Mọ Dona lẹ Yí Gbọn Ahọlu He Gbigbọ Jiwheyẹwhe Tọn to Anadena lọ Gblamẹ!
“Gbigbọ OKLUNỌ tọn na jẹ do e ji.”—ISA. 11:2.
1. Ahunmẹdunamẹnu tẹlẹ wẹ mẹdelẹ dọtọ́n gando nuhahun aihọn tọn lẹ go?
LẸNUNNUYỌNẸNTỌ Stephen Hawking kanse to 2006 dọmọ: “Nawẹ gbẹtọvi lẹ sọgan nọgbẹ̀ na owhe 100 devo dogọ to aihọn he tin to bẹwlu mẹ to paa mẹ podọ to tonudidọ-liho ehe mẹ gbọn?” Hosọ de to linlinwe New Statesman mẹ dọmọ: “Mí ma ko de ohẹ́n sẹ̀ kavi hẹn jijọho aihọn tọn wá. Kakatimọ, vivẹnudido mítọn lẹpo yin to ovọ́ mẹ. E ma yindọ mí ma ko wà nuhe go mí pé lẹpo wẹ gba. Mí ko tẹ́n gandudu he nọ deanana akuẹzinzan otò tọn po dehe ma nọ donù akuẹzinzan otò tọn go sọmọ lẹ po pọ́n podọ mí ko sọ dovivẹnu nado doalọtena awhàn gbọn awuwiwlena Alẹnu Akọta lẹ tọn podọ gbọn awhànfunnu nuzanusẹvaun lẹ bibẹpli nado dobuna akọta devo lẹ dali. Mí ko funawhàn susu nado hẹn awhàn wá opodo bo ko gboawupo, ehe dohia dọ mí ma sọgan hẹn awhàn wá opodo.”
2. To madẹnmẹ, nawẹ Jehovah na yí nupojipetọ-yinyin etọn zan do aigba lọ blebu ji gbọn?
2 Nuhe yé dọ enẹlẹ ma nọ yin nupaṣamẹ na devizọnwatọ Jehovah tọn lẹ. Biblu dọna mí dọ gbẹtọvi lẹ ma yin didá nado dugán do yedelẹ ji. (Jel. 10:23) Jehovah kẹdẹ wẹ jẹ nado yin Nupojipetọ mítọn. Enẹwutu, e tindo jlọjẹ nado ze nujinọtedo lẹ dai na mí, bo dọ lẹndai he ogbẹ̀ mítọn dona tindo, bosọ deanana mí jẹ lẹndai enẹ kọ̀n. Humọ, to madẹnmẹ, e na yí aṣẹpipa etọn zan nado hẹn gandudu voovo he gbẹtọvi lẹ ko tẹnpọn bo ma tindo kọdetọn dagbe lẹ wá opodo. To ojlẹ dopolọ mẹ, e na và mẹhe gbẹ́ ma nado kẹalọyi ewọ taidi nupojipetọ bo gbọnmọ dali hẹn mẹdevo lẹ zun afanumẹ na ylando, mape, podọ na Satani Lẹgba he yin “yẹwhe titonu ehe tọn” lẹpo sudo.—2 Kọl. 4:4.
3. Dọdai tẹwẹ Isaia dọ gando Mẹsia lọ go?
3 To aihọn yọyọ Paladisi tọn lọ mẹ, Jehovah na yí nupojipetọ-yinyin owanyi tọn etọn zan do gbẹtọvi lẹ ji gbọn Ahọluduta Mẹsia tọn gblamẹ. (Dan. 7:13, 14) Isaia dọ dọdai gando Ahọlu etọn go dọmọ: “Opò de na sọn dodonu Jẹsse tọn mẹ, alà de nasọ tọ́nkun sọn adọ̀ etọn mẹ: gbigbọ OKLUNỌ tọn na jẹ do e ji, gbigbọ wuntunnugo po zinzin po tọn, gbigbọ lẹnpọn po huhlọn po tọn, gbigbọ nuyọnẹn po osi OKLUNỌ tọn po tọn.” (Isa. 11:1, 2) Aliho tẹlẹ mẹ wẹ gbigbọ wiwe Jiwheyẹwhe tọn hẹn “opò . . . sọn dodonu Jẹsse tọn mẹ” lọ—Jesu Klisti—pegan nado dugán do gbẹtọvi lẹ ji te? Dona tẹlẹ wẹ gandudu etọn na hẹnwa? Podọ etẹwẹ mí dona wà nado mọ dona enẹlẹ yí?
Jiwheyẹwhe Hẹn Jesu Pegan Nado Dugán
4-6. Oyọnẹn vonọtaun tẹwẹ hẹn Jesu penugo nado yin Ahọlu, Yẹwhenọ Daho podọ Whẹdatọ he tindo nuyọnẹn po awuvẹmẹ po?
4 Jehovah jlo dọ mẹjidugando etọn he tin to aigba ji lẹ ni yin hinhẹnwa pipé kọ̀n to anademẹ Ahọlu, Yẹwhenọ Daho, podọ Whẹdatọ he tindo awuvẹmẹ po nuyọnẹn sisosiso po de tọn glọ. Nuhe zọ́n niyẹn bọ Jiwheyẹwhe do de Jesu Klisti, mẹhe e hẹn pegan gbọn gbigbọ wiwe gblamẹ na azọngban titengbe hugan enẹlẹ. Mì gbọ mí ni pọ́n delẹ to whẹwhinwhẹ́n he wutu Jesu na penugo nado hẹn azọngban he Jiwheyẹwhe zedo alọmẹ na ẹn lẹ di to aliho pipé mẹ.
5 Mẹdepope ma yọ́n Jiwheyẹwhe sọ Jesu. Visunnu detọ́n dopo akàn lọ ko yọ́n Otọ́ lọ sọn whenu dindẹn die jẹnukọnna mẹdepope, vlavo na owhe liva susu lẹ. To owhe enẹlẹ gblamẹ, Jesu wleawuna oyọnẹn sisosiso gando Jehovah go sọmọ bọ ewọ sọgan yin alọdlẹndo taidi “apajlẹ Jiwheyẹwhe mayinukundomọ lọ tọn.” (Kọl. 1:15) Jesu lọsu dọmọ: “Ewọ he ko mọ mi ko mọ Otọ́ lọ ga.”—Joh. 14:9.
6 Gbọnvona Jehovah, Jesu wẹ yọ́n nudida lẹpo hugan, ehe bẹ gbẹtọvi lẹ hẹn. Kọlọsinu lẹ 1:16, 17 hia dọmọ: “Gbọn ewọ [Visunnu Jiwheyẹwhe tọn] gblamẹ wẹ onú devo lẹpo yin didá te to olọn mẹ podọ to aigba ji, yèdọ onú yinukundomọ lẹ po onú mayinukundomọ lẹ po . . . Humọ, ewọ tin jẹnukọnna onú devo lẹpo podọ gbọn ewọ gblamẹ wẹ onú devo lẹpo yin hinhẹnwa tintin mẹ te.” Yí nukun homẹ tọn do pọ́n! Di “azọ́nwatọgan” Jiwheyẹwhe tọn, Jesu tindo mahẹ to adà nudida tọn devo lẹpo mẹ. Enẹwutu, e mọnukunnujẹ nuhe gando wẹkẹ lọ go lẹpo mẹ, kakajẹ apọ̀n gbẹtọvi tọn ji. Mọwẹ na nugbo tọn, Klisti wẹ apajlẹ pipé nuyọnẹn tọn!—Howh. 8:12, 22, 30, 31.
7, 8. Nawẹ gbigbọ wiwe Jiwheyẹwhe tọn gọalọna Jesu to lizọnyizọn etọn mẹ gbọn?
7 Jesu yin dide gbọn gbigbọ wiwe Jiwheyẹwhe tọn dali. Jesu dọmọ: “Gbigbọ Jehovah tọn tin to oji e, na e ko yiamisisadode mi nado lá wẹndagbe na wamọnọ lẹ, ewọ do mi hlan nado dọyẹwheho tundote tọn hlan kanlinmọ lẹ podọ nukunnumimọ tọn hlan nukuntọ́nnọ lẹ, nado tún mẹhe yin kọgbidina lẹ dote, nado dọyẹwheho owhe alọkẹyi Jehovah tọn.” (Luku 4:18, 19) E họnwun dọ to whenuena Jesu yin bibaptizi, gbigbọ wiwe gọalọna ẹn nado flin nuhe e ko plọn to olọn mẹ lẹ, kakajẹ nuhe Jiwheyẹwhe jlo dọ ewọ ni wà to lizọnyizọn aigba ji tọn etọn whenu taidi Mẹsia ji.—Hia Isaia 42:1; Luku 3:21, 22; Johanu 12:50.
8 Na Jesu mọ huhlọn yí gbọn gbigbọ wiwe gblamẹ bo yin pipé to agbasa po ayiha po mẹ wutu, e ma yin dawe klohugan he nkọtọn ma nọgbẹ̀ pọ́n lọ kẹdẹ gba, ṣigba Mẹplọntọ daho lọ ga. Na nugbo tọn, “awuji” hosetọ etọn lẹ “na aliho mẹpinplọn tọn etọn wutu.” (Mat. 7:28) Onú dopo wẹ yindọ, Jesu penugo nado mọnukunnujẹ adọ̀ nuhahun gbẹtọvi lẹ tọn mẹ—enẹ wẹ yindọ yé yin ylandonọ, mapenọ, bo ma tindo oyọnẹn gando Jiwheyẹwhe go. Ṣigba, e sọ penugo nado yọ́n nuhe tin to ahun gbẹtọvi lẹ tọn mẹ bo yinuwa hẹ yé sọgbe hẹ oyọnẹn ehe.—Mat. 9:4; Joh. 1:47.
9. Nawẹ nulinlẹnpọn do numimọ he Jesu tindo to aigba ji lẹ ji yidogọna jidide towe to ewọ mẹ taidi Ahọlu gbọn?
9 Jesu nọgbẹ̀ taidi gbẹtọvi de. Numimọ he Jesu tindo to whenue e yin gbẹtọvi de podọ haṣinṣan pẹkipẹki he e tindo hẹ gbẹtọvi mapenọ lẹ gọalọna ẹn taun nado pegan taidi Ahọlu. Apọsteli Paulu wlan dọmọ: “E lẹzun dandan na [Jesu] nado taidi ‘nọvisunnu’ etọn lẹ to aliho lẹpo mẹ, na ewọ nido sọgan lẹzun yẹwhenọ daho lẹblanunọ podọ nugbonọ de to nuhe gando Jiwheyẹwhe go lẹ mẹ, nado sọgan basi avọ́sinsan oyẹsu tọn na ylando gbẹtọ lẹ tọn. Na ewọ lọsu ko jiya to whenuena e to yinyin whiwhlepọn wutu, e penugo nado gọalọna mẹhe to yinyin whiwhlepọn lẹ.” (Heb. 2:17, 18) Na Jesu yin “whiwhlepọn” wutu, e penugo nado do awuvẹmẹ hia mẹhe to yaji lẹ. Awuvẹmẹ Jesu tọn sọawuhia hezeheze to lizọnyizọn aigba ji tọn etọn whenu. Awutunọ lẹ, mẹhe tindo oblọ lẹ, ayimajainọ lẹ—etlẹ yin ovi lẹ—nọ voawu nado dọnsẹpọ ẹ. (Malku 5:22-24, 38-42; 10:14-16) Whiwhẹnọ lẹ po mẹhe tindo ojlo na onú gbigbọmẹ tọn lẹ po nọ dọnsẹpọ ẹ. To alọ devo mẹ, goyitọ lẹ, saklanọ lẹ, po mẹhe “ma tindo owanyi Jiwheyẹwhe tọn” to yé mẹ po lẹ gbẹ́ ẹ dai, bo gbẹwanna ẹn bosọ diọnukunsọ ẹ.—Joh. 5:40-42; 11:47-53.
10. Aliho ayidego tọn tẹ mẹ wẹ Jesu do owanyi he e tindo na mí hia te?
10 Jesu ze ogbẹ̀ etọn jo do ota mítọn mẹ. Vlavo ojlo he Jesu tindo nado kú do ota mítọn mẹ wẹ yin kunnudenu daho hugan he dohia dọ mẹdevo ma sọgan yin Ahọlu dagbe sọ ewọ. (Hia Psalm 40:6-10.) “Mẹdepope ma tindo owanyi he klohu ehe, dọ mẹde ni ze alindọn etọn jo do ota họntọn etọn lẹ tọn mẹ,” wẹ Klisti dọ. (Joh. 15:13) To vogbingbọn mẹ na gbẹtọvi he yin ahọlu lẹ, he nọ saba zan akuẹ mẹjidugando yetọn lẹ tọn do apà mẹ, Jesu ze ogbẹ̀ etọn titi jo na gbẹtọvi lẹ.—Mat. 20:28.
Jesu Pegan Nado Yí Ale Ofligọ lọ Tọn lẹ Zan Do Gbẹtọvi lẹ Tamẹ
11. Naegbọn mí sọgan tindo jidide mlẹnmlẹn to Jesu mẹ di Mẹfligọtọ mítọn?
11 Lehe e sọgbe dọ taidi Yẹwhenọ Daho, Jesu wẹ mẹhe na yin nukọntọ to ale avọ́sinsan ofligọ etọn tọn lẹ hinhẹnwa na mí mẹ do sọ! Na nugbo tọn, nuhe Jesu wà to lizọnyizọn aigba ji tọn etọn whenu, do nuhe e na wà di Mẹfligọtọ mítọn to Gandudu Owhe Fọtọ́n tọn etọn whenu hia mí, ehe mí sọgan duvivi etọn, eyin mí hẹn nugbonọ-yinyin mítọn go. E hẹnazọ̀ngbọna awutunọ lẹ po mẹhe tindo oblọ lẹ po, fọ́n oṣiọ lẹ sọnku, na núdùdù gbẹtọgun lẹ, bo tlẹ dava huhlọn jọwamọ tọn lẹ. (Mat. 8:26; 14:14-21; Luku 7:14, 15) Humọ, e wà onú ehelẹ, e ma yin nado do aṣẹpipa po huhlọn etọn po hia wẹ gba, ṣigba nado do awuvẹmẹ po owanyi etọn po hia. Jesu dọna pòtọnọ de he vẹvẹna ẹn nado hẹnazọ̀ngbọna ẹn dọmọ: “Yẹn jlo.” (Malku 1:40, 41) Jesu na do awuvẹmẹ enẹ dopolọ hia to Gandudu Owhe Fọtọ́n tọn etọn whenu—ṣigba to aigba lọ blebu ji.
12. Nawẹ Isaia 11:9 na yin hinhẹndi gbọn?
12 Klisti po gandutọgbẹ́ etọn lẹ po na zindonukọn to tito mẹpinplọn gbigbọmẹ tọn he Jesu bẹjẹeji to nudi owhe 2000 die lọ mẹ. Gbọnmọ dali, hogbe he tin to Isaia 11:9 mẹ lẹ dọ “Aihọn na gọ́ na nuyọnẹn OKLUNỌ tọn, dile osin ṣinyọ́n ohù ji do” na mọ hẹndi. Matin ayihaawe, tito mẹpinplọn gbigbọmẹ tọn enẹ na bẹ nudọnamẹ lẹ hẹn do lehe mí na penukundo aigba po nudida madosọha he to e ji lẹ po go do ji, dile e yin bibiọ to Adam si to tintan whenu do. To vivọnu owhe 1000 lọ tọn, lẹndai dowhenu tọn Jiwheyẹwhe tọn dile e sọawuhia to Gẹnẹsisi 1:28 mẹ do na mọ hẹndi, podọ mí na mọ ale gigọ́ yí sọn avọ́sinsan ofligọ lọ tọn mẹ.
Jesu Pegan Nado Dawhẹ
13. Nawẹ Jesu do owanyi etọn na dodowiwa hia gbọn?
13 Klisti wẹ “Omẹ lọ he Jiwheyẹwhe ko de nado yin whẹdatọ mẹhe to ogbẹ̀ po oṣiọ lẹ po tọn.” (Owalọ 10:42) Enẹwutu, lehe e yin homẹmiọnnamẹnu nado yọnẹn dọ Jesu yin magble, podọ dodowiwa po nugbonọ-yinyin po taidi gbaja de he yin biblá lẹdo alinkàn etọn gbanun-gbanun do sọ! (Isa. 11:5) E gbẹwanna nukunkẹn, yẹnuwiwa, po nuylankan devo lẹ po, podọ e gblewhẹdo mẹhe ma nọ do homẹdagbe hia mẹhe to yaji lẹ. (Mat. 23:1-8, 25-28; Malku 3:5) Humọ, Jesu dohia dọ awusọhia gbonu tọn ma nọ yinuwa do emi ji, “na ewọ lọsu yọ́n nuhe tin to ohò gbẹtọ tọn mẹ.”—Joh. 2:25.
14. Aliho tẹ mẹ wẹ Jesu to owanyi etọn na dodowiwa po whẹdida dodo po dohia te todin, podọ etẹwẹ mí dona kanse míde?
14 Jesu zindonukọn nado do owanyi etọn na dodowiwa po whẹdida dodo po hia gbọn anadidena azọ́n yẹwhehodidọ po mẹpinplọn po tọn daho hugan he ma ko yin wiwà pọ́n to whenuho aihọn tọn mẹ dali. Gbẹtọ depope, gandudu depope kavi gbigbọ ylankan depope ma sọgan doalọtena azọ́n ehe bọ e ma nado yin wiwà mlẹnmlẹn dile Jiwheyẹwhe jlo do. Enẹwutu, mí sọgan deji mlẹnmlẹn dọ to whenue Amagẹdọni na wá vivọnu, whẹdida dodo Jiwheyẹwhe tọn na ko gbayipe. (Hia Isaia 11:4; Matiu 16:27.) Kanse dewe dọ: ‘Be n’nọ yinuwa hẹ gbẹtọ lẹ to lizọnyizọn ṣie mẹ taidi Jesu ya? Be n’nọ na nuhe go n’pé lẹpo Jehovah eyin agbasamalo kavi ninọmẹ ṣie tlẹ dekanpona nuhe n’sọgan wà ya?’
15. Etẹ hinhẹn do ayiha mẹ wẹ sọgan gọalọna mí nado na nuhe go mí pé lẹpo Jiwheyẹwhe?
15 Mí na penugo nado sẹ̀n Jiwheyẹwhe po alindọn lẹpo po eyin mí hẹn do ayiha mẹ dọ azọ́n etọn wẹ azọ́n yẹwhehodidọ tọn yin. Ewọ wẹ degbe dọ azọ́n lọ ni yin wiwà; bo nọ deanana ẹn gbọn Visunnu etọn gblamẹ; podọ e nọ hẹn mẹhe nọ tindo mahẹ to e mẹ lẹ pegan gbọn gbigbọ wiwe dali. Be hiẹ nọ wlebòna lẹblanulọkẹyi he a tindo nado sẹ̀n taidi azọ́nwahẹmẹtọgbẹ́ Jiwheyẹwhe tọn to pọmẹ hẹ Visunnu etọn he gbigbọ etọn to anadena ya? Gbọnvona Jehovah, mẹdevo tẹwẹ sọgan whàn gbẹtọ he hugan livi ṣinawe, he suhugan yetọn nọ yin pinpọnhlan di mẹhe “ma sewé bosọ yin omẹ tata” lẹ, nado má owẹ̀n Ahọluduta lọ tọn hẹ gbẹtọ lẹ to aigba 236 ji?—Owalọ 4:13.
Mọ Dona Yí Gbọn Klisti Gblamẹ!
16. Etẹwẹ Gẹnẹsisi 22:18 dohia gando dona Jiwheyẹwhe tọn go?
16 Jehovah dọna Ablaham dọmọ: “To okún towe mẹ wẹ yè na dona akọta aigba ji tọn lẹpo: na hiẹ yí ogbè ṣie sè wutu.” (Gẹn. 22:18) Ehe dohia dọ mẹhe yọ́n pinpẹn sinsẹ̀nzọn yetọn hlan Jiwheyẹwhe po Visunnu etọn po tọn lẹ sọgan tindo jide nado mọ dona he Okún Mẹsia tọn lọ na hẹnwa lẹ yí. Podọ yé hẹn dona ehelẹ do ayiha mẹ dile yé hẹn alọnu ján to sinsẹ̀nzọn lọ mẹ to egbehe.
17, 18. Opagbe Jehovah tọn tẹwẹ mí hia to Deutelonomi 28:2 mẹ, podọ etẹwẹ e zẹẹmẹdo na mí?
17 Jiwheyẹwhe dọna okún agbasalan tọn Ablaham tọn, enẹ wẹ akọta Islaeli tọn dọmọ: “Dona he lẹpo [he tin to alẹnu Osẹ́n tọn mẹ] nasọ wá ji we, bo plá we, eyin hiẹ na nọ [dotoai] hlan ogbè OKLUNỌ lọ Jiwheyẹwhe towe tọn.” (Deut. 28:2) Nudopolọ sọgan yin didọ gando devizọnwatọ Jiwheyẹwhe tọn lẹ go to egbehe. Eyin hiẹ jlo na mọ dona Jehovah tọn yí, ‘nọ dotoaina’ ogbè etọn. Gbọnmọ dali, dona etọn lẹ “nasọ wá ji we, bo plá we.” To whelọnu lo, etẹwẹ ‘todidoai’ bẹhẹn?
18 Na taun tọn, todidoai nọ bẹ nuhe tin to Ohó Jiwheyẹwhe tọn mẹ po núdùdù gbigbọmẹ tọn he e nọ wleawuna po yíyí do ayiha mẹ hẹn. (Mat. 24:45) E sọ zẹẹmẹdo tonusisena Jiwheyẹwhe po Visunnu etọn po. Jesu dọmọ: “E ma yin mẹlẹpo he to didọna mi dọ, ‘Oklunọ, Oklunọ,’ wẹ na biọ ahọluduta olọn tọn mẹ gba, ṣigba ewọ he to ojlo Otọ́ ṣie he tin to olọn mẹ tọn wà.” (Mat. 7:21) Podọ todidoai na Jiwheyẹwhe zẹẹmẹdo taliliai sọn ojlo mẹ wá na tito he e ko zedai, yèdọ agun Klistiani tọn po mẹho he yin dide lẹ po, enẹ wẹ ‘sunnu he yin ninamẹ di nunina lẹ.’—Efe. 4:8.
19. Etẹwẹ mí sọgan wà nado mọ dona yí?
19 Delẹ to ‘sunnu he yin ninamẹ di nunina lẹ’ mẹ bẹ Hagbẹ Anademẹtọ lọ he nọ yinuwa taidi afọzedaitọ do agun Klistiani tọn blebu tamẹ hẹn. (Owalọ 15:2, 6) Na nugbo tọn, whẹdida he mí na mọyi to nukunbibia daho he ja lọ whenu na sinai titengbe do aliho he mẹ mí nọ yinuwa hẹ mẹmẹsunnu gbigbọmẹ tọn Klisti tọn lẹ te ji. (Mat. 25:34-40) Enẹwutu, aliho dopo he mẹ mí sọgan mọ dona yí te wẹ nado nọgodona mẹyiamisisadode Jiwheyẹwhe tọn lẹ po nugbonọ-yinyin po.
20. (a) Etẹwẹ yin azọngban tangan ‘sunnu he yin ninamẹ di nunina lẹ’ tọn? (b) Nawẹ mí sọgan dohia dọ mí yọ́n pinpẹn mẹmẹsunnu ehelẹ tọn gbọn?
20 ‘Sunnu he yin ninamẹ di nunina lẹ’ sọ bẹ hagbẹ Wedegbẹ́ Alahọ tọn lẹ, nugopọntọ tomẹyitọ lẹ, po mẹho agun tọn lẹ po hẹn—ehe yemẹpo yin dide gbọn gbigbọ wiwe dali. (Owalọ 20:28) Azọngban tangan mẹmẹsunnu ehelẹ tọn wẹ nado hẹn omẹ Jiwheyẹwhe tọn lẹ lodo “kaka [mẹlẹpo] nado jẹ dopo-yinyin to yise mẹ podọ to oyọnẹn he pegan gando Visunnu Jiwheyẹwhe tọn go kọ̀n, bo whẹ́n pete zun sunnu, jẹ obá ninọmẹ he yin gigọ́-yinyin Klisti tọn kọ̀n.” (Efe. 4:13) Nugbo wẹ dọ, mapenọ wẹ yé yin di mímẹpo. Etomọṣo, mí na mọ dona yí eyin mí nọ kẹalọyi nukunpedomẹgo owanyinọ yetọn.—Heb. 13:7, 17.
21. Naegbọn e do yin whẹho niyaniya tọn nado setonuna Visunnu Jiwheyẹwhe tọn?
21 To madẹnmẹ, Klisti na yinuwa sọta titonu ylankan Satani tọn. To ojlẹ enẹ mẹ, gbẹninọ mítọn na sinai do whẹdida Jesu tọn ji, na ewọ wẹ Jiwheyẹwhe ko na aṣẹ nado deanana “gbẹtọ susugege” lọ jẹ “asisa osin ogbẹ̀ tọn lẹ” kọ̀n. (Osọ. 7:9, 16, 17) Enẹwutu, mì gbọ mí ni wà nuhe go mí pé lẹpo todin nado yí ojlo po pinpẹn-nutọn-yinyọnẹn po do litaina Ahọlu he gbigbọ Jehovah tọn to anadena lọ.
Etẹwẹ Hiẹ Plọn sọn Wefọ Ehelẹ Mẹ?
• Isaia 11:1-5.
[Yẹdide to weda 17]
Awuvẹmẹ Jesu tọn sọawuhia to whenue e fọ́n viyọnnu Jailu tọn sọnku
[Yẹdide to weda 18]
Jesu Klisti to anadena azọ́n yẹwhehodidọ tọn daho hugan lọ to whenuho mẹ