Todin He Mìwlẹ Ko “Wá Yọ́n Jiwheyẹwhe,” Etẹwẹ Pò?
“Mìwlẹ ko wá yọ́n Jiwheyẹwhe.”—GAL. 4:9.
ETẸWẸ YIN GBLỌNDO TOWE?
Naegbọn mí dona nọ lẹnnupọndo afọdide he mí ze nado pegan na baptẹm lẹ ji sọn ojlẹ de mẹ jẹ devo mẹ?
Naegbọn Klistiani he tlẹ whèwhín lẹ gbẹ́ dona to whinwhẹ́n to gbigbọ-liho?
Naegbọn mí dona nọ lẹnnupọndo yise po klandowiwe mítọn na Jehovah po ji?
1. Naegbọn agahun-kùntọ de nọ yí todohukanji nudọnamẹ tọn de zan to whenue ewọ to agahun etọn gbeje pọ́n?
WHEDEPOPENU he agahun-kùntọ de jlo na súnhún, e nọ yí sọwhiwhe do gbeje agahun lọ pọ́n. E nọ yí todohukanji nudọnamẹ tọn de zan nado hẹn ẹn diun dọ nulẹpo to ganji to agahun lọ go. Ṣigba, eyin ewọ ma wàmọ, e sọgan nọma doayi e go dọ nude jẹdò to agahun lọ go, podọ enẹ sọgan hẹn nugbajẹmẹji sinsinyẹn wá. Mẹhe tlẹ yin agahun-kùntọ numimọnọ lẹ lọsu tin to dandannu glọ nado nọ yí todohukanji nudọnamẹ tọn enẹ zan to gigọ́ mẹ.
2. Etẹwẹ mí dona nọ gbeje pọ́n?
2 Dile e nọ yindo na agahun-kùntọ lẹ, todohukanji nudọnamẹ tọn de tin he hiẹ lọsu sọgan nọ gbeje pọ́n nado hẹn ẹn diun dọ yise towe na gbẹ́ hẹnai to nuhahun lẹ whenu. Vlavo mí ṣẹṣẹ yí baptẹm kavi ko to nugbo lọ mẹ na owhe susu lẹ, mí dona zindonukọn nado to yise mítọn gbeje pọ́n. Whlepọn sinsinyẹn de sọgan hẹn haṣinṣan mítọn hẹ Jehovah gble, enẹwutu owùnu wẹ e na yin nado nọ lẹndọ yise mítọn ko lodo sọmọ bọ nude ma sọgan ze mí jai. Biblu na mí avase dọmọ: “Mì gbọ ewọ he lẹndọ e to ote ni payi na e nikaa jai.”—1 Kọl. 10:12.
3. Etẹwẹ Klistiani Galatia tọn lẹ dona wà?
3 Klistiani he tin to Galatia lẹ dona gbeje obá he mẹ yise yetọn siso jẹ pọ́n bo do pinpẹn-nutọn-yinyọnẹn hia na mẹdekannujẹ gbigbọmẹ tọn yetọn. Gbọn avọ́sinsan Jesu tọn gblamẹ, ewọ hùn dotẹnmẹ dote na mẹhe do yise hia to ewọ mẹ lẹ nado wá yọ́n Jiwheyẹwhe to aliho jiawu de mẹ, enẹ wẹ nado lẹzun visunnu Jiwheyẹwhe tọn lẹ. (Gal. 4:9) Nado gbọṣi haṣinṣan jiawu enẹ mẹ, Galatianu lẹ dona gbẹ́ nuplọnmẹ Klistiani Juvi hẹngogonọ he tẹdo Osẹ́n Mose tọn go lẹ tọn dai. Na nugbo tọn, Kosi he ma gboadà to agun lọ mẹ lẹ ma tlẹ yọ́n nudepope gando Osẹ́n enẹ go. Vlavo yé yin Ju kavi Kosi, yemẹpo wẹ dona basi nukọnyiyi to gbigbọ-liho. Mọwiwà biọ dọ yé ni kẹalọyi dọ emi ma sọgan yin dodonọ to dodonu Osẹ́n Mose tọn ji.
AFỌDIDE TINTAN LẸ NADO YỌ́N JIWHEYẸWHE
4, 5. Ayinamẹ tẹwẹ Paulu na Galatianu lẹ, podọ naegbọn ehe do yọ́n-na-yizan na mílọsu?
4 Lẹndai de wutu wẹ ayinamẹ apọsteli Paulu tọn do yin kinkandai, enẹ wẹ nado gọalọna Klistiani nugbo lẹ ma nado gbẹkọ nugbo họakuẹ Biblu tọn lọ go to ojlẹ depope mẹ bo lẹkọyi nuhe yé ko jodo lẹ kọ̀n. Tulinamẹ he Jehovah gbọdo apọsteli lọ nado na mẹhe tin to agun Galatia tọn mẹ lẹ ma yin na ale yewlẹ kẹdẹ tọn gba, ṣigba na ale sinsẹ̀n-basitọ Etọn lẹpo tọn, na yé nido penugo bo gbọṣi tenọgli mẹ.
5 Mímẹpo wẹ dona nọ flin lehe mí yin tuntundote sọn kanlinmọgbenu gbigbọmẹ tọn mẹ bo wá lẹzun dopo to Kunnudetọ Jehovah tọn lẹ mẹ do. Nado wà ehe, lẹnnupọndo kanbiọ awe ehelẹ ji: Be a flin afọdide he a ze nado pegan na baptẹm lẹ ya? Be a flin lehe a wá yọ́n Jiwheyẹwhe do po nuhe yin numọtolanmẹ towe to whenue ewọ wá yọ́n we po ya?
6. Todohukanji nudọnamẹ tọn tẹ ji wẹ mí na dọhodo?
6 Na nugbo tọn, mímẹpo wẹ ze afọdide ṣinẹnẹ delẹ. Afọdide enẹlẹ taidi todohukanji he bẹ nudọnamẹ gbigbọmẹ tọn lẹ hẹn de, podọ yé yin sislẹ to apotin lọ “Afọdide He Nọ Planmẹ Jẹ Baptẹm po Nukọnyiyi Gbigbọmẹ Tọn po Kọ̀n Lẹ” mẹ. Afọdide ṣinẹnẹ ehelẹ finflin whẹwhẹ na gọalọna mí ma nado lẹkọyi onú aihọn tọn lẹ kọ̀n. Dile agahun-kùntọ numimọnọ de nọ kùnhún po kọdetọn dagbe po do na e nọ yí sọwhiwhe do gbeje todohukanji nudọnamẹ tọn etọn pọ́n whẹpo do súnhún, mọ wẹ mílọsu na to kọdetọn dagbe tindo zọnmii to sinsẹ̀nzọn mítọn mẹ do niyẹn eyin mí nọ gbeje todohukanji gbigbọmẹ tọn mítọn pọ́n whẹwhẹ.
MẸHE YIN YINYỌNẸN GBỌN JIWHEYẸWHE DALI LẸ NỌ TO WHINWHẸ́N TO GBIGBỌ-LIHO ZỌNMII
7. Ohia tẹwẹ mí dona hodo, podọ etẹwutu?
7 Todohukanji nudọnamẹ tọn he agahun-kùntọ lẹ nọ yizan nọ flinnu yé dọ yé dona gbeje onú delẹ pọ́n to agahun lọ go whẹpo do súnhún. Mílọsu dona nọ gbeje nukọnyiyi gbigbọmẹ tọn mítọn pọ́n to whepoponu. Paulu kanwehlan Timoti dọmọ: “Nọ tẹdo ohia ohó he pegan lẹ tọn he hiẹ sè sọn dè e lọ go gligli gọna yise po owanyi po he tin to kọndopọ mẹ hẹ Klisti Jesu.” (2 Tim. 1:13) “Ohó he pegan” enẹlẹ tin to Ohó Jiwheyẹwhe tọn mẹ. (1 Tim. 6:3) Kẹdẹdile yẹdide ohọ̀ de tọn sọgan gọalọ jẹ obá de mẹ nado yọ́n lehe ohọ̀ lọ na te to whenue yè na gbá ẹ fó do, mọ wẹ ‘ohia nugbo lọ tọn’ nọ gọalọna mí nado tindo nukunnumọjẹnumẹ he gbloada gando nuhe Jehovah biọ to mí si lẹ go bosọ hodo yé do niyẹn. Todin, mì gbọ mí ni dọhodo afọdide he plan mí jẹ baptẹm kọ̀n lẹ ji nado pọ́n eyin mí to ohia nugbo lọ tọn hodo dile e jẹ do.
8, 9. (a) Naegbọn mí dona zindonukọn nado to whinwhẹ́n to oyọnẹn po yise po mẹ? (b) Naegbọn whinwhẹ́n gbigbọmẹ tọn mítọn taidi Klistiani de do yin nujọnu? Podọ, naegbọn e do yin yiyijlẹdo whinwhẹ́n atin de tọn go?
8 Afọdide tintan he mí ze wẹ nado dovivẹnu bo tindo oyọnẹn, podọ ehe zọ́n bọ mí wá tindo yise. Ṣigba, mí dona zindonukọn nado to whinwhẹ́n to adà awe ehelẹ mẹ. (2 Tẹs. 1:3) Nado to whinwhẹ́n nọ biọ dọ mí ni to diọdo voovo lẹ basi zọnmii. Hogbe lọ “nado whẹ́n” zẹẹmẹdo nado jideji, nado gbloada. Enẹwutu, to baptẹm mítọn godo, whinwhẹ́n mítọn ma dona doalọte, kakatimọ, mí dona to whinwhẹ́n zọnmii to gbigbọ-liho.
9 Mí sọgan yí whinwhẹ́n gbigbọmẹ tọn mítọn jlẹdo lehe atin de nọ whẹ́n do go. Atin de sọgan whẹ́n bo klo taun, titengbe eyin adọ̀ etọn lẹ hẹnai kavi dlẹnkan ganji. Di apajlẹ, delẹ to kedali-tin daho Lẹbanọni tọn lẹ mẹ nọ yiaga sọ mẹtlu 37, podọ adọ̀ yetọn lẹ nọ dohuhlọn bosọ nọ hẹnai taun. Humọ, kiklo yetọn nọ yì mẹtlu 12. (Ohàn 5:15) To tintan whenu, atin lẹ nọ yawu whẹ́n, podọ dile adọ̀ yetọn to aihẹn, yé nọ jẹ kiklo ji bo nọ jẹ agayi ji. To nukọn mẹ, e ma nọ bọawu nado doayi e go dọ atin lọ gbẹ́ to whinwhẹ́n. Mọdopolọ wẹ whinwhẹ́n gbigbọmẹ tọn mítọn te. Vlavo to whenue mí jẹ Biblu plọn ji tlolo, mí jẹ diọdo susu lẹ basi ji. Enẹgodo, mí wá yí baptẹm. Mẹsusu to agun lọ mẹ wẹ nọ doayi nukọnyiyi gbigbọmẹ tọn mítọn go. Vlavo mí jẹ gbehosọnalitọ basi ji kavi mọ lẹblanulọkẹyi devo lẹ yí to agun mẹ. Dile ojlẹ to yìyì, mẹmẹsunnu lẹ sọgan nọma doayi nukọnyiyi gbigbọmẹ tọn mítọn go. Etomọṣo, mímẹpo wẹ dona zindonukọn nado to whinwhẹ́n deji to oyọnẹn po yise po mẹ nado wá lẹzun ‘sunnu he whẹ́n pete,’ enẹ wẹ Klistiani he whèwhín to gbigbọ-liho lẹ. (Efe. 4:13) Whinwhẹ́n gbigbọmẹ tọn mítọn taidi lehe okún pẹvi de nọ whẹ́n bo nọ wá lẹzun atin daho de do.
10. Naegbọn whinwhẹ́n gbigbọmẹ tọn gbẹ́ yin dandan na Klistiani he tlẹ whèwhín lẹ?
10 Enẹwutu, whinwhẹ́n mítọn ma dona doalọte. Kẹdẹdile e nọ vẹawu nado họ̀n atin he adọ̀ etọn lẹ hẹnai de do, mọdopolọ wẹ oyọnẹn he mí tindo gando Ohó Jiwheyẹwhe tọn go po yise mítọn po nọ gọalọna mí nado hẹn nugbo lọ go gligli masẹafọ do niyẹn. To whelọnu lo, nujọnu wẹ e yin dọ oyọnẹn po yise mítọn po ni to sinsinyẹn deji zọnmii. (Howh. 12:3) To agun Klistiani tọn mẹ, mẹmẹsunnu po mẹmẹyọnnu susu po wẹ ko wàmọ. Di apajlẹ, mẹmẹsunnu de he ko to sinsẹ̀n taidi mẹho agun tọn na owhe 30 linlán basi zẹẹmẹ dọ emi gbẹ́ pò to whinwhẹ́n to gbigbọ-liho. E dọmọ: “Pinpẹn-nutọn-yinyọnẹn ṣie na Biblu ko jideji to aliho mayọnjlẹ de mẹ. N’nọ saba dín dotẹnmẹ hundote yọyọ lẹ nado yí nunọwhinnusẹ́n po osẹ́n Biblu tọn lẹ po do yizan mẹ to aliho voovo lẹ mẹ. Pinpẹn-nutọn-yinyọnẹn ṣie na lizọnyizọn lọ sọ to jijideji ga.”
HẸN HAṢINṢAN TOWE HẸ JIWHEYẸWHE SINYẸN DEJI
11. Dile ojlẹ to yìyì, nawẹ mí sọgan wá yọ́n Jehovah dogọ gbọn?
11 Whinwhẹ́n mítọn sọ nọ biọ dọ mí ni dọnsẹpọ Jehovah taidi Họntọn podọ Otọ́ mítọn. Ewọ jlo dọ mí ni tindo numọtolanmẹ lọ dọ emi kẹalọyi mí, podọ mí ni yọnẹn dọ emi yiwanna mí bosọ nọ basi hihọ́na mí. Numọtolanmẹ mọnkọtọn wẹ ovi de nọ tindo to whenue e tin to awà mẹjitọ owanyinọ etọn tọn mẹ, podọ numọtolanmẹ enẹ wẹ mí sọ nọ tindo to whenue mí topọ hẹ họntọn vivẹ́ de. Dile hiẹ lọsu sọgan ko yọnẹn do, haṣinṣan mọnkọtọn tintindo hẹ Jehovah ma nọ wá to zánto dopo mẹ. E nọ biọ whenu susu to mí si nado wá yọ́n ewọ bo yiwanna ẹn. Enẹwutu, dile a to vivẹnudo nado yọ́n Jehovah dogọ, magbe nado nọ de whenu dovo na Ohó etọn hihia egbesọegbesọ. Humọ, nọ hia zinjẹgbonu Atọ̀họ̀-Nuhihọ́ lọ Tọn po Réveillez-vous! po tọn dopodopo gọna owe sinai do Biblu ji devo lẹ.
12. Etẹwẹ mí dona wà nado yin yinyọnẹn gbọn Jehovah dali?
12 Họntọn Jiwheyẹwhe tọn lẹ nọ whẹ́n to gbigbọ-liho gbọn odẹ̀ ahundopo tọn lẹ hihò po ogbẹ́ dagbe lẹ dido po dali. (Hia Malaki 3:16.) “Otó [Jehovah] tọn lẹ hùn hlan ovẹ̀ yetọn.” (1 Pita 3:12) Taidi mẹjitọ owanyinọ de, Jehovah nọ dotoai to whenue mí dawhá ylọ ẹ to odẹ̀ mẹ nado mọ alọgọ etọn yí. Enẹwutu, mí dona nọ “sinyẹnlin to odẹ̀ mẹ.” (Lom. 12:12) Jiwheyẹwhe kẹdẹ wẹ sọgan gọalọna mí nado gbọṣi whinwhẹ́n gbigbọmẹ tọn mẹ. Kọgbidinamẹnu aihọn ehe tọn lẹ sinyẹn sọmọ bọ e na vẹawu nado nọavùnte sọta yé po huhlọn mítọn titi po. Eyin mí ma nọ sinyẹnlin to odẹ̀ mẹ, huhlọn he nọ wá do gànmẹ he Jiwheyẹwhe ko wleawufo bosọ tindo nugopipe nado na mí lọ na gbọ̀ mí go. Be hiẹ nọ hodẹ̀ hlan Jehovah taidi dọ a to hodọ hẹ họntọn dejidego de ya, kavi a mọdọ emi dona hẹn odẹ̀ emitọn lẹ pọnte dogọ?—Jel. 16:19.
13. Naegbọn gbẹdido hẹ Klistiani hatọ lẹ do yin nujọnu na whinwhẹ́n gbigbọmẹ tọn?
13 Homẹ Jehovah tọn nọ hùn do mẹhe “yí tudido yetọn do ewọ mẹ” lẹpo go; enẹwutu, etlẹ yin to whenue mí ko wá yọ́n Jiwheyẹwhe godo, mí dona gbẹ́ zindonukọn nado to gbẹdo hẹ mẹhe yọ́n ewọ lẹ. (Nah. 1:7) To aihọn he gọ́ na ninọmẹ mẹhẹngbọjọ tọn ehe mẹ, nuyọnẹnnu wẹ e na yin nado nọ tin topọ hẹ mẹmẹsunnu po mẹmẹyọnnu he nọ na mí tuli lẹ po. Ale tẹlẹ wẹ mọwiwà bẹhẹn? To agun lọ mẹ, hiẹ na mọ gbẹtọ voovo lẹ he na whàn we “hlan owanyi po azọ́n dagbe lẹ po kọ̀n.” (Heb. 10:24, 25) Ayinamẹ Paulu tọn enẹ hihodo na biọ dọ mí ni nọ kọnawudopọ hẹ hagbẹ agun lọ tọn lẹ. Enẹwutu, nọ hẹn ẹn diun dọ a nọ yì opli lẹ to gbesisọ mẹ bosọ nọ tindo mahẹ to yé mẹ gbọn gblọndo nina dali.
14. Nawẹ lẹnvọjọ po diọdo lẹ bibasi po yin nuyiwa he ma nọ doalọte de gbọn?
14 Whẹpo mí lẹzun Klistiani, mí lẹnvọjọ bo diọ sọn walọ ylankan mítọn lẹ mẹ. Ṣigba, nuyiwa he ma nọ doalọte de wẹ lẹnvọjọ yin. Na mapenọ wẹ mí yin bosọ tindo awugbopo lẹ wutu, e nọ bọawu taun dọ mí ni waylando. Kẹdẹdile odàn de nọ tin to aṣeji nado hú-adú mẹ to whedepopenu do, mọ wẹ ylando sọgan yinuwado mí ji to whedepopenu do niyẹn. (Lom. 3:9, 10; 6:12-14) Enẹwutu, mì gbọ mí ni gbọṣi nukle bo ma nọ yí nukunpẹvi do pọ́n nuṣiwa mítọn lẹ blo. Ayajẹnu wẹ e yin dọ Jehovah nọ fahomẹ hẹ mí dile mí to vivẹnudo vẹkuvẹku nado duto madogán mítọn lẹ ji podọ nado basi diọdo he jẹ lẹ. (Flp. 2:12; 2 Pita 3:9) Nuhe na gọalọna mí wẹ nado nọ yí whenu po huhlọn mítọn po zan to sinsẹ̀nzọn Jehovah tọn mẹ, kakati nido yin na yanwle ṣejannabi tọn lẹ. Mẹmẹyọnnu de wlan dọmọ: “N’yin pinplọn whẹ́n to nugbo lọ mẹ, ṣogan pọndohlan he n’tindo gando Jehovah go gbọnvo taun na mẹsusu tọn. N’nọ tindo numọtolanmẹ dọ yè dona dibuna Ẹn taun, podọ n’ma sọgan penugo nado hẹn homẹ etọn hùn gbede.” Na mẹmẹyọnnu lọ ma tindo haṣinṣan pẹkipẹki de hẹ Jehovah wutu, e wá jai jẹ nuṣiwa delẹ mẹ. E dọmọ: “E ma yindọ n’ma yiwanna Jehovah wẹ zọ́n bọ n’do ṣinuwa gba, ṣigba na n’ma yọ́n ewọ ganji wẹ zọ́n. To odẹ̀ ahundopo tọn susu lẹ hihò godo, n’jẹ diọdo lẹ basi ji.” E yidogọ dọmọ: “N’mọdọ Jehovah yinuwa hẹ mi taidi otọ́ de, bo gọalọna mi nado duto aliglọnnamẹnu lẹ dopodopo ji, bosọ yí homẹfa do gọalọna mi nado basi diọdo lẹ.”
15. Etẹlẹ go wẹ Jesu po Otọ́ etọn po nọ doayi?
15 “Mì to hodọna gbẹtọ lẹ zọnmii” gando wẹndagbe lọ go. Pita po apọsteli devo lẹ po wẹ angẹli Jiwheyẹwhe tọn de yí hogbe ehelẹ zan na to whenue yé yin didetọn sọn gànpamẹ to azọ́njiawu-liho godo. (Owalọ 5:19-21) Adà devo he mí sọ dona nọ gbeje pọ́n to todohukanji nudọnamẹ tọn mítọn mẹ wẹ mahẹ gbesisọ tọn tintindo to lizọnyizọn kunnudegbe tọn mẹ. Jesu po Otọ́ etọn po nọ doayi yise po lizọnyizọn mítọn po go. (Osọ. 2:19) Mẹho agun tọn he go mí donù wayi lọ dọmọ: “Lizọnyizọn kunnudegbe tọn dona nọ duahunmẹna mí.”
16. Naegbọn e do yin nujọnu nado nọ lẹnnupọndo klandowiwe mítọn na Jehovah ji?
16 Nọ lẹnnupọndo klandowiwe towe ji. Onú họakuẹ hugan he mí tindo to gbẹ̀mẹ wẹ haṣinṣan mẹdetiti tọn mítọn hẹ Jehovah. Ewọ yọ́n mẹhe yin etọn lẹ. (Hia Isaia 44:5.) Enẹwutu, nọ lẹnnupọndo haṣinṣan towe hẹ Jehovah ji, bosọ nọ hodẹ̀ na ewọ nido gọalọna we nado hẹn ẹn sinyẹn deji. Sọ nọ flin gbeegbe a yí baptẹm. Ehe na gọalọna we nado flindọ baptẹm towe wẹ yin nudide titengbe hugan he a basi to gbẹzan towe mẹ.
GBỌṢI ADÀ JEHOVAH TỌN MẸ GBỌN AKỌNDONANU DALI
17. Nado gbọṣi adà Jehovah tọn mẹ, naegbọn akọndonanu do yin nujọnu?
17 To wekanhlanmẹ Paulu tọn hlan Galatianu lẹ mẹ, ewọ zinnudo nujọnu-yinyin akọndonanu tọn ji. (Gal. 6:9) Onú titengbe de wẹ jẹhẹnu ehe yin na Klistiani egbezangbe tọn lẹ lọsu ga. Hiẹ na pehẹ whlepọn lẹ, ṣigba Jehovah na gọalọna we. Nọ to gbigbọ wiwe biọ to odẹ̀ mẹ zọnmii. Hiẹ na mọ kọgbọ dile ewọ na to awubla towe diọ zun ayajẹ bo to awufiẹsa towe diọ zun jijọho. (Mat. 7:7-11) Lẹnnupọndo ehe ji: Eyin Jehovah nọ penukundo ohẹ̀ lẹ go, nẹmunẹmu wẹ ewọ ma na penukundo hiẹ he yiwanna ẹn bo ko ze dewe jo na ẹn go! (Mat. 10:29-31) Mahopọnna kọgbidinamẹnu depope he a to pipehẹ, ma joagọ kavi jogbe gbede blo. Mí tindo dona susu lẹ na mí yin yinyọnẹn gbọn Jehovah dali.
18. Todin he hiẹ ko “wá yọ́n Jiwheyẹwhe,” etẹwẹ a dona wà?
18 Vlavo e ma dẹn bọ hiẹ yí baptẹm kavi ko wàmọ sọn owhe susu lẹ die, etẹwẹ pò na we todin? Zindonukọn nado to Jehovah yọnẹn bo to whinwhẹ́n zọnmii to gbigbọ-liho. Họ́ dewe sọta linlẹn lọ dọ emi ko yọ́n Jiwheyẹwhe sọmọ bọ emi masọ tindo nuhudo nado hẹn haṣinṣan emitọn hẹ ẹ sinyẹn deji ba. Humọ, nọ gbadopọnna nuhe todohukanji gbigbọmẹ tọn he ji mí dọhodo to hosọ ehe mẹ lọ bẹhẹn lẹ sọn ojlẹ de mẹ jẹ devo mẹ bo gbọnmọ dali dọnsẹpọ Jehovah, yèdọ Otọ́ owanyinọ, Họntọn po Jiwheyẹwhe mítọn po.—Hia 2 Kọlintinu lẹ 13:5, 6.
[Apotin to weda 17]
AFỌDIDE HE NỌ PLANMẸ JẸ BAPTẸM PO NUKỌNYIYI GBIGBỌMẸ TỌN PO KỌ̀N LẸ
1 Mí jẹ ‘vivẹnudo ji nado tindo oyọnẹn’ gando Jehovah po Visunnu etọn Jesu Klisti po go.—Joh. 17:3
2 Yise mítọn jideji dile oyọnẹn mítọn to susudeji.—Joh. 3:16
3 Mí nọ dọho hẹ Jehovah to odẹ̀ mẹ to gbesisọ mẹ.—Owalọ 2:21
4 Mí jẹ gbẹdo hẹ yisenọ hatọ lẹ ji to gbesisọ mẹ.—Heb. 10:24, 25
5 Mí lẹnvọjọ sọn ylando mítọn lẹ mẹ.—Owalọ 17:30
6 Mí diọ bo gbẹ́ walọ ylankan mítọn lẹ dai.—Owalọ 3:19
7 Yise mítọn whàn mí nado nọ dọhona mẹdevo lẹ to gbangba.—2 Kọl. 4:13
8 Mí klan míde do wiwe na Jehovah nado sọgan hodo afọdòmẹ Jesu tọn lẹ pẹkipẹki.—1 Pita 4:2
9 Mí basi dohia klandowiwe mítọn tọn gbọn baptẹm osin tọn dali.—1 Pita 3:21