọ numọtolanmẹ he yin gbigbọdo ehelẹ yin kinkandai to Ohó Jiwheyẹwhe tọn mẹ dohia dọ Jehovah nọ mọnukunnujẹ numọtolanmẹ mítọn mẹ. Ohó ehelẹ na mí jide dọ e nọ dotoaina ovẹvivẹ mítọn lẹ. Eyin mí kẹalọyi alọgọ Jehovah tọn, ‘ewọ na hẹn mí dote.’—Ps. 55:22.

“Nọ Hodẹ̀ to Whepoponu”

Jakọbu 4:8 dọmọ: “Mì dọnsẹpọ Jiwheyẹwhe, podọ ewọ na dọnsẹpọ mì.” Aliho dopo nado dọnsẹpọ Jiwheyẹwhe wẹ dẹ̀hiho. Apọsteli Paulu dotuhomẹna mí nado “nọ hodẹ̀ to whepoponu.” (1 Tẹs. 5:17) Eyin etlẹ nọ vẹawuna mí nado dọ numọtolanmẹ mítọn lẹ tọ́n, “gbigbọ lọsu nọ vẹvẹ do ota mítọn mẹ po hunwinwẹn he ma yin didọtọn lẹ po.” (Lom. 8:26, 27) Matin ayihaawe, Jehovah nọ mọnukunnujẹ numọtolanmẹ mítọn mẹ.

Monika, mẹhe duvivi haṣinṣan pẹkipẹki enẹ nkọtọn hẹ Jehovah dọ dọ: “Gbọn dẹ̀hiho, Biblu hihia, po oplọn mẹdetiti tọn po gblamẹ, n’wá mọdọ Jehovah lẹzun Họntọn vivẹ́ ṣie hugan. E ko lẹzun omẹ nujọnu tọn de na mi sọmọ bọ n’nọ mọdọ e to nukunpedo go e to whepoponu. Homẹmiọnnamẹnu wẹ e yin nado yọnẹn dọ e nọ mọnukunnujẹ go e to whenue n’ma tlẹ sọgan dọ numọtolanmẹ ṣie tọ́n. N’yọnẹn dọ homẹdagbe po dona etọn lẹ po madopodo.”

Enẹwutu, mì gbọ mí ni wà nuhe go mí pé lẹpo nado nọ kẹalọyi hogbe owanyi po homẹmiọnnamẹ Klistiani hatọ lẹ tọn po bo nọ yí ayinamẹ dagbe po nuflinmẹ he nọ hẹn yise lodo bọ mí nọ sè to opli Klistiani tọn lẹ ji lẹ po do yizan mẹ, bosọ nọ kọ̀n ahun mítọn lẹ jẹgbonu na Jehovah to odẹ̀ mẹ. Awuwledainanu he nọ wá do gànmẹ ehelẹ dohia dọ Jehovah nọ penukundo mí go. Sọn numimọ mẹdetiti tọn Alex tọn mẹ, e dọmọ, “Eyin mí yí adà mítọn wà nado to yìyì afọsu-afọsi hẹ nuhe Jehovah Jiwheyẹwhe wleawu etọn dai nado hẹn mí lodo to gbigbọ-liho lẹpo, mí na tindo ‘huhlọn he hú jọwamọ tọn’ nado doakọnna whlepọn depope he mí sọgan pehẹ.”—2 Kọl. 4:7.

[Apotin/Yẹdide to weda 18]

Homẹmimiọn Na Mẹhe Jẹflumẹ Lẹ

Owe Psalm lẹ tọn gọ́ na hodidọ he bẹ numọtolanmẹ hẹn lẹ, to pọmẹ hẹ jidenamẹ debọdo-dego he dohia dọ Jehovah nọ dotoaina awhágbe mẹhe jẹflumẹ sinsinyẹn lẹ tọn. Mì gbọ mí ni gbadopọnna hodidọ he bọdego ehelẹ:

“To nukunbibia ṣie mẹ yẹn ylọ OKLUNỌ na alọgọ, bosọ ylọ Jiwheyẹwhe ṣie na alọgọ; E sè ogbè ṣie sọn tẹmpli etọn mẹ, awhá ṣie to nukọn etọn sọ wá otó etọn mẹ.”—Ps. 18:6.

“OKLUNỌ sẹpọ yé he yin ayiha gbigbànọ de tọn [kavi mẹhe jẹflumẹ] lẹ, bosọ whlẹn yé he yin ayiha finfinyọ́nnọ lẹ gán.”—Ps. 34:18.

“E [Jehovah] hẹnazọ̀ngbọna ayiha gbàdonọ lẹ, bosọ blá alán yetọn.”—Ps. 147:3.

[Yẹdide to weda 17]

Lehe “ohó dopo to ojlẹ etọn mẹ” sọgan miọnhomẹnamẹ to ojlẹ ayimajai tọn mẹ do sọ!